أنا حواجبي اوردي لونهم أسود ولونهم متوسط مب فاحم ولا باهت.. وتقريبا مافيهم فراغات فماتعب بالرسم
عندي طرق مختلفة للرسم على حسب الوقت اللي بطلع
طبعا أول خطوة لازم أمشط حواجبي
مثلا لو الصبح للدوام
أستخدم قلم حواجب أو شدو لحواجبي كامل
كنت أستخدم قلم مايبلين اللي يفتر
الدرجة دارك براون
خلصت واحد وانصدمت انه قطعوه ماحصلته لا عندنا ولا اونلاين!
قهروني لأنه كان وايد عجيب.. يملي الفراغات ويرسم الحاجب كله بدون مايكون غامج واوفر
وايد يصلح مع ميكب خفيف
البديل له
آخذ فرشة مشطوفة "استخدم ايكو تولز"
وشدو ماك كورك
اخذ من الشدو وارسم به حواجبي
ابتدي من النص للكسرة
وبعدين بالباقي ارسم البداية
ما ابتدي من البداية علشان مايتركز اللون من جدام يطلع مب حلووو
***
اذا كنت بطلع في الليل او عندي مناسبة
شوي طريقتي تتغير لأن الميكب يكون غالباً أقوى
آخذ تاتو حواجب
ماخذته من محل عندنا أظن التاتو إيراني
اهو ياي في غرشة زجاجية صغيرة.. والتاتو داخل
كريمي ثقيييل
ومعاه فرشاته.. شعراتها مستطيلة صغيرة وضعيفة.. وايد حلووة لرسم الحواجب وللشدو تحت العين
هذي اهو الغرشة الصغيرة يسار.. وبالصورة قلم مايبلين اللي قطعوه 
آخذ من التاتو نتفــة واستخدمه للحاجبين "ماحب اكثر منه علشان مايطلع غامج واوفر"
وابتدي الرسم من ثلث حاجبي تقريبا
وعند الكسرة الجهة الفوقية شوي أرفعها بالتاتو
اول شي احدد بطرف الفرشاة الرسمة من برة
وبعدين امليها من داخل
والفرشاة نفسها أنظفها.. او ساعات استخدم غيرها
واستعمل شدو حواجب بدي شوب
اللون البني الغامج وأرسم بداية حواجبي
****
وطريقتي لتنظيف ماحول الحواجب...
أسويها أغلب الاوقات بس ساعات انسى واطوفها ^^
قبل ما ابتدي الرسم
امشط حواجبي بمشط الحواجب
وبعدين بفرشاة الكونسيلر اخذ من كونسيلري الكريمي - أستعمل NYX concealer in a gar
واحدد حول حواجبي فوق وتحت والبداية والنهاية بعد
وعقب الكونسيلر أبتدي الرسم بوحدة من الطريقتين اللي قلتهم فوق
عقب ماخلص الرسم أرد أمشط حواجبي بمشط الحواجب "علشان اشيل الزائد"
وبعدين ادمج واوزع الكونسيلر اللي حطيته قبل
السبب اني أوزع الكونسيلر قبل الحواجب
لأنه ساعات لما استعمل التاتو خاصة.. ارسم عالجلد بالغلط
فلما يكون الكونسيلر موجود بسهولة يندمج عكس لما يصير التاتو على الجلد مباشرة يبقع شوي
والسبب الثاني اني جربت اوزع الكونسيلر عقب ماخلص حواجبي
بس لاحظت انه اطراف الحواجب تصير باهتة شوي لان الكونسيلر يصيدها
واخر خطوة هذي اسويها لو بغيت احدد عظمة حاجبي
من تحت الكسرة لنهاية الحاجب
ارسم خط بكحل أبيض او صدفي واوزعها.. وبعدين احط فيها الاضاءة عادي ولو كان الميكب خفيف اكتفي بها وتطلع حلووة
ووبس
الطريقة طويلة بالكتابة بس بالتطبيق ماتاخذ غير دقايق
وناوية أجرب مايبيلين الكحل الكريمي البني وايد يمدحونه للحواجب.. إذا عجبني بستغني عن التاتو الايراني لأني صرت أحسه وايد ثقيل
وبعد بخاطري أجرب ماسكرا بوبا للحواجب وماكسرا ماك.. ماقط استعملت ماسكرا لحواجبي أحسها بتكون طريقة عملية وسريعة ^_^
** الصور كلها من النت ماعدا صورة التاتو الايراني من تصويري من واحد من مواضيعي السابقة
