التجمع الثالث لطالبات { كـلـيـة الـحـقـوق ] جامعة الكويت . حياكم الله

[she noon]

حبيبتي تلقين رد على سؤالج بالصفحة اللي قبلها وحدة سألت عن الدكتور مشاري العيفان والبنات ردو عليها

توني انتبه.. مششششكورة حبيبتي

 

[قدساوية 99]

العفو موفقه

 

[~.ąvȍƈaȚ.~]

حبيبتي انتي
عاد بترول اللي المفروض ماتحاتينها انشالله خير لاتفكرين

وصاجه هالسنه بايخه حتى انا ماحبيتها
استغفر الله احسها أسوأ سنه مرت علي بالحقوق :/
بس الحمدلله على كل حال

وبخصوص اخر سؤال لووول
سكتي والله اخر يوم اقول حق رفيجتي لما طلعت من الباركنق بالكليه
اقولها واي احس طلعت وخليت قلبي هناك !!
اول مره احس جذي :/
معني كنت احن اني كارهه الكليه وبفتك منها وماراح اوله عليها ولا على دكاترتها
بس بجيت اخر يوم !!:eh_s(2):
قبل لا امشي كنت واقفه جبال الكليه ,, متنحه
بس خلاص ؟ هذا اخر شي !
اللهم لك الحمد
انشالله الله يسهل عليكم وتستانسون بالتخرج وتونسوني معاكم :***

شلون ما احاتي بترول و كنت مظلومه فيها و مبدعه بالامتحان بعد :\
خليني ساكته لا اقول حجي ما ينقال هني :rgewrg:المهم بدعت بالمادة الاختيارية كالعادة مع اني دارستلها عدل
و انا كللللللللش ما حبيت سنة ثانية من كل النواحي !

و لو منج ما أوله عليها كلية الفقر :eh_s(4):
و ادعيلناا الله يسهل علينا و يحنن قلب الدكاترة بس

و مبرووك التخرج مره ثاانية

 

[~.ąvȍƈaȚ.~]

بنات سنة أولى هالرد لكم

بتكلم عن سنة ثانية

1) التزامات
خذيتها عند د.هيثم الأثري دكتور ممتاز و يشرح عدل بس بعض المرات يزيد عن وقت المحاضرة فالتركيز ينعدم:\ ياخذ الغياب اغلبية الأيام و كل غياب بنص درجة، امتحاناته متوسطة الصعوبة بس ايده ثقيله بالتصليح شوي
و المدتيرم واحد بس من 30 و التعويضي من 30 درجة ياخذ الدرجة الثانية حتى لو أقل
و يعتذر كل جم محاضره نرتاح شوي
اخر السنة ما حاسب اللي عندهم 4 غيابات و اقل (و عطاهم بونص درجتين في حال ما راح ما يبون يدخلون التعويضي و أول مره يعطي بونص )


2) احوال
عند د.ناصر الشمري
دكتور وايد وايد وااايد طيب و متساهل و عطانا تعويضي جم مره و و وايد مواعيد ما اذكر من كثرهم حق الامتحانات "التاريخ اللي يناسبج تمتحنين فيه" و 6 غيابات ما يحاسب عليهم و عالعموم غايبه 10 مرات و ما نقصني
بس شرحه ممل و صوته واطي المهم كان حضوري و غيابي واحد بس كنت أداوم عشان درجة الحضور باختصار المحاضره ما تشجع عالحضور


3) اداري1
عند د.عبدالله الرميضي
ما أزيد على كلامهم نفس الشي شرحه زين و ممتاز بس ما يساعد و ايده ثقيله بالتصليح و ما يزيد كللش


4) دولي عام
انا كنت حابه الماده طول السنة و كرهتها بالفاينل :\
المهم انها ماده حلوه و خذيتها عند د.ثقل العجمي هالدكتور الكلام ما يوفيه حقه شرحه فوق الممتاز و التنويت معاه أحسن شي امتحاناته للأمانه للأمانه صعبه القضايا يعني انصدمنا
حتى الامتحان الثاني لووول و بعض المرات يعطي كويزات مفاجأة من شرح المحاضرة اللي طافت
بس أخر السنة الدرجات كانت كلها حلوه و كلنا زادنا


5) ماليه عامه
خذيتها عند د.فاطمة المطر ( استلمت شعب د.فيصل الفهد سابقا)
باختصار سجلووا عندها ! تينن تينن و عجيبة و تحسونها اختكم مو دكتوركم و متساهله و تعطي درجات و تلاخيص و تسهل المادة كثر ما تقدرر
يعني لا تسجلون عند أحد غيرهاا انصحكم فيها


6) جزاء عام !
جزاء مادة سهله للأسف
خذيتها عند د.فاضل نصر الله للأسف بعد
و بدعت فيها للأسف الفاينل كان صعب و درجاتنا ابداع للأسف
المهم دكتور فاضل يشرح من قلبه بس شرحه ممل و ينوم و ما يشجع على الحضور و المشاركة أبد حضوري و عدمه واحد كنت احضر عشان الغياب دايما يحاسب عليه
المهم امتحاناته كلها مقالية بس كتبي الشي اللي اهوا يبيه مو اللي بالكتاب و اللي السؤال طالبه !!
آخر السنة عطانا فرصه نشرح جذي بو دقيقتين عشان اللي يبي يرفع درجته

عالعموم ما أنصح فيه لأن كرهني بالجزاء !!


7)بترول
مادة سخيفة و مليقة فيها اشياء شبيهه بمبادئ و مالية :\
خذيتها عند الحمود عالعموم الدكتور ظالم ماني مجامله العموم يمدح فيه بس اللي ينقرص منه غير
ما حضر الا يمكن 8 محاضرات طوووول السنة
و الشرح ما تدرين شقاعد يشرح
الفاينل كان سهل للأمانه
(من رايي عند د.عبدالمنعم احسن)

عالعموم ما أنصح فيها و لا بدكتورها

8)قاعة بحث
عند د.عبدالرسول بهبهاني
مسكتنا استاذة اسماء الغانم أول كورس حق اللاب و كانت وايد زينه و ثاني كورس كان يداوم يشرحلنا التزامات شكوو :\
المهم ان زين بس في ناس انرفعوا على حساب غيرهم
يعني زوين أنصح فيه


بالنهاية شدووا حيلكم و هالله هالله بالدراسة و الحضور انا هالسنة للأسف بدعت بالغياب و نزل مستواي الدراسي بسبة هالشغله
و مووفقين يارب :*


ناطرين تقرير سنة ثالثة

 

[قدساوية_افتخر]

تقرير سنه اولى

(( اصول ))
د.مرضي العنزي
دكتور يشد عالحضور والغساب امتحانه من نووته
ياخذ حضور وغياب وبس ماعليهم درجات
يعطي بونص عللغياب
الاربعين مقسمهم علا مدتيرمين
الاول صعب حيل
والثاني سهل حيل علشان نعوض
ودبل الدرجه الثانيه وعطا بونص للمحتاجين حيل
راقي عجيب جد نعم الدكتووور

(( دستوري))
عند د.محمد الفيلي
وايد حبطوني منه
كنت احضر وانوت عدل معاه نفس ايي الميدتيرم
اييبلج اشياء مو بالكتاب بحطها اصلن مايطالب بكتاب
امتحاناته متوسطه
الاغلب ماياخذ غباب الا في بعض النرلت ووتنصدمين
لانه الكورس الثاني مايدوام
واهوا يقولج ما احفظ اسامي ويطلع حافظ بنت بنت
ويعيطج اللي تستاهلينه
حبيته الصراحه

(( مبادئ ))
د.عبدالمنعم
محترم يشرح اللي عليه شديد بالحضور يعطي اكتحان بونص
امتحانانته سهله

(( شريعه )
د.راشد الهاجري
حبووب يسوولف ينوم
بس تضمنين ال a
باله وسيع عالطالبات حيل
ياخذ حضور وغياب
(( علم اجرام ))

د.عبدالعزيز العنزي

حبووب ونكته والكلاس كله ضحك انصح فيه يعطي بوونص
حيل متحرم ويهون عن الكلاسات كلها


(( قاعه بحث ))
هم دكتور عزيز
المعيده مستلمتنا طول الوقت تشرح مذكره
تعتذر وايد تسوي امتحان عليه درجتج وماكو تقرير

 

[SKY--NA]

UP

UP

UP

نداء سنه ثالثه يرجى طرح تجربتكم السابقه :eh_s(7):

 

[she noon]

بناات.. شرايكم بـ دكتور محمد الفيلي مادة " نظآم دستوري " ؟؟

ابي اعرف نظامه وشلونه أخذه ولأ لأ؟

 

[كويتيه..]

بناات.. شرايكم بـ دكتور محمد الفيلي مادة " نظآم دستوري " ؟؟

ابي اعرف نظامه وشلونه أخذه ولأ لأ؟

ماكنت طالبه عنده بس افضل لج اخذي عند د.بدر او د.فواز او د.عبدالله الرميضي

 

[قدساوية 99]

بنات بليز نبي احسن دكاترة حق مواد سنة ثالثه

 

[ZynaH-Q8]

السلام عليكم بنات

هالمنتدى بالنسبه لي قديم حيييييييييييييل ههههههههههه
بس بما اني بروح لرابعه احم احم صرت خريجه يعني

فاقلت امر اسلم لان سنه ثالثه بالعربي هدت حيلي وخلتني ابتعد عن الناس

بشرح لكم كل ماده ومنو الدكاتره الزينين بالتغريده القادمه>>> حده مأثر فيني تويتر لووول

 

[ZynaH-Q8]

راح ارتب لكم كل ماده حسب صعوبتها يعني من الاصعب الى الاسهل ... ومنو الدكتور الزين اللي المفروض تاخذين عنده

**مرافعات**
بكل معنى الكلمه مهمه جدا جدا جدا
يعني اذا مادرستي لها اول باول انسي انج تنجحين فيها ،،دفعتنا كانو الدكاتره متساهلين معانا عل اللي صار مع دكتور عبيد ولان الماده مانشرحت لنا فتره فاضطرو يحذفون بس على كثر الحذف اللي صار ،، اسبوعين بالموت خلصنا الكميه للفاينل

&الدكاتره &
عايشه الذوادي >>حبوبه حيل وامتحانتها سهله
عبدالله الرمح >>طيوب وتساهل معانا
عبدالستار الملا>> اتوقع الكل سمع السالفه اللي صارت مع الطلبة بسبته ،،توزيع درجاته مادري على اي اساس يوزع
دكتور عزمي>>فقيه كلية الحقوق اللي تبي تفهم الماده تحظر عنده بس درجاته والعلم عند الله يقولون مو شي ،،بس للامانه احترمه وايد واحب اتناقش معاه عقليته حلوه


**جزاء خاص**
وما ادراكم ماجزاء لعوزونا الدكاتره وصدمونا صدمة العالمين بالفاينل ...لمن تطلعين ناسختلهم اللي بالكتاب وحاله وفاهمه تاخذين بالسبعينات صراحه مادري ى اي اساس تم التقييم ،، ولكن الله يسامحهم

&الدكاتره&

فايز الظفيري>>متشدد يخوفج بالمحاظره امتحاناته يقولون صعبه بس الكل اخذ عنده اعمال سنه زينه ودرجاته لا يعلى عليها

فيصل الكندري>> كنت ماخذه عنده زين ومحاظرته حلوه بس امتحاناته مادري شقول القضايا سهله بس المقالي جدا يتفلسف اهم شي تكتبين عنده قد ماتقدرين وبالاعمال هم راعانا ودرجاته حلوه

منصور العتيبي >> مادري عنه وماعرف اي بنت من اللي مسجلين عنه فماقدر افيدكم

**تجاري**

الماده حلوه وخفيفه ورائعه تعبنا بالمدتيرمات ،، بس الفاينل كان رائع ولله الحمد

&الدكاتره&
عبدالله الحيان>> يخليج تداومين غصب لان الغياب عنده عشوائي بس انصدمنا ان الكل اخذ الحضور كامل امتحانه الاول سهل حيل حاولو تجيبون درجه فيه لان الثاني يعطي كمية كبيره ومايكون لج خلق تدرسين فركزو ع الاول
درجاته حلوه انصح فيه ويعطي بونص

عبدالكريم الكندري>> مادري اذا بينزل لكم هالسنه او لا بس دكتور رائع واختباراته حلوه

احمد الملحم>> هم مادري عنه

عموما الماده الكل اخذ فيها درجه لاتحاتونها بس ركزو عليها


يتبـــــــــــــع ...،،

 

[ZynaH-Q8]

**عقود**
بالبدايه تخدعج عبالج نفس التزامات بس بعدين تنصدمين من الصعوبه ،،قد ماتقدرين حاولي تدرسينها اول باول خصوصا كتاب عقد البيع ركزو عليه لان الايجار اسهل منه بوايد ،،

&الدكاتره&
بدر الملا >> بمعنى الكلمه هالدكتور راقي بطرحه باسلوبه بكل شي فيه ،، شرح ماقولج ميه بالاميه بس اختباراته سهله حيل ويراعي ،،مهم جدا عنده الحضور والغياب
طارق>> والله طالباته يمدحونه وامتحاناته سهل بس مادري اذا يركز ع الحضور او لا بس شرحه يقولون قوي
ممدوح خيري>> مادري عنه صراحه
انور الفزيع>> صدم الكل بدرجات اعمال السنه الكل بالعشرينات

**اداري2**
هالماده على ان الكتاب شويه ،، بس الامتحانات صعبه ،، وقضية الفاينل لي هاليوم حارتني

&الدكاتره&
بدر بجاد>> رائع وشرحه حلو بس معطي الماده اكبر من حجمها يعني كافي علينا مرافعات وجزاء،، قضاياه صعبه متشدد بالحضور والغياب
لكن للاماانه الاغلبيه اخذو عنده 40
عبدالمنعم>>اتوقع اغلبيتكم مجربينه بسنه اولى وثانيه ،، طيب يهتم بالغياب واتحاناته مقالي وواضح
الفارسي>> امتحانه اذكر كان الكتاب بالكامل موحيل يمدحونه ،، الشطار عنده بس الللي خذو درجات

**تشريــعات عمل **
ياربي يا هالماده على سهولتها انصدم بدرجاتي بالمديرمات

&الدكاتره&
أنس التوره>>> رائع رائع رائع شرح واسلوب وسهوله اختبارات ومسوي الماده نوتات مسهلها يعني،،و ياخذ حضور
عادل بهبهاني>> هم بعد يمدحونه سهوله اختباراته بس هم بعد اهم شي الحضور
مسلط المطيري >> انا كنت ماخذه عنده والله طيب وحبوب شرح عادي بس الامتحانات دقيقه يعني لازم الحل بالظبط
وللامانه ساعدنا حيل يعني تخيلو عطانا بونص 7 درجات

**ميراث**

لاتعليييييييييييييييييييييييييييييق هالماده اندرست بيومين بس تخيلو دكتورنا (سيد خان (افغاني) المحاظره باختصار ماتدرين شيقول كان يدرس دفعة الطالبات كلها ،، الشباب يدرسهم دكتور (عمر الشهابي)

الله يكره بالخير دكتور عمر قبل الفاينل بيومين سوالنا مراجعه قالنا شنو المهم وحذفولنا شغلات شكثر ،،
بس الاغلبيه اخذ فيها درجه الحمدالله

**اختياري3**
(ملكية فكريه)>>محمد سامي حبوب وطيب وماعتقد امدح اكثر من جذي لان الكل يعرفه والفينل شويه حيل
(حقوق وحريات)>> اعتقد دفعتنا اخر دفعه خذت هالماده لان بيلغونها خلاكان يعيطيها دكترو بدر بجاد داومو طلبته بس الكورس الاول وبعدها خلاص وفاينلهم حيل حيل شويه بس على كلام الدكتور خلاص ماراح يبطلنها بعد ،، بس انتو شوفو يمكن تتبطل معاكم

(منظمات)>>دكتور شاهين الشاهين ياربي هالانسان ورده كلية الحقوق حبيب وطيب حيييييل بس ماده كشكل عام يقولون يبيلها حفظ

(جنائي دولي)>> اللي اعرف ان يعطيها دكتور بوزبر ،، وبس

 

[ZynaH-Q8]

بالاخير ،،

صح مدحتلكم الدكاتره ،، الشاطره بتاخذ عندهم اعمال زينه
بس لاتتهاونون بالمواد ،، سنه ثالثه بالنسبه لي اللي اذكره فيها امتحان امتحان امتحان وبين كل امتحان وامتحان هم امتحان

وال ان الفصل الثاني انا كل اسبوع عندي امتحان ،، خلونا ندرس لمن وصلنا الفاينل ماعاد فينا طاقه خصوصا الطاقه كلها راحت على مرافعات تعبنا منه حيل

رتبو اموركم تجهزو ،، بس صدقوني اللي بتشد حيلها بيرتفع المعدل ان شاء الله

وموفقين يارب ،،،

وبنات اللي تخرجو ،، سولفو لنا عن رابعه

 

[ZynaH-Q8]

واسمحولي ع البدليات لان اكتب بسرعه

 

[كويتيه..]

مساء الخير
بنات شرايكم بـ

د.منصور. العتيبي جزاء عام وشنو طريقته ?
د.موسى رزيق الالتزامات والاثبات وهم شنو طريقته او اسلوبه؟

ومنو افضل د موسى والا د هيثم ؟

منو افضل د منصور والا د مبارك النويبت ؟

 

[RaWaNzA]

سبحـآن الله و بحمـدهـ , سبحـآن الله العظيــم

آب

آب

آب

 

[فراشة الجمال]

السلام عليكم
أخباركم؟؟

بنات بغيت منكم خدمة
ممكن رقم سكرتيرة الدكتور علي النامي
أبي الرقم ضرووووري ضرووري عفيه

 

[L a w y e R]

بنات ,,,, انا سجلت مادةه مبادئ قانون جزائي عند مشاري العيفان

شلونه بالدرجات والa مضمونه ولا صعبه حيييل ؟؟


لان عندي انذار معدل ولازم اخذ a


بليييز ردووو


وفي مادة حقوق انسان عند صباح اليوسف واصول التزام عند انس التوره ؟؟؟؟؟؟؟؟؟؟


وانا بالاجتماعيه ولازم ارفع معدلي ولا بنطرد :eh_s(2)::eh_s(2)::eh_s(2)::eh_s(2)::eh_s(2)::eh_s(2)::eh_s(2)::eh_s(2)::eh_s(2):

صباح اليوسف حيل طيب ويساعد ، درس رفيجاتي ويحبونه
انس التوره ممتاز معنه يديد ماشالله عليه
مشاري العيفان امتحاناته صعبه شوي بس درجاته حلوه

ارشح انس

 

[L a w y e R]

مساء الخير
بنات شرايكم بـ

د.منصور. العتيبي جزاء عام وشنو طريقته ?
د.موسى رزيق الالتزامات والاثبات وهم شنو طريقته او اسلوبه؟

ومنو افضل د موسى والا د هيثم ؟

منو افضل د منصور والا د مبارك النويبت ؟

ما انصح لا بمنصور ولا بالنويبت -_-
وموسى رزيق ممتاز
وهيثم بعد

 

[L a w y e R]

السلام عليكم
أخباركم؟؟

بنات بغيت منكم خدمة
ممكن رقم سكرتيرة الدكتور علي النامي
أبي الرقم ضرووووري ضرووري عفيه

ماعرفه
بس اذا اهو ستل يشتغل بالعماده ، كلمي العماده الصبح حزة الدوام