مشرفة القسم // جارة القمر
السلام عليكم ورحمة الله وبركاته
اول شي بعترف << ياكثر مواضيع السمبوسة الي كتبتها لكم
بس سمبوسة اليوم غيررر
بخبز الصاج مو بعجينة السمبوسة العادية ^^
تقدرين تتحكمين بحجم سمبوستج
كبيرة او صغيرة
هالاختراع لان بنتي الله يحفظها كانت تتحلم بسمبرسة كبيييررررااا على قولتها
مسكينة ملت من كثر ماذاقت الميني و الاحجام الصغيرة ^^
الطريقة
تاخذين خبزة الصاج تصفطينها نص دائرة
و تقصينها بمقص الطبخ حق اربع او ثلاث اقسام
راح يصير عندج مستطيلات مثل عجينة السمبوسة
احشيهاااا بالحشوة الي تحبينها
لفيها
سكريها بمسحة من البيض بالفرشة او خلطة العيين مثل السمبوسة
انا حشيتها بشاورما اللحم والبطاط << طلبته جاهزز
ضفت له الطحينة وشوية دبس رمان
عقب هالخطوة سمبوستنا جاهزة للتثليج
واذا حبيتي تطبخينها
كل الي علييج انج تاخذين البايركس و تصفين فيه السمبوسة
وتمسحين على كل وحدة بزيت الزيتون و اذا تحبين رشي فوقها جبن بارميزان و بهار البيتزا
وبس دخليها الفرن تتحمش
واستمتعي بالذ جامبو سمبوسة ^^
وصحية
رولات خبز الصاج باصابع الموزريلا
نفس الفكرة
بس هالمرة تقصين المستطيلات لقسمين او اكثر على حسب حجم الرولات الي تبينهم
وتلفين اصابع الموزريلا
وتسكرينها بمسحة من الفرشة بالبيض
وتغمسينها بالبيض و بعدين بالبقسماااط او البروست
انا استخدمت بقسماط التاوة طعمها مثل البروست
وبجذي تكون الرولات جاهزة للتثليج
وقت ماتبين اقليهم بالزيت
وقدمي معاهم صلصلة البيتزا او الرانش للتغميس
وهالله هالله بالدعوة الطيبة
موتنسوني ^^
