طبيب بيطري كويتي

[دكتور كويتي]

السلام عليكم

اي وحده من الخوات تحتاج تشخيص علاج نصيحة في تربية الحيوان أنا حاضر وان شاء الله أقدر أفيدها

 

[sara star]

قطوتي ماتاكل اكل بيت شسوي:krkrkr:

 

[Ańwăr Almlěssờń]

sara star


اذا كانت تاكل الدراي فود

قدمي لها الاكل السائل تدريجياً بأستخدام المعلبات

طبق القطه اليوم ( 80% دراي فود 20% طعام سائل) و بعد يومين (60%دراي فود40% طعام سائل) وبعد يومين (80% طعام سائل 20% دراي فود ) الى ان تقطعينه عنها

وبعد جذي تسوين نفس الطريقه مع اكل البيت 80% طعام سائل 20% اكل بيت

و هكذا تدريجاً عشان لا تصاب في اضطراب بالمعده

و يوميا تأكل اذا كانت بالغه 3 وجبات

واذا كانت صغيره 4 وجبات يوميا


عموما بطبيعة القطط لا تاكل لا دراي فود ولا اكل بيت ولا سوائل ولا معلبات
القطط حيوانات لاحمه تصطاد فريستها اليوميه و تتغذى على اللحم الني


^^^
انصحج تقرين عن غذاء اللحم الخام الرو فود raw food diet

 

[Ańwăr Almlěssờń]

آهلا و سهلا دكتور

ليش ما تفتح لك عياده و تورينا شهاداتك في البيطره

الله يعطيكم العافيه

 

[دكتور كويتي]

رد sara . اذا تبينها تاكل من أكل البيت لازم يكون تدريجي . أول طريقه جوعي القطوه وقدمي لها أكل البيت بس بكمية بسيطه وبعدها حطي أكلها العادي كل يوم زيدي شوي . ان شاء الله تاكل معاج الطريقة سهله.

 

[دكتور كويتي]

رد أنوار . تسلمين أختي انوار . بالنسبه للعياده البيطرية لازم شركة يعني مو لازم شهاده . الشهايد موجوده والخبره أنا طبيب بيطري عام وجراح . عندي خبره بجميع الحيوانات جراحه / تخدير / تشخيص / علاج .عندي أكثر من شهاده . إذا تحبين تشوفين الشهايد الساعه المباركه . دخولي للمنتدى عساس افيد خواتي مو قصدي أي مكسب مادي .

 

[Ańwăr Almlěssờń]

بالعكس دكتور

انا صار لي سنتين تقريبا ادرس عن الحيوانات و امراضهم و علاجاتهم

ويشرفني اتعلم منك

لكن للاسف في بعض الاسماء عندنا بالكويت يدعوون انهم متخصصين بالقطط وهم للتجاره فقط

ممكن ايميلك ؟

 

[VET-Nour]

< خن نختبر خبرتك < قولوها خمس مرات
لا آسفه ,

سؤآآليي , عندنا خروفه لمن قصو شعرها الي يقص شعرهم جرح رجلها صوب العرج [ ماشفتها من قريب اخاف منهم ] المهم انه لمن تمشي تطيح علا رجلها شنو يكون علاجها ؟ يجبسون رجلها بس ؟


وثآني , فيه علاج شراب حق الاسهال كرمك الله اهو حق القطاوه والجلابه لونه برتقالي و بنفسجي جنه , فيه دكتور قالي عن اسمه و نسيت اسمه < بعد ماقال اسم الدوا ب ربع ساعه و استحي ارد اقوله شنو اسم الدوا لانه فشله
ممكن تفيدنا جزاكا الله خيراً ؟

 

[دكتور كويتي]

رد أنوار . الله يوفقج يارب . أي شي تحبين تعرفينه أو تستفسرين عنه ان شاء الله أقدر أفيدج . أنا أداوم بعيادة حكومية وأعالج جميع أنواع الحيوانات . الحمدلله عندي صيدلية بيطرية بالبيت أغلب الادوية موجوده وطبعا سعري ارخص من السوق بواجد ( الدواء بالسوق ٥ دك عندي تقريبا ٣ دك) يعني ربحي مو مادي [email protected]

 

[دكتور كويتي]

رد نور. في حالة الجروح على حسب الجرح إذا بسيط تحطين بخاخ جروح وكافي. اما إذا الجرح مفتوح وغائر يحتاج تخدير الحيوان وخياطة الجرح. ما يصير تحطين جبس إلا في حالة الكسور. بالنسبة للسؤال الثاني في أدوية اسهال واجد اذا عندج صورة الدواء أقولج اسمه.

 

[Ańwăr Almlěssờń]

دكتور الله يعطيك العافيه عندي سؤالين

سؤال الاول : عندي قطو شاريته و اهوا كبير عمره سنه ونص تقريبا << ما اخذ تطعيماته شسوي لازم اطعمه ولا اخليه ؟

السؤال الثاني : عين الهامستر الانثى مسكره و قالت لي رفيجتي امسح عينها بقطنه و ماي دافي فيه مرٌُه وسويت مثل ما قالت و انفتحت عينها والعين فيها خط احمر من فوق << يصير استخدم القطره المعقمه للعين الي استخدمها للانسان وللقطط ؟ << مع العلم ان الانثى حامل و في تاريخ 16 الى 20 موعد ولادتها


وشكرا

 

[VET-Nour]

آممم اخوي معلم الكآسكو كلمة جب و كل ما احد تكلم قاله جب @@
ابوي عطآه رفيجه فتره و رده لنا يقول كل ماتكلم احد يقول جب و جب جعم الناس

وبعدين لمن رد كل ماتكلمت يقولي جب و ارد اقوله جب انت ليييمن تعلمها و الحين مفشلنا كل ماتكلم احد قاله جب و اذا قاله يجبك يرد عليه جب انت @@
< تراا صج مااتغشمر والله
وصارله فتره جذي :/
مانبيه يقول هالكلمه اشلون ؟؟

جم سنه خبرتك ؟ و جم عمرك < شكو ؟ ودارس بأي جامعه ؟

 

[دكتور كويتي]

رد انوار . اي لازم تطعمين القطوه . بالنسبه للسؤال الثاني اي استخدمي القطره للعين

 

[دكتور كويتي]

رد نور . من الصعب ينسى الكاسكو او يغير طبعه . بس انتي اذا شفتي الكاسكو رددي اي كلمه حلوه . واذا رد عليج بكلمة جب لا ترددينها قدامه . حاولي تخلينه ينسى الكلمه . بالنسبة للخبره تقريبا اكثر من ١٠ سنوات . عندي شهادتين من سوريا واليمن .

 

[@شيخه@]

اااب

 

[غلاى الغويليه]

دكتور رفيجتى
قطوتها فيها جرب بالاذن وددتها البيطرى وعطوها ابر لفطريات الاذن وحبوب وعصار داخل الاذن لمده 3 ايام
بعدين كل اسبوع مره

بس مع هذا ماراح الجرب الى بـ اذنها كل ماتنظفها يرجع مره ثانيه
وودتها البيطرى قالها سويلها تحاليل داخليها يمكن فيها شئ ؟

وهى للحين ماودتها تسوى التحاليل فـ شنو ممكن يكون فيها وشنو العلاج لانها حيل تحاتيها

 

[دكتور كويتي]

رد غلاي . ممكن يكون فيها طفيليات لازم اخذ منها تحاليل عساس أتأكد. عموما فطريات أو طفيليات علاجها بسيط ان شاء الله.

 

[sara star]

السلام عليكم دكتور قطوتي وايد تنام و اهيه عمره 3 سنوات

 

[saronaq8]

دكتور بلييز قطوي سويت له عمليه نزع الأظافر شنو تنصحني بعد العمليه أسوي له وهل صج إنه يتغير بعد نزع الأظافر وهل راح يرد علي طبيعته مثل ما كان أرجوك ساعدني ضروري والحين ريوله ملفوفه وأنا وايد قاعد أحاتي لما باجر أفتح اللفاف

 

[دكتور كويتي]

رد sara . هذي القطوه متعوده على النوم . هذا من التربية الخاطئه. لازم تغيرين سلوكها لا تعطينها مجال للنوم حاولي تعودينها وتلعبينها عساس تنسى النوم .