My Healthy Self .. عالمي تحت سيطرتي :)

[م.بابونج]

كل يوم أدخل يومياتج وأقرا آخر مستجداتج

وعجبوني الفيديوات وايد وان شالله أستفيد منهم

بس حدي بخيلة ولا مرة رديت عليج

دايما تكون بنتي اسم الله عليها مشاغلتني فما أرد

ما شالله عليج ... استمري ودايما ان شالله راح أدخل أشجعج خصوصا إن نظامج مقارب لنظامي

يحبنى الله *

أعتقد حبيبتي إن صار عندج لبس بالموضوع

منتجات أرض الطبيعة خالية من الجلوتين مو الجيلاتين

الجلوتين مادة موجودة في المعجنات والمواد الغذائية اللي مصنوعة من القمح تكون مثل الصمغ تقريبا بس ما تشوفينها

شفتي عجينة الفطاير لما تسوينها؟ كلما عجنتيها أكثر كلما كانت العجينة أحلى لأن الروابط الجلوتينية تزيد

وايد ناس فيهم حساسية منها ومايدرون ووايد ناس من يقطعونها ينزل وزنهم

م.بابونج سوري حبيبتي دشيت عرض في موضوعج

أهلييين يا قلبي مشكووورة على التشجيع .. و حياج الله بأي وقت
و ان شاء الله راح أحط معلومات مفيدة بموضوعي ابتداءا من اليوم .. كل يوم أخصص لنفسي ساعة أسوي فيها بحث عن شغلة معينة و أشارككم فيها منها انتوا تستفيدون و أنا أأكد المعلومات اللي عندي .. ألحين أحط ملخص اليوم

 

[كويتية بروما]

موفقه حياتي متابعتج

 

[م.بابونج]

بسم الله الرحمن الرحيم

ملخص اليوم السادس

اليوم و الحمدلله تشافيت من مرضي , كنت مصخنة الفترة اللي طافت من جذي ما كنت أطبخ و لا تفرغت للموضوع .. بس الحمدلله اليوم صرت أحسن .. الرياضة ان شاء الله أبديها بكرة ان شاء الله و راح أعطي نصائح حلوة عشان تقدرين تخلين الرياضة جزء من يومج غير النصائح اللي متعودين عليها ( صعدي الدرج , حاولي تتحركين أكثر .. إلخ .. ) لأني أنا أحب أقرا عن هالسوالف ..
بالبداية نبدي بيوميات الأكل ..

اليوم قعدت من النوم متأخر بس أصريت إني أتريق بالأول .. هذا كان ريوقي

عبارة عن Oatmeal Quacker بس هذا النوع الخاص اللي يكون فيه سكر أقل و ألياف أكثر , أنا حطيت معاه قطعتين كيوي , و قطعتين قوج و طلع الطعم موووووطبيييعععييي .. و اللي ما تعرف شكل الأوتميل هذا شكله

يبيعونه حتى بالجمعيات يمكن أغلى شوي من سعر الكويكر العادي بس لذييييذذ و ما يحتاج تزيدين عليه سكر إهو حلاوته تكفي و تعطيج طاقة حق طووول اليوم .. أنا أشربه مع حليب حار و فيه نار مع حليب بارد يعني عادي انتي و راحتج

طبعا ظليت و نظفت غرفتي و سويت نشاطات وايد للأسف الرياضة ما كانت منها بس تحركت وايد اليوم أنا , و اللي مونسني إن اليوم أختي تقولي مبين علي إني ضعفانة مع إني ما صار لي اسبوعين من بديت حدي تشققت يوم قالتلي و حدي متحمسة حق الوزن باجر , الأيام تركض و باجر راح يصير لي اسبوع من فتحت الموضوع :ggdw::ggdw:

بعدين الساعة 8 بالليل قررت أتعشى .. و هذا كان عشان

عبارة عن حمسة ربيان .. الوصفة من تأليفي مو ماخذتها من مكان .. شريت الربيان المجمد مال أمريكانا , و خضار مشكلة مجمدة من العملاق الأخضر و سويتهم حمسة طبعا باستعمال زيت الزيتون لأن صحي جدا للقلب و بالقلي .. حطيت عليه كوسة و طماطتين و خليتهم شوية على النار و صارت حمسة مووووو طبيييعيييةةةة , حطيت عليه ليمون و شوية بهارات من الموجود و السلام عليكم

بعدين حسيت إن الأكل ما فيه كربوهيدرات فقررت أضيف خضراوات غنية بالكربوهيدرات

كل شي مفيوح طبعا و بدون دهن , و كان الطعم جنااانننن مو طبيعي , أكلات بسيطة و ما يبيلها وقت و تشبع و تؤدي الغرض

الحمدلله ألحين حدددييي شبعانة و قاعدة أشرب ماي بكثرة .. سويت عصير كيوي طبيعي بس شربت نصف كوب فقط لأن فيه سكر

و هاذي كانت يومياتي لليوم .. نشوفكم على خير ان شاء الله :eh_s(7)::eh_s(7)::eh_s(7):

ألحين أحط شوية معلومات عن أكلي اليوم
​

 

[م.بابونج]

بسم الله الرحمن الرحيم ..

القيمة الغذائية لأكلي هذا اليوم ..

بالنسبة لكويكر الأوتميل أنا خذيته Low Sugar and Maple إهو عبارة عن أكياس و انتي تحطينهم معاهم حليب ..

الباكيت الواحد فيه 120 كالوري بس أنا حطيت 2 يعني 240 كالوري
حبة الكيوي فيها 46 سعرة حرارية أنا استعملت 2 يعني 92 سعرة حرارية
القوج ( البرقوق ) 100 جرام منه فيها 52 سعرة حرارية أنا مو ماهرة بالقياس و ما عندي ميزان , بس كانوا صغار حيل و مع تقديري يكونون 30 جرام يعني 16 سعرة حرارية
حليب قليل الدسم كوب 102 سعرة حرارية
يعني ريوقي اليوم كان 240 + 92 + 16 +102 = 450 سعرة حرارية

بالعادة ينصح الخبراء أن وجبة الفطور تكون 400 - 450 كالوري .. حدددهه حددههه لوووول :ggdw::ggdw:

أوكي ألحين على الغداء/ عشاء
ربيان أمريكانا ( هني تيي فايدة قراءة الlabels اللي يكونون على الأكلات المجمدة و المعلبة )

ال100 جرام فيها 462 كالوري .. أنا أتوقع خذيت 100 - 150 جرام فراح أحسبها على الأعلى يعني 693 كالوري وااااااااااااااااااااوووووووووووووو !!! ما توقعت هالكثر و الله عشان أنتبه المرة الياية و انا أقوووللل شفيني شبعانة و مالي خلق آكل شييي لووول , و على فكرة فيه ناس يسئلون شنو يعني kcal هل إهي نفسها كالوري ؟؟
و الجواب إهو نعم .. الkcal و الكالوري نفس الشيء الفرق بينهم بسييييطططط جدا فمعظم الخبراء يقولون إنهم نفس الشي و تقدرون تاخذونهم كقيمة عادية عادي

طماط فيه 26 سعرة حرارية .. انا استعملت 2 يعني 52 سعرة حرارية
مجموعة خضار مطبوخةمن العملاق الأخضر

يمكن أنا استعملت مقدراين (( بس بغيت أنبه ترى نظام الكالوريز مو قرآن و لا هو علم الذرة عشان تكونين دقيقة 100% .. من جذي معظم الناس تحسه صعب و ممل , لا بأس لو تقدرين الكميات بس تكون كميات معقولة عشان تقدرين تنتبهين على أكلج .. و بالنهاية الموضوع مو موضوع تجويع كثر ما إهو سيطرة على الشهية )) يعني 100 كالوري

سبانخ مجمدة

أنا استخدمت 100 جرام لأنهم حاطينهم على شكل مكعبات و كل مكعب 100 جرام و أنا خذيت واحد يعني 22 كالوري

حبة كوسا فيها 9 سعرة حرارية

حبة بطاطس مسلوقة (( معلومة لعشاق الأكل الصحي , البطاطا الحلوة صحية أكثر بوااايييد من البطاطا العادية و أنا مفكرة اجربها بالأيام الياية )) 88 سعرة حرارية و يمكن أقل بعد

حبو جزر متوسطة 31 سعرة حرارية

لو فيه غلط صلحولي يعطيكم العافية يمكن أنا تقديري غلط بالأوزان من جذي صايرة الكالوري معاي بالعالي لوووول , اللي حاسة فيه شي غلط من الصور اللي حاطتها خل تبلغني يمكن أنا حاسبتها غلط

يعني الوجبة فيها : 693 + 52 +100 +22 +9 +88 +31 = 995 كالوري يعني 1000 كالوري :eh_s(13)::eh_s(13)::eh_s(13): و الله ما توقعت قلت إن فيها خضار وايد وناسة .. بس إهو الربيان اللي زاد السعرات وايد ما توقعت فيه هالكثر .. يمكن استعملت أقل و الله مادري بس فيه وايد .. من جذي مهم الواحد يركز على المعلومات الغذائية اللي تكون بالعلبة
يعني اليوم مجموعي كان 1450 كالوري ..
طبعا أنا هدفي يكون 1200 كالوري باليوم .. يعني لازم أخفف 250 كالوري

استفدت من هاليوم و الحمدلله إني راح أنام و أنا شبعانة و طبعا مع الرياضة و الحرق راح يصير الموضوع تمام التمام ان شاء الله

يالله نشوفكم على خييررر :eh_s(7)::eh_s(7):


​

 

[م.بابونج]

أهلييين يا حلوات شلونكم شخباركم ؟؟
ليلحين ما قست وزني للأسف .. يومياتي ان شاء الله راح أكملها من بكرة , لأن اليوم نظام يومي منعفس بسبب المرض << ما خلصت بعدي لووول
بس راح أحاول أحافظ على نفسي قدر الامكان , أشوفكم على خير ان شاء الله

 

[م.بابونج]

أهلييييييييينننن بناااااااااتتت
تووونننيي قاعدة من النوم و وزنت ..


الوزن السابق 70.7 كج ..
الوزن الحالي





:eh_s(9)::eh_s(9)::eh_s(9)::eh_s(9)::eh_s(9): 69.9
تقريبا كيلو ناقصة وناااسسسةةة

 

[بسبوسة الرياض]

راح اتابعك يومياتك صحيه وحلوه ومفيده

 

[DietGirl]

مبرووك الوزن ومبرووك دخولج عالم الستينات
شدي حيلج
ومتابعينج

 

[Pretty Amoola]

يعطيج العافية خيتو ... وموضوعج يشوق :eh_s(9):

أنا وزني مقارب لوزنج , أنا كنت 91 والحين تقريبا 72

وودي أوصل لل 65 وبعدين أشوف إذا أحتاج أنزله زيادة

أو لا ، لأني أنا طويلة طولي 166 تقريبا.

قاعدة أخفف أكلي ومسجلة بنادي كيرفز . وياااااارب أنزل

قبل العيد لل68 هم نعمة . :yaaaaaarb:​

 

[م.بابونج]

السلام عليكم ..
أعتذر عن الانقطاع في الفترة السابقة لأني انشغلت جدا جدا ..
بس الفترة اللي طافت الحمدلله كان التزامي 70% و هذا الشيء تطور واايد ملحوظ , أحس بطني صار أخف و من ألحين بدا يبين علي حتى أختي قالت لي إن فيه ملامح طالعة بجسمي :eh_s(9)::eh_s(9):

بالنسبة لليوم , كان أكلي جدا صحي 100%
اليوم تريقت الحمدلله :ggdw::ggdw::ggdw::ggdw: , كان ريوقي عبارة عن جبن فيتا قليل الدسم بالزعتر , و معاه خبز إيراني .. و خضراوات واايييدد ( جزر , طماط , خس , جرجير ) كللل شي عندي بالثلاجة حطيته لووول .. و بالنهاية كنوع من التحلية سويت أكلة من اختراعي .. عبارة عن معكرونية ( أنا استخدمت المعكرونية السمرا ) معاها كويكر و حليب .. و حطيتهم على النار و زدت عليهم شوية سكر أسمر و عسل .. و طلعت الأكلة واايييدد حلوة و حق الصبح تعطي طاقة حلوة
الغدا كان عبارة عن سلطة بالتونا روووووعععةةة و مغذية حيل
العشا مو مشتهية , فقلت خلاص باجر أتريق أحسن .. الرياضة مشيت نصف ساعة بحوش البيت بس مشي بطيء كان
و حاولت إني أشرب ماي كثر ما أقدر ..

هذا كان ملخص اليوم خل أشوف شنو فيه معلومات أقدر أفيدكم فيها

 

[م.بابونج]

معلومات حلوة استفدت منها خلال بحثي
1) الكويكر هو بديل رائع للعجين , بالذات إذا كنتي ناوية تسوين كيك أو حلويات ... و الكويكر أو الأوتميل رائع جدا للريوق لما تاكلينه مع حليب و تحطين عليه قطع فواكه طازجة .. تصير وجبة غذائية كاملة الفوائد

2) ماكو فرق بين الفواكه المجمدة و الطازجة , و ألحين الجمعيات يبيعون فواكه مجمدة لا تطوفين الفرضة و اشتريهم و أبدعي بالحلويات اللي تقدرين تسوينها فيهم

3) ساعات الشخص في بداية رحلته في نقص الوزن يلقى إن وزنه في البداية يزيد سواء كان يسوي رياضة أو لا .. و هذا الشيء بسبب قلة الماء , إي قلة الماء , لما تشربين ماء كفاية الجسم راح يتمسك بكل نقطة ماي بالجسم مما يسبب الامساك و في ناس انتفاخ في الجسم .. الحل ؟؟ شربي ماااااييييي واايييدددد

4) الرياضة مو ضروري تكون ساعة كاملة مرة وحدة .. عادي تقدرين تسوين عشر دقايق كل مرة خلال اليوم , و ممكن يكون أي نوع من التمرين حتى لو تركضين بمكانج أو مجرد تمارين اليوغا العادية

هاذي بعض المعلومات .. و ان شاء الله غدا أييب المزيد من المعلومات و أبدي يومياتي من جديد

 

[وه ياحلاتي]

بالتوفيق ياقلبوووو

وعقبال ماتوصلين للوزن المثالي

 

[م.بابونج]

السلام عليكم بنات ..
عيدكم مبارك و كل عام و انتوا بخير
أعتذر عن عدم دخولي للموضوع و اهمالي له بطريقة شديدة بسبب انشغالي الشديد
بس ان شاء الله راح أتابع الموضوع بشكل أكبر و أحسن ..
خل أقولكم التطورات اللي صارت لي ..
خلال فترة غيابي قعدت أدور على الأسباب اللي تخليني دايما أخبص و أعفس الدنيا من قبل لا أبدى , طبعا أي مشكلة خارجية لازم بدايتها مشكلة داخلية في العقل .. قريت مقولة واااااايد حلوة عن هالموضوع
Motivation is what gets us started .. habits is what keeps us going
معناتها : الارادة تخليج تبدين .. العادات تخليج تستمرين
من هالمقولة اكتشفت إن عاداتي بالأكل إهي اللي مو مضبوطة , أكل بسرعة , نوعية الأكل مو مضبوطة , و ما أشرب ماي ..إلخ
شلون كنت متوقعة إني أنجح إذا كان الأساس مو مضبوط ؟؟
المهم فقررت قرار قوي ..
نظام يديد بسويه على نفسي .. بسميه " One Habit at a time " يعني كل اسبوع راح أطور عندي عادة صحية تقدر تساعدني إني أوصل لي هدفي ..
أنا خلصت الاسبوع الأول اللي كان : أشرب لترين ماي باليوم .. و الحمدلله تعودت عليه
طريقتي إهي :
كل اسبوع أحط عادة صحية لازم ألتزم فيها .. و لازم أحط كل تركيزي عليها لييييننن أقدر أتعود عليها و أخليها جزء من يومي , لين بنهاية البرنامج أكون تعودت على عادات صحية و أقدر أسويها بكل سهالة عشان أقدر أوصل لي هدفي بكل راحة و طبعا نهاية كل اسبوع أسوي لنفسي مفاجأة ( طبعا تكون مالها شغل بالأكل عشان ما أربط الأكل بالوناسة )
الاسبوع الأول : شرب لترين ماي باليوم ( انتهيت منه .. و كافأت نفسي بأني رحت حق سبا و سويت مساج لإيدي و رجلي حده كان وناسة )
الاسبوع الثاني ( ليلحين أنا فيه ) : 1) شرب لترين و نص ماي
2) الأكل لما أكون جوعانة فقط ..
طبعا الهدف من هذا الاسبوع إني أقدر أفرق بين الجوع العاطفي و الجوع الحقيقي ( الجوع العاطفي معناته إن الانسان ياكل لما يكون متوتر أو قلق أو لأسباب أخرى مالها شغل بالجوع ) .. إلى الآن أنا ماشية تمام فيه و أحس نفسي أخف بوااايييدد بسبب شربي للماي .. و إلى الآن ناقصة نص كيلو أتوقع الأسابيع القادمة أقدر أنقص أسرع من جذي بس المهم إني أستمر

ان شا ءالله يوميا راح أدخل الموضوع أبلغكم إذا التزمت اليوم أو لا .. و اللي تبي تشاركني حياها الله , كل شي بالهداوة يصير
الواحد لما بيسوي كل شي مرة وحدة راح يتلخبط و يعفس الدنيا و عقبها ييأس و يوقف
ان شاء الله راح ألتزم هالمرة لاني أحس التأثير على جسمي مبين حيل حتى لو ما نقصت بالوزن بس أحس نفسي وااايييد أخف من قبل

نشوفكم ان شاءالله بالليل

 

[م.بابونج]

السلام عليكم
اليوم كان اليوم الثالث من الاسبوع الثاني من بدايتي لنظامي الجديد ..
اليوم اللي طاف و اللي قبله كان عندي مشكلة في كمية الماي اللي أشربها , أنا متفقة مع نفسي إني لازم أشرب كل يوم لترين و نصف من الماي .. و لكنني كنت أشرب لتر واحد فقط .. بس الحمدلله اليوم قدرت و بحمد الله إني ألتزم بهالكمية
فيه ناس وايد يشتكون إن الماي مشكلة لأن يمشي البطن بطريقة سريعة فالواحد يضطر يروح الحمام بكثرة ( و انتوا بكرامة ) , بس هذا الشي لأن الناس تشرب الماي بسرعة , لدرجة إن الجسم ما يستفيد منه يكون كل همه إنه يبي يتخلص من كمية الماي الزايدة عن حاجته بأقصى سرعة ممكنة .. فتلاقين نفسج وايد تترددين على الحمام .. الحل ؟؟
شربي الماي ببطئ , يعني حطي يمج بطل ماي , و قعدي مزمزي فيه على الراحة لييين يخلص , عادي محد وراج و لا تستعيلين .. شوي شوي الجسم راح يتعود على الماي فتقدرين تزيدين الكمية بكل سهولة

و بالنسبة للأكل أنا ملاحظة إن كمية أكلي واايد قالة عن قبل .. لأني اليوم قدرت أعرف متى أكون يوعانة صج و متى أكون قاعدة آكل عشان أرضي الناس أو أكون أنا متوترة شوي
اليوم كان يوم مثمر و الحمدلله وايد راضية عن نفسي و ان شا ءالله غدا يكون أفضل

 

[شهرزآد]

مآشآء الله :$
إستمري , والله يوفقك (=

 

[م.بابونج]

مآشآء الله :$
إستمري , والله يوفقك (=

تسلمين يا قلبي و الله يوفق الجميع
عيدج مبارك

 

[م.بابونج]

السلام عليكم بنات .. عيدكم مبارك و عساكم من عواده
و الله اليوم أنا حدي تعبانة ما أقدر أكتب وايد بس بغيت أأكد إني الحمدلله اليوم ماشية مضبوووطططططط و فعلا لما الشخص ياكل لما يكون جوعان يصير الأكل له قيمة و لذة غير
الحمدلله حدي فخورة بنفسي و ناطرة الاسبوع يخلص عشان أشوف أخبار وزني
​

 

[متجر جنات عدن]

مشكووووووووووووره