أستخرت وموحاسة بشي .. شورو علي :)

[فـدى جـابر]

السلام عليكم ..

شلونكم بنات ؟
ببدأ بموضوعي بإختصار وياليت تشورون علي ..

انا بنت منفصلة ومااستمر زواجي أشهر بسبب خلافات مع طليقي وانفصلت ..

المهم مو هذا موضوعنا ..

الحين متقدملي شخص مطلق مرتين وعنده بنت من طليقته الأولى وبنت من طليقته الثانية
انا احس لما دريت انه منفصل مرتين كشيت منه وقلت هذا انسان سهل الطلاق عنده بس للأمانه الكل يمدحه ويقولون ماله حظ مع الحريم ..

الاولى كان ماخذها عن حب وصارت بينهم خلافات كبيرة وخربت العلاقة بينهم ..

والثانية بنت عمه ماقعدت معاه إلا شهر وحملت بسرعه وراحت لأهلها ماتبيه عشان خلافات بين أمها وأمه !!


انا محتااااره !!
ساعات أقول يمكن ياخذني ويطلقني حالي حاله اللي قبلي !
وساعات اقول يمكن صج أهو ماله حظ !!

واخاف اوافق عليه ويصير حلو بعيون طليقاته ومايخلوني بحالي !!


شورو علي الله يجزاكم خير !!

انا محتاارة !!
استخرت مرة ومرتين وثلاثة وموحاسة بشي !!



​

 

[فراشه بيضا]

مادري اخاف يحن للي يحبها
دايم اللي يطللقون يحنون للقديمه
هذا رايي
لو بمكانج كنت فكرت جذي الصراحه الزواج صاير يخوف هالايام

 

[زوجة عزيز]

انا زوجي كان الكل يمدحه واهو مطلق مرتين وعنده اعيال من الاولى والثانيه بس للامانه ان اللي يمدحونه مايعرفون عن حياته داخل بيته اي شي والعيب والغلط منه مايتحملونه الحريم ومثلج انا استخرت وكل شي !!!

 

[سما الشقين]

انا اقول اسألي زوجاته السابقين وجه لوجه مو قالوا الناس ولا قالت امه

 

[عسل حدي]

امبي كنك تتكلمين عن واد اعرفه لووول
استخيري مره واثنين وثلاث

 

[مشتطـه]

والله مادري
اذا فرصتج بالخطاب ضعيفه وايد توكلي على الله واخذيه
عالاقل تتزوجين والا انج تقعدين
لان ممكن واحتمال انج تستمرين ويحبج

اما اذا انتي صغيره وتنخطبين رغم انج مطلقة لا نطري الاحسن


فكري عدل عدل

والل يكتب لج الخير


حريم هالوقت عوب ويتطلبون لا تلومينه لي طلق يمكن البلا من المرا

 

[مولاي الفرج]

نصيحتي نفس الاخت اللي قالت سئلي زوجاته

سهل توصلين لاهله

واهو اذا صج مظلوم راح يبين

 

[امـ خــزامـى]

تكلمي مع زوجاته ولا لاتاخذينه


نصييييييييييييحه

وترى بنت العم لو وشكثر تتمشكل مع زوجها ولد عمها مايتطلقوووووووووووون بسهوله

 

[معزوفة عشق&]

استخيري اكثر من مره واسالو عنه تمام التمام
ولو تم الموضوع ع خير اعرفي ان هذا نصيبك ورزقتك والله يوفقك ويكتب لك الخير وين ماكان

 

[مناير ...!]

الاستخاره حبيبتي ماتحسسج بشي
سالفه الحلم بعد الاستخاره
والاحساس بشي مو صج
شوفي مواقع الفتاوي
الاستخاره انج تستخيرين وتمشين بحياتج وربج بيسسر لج الامر ولا بيبعده عنج
فالله يوفقج ويكتب لج الي فيه خيره لج

 

[zozo.7ob]

نصيحة مني لا تكلمين زوجاته الا اذا كانو صادقات لان احيانا المراءة المطلقة تحاول تنتقم من طليقها و تسوا سمعته ثاني شيء انتي اسالي اصدقائه اقاربه عنا باي طريقة و راح تعرفين اذا هوا مظلوم ولا لا
و لو انتي مو مرتاحة لا تاخذينه و اذا انتي مرتاحة له اخذيه و بالنهاية القرار قرارج و االي يريده الله خير

 

[رنيم الروح]

الاستخاره حبيبتي ماتحسسج بشي
سالفه الحلم بعد الاستخاره
والاحساس بشي مو صج
شوفي مواقع الفتاوي
الاستخاره انج تستخيرين وتمشين بحياتج وربج بيسسر لج الامر ولا بيبعده عنج
فالله يوفقج ويكتب لج الي فيه خيره لج

كلامي من كلامها
و سألي كل الناس الا زوجاته لا تسألينهم عنه لانه كلامهم بيطلع العكس خاصة اذا وحده فيهم تبيه وتبي ترجع له

 

[^لغموضي معاني^]

لاتسالين اللي طلقهم لان الشي هذا مو حلو لابحقج ولا بحقه ومستحيييل بتقول لج السبب لو كانت صاجه

اسالي الناس او رفايجها او اي احد يمون عليها

واستخيري والله يكتب لج اللي فيه خير لج

 

[Patcholli]

انا ولد خالتي مطلق 3 مرات والسبب حريمه
الاولى كانت خبله
والثانيه كانت تبي واحد غيره بس بدون من جذي اهلها ماوافقو عليه وزوجوها ولد خالتي غصب ولما خذاها اكتشف ان اهي اتعرفه وتكلمه ومستمره معاه
والثالثه ام عياله قعدت معاه 11 سنه وعلى كبر فصلت صارت تبي تطلع وتسهر وتقز وتروح وترد واتنازلت عن عيالها بالمحكمه وطلبت الطلاق عشان اسباب سخيفه ..!!

ما انكر انه اهو فيه عيوب بس عيوب طبيعيه موجوده بكل البشر مو شي جايد
فمادري انتي سئلي عدل عدل عدل ولاتوافقين على طول
لان مهما كان الناس يحكمون عالظاهر اهما مايدرون هالانسان شنو طبعه داخل بيته

 

[PuPa^^SWeeT]

باتشووولي


صااجة في رياييل يحاولون يمشوون السفينة بس حريمهم مايساعدوونهم




اذا الريال اتشوفينه زين قبلي


اذا سمعتي شي غلط لا تقبلين


الاستخارة اتبين بعدين

 

[توتة UAE]

هيه مب حلوة تسألين طليقاته وانا بعد
كنت أتحرى الاستخارة صلاة وعقب شو
أحس فيه وناس يتريون حلم يحلمونه . .

خلي أهلج يسألون عنه أكثر وشوفي
إذا يمدحونه صلي استخارة وانوي انج
بتوافقين عليه خلاص وتوكلي ع الله
إذا هالزواج مب خير لج بيستوي شي
مشكلة اي شي ماعرف . .

واذا استخرتي وتوكلتي ع الله وكل
شي كان تمام خلاص ارتاحي وباذن
الله خير لج . .

بالتوفيييق ربي يرزقج الزوج الصالح المحب

 

[manoooram]

حبيبتي استخيري وخلي أهلج يسألون عنه عدل
والله يوفقج يا قلبي

 

[معي احلى]

المطلقه ماتجي تقول لك طليقي ملاك والعيب مني .. اكيد بتطلع العيب منه .. الا من رحم ربي .. بتقول ماتفقنا او هذا نصيبنا ..


رايي من راي الاخت مناير امشي بالموضوع ومع الاستخاره .. أما بتتسهل الامور او تتفركش ..

 

[ام الحلوااات]

مــــع مـــــششششــــتتـــــــطـــــــــــــــه

 

[مولاي الفرج]

المفروض اللي مطلق يقول حق اللي يتقدم لها السبب

عشان تكون على بينه وما تحتار