السلام عليكم
حالتي النفسيه معصبه وفيني غضب على زوجي
غشمرته ثقييييييله واذا طلبت شغله منه على حسب مزاجه ينفذ او لا
واللي قاهرني زياده يبدي الناس علي ماعنده مشكله يخلص اشغال الناس بنفس الوقت وانا يأجل شغلي شهور
لو اقول كلام او نصيحه. مايعجبه ولو شخص ثاني يقول كلام او نصيحه مطابقه لكلامي او نصيحتي يتقبل وتثبت براسه
ودي اصارخ من القهر مادري شلون اتعامل معاه
فيني طبع حاولت اغيره ماقدرت اغلب الوقت اضحك معاه ابي اصير جديه ابي يتمنى يسمع ضحكتي
مره سويت تجربه مسكت نفسي يوم كامل ماضحكت استغرب قالي شفيج انتي زعلانه مني يعني صار فيه طبع اذا ماضحكت معناتها انا زعلانه شسوي معاه
انتي تتكلمين عن ريلج ؟؟
امبيه معقوله جذي ريلج كوبي بيست عنه ؟؟
انا ريلي جذي اي شي اي شي اي شي لازم يتطنز او يظحك او يتغشمر ماعنده شي جد كنت اتظايق اول ايام بس خلاص تعودت عليه ياختي يظحك احس من منفس ودمه سم ..
ومنو قالج ان الريايل الباجي من تقولينله شي يركظ ؟
لا حبيبتي غلطانه حق بيته يقول لاحق عليه ومو ان مايحب بيته بس من وجهة نظره ان شي مو الزامي يعني اي وقت يسويه على مزاجه
بس حق الغرب لا عنده عيب وفشله ولازم يطق الصدر ويبين لهم شهامته و نخوته الريايل جذي ..
عادي حبيبتي انتي لازم تتأقلمين على طبع ريلج
لاتاخذينه اختبار وتحدي ترى بتتعبين ماراح يتغير شي
بس بتزيد المشاكل
انتي تقبلي منه
وفكري يامعوده يظحك ويتغشمر هاذي مو مشكله
يسرسر يخون يشرب يزني حشاج هاذي الي صصج يسمونه مشكله
انا كل ما اتظايق اتذكر حال غيري واعليا عليهم الدينار مايطلع من رياييلهم واقول حمدلله يارب ريلي عيوبه حسنات عند غيري
وحده تقول ريلي عمره ماشفنا اسنانه يعني عمره ماظحك
وتعالي شوفيه بالدوام الكل يقول عنه نكته وغشمرجي ويحبونه الكل
هاذا شتقولين عنه..!
