لا تياسين من الدعاء ( فانه لا يهلك مع الدعاء احد )
اشتدي يا ازمة تنفرجي
المطلوب : تتيقنين ان بوسط هالبلاوي الي انتي فيها رح يطلعلج الحل بدون ماتدرين
مفتاح حسن الظن بالله : هو ان يعلم المؤمن ان الله قادر ان يفعل كل شي
الدعاء يعني الاجابة والله ما يوخرها الا لحكمة ومو معناها مرح يستجيبلج
روضي نفسج وخليها تتقبل الواقع علميها ترضي وتصبر هذا كله رفع درجات لج
واذا تبين ترفعين درجاتج عند الله بنفسج ، دوري بقوقل في مواضيع واذكار تقولينها ترفع درجاتج
لا تشدين علي روحج حيل بالعبادة ً خلج معتدلة واتقي الله بكل وقت بالسر والعلن ..
مفتاح فرج همج شي واحد : حسن الظن وثقي تماما يا اختي الكريمة (( من سابع المستحيلات ومستحيل ثم مستحيل ثم مستحيل تحسنين الظن بالله ومايعطيج ظنج )) !!
اقراي كتاب الفرج بعد الشدة للتنوخي ، واعلمي اختي الكريمة ان الله وعد بالاجابة ولو بعد حين
وحطي هالحديث تحت عيونج : لا يزال يستجاب للعبد مالم يستعجل مالم يدعو باثم او قطيعة رحم قيل وكيف يستعجل قال : ان يقول قد دعوت وقد دعوت ولم اري يستجاب لي فيستحسر ويترك الدعاء ..
طبعا الحديث كلنا نعرفه و قريناه الف مرة و تييلنا ايام ننحبط وننسي بس لاحظي بداية الحديث الرسول قال : ((( لا يزال )) يعني حتي لو تاخرت دعوتج لا تياسين لا يزال يستجابلج دام دعوتج حلال ومافيها اثم ..
الانسان خُلق عجول و متسرع واحنا عندنا نصبر شهر معناها صبرنا وايد ، ونسينا صبر الانبياء رالصالحين ..
اروي حبيبتي انتي بضيقه اوشكت علي الاختفاء سمعي كلامي وطيعيني لا تسمعين الشيطان الي يوسوسلج ان حياتج رح تصير اسوا
لمي روحج وتماسكي و الفرج قرب ، ان الله تعالي يضحك سبحانه اذا شاف عبده ترك الدعاء ويأس لان يدري سبحانه ان خلاص الفرج قرب حييل
حاليا تحتاجين فترة استعيني بالله وطلبي منه يثبتج وما يقطع قلبج من رجائه ، خلج راضية بالهموم صنعي هالشعور بالبداية حتي لو ماودج لين رح يصير ودج
طنشي بالدنيا بالعالم كله مهمن كانو الي يضغطون عليج يحبطونج يمكن تحسين ماكو امل بس الامل موجود انتي لانج تعبانة مو قادرة تحكمين وتميزين
ريحي بالج و ادعي ولا تشدين علي روحج ، تماسكي و اوجدي اليقين بداخلج بالله ساعدي روحج بروحج لا تستعينين بالبشر عشان الله يعزج ويرفعج
انصحج تقرين كتاب الشدة بعد الفرج تحصلينه بالنت صيغة بي دي اف من اجمل الكتب وتقدربن تحملينه علي فونج واقريه رح يواسيج ويسليج ويرفع معنوياتج
لا تستسلمين تو الناس ولا تتسخطين علي قضاء الله وقدره وتعوذي من الشيطان اذا حسيتي انج بلشتي تفترين و روحج صارت مبهوتة ، ماعليه شدة وتزول والايام دول بسرعه تخلص ومن ساعه لي ساعه امية فرج وبالدقيقه الله يفك كرب ويشفي مريض ويفرج عن مظلوم
خلج متماسكة مو وقت هالنكسة اصحي يا اروي يا حبيبتي همج بدا ينفرج ..
تدرين قبل اذا اشتدت كرب الصالحين و صار ماكو امل لحل همومهم وتتعقد امورهم يستبشرون بقرب الفرج ؟؟! ويستانسون بدل لا يحزنون ..
ترا الله قعد يزيد الهموم عليج والمشاكل واهو عارف صبرج وتحملج ..
لكنه قعد يختبر ثباتج لا تسقطين بالامتحان يا اروي و تحملي الفرج قريب ماتدرين متي ووين وشلون
و بالنسبة لاذكارج صدقاتج ( ان الله لا يضيع اجر المحسنين ) لا تضيعين اجر الي سويتيه صبري واحتسبي الاجر حتي لو كنتي مكرهه علي هالصبر
( من رضا له الرضا ، من سخط له السخط )
كلمة اخيرة بس : لا تهتمين لاي بشر يحاول يحبطج لانهم بشر مهمن وصلو من العلم اهما مجرد بشر مايعرفون شي الا قليلا مثل ماقال ربي : وما اؤتيتم من العلم الا قليلا
مساكين هالبشر مايفقهون مهمن وصلت درجة علمهم و حبطوج وقالولج مافي ذرة
امل ، مافي حل ، ماكو مخرج ، تاكدي في مليون مخرج ومليون باب او اكثر بس مو بالضرورة الي ببالج
هذا ربنا رب العالمين هو المدبر قد وضع الله لكل شي قدرا لا تستعيلين العيلة من الشيطان لا تخربين ترا ربج يقدر يعطيج الي تبين بوقته بس يبي يشوف صلاحج و هل هزمتي نفسج وهواها واعتدلتي او لا هالشي قريته مرة متي ماهزماي شيطانج وصلحت نفسج رح يجي الفرج ، خلج واثقة بالله ولا تقولين متي ووين شوي شوي نفسج تتعود ان ماتقول هالكلام ورح تحسين انج راضية عن الله واقداره سبحانه بعدها المفاجاة ..
كل الي تبينه يتسطر عندج !!
شوفي لو الامور كلش ماكو ذرة امل وخلاص تحسين كلشي انتهي ووايد امور تبينها راحت عليج ولا زلتي تبينها و متعلقه فيها وماكو شي تحقق تخيلي انا اقولج ظلي ادعي وبثقة و احسني الظن رح تتغير نواميس الكون باذن الله رح يسبب الاسباب سبحانه رح تنقلب الامور لصالحج خلج واثقه فيه
اروي مابي اشوفج داشة اهني الا وانتي تكتبين قصة الفرج
شي ثاني قبل لا انسي : لا تعلقين قلبج بقصص البنات في بعضهم يستجابلهم بشهر في بخمس شهرر في بسنة في بساعه في ٣ سنوات
لا تقارنين روحج باحد عشان لا تعقدين روحج والشيطان يوسوسلج ان انتي مرح تفرج عليج الا بعد سنين ومنين وان لازم تمرين بالي مرت فيه فلانة وعلتانة يالله انفرج عليهم ؟! غلط حبيبتي قطعي هالتفكير الخايس. و خلج متفائلة و اذا حسيتي بضعف عيشي لحظة الضعف علي سجادتج و بعدها تعوذي من الشيطان وانتظري فرج الله ، الايام بسرعه تركض ماكو شي اسمه هموم تزيد في شي اسمه انسان ما يعرف شلون يتعامل مع ربه ويغير من نفسه ..
اسفة طولت عليج بس كله لمصلحتج و ربي يبشرني فيج قريب
