السلام عليكم ورحمة الله
اليوم مثل ما اوعدتكم راح اكتب تجربتي كاااملة وبالتفصيل
اول شيء مشكلتي هي Gummy smaile
وعدم تطابق الشفايف يعني ماتسكر ع بعضها مفتوحه دايم ماسكرهم الا بالشد وحقيقه هذا اكثر شيء ضايقني
اممم ومعظم الناس مو منتبهين لهالمشكله ومايلاحظون لأني كنت دائماً احاول اسيطر عليها
المهم قررت اسوي العملية وبحثت بحثت لين شفت تجمعكم الجميل
وسجلت عشانه، سويت التقويم الجراحي وكلفني 25 ألف عند الاستشارية ايمان القفيدي
والعملية سويتها حكومي عند الاستشارية مريم الهندي في مستشفى الملك خالد
التقويم ركبته قبل سنه ونص
والعملية سويتها قبل تقريباً ثلاث اسابيع
عمليتي كانت السبت 27 ابريل 2013
دخلوني المستشفى يوم الاربعاء عشان الفحوصات
وسحبوا مني دم وطلعوني وقالوا تعالي الجمعه المغرب
الجمعة المغرب جاني طبيب التخدير وقالي كل شيء عندك سليم ماعدا فقر الدم ناقص شوي
وقالولي صومي من س12 الليل وانا تعشيت وصمت الساعه 8 من الحماس
ويوم السبت س7 ونص الصباح عطوني حبوب تهدئ الاعصاب تخلي الواحد دايخ وهادئ
قالوا انها تخدر شوي وعني انا مالاحظت شيء ابدددد
عيوني مفتوحه ع الآخر ومتحمسة لاحسيت بخمول ولا دوخه ولاشيء هههههههه
وبعدها يمكن بساعتين ودوني لغرفة العمليات
لاحظوا انا ماخفت للحين متحمسه وعايشة جو اكشن خخخخ
بس يوم نقلوني ع طاولة العمليات وشفت غرفة العمليات هينا بس خفت وارتبكت
وصرت ارتجف عاد يقولون لي خايفة ؟!!! قلت لا ابد بس رجولي ترتجف من نفسها
حطوا لي تخدير عن طريق الوريد وعن طريق التنفس بعد
ويتكلم معي الطبيب ويسولف ويضحك وممممادريت الا يقولون اصحي يا اشواق
الحمدلله ع السلامه خلاص خلصت العملية !!!!!!! انا انصدمت خلصت كل شيء وانا كنت اضحك قبل دقيقة ..... وطالعت فيهم واحس جسمي مهدووود ومافيني حيل رجعت ونمت
وصحيت ورجعت نمت الا يدخلون علي اهلي
وابي اتكلم معهم بس ماقدرت صوتي متحشرج مافهموا شيء وصرت ارتجف
مادري ليه صراحه بس جسمي يرتجف يمكن لاني توني صاحية من التخدير ومالي الا تقريباً عشر
دقايق
وطلعوا من عندي وهم مفجوعين ومصدومين هههههههه
رجعت نممممت يمكن ثلاث ساعات او اربع وطبعا اصحى وارجع انام
انا دخلت غرفة العمليات تقريباً 9 ونص الصباح يمكن خدروني الساعه 10 وطلعت من العملية الساعة 3 العصر
استغرقت عمليتي خمس ساعات
والعملية كانت قص من الفك 6 ملم
وتقديم الذقن 4 ملم
انا ما كان عندي تراجع في الفك السفلي يمكن شيء بسيط وعادي جداً بس قدموا لي الذقن
عشان اذا قصوا من الفك مايصير راجع ورا
المهم انا بعد طلعت من غرفة العمليات دخلوني العناية الخاصة
واهم نقطة احب اذكرها لكم ولازم تنتبهون لها اني الساعة 6 المغرب يعني بعد العملية بثلاث ساعات حسيت بغثيان واقول لنفسي انتي تدلعين اكيد كلها ثواني ويروح
واحاول اصده عني بس ماقدرت واحس خلاص مرجعه مرجعه وانادي النيرس واصيح نيييييييييرس برجع وحطت كيس وانا اسال نفسي ماكليت شيء ولاشربت شيء شالسالفه
إلا ارجع دم خالص صافي انا انصددددمت صدمه كاملة كاني مصاص دماء
والمشكله الدم اللي رجعته كثير يمكن كيلو او اكثر
بس في ذيك اللحظه تذكرت كلام بنت هينا بالتجمع كانت كتبت انها رجعت دم وان هذا شيء عادي
لحظتها ارتحت الحممدلله ولا كان قلت بموت، بعدها هدأت نفسي وحسيت بتحسن شامل
وبعد العملية تقريباً باربع ساعات يعني بعد رجعت بساعه صرت عادي وجالسه اشرب عصير تفاح
و اضحك مع الدكتورة واسولف طبيعي تماماً هههههه
يعني كنت متصوره اني بتعب ومدري شنو بس الحمدلله الوضع تمام جداً
وأسأل الدكتوره الموضوع بسيط احس العملية سهله مرررا قالت لا عمليتك كانت متوسطه مو سهله خخخخ تقول طولنا فيها اكثر من اللازم
قلت لها طيب انا ماحس اني تعبت قالت اي انتي قمتي زين الحممممدلله
جلست بالعناية الخاصة بس يوم واحد بعدها رجعوني لغرفتي وجلست فيها يوم واحد
وبعدها طلعت للبيت ع طول وانا احس اني مو تعبانه ولاشيء
يعني انا دخلت التنويم يوم الجمعة بالليل وطلعت الاثنين الظهر
يعني ماجلست بالمستشفى يوم كامل الا السبت والاحد
وقبل ما اطلع حطوا لي المطاطات وهنا بدت المعاناة الحقيقية
بعد وصلت للبيت وجلست بغرفتي حسيت بألم وسقم ووجع وقرف وكرهت نفسي
كله من المطاطات الله ياخذها
حسيت مالي نفس اتكلم ولا اسوي شيء
قلت مراح آكل بشرب سوائل بس وقعدت يمكن يوم ونص ع السوائل وجيت امي اصيح ابي آكل خلاص ماني متحمله
وسوت لي امي شوربة يمكن الذ شيء أكلته بحياتي كلللله من الحرمان
وقعدت ع الشوربة واندومي مكسره مطبوخه ع طريقة المكرونه بمعجون الطماطم بدون بهاراتها لذيذه جد
واشياء لينه
خمس ايام او اربع تقريباً هي صدق صعبة حيييل وانا متأكده انه صعوبتها تكمن فالمطاطات
وكان نفسي اطلع من البيت في اليوم الخامس
رحت للكوفي مع بنات خالتي واسولف عادي وهم اصلاً مادروا عن العملية
ولا لاحظوا شيء لان احنا كنا جالسين ع طاوله مفتوحه وكلنا قاعدين بالنقاب
الزبده انهم مالاحظوا شيء كنت عادية تماماً اسولف معهم واشرب قهوه عادي
بس شوي كلامي مو واضح قلت لهم من مطاطات التقويم
امممم شنو بعد لازم اكتبه لكم
اه صح اهم شيء شكل وجهي ؟؟؟
وانا في العناية الخاصة تقول النيرس للدكتوره شيز بيوتفل هههههه
تطالع في الدكتوره وتقولي تقول الممرضه انك جميله
وانا اقول في نفسي واضح
اتوقع اني هذيك اللحظه اشبه اشين ممثل كوري
وجهي اول كان يعجبني طويل شوي بس انيق وجذاب
وملامحي حااده
انف نحيف مرررا يمكن اكثر من اللازم
وعيون واسعه وكبيره ملامح خليجية
كثيرين يحبون شكلي ويعتبروني محظوظه لأبعد الحدود
وانا لولا مشكلة القمي سمايل اذا ضحكت بقوه و ان شفايفي ماتسكر بشكل طبيعي
لازم اسحبهم لبعض وأتم ماسكتهم واذا استرخيت تفك من نفسها
لولا هالمشاكل ماسويت العملية
يعني انا ماكان هدفي اكون اجمل لا بس ابي ارتاح واكون طبيعيه
وجهي الاسبوع الاول كان وارم بس مو مرا
ماتورم كثير اصلاً تورم بشكل معتدل
الاسبوع الثاني صار عادي بس منطقة الخدود وحوالين الانف والانف متورم
الاسبوع الثالث خف كثير صار عادي
في بداية الاسبوع الثالث رحت الدوام
لاني عادي ما اعاني من اي مشكله وعندي اختبار ف الكلية
صحيح انه باقي متورم شوي في خدودي وشفتي اللي فوق
بس خفيف مررررا
المهم يوم رحت كانت معي اختي بنفس الكلية
امشي مع اختي وقابلت البنات
المهم اسلم ع صديقتي واشوفها ماقامت بس مصافحه!!!!
استغربت وتركتها ورحت جلست وبعد شوي تسلم اختي عليها وتقوم تسلم عادي
جت عندي اختي وقلت شفتي ساره الحيوانه كيف سلمت علي
قالت انتي الحيوانه ماعرفتك هههههههههههههههه يماااااااااه
تقولي اختي بعد سلمتي عليها تسأل تقول اشواق ماجت!!!!
اختي مسكينه انصدمت وقالت هي اللي سلمتي عليها قبل شوي وساره انهبلت وانخرصت وانا ورب البيت جتني صدمه ماتتصورونها صدمه عميقة
اوكييييييه انا تغيرت بقوه وتغيرت ملامحي بس اوصل لمستوى مايعرفوني صديقاتي لا والف لا
ولا حتى تخيلت هذا الشيء ممكن يصيرلي، صحيح انا قريت تجربه لوحده من البنات
تقول لولا امشي مع امي ماعرفوني الناس
بس تصورت انه البنت مشكلتها قوية وانها قبل عندها تشوه
وتخيلت كذا وقلت يمكن عشان كذا
بس انا كان شكلي طبيعي وحلو قبل ومافيه احد قد قالي ان عندي مشكله
ولا حتى احد قد انتبه لها ابددد
قسسسم جتني ضحكه هيستيريه امسكها بصعوبه يوم وصلت البيت ضحكت لين تعبت
البنات نصهم ماعرفني ونصهم الثاني قال انتي جايك حادث ولا شيء
وكلههم ماعجبهم شكلي الجديد يقولون جمالك راح
والحقيقه مو كذا جمالي ماراح هو نفسه بس تغير بنسبة كبيره
انا تغيرت جذرياً وهذا ماكان في تصوري ولا ابيه
وعشان كذا الناس مايألفون الاشياء الجديده والغريبه بسرعه
انا اعرف نفسي واعرف شكلي تماماً ماصار شكلي للأسوأ ابداً
بالعكس حالياً انا احلى بس الفرق ان ملامحي الحاده اختفت نسبياً
انفي فرش حبتين وهو اول نحيف بقوه
يعني الحين شكله عادي بس اهلي مو متقبلينه
الشي الثاني شفتي السفليه نحفت كثييير اول كانت مليانه
وهذا بعد مو متقبلينه
وجهي صار بيضاوي تماماً واول كان طويل واكثر اناقه
بس احس ملامحي مضغوطه ع بعض هذا وانا وجهي طويل شلون باللي وجيههم قصيره او دائريه يسوون هالعملية!!!!!
بس انا حالياً مرتاحه المهم ان المشاكل اللي كنت اعاني منها اختفت
اي والشيء الثاني ملامحي صارت اصغر عمر كثير
اتوقع ان الناس يحبون شكلي القديم وشكلي الحالي ضيف غير مرغوب فيه بالنسبة لهم هههههههه
هذا كل شيء حالياً
اتوقع اني كتبت كل شيء ولو فيه شيء ناقص ذكروني فيه وراح اكتبه
في النهاية احب أأكد على نقطه مهمه جداً
العملية للي حالتهم مثل حالتي ترا تغير اشكالهم بشكل كبير
ويمكن بعض البنات ماعندهم المرونه اللي تساعدهم يتقبلون اشكالهم الجديده
خصوصاً انهم راح يمرون في سلسلة خطوات معقده وصعبة نوعاً ما
بدءاً بالعملية وانتهاءًا بالتورم اللي يحتاج وقت حتى يخف
يعني لاتسويها الا وحده صاملة ومتأكده وواثقة 100٪
اللي متردده بتواجه صعوبه اكبر واكبر
وانصح اللي عندهم مشكلة تعقدهم او تضايقهم يسوونها، بس اللي عندهم عادي ومتقبلين اشكالهم
لايسوونها لانها بصراحه مالها علاقه في التجميل مو شرط تغير الشكل للأجمل!
العملية هذه دورها تبعد المشكلة اللي تعانين منها سواء للأحسن او للأسوأ.
ههه صارلي اكتب تجربتي تقريباً ثلاث ساعات تعبت وانا اكتب
دعواتكم:eh_s(7):
