عنايتي ببشرتي الدهنيه
بطلت اشوف حب الحمدلله
اولا اغسل وجهي بصابون ينشف الدهنيه بوجهي ..
هالصورتين
صابونة الكبريت وصابونة الاحماض
اثنينهم جربتهم
صابونة الكبريت اذا وجهج فيه حب كبير تساهم انه يروح وما يتكاثر
اما الاحماض فحلوه كصابونة يوميه للبشره الدهنيه
خاصه الصبح اول ما اقعد اغسل فيها
خلصت هالصابونه ورجعت شريت وحده جديده ومستمره عليها
تشد البشره + تشيل الدهنيه
والنتيجه ما عاد اشوف حب
احسن تونر للبشره
اللي يكون مافيه كحول
انا من زمان ما استعمل تونر
بس احسن تونر عجبني هو من كلين اند كلير قبل استعملته
عندي رؤوس سودا على الخشم
استعمل غسول كلين اند كلير للرؤوس السودا مره باليوم بعد ما اغسل وجهي بصابونة الاحماض الصبح
واحط لزقات خشم
احسن نوع جربته ماركة بيوريه
بالنسبه لي احسن كريم مرطب للبشره الدهنيه هو كريم بيبانثين ما يطلع حبوب انا كانت مشكلتي كل ما حطيت مرطب قبيت حب بس من تجاربي هالكريم احسن مهدئ ومرطب للبشره كنت احطه بالنهار وبعد كل وضوء وانا بالبيت
اذا طلعت لي حبه مفاجئه عندي روتين لها
احط على الحبه كريم مضاد حيوي يحتوي على الفيوسيديك اسيد
يكون كريم مو مرهم
مثل كريم فيوسيدين - كريم زيتا - كريم فوديون او كريم فيوسيباكت البرتقالي
وهذا دايم اخذه من الصيدليه مرات
او كريم فيوسيباكت البرتقالي وميزته حتى حلو لتهيج البشره واحمرارها والحبوب الكبار
طبعا كريمات حمض الفيوسيديك احطهم بالنهار وانا بالبيت ولما اجي انام
احط ع الحبه كريم اكرتين 0.25%
هذا يشيل الحبه واثرها ويقشرها
انا حاليا استعمل كريمات وسيروم عشان موضوع الحفر والمسام اللي بخدودي
هذي صوره جماعيه لاغراضي
اللي مكتوب عليه viola هذا سيروم بوتكس احطه اول ما اقعد وبعد نص ساعه احط احط على مكان الحفر والمسام بعد ما ينشف السيروم بوجهي عصره من الكريمين اللي بوسط الصوره جل erase وجل contractubex
اما بالنسبه للعصار اللي على طرف الصوره فهذا جل ديرمونو شريته من تلي سين
احطه بالليل وانام
اما الكريم اللي فوق بالصوره هذا كريم شد بشره من كاثي دالاس احط منه مرات بالنهار مدة ساعتين اول 3 بعدين اغسل منه واحط السيروم و الكريمات الجل حق الحفر
واستعملته قبل مدة شهر هالكريم اللي من كاثي دالاس حسيت خلى وجهي مرتاح وشدود
انا حاليا حيل مستمره على هالكريمات عشان ابي مكياجي بالعيد يطلع حلوو
تعرفين الحفر والمسام تخرب منظر المكياج
اما بالنسبه لبشرتج اذا فيج حبوب
من تجاربي استعملت مجموعة برو اكتف مره وخلصتها
كانت حيل حلوه شالت كل الحب اللي بوجهي
يمدحون مجموعة بيور زون من لوريال للبشره الدهنيه بس ما استعملتها صراحه
سمعت مدح على التونر حق المجموعه والغسول بس ما جربتهم
اما بالنسبه للماسكات اللي جربتهم وحبيتهم
جربت 2 من ماسكات همالايا وكانوا حلوين ويشدون البشره
ماسك الطين وماسك الخيار واللوز
وماسك من نيتروجينا كنت احطه صج كان ينظف
وهم استعملت ماسك طين البحر الميت ماركة beauty secrets
بس حاليا مو لاقيته كان فضيع يشد الوجه وحتى خفف الحفر بوجهي
هذا ملخص مني لتجاربي واللي سمعته
بشرتي دهنيه حيل وقبل 4 سنين اخذت كورس الروكيوتان وبعد فتره سنه رجع لي الحبوب بس مو نفس قبل يعني مرات تطلع لي حبه حبتين واعالجهم ويروحون
بس ابتلشت بالاثار والمسام لكن كانت غلطتي بكورس الروكيوتان كنت ما ارطب بشرتي فجفت وتحفرت
