منو فيكم مثلي يتساقط شعرها ابي مساعده

[سلاسل الذهب]

انا صار لي شهرين شعري حيل يتساقط اخاف استخدم زيت للشعر ويطيح اكثر ابي بس يثقل مولازم يطول ياليت اي وحده تعرف شي تكون اهيه مجربته ونفع معاها تقولي وجزاكم الله ألف خير

 

[((shoOoshoOo))]

تونيك سورسير عجيب لتساقط الشعر

والله يشافي شعرج خيتوو

 

[سلاسل الذهب]

مشكوره يا الغاليه انا قالت لي وحده عنه تمدحه حيل بس قلت بتأكد ما تقصرين عسى عمرج طويل

 

[futooosh]

اول شي لازم تحليل للدم عشان تعرفين اذا فيج نقص بالحديد او نقص فيتامين د
لان نقصهم يسبب تساقط بالشعر

 

[حدي متدلعه]

نقص البروتين والفيتامينات تسبب تساقط الشعر اكلي فواكه
موفقه

 

[Jojo1000]

انا لي سنتين توظفت بشركة بناتها اللهم لك الحمد كلهم حسودين
اخذت كورس كامل علاج سويت تحاليل طلع مافيني شي
طلع كله من حسدهم وعيونهم
ووحده من صديقاتي بالدوام حلمت حلم فسره المفسر قال عندكم بالشركة بنات يحسدون
المهم تركتها خف شوي بس للحين ماله علاج قالي مقري عندي عين وأشد من السحر

 

[Jojo1000]

انا لي سنتين توظفت بشركة بناتها اللهم لك الحمد كلهم حسودين
اخذت كورس كامل علاج سويت تحاليل طلع مافيني شي
طلع كله من حسدهم وعيونهم
ووحده من صديقاتي بالدوام حلمت حلم فسره المفسر قال عندكم بالشركة بنات يحسدون
المهم تركتها خف شوي بس للحين ماله علاج قالي مقري عندي عين وأشد من السحر

 

[منيره آل ثاني]

طالما حسد اقري على عمرج ومافيج الا العافيه

 

[كويت الاناقه]

ان شالله الموضوع هذاا يفيدكم

مـنتجـــات العـــنايـــة بـــالشـــعر شـــاركيـــنا فيــها بالصــــــور

http://www.q8yat.com/t1043798.html

 

[رمادية الهوى]

انااا مثلك يتسسسسساقط شعررري والمشكله استخدم فيتامين
ووقت الدوره بزياده يتسسسساقط ابي حححل

 

[FANA__3]

انا كنت مثلكم شعري يتساقط بالهبل وكنت بالبدايه استخدم زيوت للشعر بس ما فاد معاي بشي لاني بهذاك الوقت كنت استخدم الزيوت بطريقه خطأ وغير ان شعري من النوع الدهني فزاد التساقط عندي اكثر

بعدين قررت اروح لدكتور الجلديه بالمستشفى الحكومي ووصفلي على تونك للشعر وشامبو كان قوامه سائل حيل كأنه ماي وسائل تدليك للشعر ودوا ثاني مثل القطره للشعر وقالي اسوي فحص وطلع معاي نقص بالحديد فوصفلي على حبوب حديد

استمريت بالعلاج لمدة حوالي ست اشهر والحمدلله خف التساقط بشكل كبير بعدين شفت دعايه اعلان تونك سن بيرست sun-burst الصيني اللي يطلع بقناة فتافيت فقلت اجربه فوقفت علاج دكتور الجلديه واستخدمت تونك سن بيرست واستمريت عليه لمدة 6 اشهر يعني لغاية ما خلصت العبوات عندي والحمدلله وقفلي التساقط بشكل كبير وايد


بعد ما خلصت التونيك الصيني قررت اروح صوب المواد الطبيعيه وخاصه ان نسبة التساقط خف وايد وكنت ابي شي يحافظلي على هالشي فاستخدمت وايد خلطات طبيعيه وبالأخير استقريت على غسول منقوع السدر فيه بصل ومنقوع الحلبه والمراميه ومرتاحه عليه بالاضافه لهالغسول استخدم معاه تونك روز الماري الايراني مع حبوب حديد واذا توافر عندي حبوب فيتامينات للشعر استخدمه


طريقة استخدام الغسول :


تييبين سدر يمني اصلي اللي لما تخلطينه بالماي يصير لزج ويطلع رغوه ولما تنقعينه يوم كامل يصير ثقيل .. تنقعين السدر يوم كامل مع بصل (3 كوب ونص ماي حار مع 3 او 2 ونص ملعقه كبيره سدر وبصل كبير) + والحلبه تنقعيه بروحه بالماي كميه نصف كوب + مع نصف كوب منقوع الميراميه

(اذا ما حصلتي سدر اصلي في عطار يمني في سوق الديره المباركيه صوب اللي يبيعون خامات الدشاديش يم مجمع المباركيه وسرداب دعيج يبيع نوعيه زينه ترغي اسمه على ما اظن شركة العنقود الاخضر للعطاره وهذا رقمهم 22413306)


بعد ما تنقعينهم يوم كامل تصفينهم بقطعه خام ما تبينه (مثلا غتره قديمه) وتاخذين ماية الخلطه بدون البودر بس الماي

بعد ما تغسلين شعرج بالشامبو ييبي طشت صغير وحطي الخلطه فيه وحركيه بإيدينج علشان يطلع رغوه ويصير اثقل بعدين صبي الخلطه على شعرج واذا تبين تدلكين شعرج فعلى راحتج المهم توصل الخلطه لفروة الراس وبما ان الخلطه ثقيله فراح يظل فتره على فروة الراس قبل لا ينزل وصبي الغسول اكثر من مره على راسج لغاية ما تحسين ان شعرج تشبع بالغسول وبعدين لبسي كبوس بلاستيك وخلي الغسول على راسج فتره حوالي ربع ساعه او اكثر على راحتج وبعدين شطفي شعرج بالماي وطلعي


عيب الغسول انه يخشن الشعر لأن السدر معروف انه يخشن السدر .. وكحل لهالشي استخدمي بلسم على اطراف الشعر ومو فروة الراس علشان ينعم الشعر


انا استقريت على هالغسول وبطلت استخدم الخلطات لانه شي سريع وسهل ويستخدم على الفروة المهيئه لاستقبال والاستفاده من الخلطات .. لان لما تغسلين شعرج تكون فروة شعرج نظيفه ومساماته مفتوحه وهذي اهيه البشره المناسبه لاستخدام واستقبال اي خلطه عليه .. يعني علطول الشعر راح يستفيد من مكونات الغسول ويعطي نتايج سريعه بعكس لما تحطين الخلطات والزيوت على فروه مغسوله قبل يوم او يومين اهني البشره ما تستفيد بشكل كبير من الخلطات والزيوت ويعطي نتايج بطيئه



الحين اهم شي من هالكلام كله انج اول شي تسوين تحليل وتعرفين المشكله ولما تتحكمين بنسبة التساقط ويخف عندج التساقط بنسبه كبيره اتجهي للخلطات والزيوت والغسولات الطبيعيه + استخدام فيتامينات الشعر + التونيكات او البخاخات او الانبولات الطبيعيه ومو الصناعيه ابتعدي عنها نهائيا + استخدمي شامبو طبي او طبيعي من اللي موجود بالعطار مثل شامبو جنين القمح اللي علبته بيضه من انتاج شركة كويت شوب وهذا موقع الشركه

شامبو جنين القمح



اهم نقطه انج ما تستخدمين الخلطات والزيوت والغسول الا لما التساقط يخف عندج بنسبه كبيره ويصير طبيعي لان الشعر المتساقط يكون تعبان وما يتحمل هالاشياء فمتى ما خف التساقط عندج ابدي استخدمي هالخلطات


واذا ما تبين تستخدمين الغسول وتبين تستخدمين الزيوت والخلطات لازم تستخدمينه بطريقه صحيحه


طرق استخدام الخلطات والزيوت:


1- لازم يستخدم على فروة نظيفه ولو تستخدمين على شعر مغسول بنفس اليوم ويكون ناشف مو مبلل فيكون احسن

2- يوضع فقط على الفروه ولمدة ساعتين

3- بالنسبه للزيوت يوضع بضع قطرات على فروة الراس ومو كل الشعر يعني لا تغرقين شعرج بالزيت بس حطي شويه على فروة الراس وافضل طريقه لتوزيع الزيت على الشعر انج تييبين قطن دائري وحطي عليه شوية زيت وبالقطن مرريه على فروة راسج وسوي تدليك خفيف لفروة الراس ومو الشعر

4- اذا شعرج من النوع الدهني ينصح انج تبتعدين عن الزيوت لانه راح يزيد التساقط عندج

5- قبل لا تستخدمين اي خلطه على شعرج سوي بحث في الغوغيل عن اضرار هالماده مو بس تدورين عن الفوائد .. مثلا اذا الخلطه فيها بيض شيلي منها البيض لان البيض فيها ميكروبات وجراثيم فيمكن مع مرور الوقت يسبب فطريات وميكروبات للشعر ويمكن يسبب الثعلبه .. نواة التمر فيها نسبه عاليه من الرصاص واذا دخل في الجسم يصعب انه يتخلص منه فيؤدي للاصابه بالامراض .. المسمار او القرنفل يسبب تهيج الأنسجة وتلفها عند استخدامها لفترات طويلة (قريت بالنت انه في وحده صلعت لما استخدمت المسمار) وغيرها من المواد الثانيه الضاره للشعر فقبل لا تستخدمين اي شي لشعرج دوري على الاضرار قبل الفوائد


آخر نصيحه انصح انج تغسلين شعرج كل يوم وترك وخاصة اذا شعرج دهني .. واللي تقول ان كثرة غسل الشعر يسبب التساقط فهالكلام اعتبره غير صحيح .. لأني لاحظت ان شعري يتساقط اكثر لما اغسله بعد يومين او اكثر




​

 

[رمادية الهوى]

ربي يسعدك ماقصرررتي ياقلبي
وان شاءالله اجرب هالطريقه

 

[FANA__3]

العفو ما سويت شي وان شاء الله تستفيدين من تجربتي ويتشافى شعرج

مثل ما قلت اهم شي من كل هالكلام انج تسوين تحليل وتعرفين السبب وبعد ما يخف عندج التساقط ويرجع طبيعي ابدي استخدمي الخلطات او الزيوت او الغسول اللي يريحج

في غسول ثاني ما يخشن الشعر وايد مثل السدر .. كنت بالبدايه استخدم الغسول وبعدين استقريت على غسول السدر لانه السدر يخلي الشعر يطلع كأنه كثيف

الغسول الاول اللي كنت استخدمه .. كنت استخدم البصل مع الحنه والسدر (حوالي 2 ونصف ملعقه كبيره حنه وملعقه سدر او احيانا ما استخدم سدر ) + منقوع الحلبه + منقوع الاملج (لانه معروف انه يطول الشعر وينعمه) + منقوع الجرجير (لعلاج تساقط الشعر - تحطين الجرجير مع شوية ماي بالخلاط وتنقعينه يوم كامل بالثلاجه وتصفينه وتستخدمين بس الماي)



​

 

[Lameez]

حبيبتي انا كان عندي تساقط شعر مزمن خصوصا ان عندي فقر دم ونقص فيتامين د. قبل سنة تقريبا وصل الموضوع ان قام يحت خصل خصل .. كنت ابجي تحت الشاور... رحت حق بووتس وعطوني Proirn N. وقف التساقط خلال ايام نتيجته مو طبيعية وسريعة والحلو فيه انه يعالج التساقط ايا كان السبب. سألي الصيدلاني عنه )

 

[ام راكان66]

استخدم معاه تونك روز الماري الايراني مع حبوب حديد واذا توافر عندي حبوب فيتامينات للشعر استخدمه
الله يسعدك اختي كيف طريقة الروز ماري بالظبط لاني لما اشتريته قالي البايع احطه مع زيوت ثانيه انتي كيف طريقتك

 

[ام راكان66]

استخدم معاه تونك روز الماري الايراني مع حبوب حديد واذا توافر عندي حبوب فيتامينات للشعر استخدمه
الله يسعدك اختي كيف طريقة الروز ماري بالظبط لاني لما اشتريته قالي البايع احطه مع زيوت ثانيه انتي كيف طريقتك

 

[FANA__3]

اتتي شنو شريتي التونك اللي عباره عن دوا وﻻ عشبة الروز ماري؟

انا استخدم التونك وينحط على فروة الراس مرتين الصبح وبالليل واذا تبين تستخدمين بعد ما تغسلين شعرج بخمس او عشر دقايق فيصير

اما العشبه فما اعرف طريقة استخدامه مع الزيوت

 

[FANA__3]

بنات لقيت طريقه علشان احمي شعري من الجفاف والخشونه اللي يسببه السدر والماء والشامبو بس قبل لا اقولكم الطريقه بقولكم على احد الاسباب الرئيسيه لتساقط الشعر


احد الاسباب الرئيسيه للتساقط اهو التشابك والجفاف اللي يسببه الماي والشامبو لانه لما يتشابك شعرج وتمشطينه راح تصير عمليه شد وسحب خلال التمشيط واذا الشعره ضعيفه علطول راح تطيح وهالشي اكتشفته لما كنت بالمتوسط


لما كنت بالمتوسط كان شعري يتساقط ونوعية شعري لا خشن ولا ناعم وبسرعه يتشابك .. فمره من المرات بنهاية الاسبوع نمت عند بيت وحده من اهلنا .. ونسيت اخذ مشطي فأخذت مشط امها وكان شكله غريب .. اسنانه ما كانت سيده مثل باقي المشوط .. اسنانه كانت فيها تعرجات غريبه .. واول مره اشوف اسنان بهالشكل .. ولما بديت امشط شعري صارت لي صدمه عجيبه .. المشط وبكل بساطه وسهوله فك لي التشابك بشكل سحري لدرجة ان المشط كان ينزل علطول لتحت بدون اي عوائق .. اهو من نفسه فك التشابكات .. وهذا اهو السر في كون المشط بأسنان غريبه بتعرجات لان هالتعرجات وظيفتها انها تفك التشابكات .. ولما خلصت كانت المفاجئه الكبرى ما طاح من شعري الا شعره او شعرتين .. حيل انصدمت وحبيت المشط .. بس للأسف ما سألتها من وين شرت المشط والحين لو اسألها ما راح تتذكر .. والمشط دورت عليه بكل مراكز التجميل وما حصلته .. جد كان مشط سحري ويا ليت لو اقدر احصله مره ثانيه


فالتشابك احد الاسباب الرئيسيه للتساقط وعلشان نحل هالشي لازم نرطب الشعر علشان نخفف التشابك عنه .. والزيوت افضل المواد لترطيب الشعر


انا استخدمت زيت جوز الهندي الطبيعي علشان ارطب شعري وما شاء الله حيل ناسبني ونعم شعري حتى مع استخدامي للسدر نعمه وما خلاه يصير ناشف مثل قبل .. واول مره اشوف زيت يعطي مثل هالنتيجه .. يعني انا استخدمت وايد زيوت ومن بينها زيت الناجيل اللي ييي بغوطي اخضر وبنفسجي بس مثل هالزيت ما شفت يمكن لانه طبيعي ومو مثل مال الشركات اللي يحطون بالزيت مواد وزيوت ثانيه بالعلبه علشان جي ما يعطي النتيجه المطلوبه ويخرب لنا الشعر بدال ما يصلحه .. واللي تبي الزيت تراسلني على الخاص او اتدش على هالحساب بالانستغرام azada11


طريقة ترطيب الشعر:


انا بعمري ما فكرت استخدم زيت لان الزيوت ما تناسبني بس لان السدر نشف شعري فدورت على طريقه علشان انعم فيه شعري وارطبه فقلت خل استخدم زيت جوز الهند الطبيعي اللي موجود عندي


اول شي يبت مرش الماي ورشيت الماي على شعري من غير ما يحوش فروة الراس لان الشعر الرطب يمتص الزيت بسرعه بعدين حطيت الزيت على ايدي ومسحت فيه على شعري من فوق لتحت من غير ما احوش الفروه .. وحطي الزيت المده اللي تبينها ويمكن تحطينه بالليل للصبح ومو شرط تغطين شعرج لانه ما نحتاج نوفر حراره لتفتح المسامات لان الزيت راح يكون على الشعر مو الفروه



الـنـتـايـج:


ما شاء الله شعري صار حيوي وصحي وقلت التشابكات وصار سهل تمشيطه حتى التشابكات صارت سهله انها تفكك مو مثل قبل اقعد ساعه لافككه لما كنت استخدم السدر من غير ما ازيت شعري .. وغير جذي التساقط اقول خف بنسبه اكبر واكبر لان التشابكات قلت وصار سهل تمشيطه فبالتالي التساقط خف وايد


بعد ما شفت هالنتيجه دورت بالنت عن فوايد زيت جوز الهند واكتشفت ان زيت جوز الهند من فوايده انه يستخدم كبلسم طبيعي للشعر ويرطب الشعر وينعمه والدليل شعور الهنود ناعمه وصحيه من زيت جوز الهند اللي يستخدمونه 24 ساعه حتى بعد ما يغسلون شعرهم يمسحون بزيت جوز الهند على شعورهم من غير ما يحوشون الفروه وهالشي شفته بعيني .. الفراش اللي يشتغل بمكتبنا يحط 24 ساعه زيت جوز الهند وما شاء الله شعره اسود وناعم مثل شعر شاروخ خان



وهذي بعض فوائد زيت جوز الهند يبته لكم من النت:



زيت جوز الهند يعد من أكثر الزيوت التى تستخدم لتنعيم الشعر حيث أنه يستخدم كملطف او بلسم طبيعى للشعر حيث انه يجعل الشعر مرن وغير متشابك كما أن زيت جوز الهند يناسب جميع انواع الشعر (جاف - دهنى - عادى ) كما هو مناسب لمعالجه الشعر وتغذيته ......... فزيت جوز الهند هو الزيت رقم واحد فى قائمة الزيوت الطبيعية التى تفيد الشعر وتكون غنيه بالعديد من الفوائد التى تجعلكى تملكين شعر جذاب وجميل لان:

زيت جوز الهند يحفز نمو الشعر حيث انه يقوى جذور الشعر

زيت جوز الهند يحافظ على فروة الرأس من القمل ويحارب ويقضى على القشرة حيث ان له خصائص مضادة للجراثيم والفطريات

زيت جوز الهند يرطب الشعر الجاف

زيت جوز الهند يضيف اللمعان والتألق والنعومة على الشعر.

زيت جوز الهند يمنع تكسر وتقصف الشعر ويطول الشعر.

زيت جوز الهند يبطئ فقدان الشعر.

زيت جوز الهند يقلل بشكل ملحوظ من فقدان الشعر للبروتين الذى ينتجه مما يعرض الشعر للتلف حيث ان الباحثون اكتشفوا أنه هو الزيت الوحيد القادر على محاربة تلف الشعر نتيجه عدم انتاجه للبروتينات الطبيعية به.

زيت جوز الهند يحتوى على حمض اللوريك وهو عنصرا رئيسيا فى زيت جوز الهند فحمض اللوريك هو من الأحماض الدهنية التي تغذى بروتينات الشعر مما يساعد في حماية جذور الشعر ومنع تكسر الشعر حيث كشفت دراسة أجريت في عام 2003 أن زيت جوز الهند يمكن أن يقلل أو يمنع تساقط الشعر لاحتوائه على البروتين مما يجعله أكثر فعالية من الزيوت الاخرى

زيت جوز الهند يساهم فى عدم حدوث الشيب المبكر وتحويل لون شعرك الى اللون الرمادى

زيت جوز الهند هو مصدر غني لفيتامين e وفيتامين k والحديد. هذه المواد الغذائية هي ضرورية للحفاظ على تألق شعرك ونعومتة. فيتامين e بشكل خاص يساهم في القضاء على قشرة الرأس، والذي هو السبب الرئيسي لتساقط الشعر ونمو الشعر إعاقة.

زيت جوز الهند يحسن الدورة الدموية دلكي فروة رأسك بزيت جوز الهند مما يعمل على تنشيط الدورة الدموية




بالنسبه للفروه:



اذا تبين تحطين الزيت على فروة راسج فلازم تراعين هالأشياء:



1- الفروه لازم تكون نظيفه حيل ومو دهنيه .. اذا كانت دهنيه راح يتساقط شعرج بزياده.

2- تحطين بضع قطران على فروه الراس .. يعني لا تغرفين فروة الراس بالزيت لانه الفروه راح تختنق وتطيح فحطي شويه واحسن طريقه لتوزيع الزيت اما عن طريق القطره او القطن المدور .. اما الشعر فلج حرية الاختيار بكميه الزيت اللي تبين تحطينه على شعرج حتى لو تبين تغرقينه بالزيت فما راح يأثر.

2- تحطينه على شعرج لمدة ساعتين فقط علشان لا تختنق الفروه ويتساقط شعرج.

3- تغطين شعرج بكبوس بلاستيك علشان توفرين الحراره داخل الكبوس لتفتح المساسات ويتشرب الزيت.

4- افضل وقت لوضع الزيت على فروة الراس بعد غسل الشعر .. لانه الفروه تكون نظيفه ومو دهنيه .. وعندج خيارين للوقت اللي تحطين فيه زيت على الفروه .. يا اما تحطينه بعد ما ينشف شعرج .. او انج تحطينه وشعرج بعده رطب ومبلل .. وخبراء الشعر ينصحون انه تحطين الزيت وشعرج بعده رطب لانه المسامات تكون مفتوحه فراح يتشرب الزيت علطول .. اما اشلون تحطين الزيت على فروة راسج واهو مبلل فهذا اللي ما اعرفه .. اعتقد افضل طريقه انج تحطينه وتوزعينه عن طريق القطره واذا ما عندج قطره اشتري من الصيدليه أي دوا ييي معاه قطره وغطي الدوا واستخدمي القطر ه او اشتري تونك الروز ماري الايراني اللي موجود بالعطار ييي معاه قطره (راح احط صورته تحت) .. اما بالنسبه للتدليك فما انصحج تدلكينه الا اذا كان الشعر ناشف اما اذا كان مبلل فيفضل ما تدلكينه لان الشعره تكون رقيقه والمسامات تكون مفتوحه فإذا دلكتي فروة الراس يمكن يطيح شعرج او يمكن لأ ما ادري مو متأكده من هالشي عالعموم جربي مره تدلكينه ومره لأ وشوفي اللي يناسبج




خـلاصـة الـكـلام:



1- التزييت قبل غسل الشعر وايد وايد وايد مهم للشعر علشان يرطب الشعر ويحمي الشعر من الجفاف والخشونه والتشابكات اللي يسببه الماي والشامبو .. ولكم حرية الاختيار بتزيت الشعر فقط .. أو تزييت الشعر مع الفروه مع بعض بس اهم شي الشعر ومو مهم اذا ما زيتوا الفروه لان مو الكل يناسبه الزيت وخاصه ذوات الشعر الدهني .. واهم من هالكلام حاولوا تستخدمون زيت طبيعي وخاصه للي ما يناسبهم الزيوت لان مثل ما قلت زيوت الشركات ما تناسب الكل اما الطبيعي فيناسب الكل واكبر دليل انه ناسب شعري واذا تبون زيت جوز هندي طبيعي حطيت فوق طرق الحصول عليه


2- اللي عندها تساقط يمكن يكون جفاف الشعر والتشابكات اهو اللي يسبب لها التساقط فخل تتبع طريقتي وتزيت شعرها من غير الفروه وتشوف اذا التساقط راح يقل معاها او لأ .. بالبدايه زيتي بس الشعر من غير الفروه واذا شفتي نتيجه وحبيتي تحطينه على فروة الراس فراعي الارشادات اللي حطيته بالنسبه لطرق وضع الزيت للفروه.


3- استخدموا شامبو ينعم الشعر .. انا استبدلت شامبو جنين القمح من شركة كويت شوب بشامبو ذيل الحصان من نفس الشركه








صورة قطرة الروز ماري









​

 

[ام راكان66]

اتتي شنو شريتي التونك اللي عباره عن دوا وﻻ عشبة الروز ماري؟

انا استخدم التونك وينحط على فروة الراس مرتين الصبح وبالليل واذا تبين تستخدمين بعد ما تغسلين شعرج بخمس او عشر دقايق فيصير

اما العشبه فما اعرف طريقة استخدامه مع الزيوت

انا اللي عندي التونك نفس اللي في الصوره بس لاحظت لما احطه شعري ينشف ويخشن هل عادي كذا ولا ماناسبني

 

[FANA__3]

انا اللي عندي التونك نفس اللي في الصوره بس لاحظت لما احطه شعري ينشف ويخشن هل عادي كذا ولا ماناسبني

التونك ينحط بس على الفروه ما ينحط على الشعر

واذا شعرج صار ناشف وجاف وخشن اتبعي طريقتي وزيتي شعرج بزيت جوز الهند الطبيعي .. والطريقه والخطوات حطيته بردي فوق