الزواج من رجل مطلق لديه ابناء

[بسكم لقافه]

:eh_s(11):انا ملجت صارلي تقريبا 3 شهور من رجل مطلق ولديه خمسة ابناء بحضانته . وطبعا استخرت قبل الموافقه . في بدايه الملجه تحسفت وخفت من اعياله وحسيت مسئوليه لانهم راح يكونون عندي ولكن الحين شوي اقتنعت بالوضع , ابي رايكم؟ نصائحكم ؟

 

[د.أحمدالكريباني]

السلام عليكم
هلا استاذه اسمحي لي بأعطائك هذه المشوره

انتي ملجتي وقبلها استخرتي

انتي اخذتي راي اللي افضل مننا كلنا توكلتي على الحي القيوم وصليتي استخاره
واللي يستخير يوجهه ربي سبحانه للصواب ويبعده عن اللي مافيه خير
لذلك ماتحتاجين اي راي بعد الله
واحمدي ربي اللي جمع بينكم
وعمر عياله مايكونون عائق
لذلك ابتعدي عن بعض النصائح بعد ماصليتي الاستخاري
وربي يتمم بينكم بالخير كله

وهذي خيره من رب العالمين غيرج تتمنى تتزوج حتى لو عنده عشرة اطفال
الاولاد من زوجه ثانيه مايعيقون استمرار الحياة الزوجيه ومبروكين باذن الله
ودمتي بسعاده

 

[ashwaq1]

السلام عليكم انا برايي لا تفكرين اتييبين عيال الحين الا لما تكونين متاكدة اميه بالاميه انج راح تستمرين مع زوجج وعياله
هل تقدرين تتحملين او لا
خمسه مو شويه ولج الاجر اذا ربيتيهم صراحه وصارو مثل عيالج بس لو مو مقتنعه من البدايه حرام تييبين ياهل وتالي تطلقين نطري على روحج وشوفي وضعج
والله يسهل دربج ان شاء الله وسخر زوجج وعياله لج وتتوفقين بهالزواجه ودايم ادعي باخر الليل بالصلاة ان الله يتمم عليج هالزواج وتستمرين فيه ان شاء الله

 

[زوجة حياتي]

كل واحد وظروفه رفيجتي متزوجة من رجل مطلق وعنده عيال شافت الويل من طليقته وعياله

يارب أكون زوجج غير وتتوفقين بحياتك وتعيشون بسعادة

 

[keka89]

فكري عدل ترى خمس اعايل وايد هذا يبي خدامه مو زوجه ديري بالج ترى والله باجر تتحسفين
عاد الا اذا غني حيل حيل وحلو وشكله صغير وخاطرج فيه وعنده خدامه او ثنتين ومارح يقصر معاج هذا شي ثاني

 

[بسكم لقافه]

امهم بشكل عام ماتدري عنهم ولاطالبت بحضانتهم بس ابوهم يوديهم لها يوم واحد ويردهم عشان لايحرمهم منها

 

[بسكم لقافه]

فكري عدل ترى خمس اعايل وايد هذا يبي خدامه مو زوجه ديري بالج ترى والله باجر تتحسفين
عاد الا اذا غني حيل حيل وحلو وشكله صغير وخاطرج فيه وعنده خدامه او ثنتين ومارح يقصر معاج هذا شي ثاني

لا ميزانيته على قده ماعنده زود وخدامه وحده بس بالبيت وعمره 40 وانا عمري 32

 

[keka89]

الله يوفقج معاه اذا مقتنعه

 

[مدّهره !]

يختي أنتِ أووردي ملكتِ رايناا مو مغير شيء بالعكس كثرت الآراء تسبب لك تذبذب مو فاايدتك

عموماا الزواج توفيق من الله أولا وثاانياا يعتمد ع شخصية الرجل ماله علاقه عنده عيال او لا

ربي يوووفقك

 

[اسيره.الظلام]

اختي نصيحه مني لج لا تتزوجين واحد عنده عيال ترا باجر ما راح تتتهنين بحياتج الشخصيه معاه وحتي خصوصياتج تنحرمين منها انا صارلي هالموقف وبعدها انفصلت مجرد خطبه فكرت عدل وكلن بطريجه الحين

 

[Miss Basma ..}]

كلمتيه عن رغبتج بأنج تجبين عيال ؟
بعضهم ما يبون و إلا بس يجيبون طفل واحد من الزوجة الثانية

 

[قهوه الليل]

الله يوفقج ان شاء الله ويكتب لج الي فيه الخير

 

[حصة2010]

حبيتى الله يوفقج يا رب

 

[mrs.abk]

أختي ما أنصحج تكملين في هالزيجة .. نفسيا بتتعبين حتى لو هم طيبين .. بتتحولين من زوجة لخدامة خاصة انه ما بييب خدامة ..

 

[mathic.planet]

انتي نفس حالتي لاتعطين اهتماماتج كلها لهم خليج عاديه يعني لاتتدخلين بمشاكلهم ودايما خلي زوجج هو الي يدير باله عليهم يعني مرات بنت زوجي تناديني أقول لزوجي انا تعبانه شوف بنتك شنو تبي يعني هالامور خلي زوجج يشاركة في التربيه بس المشاركة الأكبر تكون منه هو لان انتي بتعيشين لزوجج ولنفسج وان كبروا العيال ماراح يدرون عن شي لاتتعبين وايد وخليه هو يذاكر لهم بعض المرات وخلي كلامج معاه حبيبي الله لا يهينك ويخليك لي سمع لولدك او شوف شنو يبي لان الزوج لايحب الأوامر
وربج ولي التوفيق

 

[تمره بحلاوتها]

الله يوفقج ويهنيج
دام انج توكلتي على الله لاتحاتين
اهتمي بنفسج وبزوجج والعيال الله وابوهم حافظينهم مااقولج طنشيهم لاااا بالعكس اكسبيهم صيري اختهم الكبيره ولج اجر فيهم صغار ومالهم ذنب بانفصال والديهم
لاتشتطين بالاهتمام فيهم عاساس تكبرين بعين زوجج
قومي بواجباتج للزوج واخذي حقوقج منه والعيال بيصيرون اخوان عيالج ان شاءالله وسندهم
العيال بركه الله يخليهم له ولج والله يهنيكم ويسخرلكم عباده المؤمنين