هل لديكم طفل يعاني من التوحد- خلونا نتجمع

[ناني سيكرتس]

هاي بنات اشلونكم شخباركم سوري على القطعه بس الدنيا تلاهي
اشلون البزران عساهم بخير
مركز الخرافي رسومه اذا بس حق فتره الصيف من 1-6 لي 1-9 ب50 واذا تبين حق السنه كامله 100 يعني رسومهم حلوة وشكلي بدخل حبايبي لان ماكو غيره الظاهر
مادري اشفيني على هالأسئله بس في وايد شغلات ببالي علشان اعرف اذا حياتي طبيعيه او بس انا فتحملوني ماعليه اختكم الصغيره(حدي بيبي)
اشلون علاقتكم مع ازواجكم تمارسون حياتكم طبيعي والا حاسين في فرق؟؟ بعاد عن بعض والا مشكله عيالكم قربتكم اكثر؟؟ تطلعون مع بعض والا لا؟؟ انتي تمارسين حياتج الاجتماعيه عادي؟؟ يخليج تطلعين مع صديقاتج او لا؟؟ مخليج تستمرين بحياتج العمليه او الدراسيه والا طلب منج تهدين كل شي وتتفرغين حق ولدج او بنتج؟؟ وسوري على هالسؤال اشلون علاقتكم الحميمه؟؟ يساعدج على ولدج وبنتج والا مخليه عليج تتحملين مسئوليته؟؟ ادري طولت ومصختها بس صج صج محتاجه اعرف اشلون عايشين حياتكم لاني انا مو عارفه اشلون اتصرف بحياتي واذا جاوبتو على اسألتي راح اجاوب عليها
تحياتي للجميع وعسى الله يحفظ ويشافي عيالنا

شوفي حبيبتي بالنسبه لي اول الايام من دريت عن حالة ولدي اعتفست حياتي الاجتماعيه والشخصيه والحميميه, بس بعد شهرين من العفيسه ردت حياتي عاديه, بس شنو قللت الطلعات, واذا بغيت اطلع اول انوم عيالي كلهم وبعدين اطلع, والزوارات ما قمت اروح وايد لان تعودت عالقعده, بس الحين احسن تحسن علي الوضع.
اذا على ريلي اشوا انه مساعدني وان كلم اهله عشان بالزواره لا يعطون ولدي كاكاو وحلاو وهالخرابيط لان تدرين انه وضع خاص ما يقدر ياكل من هالسوالف, وانا بعد ماقصرت خذيت روب وعصير وبطاط من الي ياكله ولدي الحين ووديتهم بيت حمولتي عشان اذا ولدي يوعان عطيته منه وخليت باجي الاكل عندهم, وبعد الحين قمت اغدي عيالي بالبيت قبل لا نزور عشان ياكلون مع اخوهم الكبير وعشان اخلطله الاكل مع الفيتامينات..

وبس, ايه صج ولدي الحين قمت اعامله عادي حاله حال اخوانه عشان ما يحس انه مختلف عنهم بس لما اكلمه اكلمه بطريقه خاصه ولا الباجي كلهم نفس الشي..

تعبت..

 

[ناني سيكرتس]

والله رسوم الخرافي وايد ممتازة ومعقوله ..
انا بدخل ولدي التربية النموذجية .. تصدقون سألت عن رسومها قالوا لي 160 .. اليوم رحت آخذ الأوراق صارت 190 :eh_s(14)::eh_s(14)::eh_s(14):
صج احتريت .. شصاير شهر واحد بهالسعر والوقت مو وايد .. من 8:30 إلى 12 .. جنة شوية ؟؟
طبعا هذا شامل تعديل السلوك والنطق والرحلات .. قبل كنت مفكرة أدخله شهرين .. الحين :eh_s(14):حتى الشهر قاعدة أفكر فيه ..

اشدعوه 160 ولا 190 اي شي, ليش كل هذا عشان اليهال حاله خاصه, والله نصب, حرام عليهم هذول حاله خاصه مو تجاره..

 

[ناني سيكرتس]

:0bee2e8d89:واااااااااااااااي آنااااا حديييييي مصدووووووومة :0bee2e8d89:
تصدقون زوجي اليوم الصبح كان قاعد يكمل أوراق المجلس الأعلى ... ولا يشوف أبو عنده 3 أطفال فيهم توحد ..
قعدوا يسولفون .. جان يقوله ريلي الله يكون بعونكم 3 يهال فيهم توحد ..
جاااااان يقول حق زوجي المفااااااجأة :050103nbh_prv:
تصدق ولا وااااحد فيهم فيه شي !!!!!!!!!!!!!!!!
بس سويت لهم واسطة عشان أطلع لهم تقرير تدري ديرتك جذي .. انا استفيد أحسن من الغريب .. معاشات تنزل لهم .. قرض البنك المركزي اذا بطلع ببيت يزيد 5 آلاف ... مدارسهم تندفع !!!!!!!
تخيلوا وهالكلام جدام الموظفة .....
وااااااي انا انصعقت ؟؟؟؟!!!!!!!
ابييييه شنو هذا ّّّّّّّّ؟؟؟؟؟؟؟؟؟:0bee2e8d89:
أروح أفاول على عيالي عشان الفلوس ؟؟؟ فيه ناس جذي ؟؟؟؟؟
الحمدلله والشكر الحمدلله والشكر ...​

من صجج اكو واحد جذيه, امبيه اشفيهم الناس ينوا عشان الفلوس..
لا حول ولا قوة الا بالله..

 

[ناني سيكرتس]

بنات شدعوه و لا سؤال سألته أحد جاوبني غير مره وحدة؟ ما عليه أعيد السؤال الفيتامينات اللي من ريزلتس شلوون أحصلها؟ و فيه مكان ثاني يبيع أشياء تفيدنا؟ و الدوره متى إتفقتوا تكوون؟أنا وياكم و أرجو إنكم تتقبلوني بالجرووب معاكم و ماجوريين

حبيبتي الفيتامينات على ما اعتقد بس من ريزلتس, او تقدرين تطلبينهم من امريكا على قول البنات انا ما ادري, المهم تروحين ريزلتس وتورينه ورقه الفيتامينات واهو يعطيج اياهم وتشترينهم عادي..
بس جنه لازم الطبيبه تكتبهم لج عشان تعرفين متى واشلون ياخذهم الياهل شنو الي يفيده..

 

[ناني سيكرتس]

بنات تكفون سؤال ضروري .. انا توه زوجي عطوه موعد حق مركز الوراثة ...
بس نسى يسألهم سؤااااااال مهم هل أييب ولدي معاي ؟؟ ولا أنا والأبو بس ؟؟؟؟؟

سنع لازم الولد لان هناك راح يشخصون حالته وراح يسالونج اسئله عنه, حضور الاب مو ضروري, لا وبعد ما تخلصين من الدكتور راح يعطونج موعد حق الدكتور النفسي عندهم لان لازم الي يشخص حالته الولد دكتورين عادي ونفسي..
بس اذا تبين اخذي ابوه احين عشان يصفط السياره ويحوس بالاوراق ..:dddds:

 

[ناني سيكرتس]

سنع ومنع شنو مركز الوراثه ووين ساير ؟؟؟

مركز الوراثه يم مستشفى الولاده مال الصباح..

 

[ناني سيكرتس]

ريمه : ترى المجلس الاعلى يعطي حق كل اليهال اللي فيهم توحد و صفات توحد

سنع : حبيبتي لازم احمداني يروح علشان راح يسحبون منه دم الله يعينه افقير

ليش انا يوسف ما اسحبو منه دم ولا سووله اي تحليل كلش ملش..

 

[ناني سيكرتس]

متى موعد دكتوره فاطمه..؟

ياايمان ردي علينا..

 

[Miss_Hopless]

حتى انا ماسحبو من اليهال لا دم ولاشي

 

[wathoo7a]

بنات مشكوريين وايد وايد و سنع و منع صج إسم على مسمى سنعه ماشالله عليج و ريمه الكويت و إيما نوفا مشكوريين خواتي و ناطره الوقت اللي نجتمع فيه مع بعض ما أدري متى قررتوا؟ و بعدين بسأل شلون دربتو عيالكم على تفريش الأسنان؟ و نفخ فقاقيع الصابون ؟مع العلم إن ولدي عمره 3 سنوات و 3 أشهر

 

[ريمه الكويت]

هلا بنات شلونكم وشلون عيالكم

انا بعد طلبو تحاليل دم عشان يجيكون على الغده الدرقيه ونسبه الحديد والزنك بالدم لان على كلام الدكتوره نقصها اهو ياثر على الذكاء والتركيز بس بعد ماسويتهم بس البارحه بديت بالفيتامينات ومانعته من الكاكاو والحلاو والشبس وهالسوالف وانشالله خير

 

[سنع ومنع]

بنات مشكوريين وايد وايد و سنع و منع صج إسم على مسمى سنعه ماشالله عليج و ريمه الكويت و إيما نوفا مشكوريين خواتي و ناطره الوقت اللي نجتمع فيه مع بعض ما أدري متى قررتوا؟ و بعدين بسأل شلون دربتو عيالكم على تفريش الأسنان؟ و نفخ فقاقيع الصابون ؟مع العلم إن ولدي عمره 3 سنوات و 3 أشهر

بعد عمري مشكورة وما قصرتي .. واذا بغيتي أي شي انا موجودة ..
بالنسبة لتفريش الأسنان الحضانة وااااااايد ساعدتني .. ونفخ الفقاقيع للحين قاعدة أحاول معاه ان اهوا ينفخ .. استاذ تعديل السلوك قال لي نفخي بالهوا ووريه ان ماكو مفايدة من النفخ بالهوا بعدين نفخي بالققاقيع .. و نفخي على كلينكس ووري انه يتحرك بعدين خليه اهوا يحاول .. بعدين نفخي بالفقاقيع

 

[سنع ومنع]

Emanova مشكووووووووورة على الموقع ما الألعاب حدددددددده عجيب .. مو طبيعي .. وايد وايد وايد حلو وألعابه تعليمية بحتة .. بقعد عليه قعدة سنع أطلب حق حبيبي اللي يفيده

 

[Miss_Hopless]

هاي بنات اشلونكم؟؟
انا الصراحه قاعده اعاني مع اليهال مو قاعدين ياكلون كلش وحتى لو كلو لقمتين 3 وبس اكتفو مو عارفه شسوي معاهم ومو اي اكل ياكلون شغلات معينه وقليله
شورو علي يالطيبين

 

[ريحانة_14]

وضوحة حبيبتي .. مسكي إيدج ولدج وحطي باطن كفه مقابل حلجج ونفخي عليه شوي شوي خليه يحس إن من هالعضو ( الفم ) يطلع هوا ناعم ورقيق .. وبعدين مسكي إيده وحطي باطن كفه مقابل حلجه أهو وسويله بحلجج حركة النفخ علشان يشوفج ويسويها مثلج .. ودربيه كذا مرة على هالحركة

لين يتعلم يطلع هوا من حلجه .. ويحس فيه .. وتالي تضيفين معنى على الهوا إللي يطلع من حلجه وتعطينه لعبه فقاعات الصابون وتنفخين فيها جدامه .. وتالي حطي إيدج على إيده خليه يحاول يمسك اللعبه ( إذا شدته الفقاعات ) وأهو ينفخ فيها تالي ..

بالنسبه حق تفريش الأسنان .. بالبداية لازم يكون المعجون معجون مخصص للأطفال بنكهات لذيذه .. ويمكن ياكله أول شي

طبعا تدربينه بالبدايه على إنه يفرش الأسنان الأمامية فقط وإنتي تكونين ماسكه الفرشان معاه وتفرشين أسنانه معاه .. وخليها 3 مرات في اليوم علشان تكثفين التدريب له .. وإذا عندج صور لخطوات تفريش الأسنان تعرضينها له .. وبعد ما يتدرب إنه يفرش بمساعدتج الخطوة الثانية إنتي فرشي أسنانج جدامه وحاولي تكون ملامحج مبتسمه كلما أدى خطوة بروحه كنوع من التشجيع والتعزيز على الخطوات إللي ينجزها وبعد ما يخلص إذا ماكان يتحسس من الضم والتقبيل ضميه ودغدغيه شوي .. أو سويله give me five إذا كان يستوعب معناها .....

إذا بديتي بهالخطوات نكمل لج الباجي بإذن الله

وأتمنى لج التوفيق ياااااارب

 

[Emanova]

السلام بنات ....


عفيه اتفقوا متى احسن وقت و يوم ينفعكم علشان نتجمع ... علشان اضبط مع الدكتوره ...تبون نهايه الاسبوع و لا نص الاسبوع ..... و متى يكون احسن وقت عندكم ..... علشان على الاسبوع هذا نتجمع

 

[سنع ومنع]

emanova يمعتنا عند الدكتورة شرايج تكون الجمعة القادمة ؟؟؟؟ وتكون بعد صلاة المغرب ..
ننطرالبنات .. شرايكم ؟؟؟

 

[Miss_Hopless]

قوه بنات اشلوكم شخباركم؟؟ ودي ارز ويهي معاكم عادي؟؟؟ بس خلوها يوم ثاني لان اليمعه زوارتي عند امي ماقدر اذا تبونها اليمعه بكيفكم شوفو اللي يناسبكم وقولولي اذا ماتبوني عادي ماراح ازعل)))
تحياتي

 

[ناني سيكرتس]

يا بنات ما نبي ايام الويك اند لان عندنا زوارات خلوها يوم عادي احد اثنين ثلاثا اربعا بس الويك اند صعبه شوي..

 

[أم علاوي حبيبي]

اختي سنع ومنع ، قصة الأبو اللي يسوي في عياله توحد عشان ياخذ من الحكومه استحاله تكون صحيحه لان التوحد له اختباراته ولو حتى ما فيهم توحد ( لأن التوحد ما يظهر او يبين الا عقب 3 سنوات ) يكون عندهم مشاكل ثانيه اعاقه ثانيه هذا أنا اقولج بحكم شغلي مع المعاقين واي استفسار عن الاجراءات انا حاضره