شلون يهون عليكم يامسافرين ؟؟؟

[بنت جنيف]

السلام عليكم جميعا
عندي سؤال دايما يحوس بقلبي شلون تهدون اعيالكم وتسافرون شلون يهون عليكم ماتشوفونهم حتى لو اسبوع بس والله استغرب من الي تهد عيالها وتسافر ،،، عيالنا كلهم عزيزين عند جدهم وجدتهم او خالاتهم او عماتهم لكن مستحييييييييييل اهد عيالي واسافر شلون تستانسين وعيالج بعيدين عنج مو تحت عينج والله عيالي اسفرهم معاي بالاشهر بس ماخليهم عند احد مايهون علي انا لما اروح الدوام وارجع ياكلني قلبي عليهم احاتيهم يمكن يمرض وانتي مسافره صار في شي لاسمح الله تصرف الام والابو غير والمفروض ماتثقلين على امج حرام كفايه ربتنا وربت اخوانه بالعمر لازم انريحهم مانقط عيالنا عليهم ... لو بكتب بالهلموضوع ماراح اخلص لأن صج يضايقني اتحمل بجي وحنه عيالي ولا اخليهم بالكويت واستانس مع ريلي اهم بكونون ملح السفر اصلا ......

 

[May81]

انا وياج اختي بنت جنيف ... يعورني قلبي اخليهم واروح عنهم ... صج انه تعب لكن اريح قلب ... انا هلصيف بجرب السفر مع اثنين الله يحفظهم ولدي 3 سنوات وولدي الثاني 9 شهور .. والله أيسر امورنا يارب ويحفظهم من كل شر

 

[bnt_7waa]

اذا كان عندج احد اتحطين عنده عيالج عادي حبوبه وين المشكله


يعني اقرب شي امج تكون

 

[الاسطورية]

لانها مخليتهم عند ناس ثقه واذا المده قصيره مافيها شي من حقهم يعيشون جم يوم بهدوء ورومنسية

 

[بنت جنيف]

may 81 وانا عيالي كبر عيالج وبسفرهم معاي صح كلامج تعب لكن اريح قلب

 

[بنت جنيف]

بنت حوا اقدر احطهم عند امي لكن مايهون عي اخليهم واصلا بدون كلام امي تخاف على عيالي اكثر مني لكن ماقدر اونس نفسي وامأذيه غيري وعليه امي ربتنا وكبرتنا فتحتاج انها ترتاح بعد هالعمر هم اقط عيالي عليها وانا وريلي متفقين على هالسالفة

 

[May81]

الله يحفظهم ان شاءالله
اهم شيء انهم ينامون بالطياره .. وبعدين يحلها الف حلااال

 

[بنت جنيف]

اي والله صاجه اهم شي انخدرهم الطياره "لا يفضحونه

 

[May81]

بنت جنيف ماتعرفين ادوه ينوم ..
لان ولدي لصغير جربت له كذا شيء ومافي فايده جربت زرتك و فنستلين وبريملان
ماينمونه !!!!

 

[الفاتنة]

شوفي حياتي الله يهون عليج سفركم ويطوي خطركم

حبيبتي ابو 9 شهور لا تحاتينه هذا كلة بالعربانة والا نايم

العود اهو الي يفهم ويبي كل شيء

وزين تسوين تاخذينهم معاج والله يذكرونها لج

اعرف وحدة كلا تخلي عيالها تقول عادي وتخلي كل واحد ببيت يعني مو مع بعض وكل مرة تسافر بالصيف والشتاء وكل وقت وتخليهم ___عفية ريال ثوور

المهم بيت القصيد عيالها تعقدوا حسافة عليهم وصاروا عدوانيين تصدقين يوم ردينا من اخر مرة سافرنا فيها ولدها العود كفر بعيالي طق يقول لييش تسافرون قعدوا مثلنا .. وعلية يكسون الخاطر

 

[afesa]

ماادري انا عندي عادي اول سفره كنت بسافر فيها بروحي بجيت وسويت فيلم هندي عشان باهد عيالي ...بس الحين عاديييييييييييي حده بالعكس اصلا اليهال مو مال سفر احسن لهم يقعدون اهنيه بمكانهم ومرتاحين ...انا الحين اقص عليهم اعطيهم فلوس وهدايا عشان يقعدون...اليهال ما يعرفون حق الطبيعه والطلعه والاماكن السياحيه ومصاريف عالفاضي.....وبصراحه انا محد يعطيني ويه ويرضى يمسك عيالي ,,والا لو احد يعطيني ويه جان ما اقعد بالديره كله سفر

 

[بنت جنيف]

may81 لا حرام لا تعطينهم ادويه منومه انا اخاف من هلسوالف ادويه منومه خصوصا اليهال بعمر اقل من سنه موزينه له كثرة الادويه اكيد بدوخ وبينام بالطياره

 

[بنت جنيف]

الفاتنه حلوه هذي عفيه ريال ثور صج والله اليهال اتحلين عليهم بالسفر ويعطون جو والله ايونس
شفتي اشلون هذي من الآثار المترتبه على ترك الابناء في الكويت وسفر والديهم (اشتغلت المدرسة هااا) يخلونهم يحقدون على غيرهم لأنهم استانسو وسافروا واهما لأ وعليه قاعدين ياتقعدون كلكم ياتسافرون كلكم :

 

[بنت جنيف]

afesa وبصراحه انا محد يعطيني ويه ويرضى يمسك عيالي ,,والا لو احد يعطيني ويه جان ما اقعد بالديره كله سفر

والله الواحد يقول يالله عيالي ماله خلق بعد يشيل هم عيال غيرة واهما مسافرين مستانسين وشاقين غيرنا

 

[بنت جنيف]

عنود حبيبتي والله بنات هالوقت كله قاطين عيالهم ومسافرين ماكو مسؤليه ولا يفكرون إلا بوناستهم مايدرون انه وناستهم من وناسه عيالهم

 

[bambena]

اخليهم عند امي وجنه العيد من صجج !! ماصدق اصلا

اهي تبيهم وانا ابي الراحه بالسفر وولدي اصلا صغير مايهمه السفر الحين كل اللي يهمه اللعبه اللي بييبها وكل يوم ادق اتطمن عليهم

الله يخلي لنا امهاتنا يارب

 

[malekatsabaa]

عنود حبيبتي والله بنات هالوقت كله قاطين عيالهم ومسافرين ماكو مسؤليه ولا يفكرون إلا بوناستهم مايدرون انه وناستهم من وناسه عيالهم

والله حبيبتي انا ما اتفق معاج في هالنقطه!

ولا اتفق مع البنات الي كل قاطين عيالهم ..

وكون اني اهد عيالي عند اهلي مره بالسنه اسبوعين او ثلاث خاصه اذا صغار اقل من ثلاث سنوات مو معناته اني انانيه او ما افكر الا بعمري..لأ مافيها شي اذا هديتهم وغيرت جو اشوي .. اصلا اذا خذيتهم معاي اهم راح يتعبون ويتبهدلون ولا راح استانس ولاهم راح يستانسون ..

انا جربت مره واخذت ولدي الي عمره سنتين ونص معاي..حرام والله تعب هناك لان مو مثل ديرتنا كل شي قريب ..اقل مشوار ساعه الا ربع بالتكاسي وتاخذين وياج حفاضات واحيانا اكل خاص ويستعسر لي يتله النومه وبتعب من قعدة العربانه لان غالبا ناخذ اليوم كله طلعه..لا وصار معاه المسكين اسهال من تغيير الجو..بتقولينلي الحين ان وناستج من وناسته؟؟اصلا اهو ماراح يستانس عشان انتي تستانسين...

ما اقولج ان انا مستانسه لما اهدهم..لا والله قلبي يتقطع عليهم وباليوم مرتين ثلاث اكلمهم بس هم اشوف ان لما الام اتهد عيالها وتسافر صحيا مفيد عشان الياهل لا يتعلق بالام وايد.وياما امي هدتني وسافرت لما كنت صغيره ماتعقدت!!!
الله يخليها لنا ويطول ابعمرها دايما حنانها يكفيني ويطمني..وآسفه عالاطاله

 

[شقرديه]

بنت جنيف انا معاااج
ياما شفت حريم والله ان قلوبهم صخر مايحسووون خليها على الله

 

[May81]

may81 لا حرام لا تعطينهم ادويه منومه انا اخاف من هلسوالف ادويه منومه خصوصا اليهال بعمر اقل من سنه موزينه له كثرة الادويه اكيد بدوخ وبينام بالطياره

لالالالالالا مو منومه ... ادوية الحساسيه تنوم مثل زرتك ولدي لكبير لين اعطيه ينام ... اما لصغير فلا

مو قصدي منوم قصدي دوا نفس دوا الحساسه ولا الكحه

 

[بنت جنيف]

تسلمين حبيبتي عنود والحمدالله ان زوجي بعد مأيدني بهالنقطه وحمواتي والله اني كبرت بعينهم من هالسالفه زياده ويسافرون ويهدون عيالهم ولما يرجعون يقولون حق ريلي جان زين ماخذين عيالنا مثل مرتك ماتخلي عيالها والله يشهدون فيني موجدامي من وراي وحريم حمواني يحترون