كنتو تلعبون "بروي" ؟ شاركينا بألعاب طفولتج

[coffee]

أهلين بنات ديرتي

اليوم وأنا اقرا القبس قريت كلمة "بروي" وهالكلمة ترجعني لأيام الطفولة وبالأخص بيت عمتي وشلون كنا نلعب وكل وحده محدده الدور اللي بتقوم فيه هههه والله كان وناسه

طبعا الألعاب تفرق من جيل لي جيل .. على أيامنا "جيل السبعينات" ومن الألعاب اللي أحبها وما عندي مانع العبها الحين لوول:

- الكتكوت اللي داخل البيضة اللي تفتر وتتبطل وأحاول بسرعة ألمسه لان أطراف البيضة تعور لول

- الدوائر الحلقية ام الوان أحبها لما تتحرك من ايد لي ايد بس لا اتشربك تصير عله

- الاتاري وكمبيوتر صخر .. واذكر لعبة الكاراتيه الياباني مادري الصيني اللي يطق بعجفته .. ولعبة الباراشوت اللي لازم ترشينهم قبل لا يبوقون الشخص

- الرول سكيين وسكييت بورد

- الدمى الكبار اللي نتحكم بطول شعرهم وباربي وبيتها

- لعبة اللي فيها مثل سلك ولازم تحطين طرف السلك عند الاسم والطرف الثاني عند الصوره الصح

- لعبة كرة السلة الصغيره اللي اثنين يلعبونها يرعصون دقم وتطير الكره

- البي بي فووت

- الدوائر اللي ينحط عليها قلم رصاص وتسوي رسمات غريبه وحلوه

- "الحيله" بالمدرسه

- القاري على قولة عمتي "الجاري"

- اموت على اللعب برمل وطين البحر

واللي مـــــــــا كنت احبه الجراقي اللي يلحق يماااا :tomato2:
و "اي تي" اخاف منه مادري ليش قطيعه مع صبعه اللي يشب أحمر لول

بانتظار ماضي ألعابكم.. :gathering:

 

[وجدان الكويت]

ياحلوج والله ذكرتينا بالماضي

اخخخخخخخخخخخ ليت الطفووولة تعود يوما

كنا وايد بسطاء مو الحين مهما اتييبين للياهل مايرضى بين البي اس بي وبين البلاي ستيشن وهالالعاب اللي مضارها اكثر من منافعها

الحيلة طبعا هذي لعبة البنات بدوون منازع

والعرااايس اللي حتى النووم تنام يمنا لوووووووووووول

والنايتندو خااصة لعبة ماريووو هههههههههههههه

 

[دهن عود مبخر]

اي والله هذي الالعاب ولا بلاش

وياااااازينها من ذكريات

بنات تذكرون لما نتعازم مع بنات الفريج العصاري
وكل وحده تجيب مواعينها الالعاب ونسوي جاي بارد
ولا نصب العصير بالقلاصات العنونيه
ونحط الحلاو والبفك بالصحون :gathering:

ونسوي روحنا حريم كبار خخخخخخخخ :dddds:
وشرايط المدرسه بشعورنا :dddds:


وترى حتى التيل كنت العبها :ggdw:
واستانس لي جمعت اكثر من غيري وكنا نجمعهم بقواطي الحليب :dddds::dddds:

وناااااااااااااااااسه
...​

 

[coffee]

وجدان الكويت ههه حبيبتي اعيونج الحلوه وعلى قولتج العابنا كنا امدلعينهم عدل وانحاتيهم لا وبعد مسمينهم اسامي لول مو اعيال هالوكت اللي ما يتم يوم الا مكسرين اللعبه ..

دهن عود مبخر ههههه كنا نسوي هالشي بعد يعني اسكت نعرف نطبخ يا حلو البراءة .. لول انا ما اعرف العب اتيل بس كنت استانس اطالعهم لان الوانهم واشكالهم حلوه.. انا كت ايمع مع البنات حشرة ليدي بيرد بقوطي ماي صحه ههه

 

[دهن عود مبخر]

هههههه
كنا بنكبر بسرعه... والحين ودنا ترد فينا السنين :eh_s(1):

تذكرون النبابيط خخخخخ
كنت اسويهم واتيبهم واسنعهم ...
وكنانحط قواطي بيبسي فوق بعض
ونتسابق من يطيحهم اول _03BA:

بتقولون لعبة صبيان
ليش اني البنت السادسه عقب خمس صبيان فكنت معاهم على طوووووول :ggdw:


صج صج وناسه​

 

[وجدان الكويت]

دهن عود مبخر ذكرتيني بعزايم العصر لوووووووووووووول

لا واذكر لمن وحدة تنجح تطرش ابوها الجميعة اييبلها عصير وبيبسي العايلة اوفر ههههههههه وبطاط وكاكاو

ونسوي حفلة العصر

العيد لا قلبناها استقبالات ومصاااريف تقص الظهر مالها داعي

وفي لعبة اذا تذكرونها اللي نسميها الين كنا نسوي فيها شخصيات خخخخخخخخخخ

يوم سافرنا ايام الغزو الله لايعودة السعودية جان تطلب المدرسة مني صلصال اللي اهو نفسة الطين توهقوا فيني اهلي مايدرون شنو الصلصاال اخرتها طلع طين

وفي لعبة تذكرونها اللي سمج يدور يدور ويكون معاج خيط تصيد لسمجة مع حلجها هذي والله ادورها ابيها بلعب فيها

 

[coffee]

دهن عود مبخر ههههه شكل طفولتج وناسه حافله بالمغامرات .. بعد بعد نبي ازياده ناطرين اشياء يديده غير النباطه

وجدان الكويت الله ليلحين العبها لول احبها مالت السمج احسها تسوي ريلاكسيشن .. والعصر مادري ليش عندنا هالحزه شي اساسي جاي الضحى مالنا لول ولازم كاكاو وبرد وخرابيط .. انزين تذكرين كاكاو بو ولد اللي يبيعونه بمقصف الابتدائي؟

 

[coffee]

تذكرون هاللعبه؟

 

[coffee]

أحب هالنوع من الجراقي وانا اصغيره افقصه بصبعي والحين اخاف لول

مونوبولي استانس على الاشكال الصغيره

ومن الألعاب القديمه اللي أحبها الدامه والدومنا والبليارد اياباااااااااااااا مع البودر اللي يخنق هههه

 

[أميره بأخلاقها]

رااح اجيبلكم جم صوره كنت حافظتهم عندي
الرسوومات هذي كنت راسمتها وانا صغيره
ليــ رجعه

 

[ام خالد 78]

اموت على كومبيوتر صخر والعابه مثل الاهرام ووالقلعه والبطريق اللي يشتري والضفدع والجواهر والطيارات

واحب الكيرم

 

[الاخلاص]

مالحقت على لعبة بروي كنت اسميها لعبة بيوت
احب العب حجله
حي الميت
فتاحي ياورده هههه
ولعبة الشيوخ
ولعبة امممممممممم مايطر على بالي شئ الحين بس واجد العاب مشكوره على الموضوع الحلو

 

[coffee]

أميرة بأخلاقها ناطرينج

ام بوصطيف ههه كووول

الاخلاص هههه والله ذكرتيني بفتحي يا وردة ليلحين مو فاهمه شقصتها .. حياج الله حبيبتي وبانتظارج

 

[الهيـــام]

وناسة
نحن لين الحين نلعبهم فتاحي ياورده في كل حفلة لازم نلعبها الكبار مع اليهال
و الحيله نحن نسميها توح يضحك الإسم بس ما أدري شو معناه
و صح الطين عندنا نسميه صلصال

 

[coffee]

حياج الله الهيام انتي من وين ؟

 

[وجدان الكويت]

لووووووووووووول

ذكرتووني يافتااحي يااوردة

 

[عـشـــ كويت ــقـــي]

السلام عليكم
وااي حده ونااسه العابنا قبل .. مو الحين ..
بس بنات اعذروني في اشياء قلتوها مالعبتها لمن كنت صغيره .. وحسيت انكم شوي اكبر اكبر مني عاد ماادري صح ولا مو صح ..

في لعبه عمتي كانت دايما تلعبنها .. واهي صلوا صلاة البقر .. << احبه واايد استانس عليها ..
واللعبه هذي الثعلب والبنات وامهم ماادري والله شسمها نسيتها هم لعبتها ..
وعاد طاق طاق طاقيه .. هم عجيييييييييبه خووووووش لعبه ..
ونااسه هالالعاب .. ياكثر ما لعبتهم بالحووش ..

 

[حناينq8]

حلو موضوعج كوفي


اكثر شي كنا نلعبه واحنا صغار ويا اخواني وعيال عمامي

اللبيده - ومقصي - وعنبر - وحار بارد

كمبيوتر صخر كان هديه عيد ميلادي من اختي

والاتاري السوده

والتيل


والجراقي اللي بعلبه نقطه على الارض وينفجر




تذكرون العروسه بحديقة الشعب القديمه

لي رجعه اذا تذكرت بعد

 

[Eng.shosha]

كنا نلعب في بيت يدي .. بنات خالاتي الاكبر منا يعني ابلات ومن صجهم يقسمون الدار نصين نص غرفة مدرسات والثاني يعني صف .. يفصلونها بشرشف لووووول

ومن صجهم يعصبون على بعض انتي خذيتي حصتي لا انتي خذيتي وقت لووووووووول يضحكون
اتذكر سوو اخر يوم سوو لنا شهادات لووووووول وقالوا حق امهاتنا يوقعون حدهم مصدقين لوول


يسلموو خوووش موضوع

 

[**حلوة ودلوعة**]

السلام عليكم
وااي حده ونااسه العابنا قبل .. مو الحين ..
بس بنات اعذروني في اشياء قلتوها مالعبتها لمن كنت صغيره .. وحسيت انكم شوي اكبر اكبر مني عاد ماادري صح ولا مو صح ..
في لعبه عمتي كانت دايما تلعبنها .. واهي صلوا صلاة البقر .. << احبه واايد استانس عليها ..
واللعبه هذي الثعلب والبنات وامهم ماادري والله شسمها نسيتها هم لعبتها ..
وعاد طاق طاق طاقيه .. هم عجيييييييييبه خووووووش لعبه ..
ونااسه هالالعاب .. ياكثر ما لعبتهم بالحووش ..

اي انا نفسج احسن نص الالعاب ما عرفتها


وشنو صلاة البقر؟؟؟؟؟

والثعلب قاعدة احاول اتذكر اسمها وبدايتها ما قدرت الظاهر كبرنا والكبر شين<<<مع اني مواليد الثمانينات


وعموما خوش موضوع

تسلمين يا كوفي