نادي الكتاب لشهر12 رواية-17 لعبدالوهاب السيد

[dla3_princess]

انا قريت اول 3 قصص وانشالله بكمل اليوم بعد بس اول قصه انصدددددمت من المره حسبي الله على ابليسها

كسر خاطري اي وبعد الثانيه حسيتها شوي موذاك الزود بس الثالثه الساعه شوووي اختررررعت مادري بس صج خفت لأن كنت قاعده

اتخيل المشاهد و انا اقرا...





بكمل انشالله القصص و اقولكم

 

[C'est La Vie]

توني خلصت القصة الاولى
احس ان هالنوع من الحب خيالي مو موجود بهالزمن
ولا منو الريال اللي من البيت لي الدوام من الدوام لي البيت؟
ماكو
ووايد مصور الزوج ان حساس ومرهف المشاعر من صار شي لم مرته خايف عليها
وانا اتوقع السبب اللي خلا زوجته تدق عليه هالمرة لأنها خايفة على "الجار"
ما عجبتني زود وما فيها لا اثارة ولا رعب
كل الاحداث صارت متسلسلة بشكل عادي
جريمة شرطة اعتقال
ما ضاف شي يديد

 

[C'est La Vie]

خلصت الحلم الفضائي
وااااااااااي شنو هذا حده بط جبدي
اول شي واحد مني والطريج قالك بحقق حلمك تعطيه هالمبلغ مثل المسبه؟؟؟
وثاني شي شنو يعني مو مهم اني اموت المهم اني حققت حلمي؟
لا يبه عني ما حققت حلمي ولا اموت هالموتة البايخة بروحي بعيد عن اهلي وداري
صج صج انقهرت

 

[Shade]

1) القصة الأولى حلوة ومكتملة ، والقصص القصيرة مو مطلوب من الكاتب إن يشرح فيها كل شيء وإلا ستصبح رواية .

2) قصة الساعة ما أدري ليش الناس وصفوها بالخيال الذي لا يصدق ، تشوفون الأفلام الأجنبية اللي من نوع هاري بوتر وغيرها ، الكل يشوفها من غير ما يقول هالكلام

3) قصة الحلم الفضائي هي قصة خيال علمي وانا اشوف النهاية منطقية إلى حد ما لأن الرجل صارت له الحادثة هذي في أواخر ايام عمره فماكانت فارقه معاه يعيش او يموت

4) المسرحية أنا اشوفها أيضا أجمل قصة من القصص الأربعة

 

[brat]

أمس شريت القصة من معرض الكتاب

الغلاف عجبني، وقريت لما بداية قصة "أغرب الجرائم"

بالنسبة للقصص اللي راح نتناقش فيها هالأسبوع، اللي عجبني أكثر شي قصة الساعة، والمسرحية.

مثل ما قلتوا، القصص ما فيها رعب، لكن مجرد نهايات غير متوقعة بتاتاً.

مادري بديتوا مناقشة ولا بتخلونها الأحد؟

 

[ذكريات]

انا امس شريتها من المعرض و اليوم قرييتهم

بصراحة ما كنت متوقعة هالمستوى

اول قصة كلش مافي قصة .. بس بالبداية احتريت من الزوجة لووووووووووووووول

و يمكن بس اللي شوي زينة قصة سلطان

بنظري القصص ما فيها رعب و لا تشويق و الكتاب ما يشجع ان الواحد يكمله

حدي انصدمت توقعت نفس مستوى الابعاد المجهولة !!

 

[ذكريات]

الجريمة المزدوجة

القصة الأولى اللي اهي جريمة مزدوجة ،، ما فيها رعب أبدا، مجرد ان النهاية كانت مؤلمة وغير متوقعة ابدا، احس القصة مو مكتملة ما ادري ليش، اوكي الجيران كانوا يتخانقون بس اشمعنا هالمرة يعني اللي خافت فيها الزوجة عليهم وحست ان صار شي وحتى لو فرضا ان اخر مرة كانت اصواتهم حيييييييل مرتفعه بس احس ما صار شي قوي اللي يخلي الزوجة تتصل على زوجها، احس القصة ناقصها بهارات، يعني المفروض اخر خناقة للجيران يكون فيها شوي اثارة ووصف دقيق لكن الكاتب وصف الخناقة على لسان الزوجة ، ان هالمرة صوتهم كان عالي وايد وفجأة صار هدوء،،وبعدين سالفة الصورة مو دليل قوي، حلاته لو يايب دليل اقوى، باختصار القصة الاولى ما عجبتني ما ادري ليش بس احس نا قصها احداث اكثر، يعني الكاتب كتب بصفحتين وصف لعلاقة الزوج بالزوجة، احس ماله داعي ان يعيد ويزيد على وصف علاقة الزوج والزوجة

انا بعد قمت افكر كل هوشة اخر شي بيصير هدوء

يعني ما وضح عدل شنو اللي خلاها تحس انه شي غريب ؟؟:jumpon:

بعد انا حسيت انه ثلاث ارباع القصة وصف عن علاقتهم مو قصة

 

[ذكريات]

القصة الثانية الحلم الفضائي

الله يسلمكم هالقصة حدددددددهاااااااااااااااااااا خيالية، واحداثها ما تدش العقل، يعني اكو افلام خيالية بس من كثر ما احداثها واقعية تحسين انج صدقتيها لكن هالقصة خيالية بحتتتتتتتتتتتتته صج نهايتها تعتبر صددددددددممة الواحد مو متوقعها، يعني انا تحسفت على ملايين الريال وعلى وظيفته وشركاته يمكن اكثر منه لووووووووووووووووووول بس طريقة سرد الاحداث ما فيها اقناع ان يمكن هالشي فعلا يصير، طبعا فكرة حلوة ان الكاتب طعم القصة بأشياء حقيقية صارت بالكويت مثل سالفة ام العيش، لكن طريقة صنع المركبة ومكان صنع المركبة وشلون طاروا فيها بدون لا احد يلاحظ هذا كله احس يبيله شرح اكثر علشان شوي يخلي القصة شوي مقنعه، يعني كان يقدر يقول ان المخزن في منطقة نائية بعيدة عن الناس لان مستحيل مثلا يعني يكون المخزن بين مخازن ثانية وما احد يحس فيها لما تطلع صعبة شوي خو المخازن كلها حراس وفي بعضهم ما ينام، ثاني شي لما كتب ان المخزن سقفه مفتوح، اوكي شلون صار هاذي؟ يعني وقت الحر والبرد والغبار والمطر ما راح يأثر على السفينة او على طريقة صنعها؟ جان على الاقل كتب ان السقف متحرك او شي جذي، وثالث شغلة وان شاء الله الاخيرة،،، ابيه نسيت شنو الشغلة الثالثة،،، تدرون شلون لما اتذكر باضيفها

نفس تفكيري

اول شي يه على بالي شلون اشتغل بالحر ؟؟

و بالنهاية قلت يا حظ اخوانه الحين لووووووووووووووووووووووووووول

بس الحمدلله مات مرتاح الشايب

 

[ذكريات]

ابيه بنات مو قادرة اوقف ،، جني مينونه قريت القصص تقريبا كلها ما ابي اوقف احس خلاص انشديت ما ابي اي شي يقطع علي ،،، انا اللحين موصلة عند قصة ((أويجا))

بنات عندي اقتراح،، شرايكم ما نحدد شهر لقراءة كتاب واحد، لأ يصير كل مرة على حسب مقدرتنا، يعني اذا قدرنا بشهر نخلص كتابين اوكي واذا شهر هم اوكي ،،

شرايكم نشوف منو اللي خلص القصص الاربع الاولى علشان نناقش ويبدون البنات بالقصص الباجية يعني قصدي مو لازم ننطر للاحد ، اذا كلنا مخلصين القصص الاربعه اللحين ليش ما نناقش وبجذي يمكن نخلص الكتاب باقل من شهر ونبدي بالكتاب الثاني بآخر شهر 12

طبعا هالشي على حسب مقدرة الجميع ولازم نراعي اللي ما خلص للحين يعني حسافة لا نخرب على بعض يا نناقش كلنا الموضوع اللحين والا ننطر لما الباجي يخلصون ونناقش

حرام في بنات عندهم امتحانات

بنات تدرون بصراحة احس الكتاب حسافة فيه 3 و نص :eh_s(14):

 

[Shiny Star]

فن رواية القصص القصيرة لا يمكن ان يكون فيه تفاصيل وإجابات عن كل الأسئلة .....

القصة القصيرة :

سرد قصصي قصير نسبيًا (قد يقل عن عشرة آلاف كلمة) يهدف إلى إحداث تأثير مفرد مهيمن ويمتلك عناصر الدراما. وفي أغلب الأحوال تركز القصة القصيرة على شخصية واحدة في موقف واحد في لحظة واحدة. وحتى إذا لم تتحقق هذه الشروط فلا بد أن تكون الوحدة هي المبدأ الموجه لها. والكثير من القصص القصيرة يتكون من شخصية (أو مجموعة من الشخصيات) تقدم في مواجهة خلفية أو وضع، وتنغمس خلال الفعل الذهني أو الفيزيائي في موقف. وهذا الصراع الدرامي أي اصطدام قوى متضادة ماثل في قلب الكثير من القصص القصيرة الممتازة. فالتوتر من العناصر البنائية للقصة القصيرة كما أن تكامل الانطباع من سمات تلقيها بالإضافة إلى أنها كثيرًا ما تعبر عن صوت منفرد لواحد من جماعة مغمورة.

ويعتبر ( إدجار ألن بو ) من رواد القصة القصيرة الحديثة في الغرب . وقد ازدهر هذا اللون من الأدب،في أرجاء العالم المختلفة، طوال قرن مضى على أيدي ( موباسان وزولا وتورجنيف وتشيخوف وهاردي وستيفنسن )، ومئات من فناني القصة القصيرة. وفي العالم العربي بلغت القصة القصيرة درجة عالية من النضج على أيدي يوسف إدريس في مصر، وزكريا تامر في سوريا ، ومحمد المر في دولة الإمارات

مقتبس من موقع www.geocities.com/farraj17/a4.htm - 33k

 

[Shiny Star]

انا شخصيا أموت على الروايات الطويلة ذات الشرح والسرد الوفير على القصص القصيرة طبعا مجرد رأي شخصي طبعا هذا ما يمنع إن في ناس غيري تحب تقرأ القصص القصيرة

 

[قلب راشد]

خووش موضووع موفقين ياارب

انا لا أميل لعبدالوهاب السيد بقول لاختي تشارك معاكم لأنها من عشااقه وعندها نسخه من كل مؤلفاته بس ان شاء الله

اذا كان الكتاب ثاني راح اتناقش معاكم فيه

 

[^^نـــواره^^]

فن رواية القصص القصيرة لا يمكن ان يكون فيه تفاصيل وإجابات عن كل الأسئلة .....

القصة القصيرة :

سرد قصصي قصير نسبيًا (قد يقل عن عشرة آلاف كلمة) يهدف إلى إحداث تأثير مفرد مهيمن ويمتلك عناصر الدراما. وفي أغلب الأحوال تركز القصة القصيرة على شخصية واحدة في موقف واحد في لحظة واحدة. وحتى إذا لم تتحقق هذه الشروط فلا بد أن تكون الوحدة هي المبدأ الموجه لها. والكثير من القصص القصيرة يتكون من شخصية (أو مجموعة من الشخصيات) تقدم في مواجهة خلفية أو وضع، وتنغمس خلال الفعل الذهني أو الفيزيائي في موقف. وهذا الصراع الدرامي أي اصطدام قوى متضادة ماثل في قلب الكثير من القصص القصيرة الممتازة. فالتوتر من العناصر البنائية للقصة القصيرة كما أن تكامل الانطباع من سمات تلقيها بالإضافة إلى أنها كثيرًا ما تعبر عن صوت منفرد لواحد من جماعة مغمورة. www.geocities.com/farraj17/a4.htm - 33k

اهو صح ان القصة القصيرة لازم تكون مختصرة وفيها اسئلة بدون اجوبة بس هم ما يصير اركز ثلاث ارباع القصة على موضوع ثانوي والربع بس عن القصة الاساسية،، القصة لازم تتوفر فيها 4 عناصر سواء كانت طويلة او قصيرة:
1. المقدمة: ويكون فيها مقدمة عن الشخصيات، وصف لحالهم اسلوبهم في المعيشة او اي شي ثاني الكاتب حاب يكتبه كمقدمة.
2. الحبكة: او المشكلة اللي بتصير او محور القصة.
3. الحل: او ما بعد الحبكة نقدر نقول، يعني شنو الحل اللي صار او شلون تأقلموا مع الشي اليديد او الحبكة اللي صارت لهم.
4. الختام: وفيها يتكلم الكاتب عن نهاية هالقصة سواء حزينة او سعيدة او احيانا تكون بدون نهاية

احس في القصة الاولى اللي هي جريمة مزدوجة الكاتب وايد طول في المقدمة اللي هي شرح مفصل عن حياة الزوجين.

في القصة الثانية اللي هي الحل الفضائي، عطى الحبكة جزء بسيط جدا من الشرح واهيا ان الشاب يبي يسوي مركبة فضائية وان الريال الشايب عطاه الفلوس وهذاك قام يشتغل، اما النهاية فحلوة نوعا ما بانها كانت غير متوقعة.

في القصة الثالثة اللي هي الساعة احس عناصر القصة الاربعة توفرت في توازن وااااااااااااااااايد حلو وفعلا نجح الكاتب فيها صج انها خيالية وخالية من الرعب لكن شرح الكاتب لكل خطوة بالتفصيل ما ادري خلاني احس ان فعلا هالشي ممكن يصير والدليل ان دشيت قوقل رحت ادور عن الفجوات السوداء لووووووول

أما القصة الرابعة اللي هي المسرحية ، فتوافرت فيها العناصر الاربعة وفعلا متوازنة واحس ما طول الشرح في جزء على حساب الجزء الثاني، بس ما ادري ليش ما حبيتها

من بين الاربع قصص اللي قريتهم حسيت ان قصة الساعة هي القصة اللي شدتني ورجعت قريتها مرة ثانية

 

[شوشوا]

انا وصلت تقريبا ببدا اقرا القصه الثامنه
اما عن رايي بلقصص
جريمه مزدوجه مادري حسيتها عاديه !! بس النهايه اتوقع لما سكتوا الجيران اهيا اتصلت على حبيبها ومارد وخافت عليه !
بس ماحس توصل يدق الزوج عالشرطه عشان سكتوا .. عادي وايد تصير ولا ماتعودوا من هوشاتهم الي قبل !!

الحلم الفضائي حلوة بس شدعوه ماطلب منه بطاقه مدنيه ولا جواز واهوا قايله دارس بامريكا
بس نهايتها مو متوقعه وحده خيال وهذا المغزى من الكتاب انه كتاب خيالي

المسرحيه ماحبيتها ! ممم ماعرفت السبب ليش ماخلوا الممثل يكمل دوره ؟

الساعه هذي عجييبه فكرتها ونهايتها حلوة خلتني افكر لو انا مكانه
بلعب بلفلوس لعببب ليش اقعد بمخبأ جم سنه بروحي عشان استخف

انا عندي نقد ان الكتاب مكتوب ان رعب وتحبس انفاسك من الغموض
ماشوف رعب!!! والغموض مايمدي نحس بلغموض لان فجأه يطلع السبب ببعض القصص

بس في قصص بعد هالاربع قصص حبيييتهم حده فكرتهم عجيبه
أأجل مناقشتهم للاسبوع الياي

 

[Shade]

حرام في بنات عندهم امتحانات

بنات تدرون بصراحة احس الكتاب حسافة فيه 3 و نص :eh_s(14):

حرام عليج انتي قرأتي 4 قصص بس ، كملي باقي الكتاب والقصص الأحلى للحين ما وصلتي لها

الكتاب فيه 17 قصة ، من الطبيعي إن نستانس على 7 أو 8 أو 10 منهم وشبه مستحيل إن أحد يطلع راضي بالقصص ال17 كلهم

 

[Miss.EnGiNeErA^_^]

انـــــا راح اشترك معااكم..ع الكتاااب الثااانيــــ^^....
موفقين...بال17....

**..عطوني..خبر اول مااتبلشوون الكتااب الثاااني....^^

 

[دراهــم]

ليش ما قلتوا لنا :jumpon: :jumpon:

بشترك معاكم .. يمدي ؟

 

[Shiny Star]

حبيبتي نواره مشكورة عالرد وتحليلك حددددددده حلو

وايد شدني إنك هالسنة إن شاء الله رايحة الحج إدعيلي بالتوفيق وإني أربي عيالي التربية الصالحة ... تروحين وتردين بالسلامة يا رب

 

[ذكريات]

خلصت الحلم الفضائي
وااااااااااي شنو هذا حده بط جبدي
اول شي واحد مني والطريج قالك بحقق حلمك تعطيه هالمبلغ مثل المسبه؟؟؟
وثاني شي شنو يعني مو مهم اني اموت المهم اني حققت حلمي؟
لا يبه عني ما حققت حلمي ولا اموت هالموتة البايخة بروحي بعيد عن اهلي وداري
صج صج انقهرت

اهو ما عطاه المبلغ .. شراله الادوات

 

[ذكريات]

انا وصلت تقريبا ببدا اقرا القصه الثامنه
اما عن رايي بلقصص

المسرحيه ماحبيتها ! ممم ماعرفت السبب ليش ماخلوا الممثل يكمل دوره ؟

أأجل مناقشتهم للاسبوع الياي

لانهم ميانييييين