ليش ديايتي واللحم المفروم زفر؟!!! ساعدووني

[كويتيه مذهله 87]

السلام عليكم

:gathering:

بنات انا صارلي الحين سنتين ونص اطبخ لزوجي ولازم الديااايه زفره ومو مستويه من داخل عدل:krkrkr:

ولمن اطبخ يشم الدياي او اللحم زفر وما يااكل
قبل كان ياكل وجاملني بس مرات بطنه يعوره

شلون تروح الدياي منها الزفره؟!

معني لمن اطبخ ديااااايتي ما اخلي بهاار ما احطه

حتي اللحم المفروووم احط جميع انواع البهاررات:tomato2:

بس همن يصير زفر:eh_s(1):



شنو تسوووووووووووووووون يعني قبل لا طبخون الدياااااايه شنو تحطون فيها واللحم المفروم بعد؟_03BA:

و شنو البهارات المطلووبه للدياي واللحم_03BA:


والي تقدر تفيدني لا تبخل علي​

 

[املاك ss وافي]

حبيبتي اللحم المفروم اذا كنتي تشترينه من السوق مغلف وجاهز اغلي ماي وحطي وخليه يطبخ وكل ماطلع الزفر من فوق شيليه يصير متجمع ع شكل ابيض رغوه 0 وصفيه من الماي وكملي شغلك عادي والدجاج نفس الشي غسليها عدل مدل واذ فوحتيها الزفره بتطلع وشيليها بعد ولج مني وصفه هالديايه رووووووعه
جيبي الدجاجه كامله او مقطعه كيفك وبعدين سويي هالخلطه العجيييييييييبه اخلطي 5قفشات كاتشب ومن كل بهار عندك م ك وملح وزيت وكركم وادهني فيها الدييايه كلها وحطيها بصينيه الفرن وغلفيها بقصدير وبعدين دخليها الفرن ساعه وبعد الساعه شيلي القصدير من وشغلي نار الفرن من فوق بس عشان تتحمر وبس قدميها مع رز ابيض وبالعافيه وانشالله افدتك

 

[ليـــــدي]

شوفي حبيبتي قبل لا تطبخين الدياي غسليه وافركيه بملح وليمون يعني حطي عليه ملح وافركيه بليمون

راح تلاحظين الجلد صار يلمع وبعدين غسليه بماي عدل وفي ناس ينقعون الدياي بخل وبعدين شكلج تستعجلين

وتكون الديايه ما استوت لا نطري عليها لحد ما تستوي لا تستعجلين ..

واللحم المفروم لما تطبخينه اول شي حطيه على النار من غير زيت خصوصا لو كان مثلج

راح يطلع منه ماي ويطبخ حطي عليه شوي هيل مطحون عشان الزفرة بس لا تكثرين وشوية فلفل اسود ولما يتغير لون اللحم

اشخليه عشان يروح كل الماي اللي فيه زفرة ،، وبعدين طبخي اللحم عادي مع زيت وبصل او حسب اكلتج ..

وان شاءلله اكون افدتج ​

 

[ملوكه]

اللحم المفروم فوحيه مع ملعقه اكل صغيره كمون وملح واشخليه بعدين سويه على الحمسه اللي تبينها

 

[Little_Queen]

الديايه خليها تفج على راحتها ...
و بعدين غسليها و نظفي احشاءها عدل بالمااااااااااي ..

بعدين كوني مجهزة طاسه فيها طحييين + ملح ... فركي الديايه عدل مدل فيه و سويلها مساااااج .. و بعدين فركيها بنص ليمونه من داخل و من بره من كل صوووب .. و حتى تحت أباطها فركي !!!

و بعدين الله يسلمج حطيها بجدر مع الماي و حطي معاها " ورق غار + مسمار + عود دارسين + جم حبه هيل مقرومه ) و خليها تفوووووح ... و بتلاقين بعد شوي بيطلع شي اسمه " الريم " هذي عبارة عن رغوة بيضا بتطفح على ويه الماي ... شيليها و قطيها بره .... هذي اهي زفرة الدياي


و بعدين خليها على راحتها بالمااااي ليما تنفاح عدل عدل عدل ... قزيها بالشوكه و شوفي الشوكه تدش بسهولة ولا لأأ ....


--------------


بالنسبة للحم المفروم ... احنا طريقتنا انه نخليه من قبلها بيوم بره الفريزر يفجججججج .... و بعدين ناخذه و نحطه عالنار مع كمية وافرة من البصل المفروووم ناعم .. و نقلبه نقلبه نقلبه نقلبه لييييييييييييما يستوي .. من غير دهن ولا شي .. اهو بروحه بيطلع دهنه و بينطبخ مع البصل و ماي البصل بروحه ليما ينطبخ ... و اهم شي لا تملحينه ولا تتبلينه الا عقب ما يخلص الطباخ ماله لأنه كل ما رح تملحينه و اهو ينطبخ بيطلع سوائل أكثر و الملح كله يروح و مايصير له طعم



و الخيار الأخير ...... شنو نوع الدياي و شنو نوع اللحم الي تستخدمينه ؟؟؟ يمكن العيب فيهم مو في الطريقة !

 

[قسمه ونصيب]

الروب والليمون يشيلون الزفر من الدجاج نقعيهاااا ساعه

او قبلها بيوم بالثلاجه نقعيهااا

واللحم المفروم ضيفي له الهيل وكمون

 

[شيري]

اهم شي غسيل الدياي اهواللي يطير الريحه ولازم تطلعين الدياي من الليل برا الفريزر والصبح نقعيه بماي وملح وايد عشان الديايه تصير طريه خصوصا الصدر خليها لمده ساعه بعدين غسليها عدل وفركيها بملح وكركم وطحين وخليها اقل شي نص ساعه بعدين غسليها ورشي عليها شوي خل واغسليها ورشي عليها شوووي بهارات الكاري العلبه الخضرا بس لا تكثرين تصير طعمها مررر يعني الديايه حطيلها قفشه الحوس الصغيييره ورشي شوي ملح وبهارات الكاري احلي شي ماركه غزال او ماركه ماذرززولما تفوحينها حطي بالماي حبه فلفل اخضر راح يشيل ريحه الزفره واللحم المفروم احسن شي اللي من القصاب خليه يغسله ويفرمه وحطيه بالفريزر وادا بغيتيه طلعيه لحد ما يذوب الثلج بعدين غسليه بماي ورشي خل وردي غسليه بالماي عدل وحطيه بمشال لحدماينزل الماي حمسي البصل وفلفل اسودوهيل وبهارات كاري وحبه فلفل باردوورق غار جربي طريقتي وراح تدعين لي ولا تستخدمين الماي الحار في غسيل الدياي واللحم لانه يسبب ريحه زفره

 

[كويتيه مذهله 87]

حبااايبي مشكوورين ااايد


انا استخدم دياي هلال

واللحم المفرووووم من اللحام يعني من برا

وماشالله عليكم وايد استفدت من خبرتااكم عسي ربي يوفقكم ويحقق الي اباالكم يااارب

 

[Little_Queen]

الي اعرفه يا ام الكتاكيت ان اللحم المفروم عمره ما ينغسل !! مره غسلته جدتي شخلتني ..

و هم بعد أبلتنا مالت الاقتصاد المنزلي أيام الثانوي قالتلنا اياها .. اللحم المفروم لا يغسل ... بس مادري ليش للأمانه ..

 

[شيري]

:aha:ليتل كوين اللحم المفروم اللي ماينغسل اهوالجاهز لانه مفروم حيييل ناعم واذا انغسل ذاب بالماي بس لحم القصاب ينفرم خشن فينغسل سريع بالمشخال عشان ينزل منه الدم وماراح يصير له شي وهذا عن تجربه

 

[شيري]

كوينيه مذهله غيري نوع الدياي وبتحسين بفرق كبيراحسن شي ساديا او دياي دو

 

[كويتيه مذهله 87]

أنا قبل كنت استخدم دياي ساديا بس مشكووك فيه وغيرناااه

 

[sara3]

انا الدجاجة اغسلها عدل وبعدين افركها بخل وقفشتين طحين واخليها شوى وبعدين اغسلها عدل مدل
بس اهم شى اتغسلين الدياية بماى بارد وحتى لمن ترفعينها على النار يكون الماى بارد موتحطين ماى مغلى ولمن تفوح الدياية اول فوحة شيلى الريم اللى يطلع بوجة الجدر

موفقة حبيبتى

 

[رفرف]

انا اول اغسلها زييين وافركها بطحين وثوم .. او ليمونة ..
واتبلها وبهارات وكلشي

لما تفوحين الدياي مع ورق غار ولومي ودارسين وهيل خل تقلب قلبتين وتطلع الزفره فوقها جنها رغوه
اغسلها مرة ثانية واكت الماي واحط ماي يديد وافركها بالبهارات وابهرها من داخل وارد احط لومي وورق غار ودارسين وهيل ومسمار وفلفل اسود مع الماي واخليها تفوح مرة ثانية بماي وجدر يديد ما ارد افوحها بالماي الزفر احس الزفر لازق ..

واللحم المفروم لازم اغسله حتى الجاهز شلون ما تغسلونه ؟

 

[جارة القمر]

ماشاء الله


البنات ما قصروا

وأنا اللحم المفروم


أغسله


وأحطه بمشخال عقب ينزل من الماء

 

[العاذرية]

مشكووووووووورين كنت بسال نفس السؤال

شكرا لصاحبة السؤال

 

[صدى الأفراح]

ماشاءالل البنات ماقصرو كل كلامهم صح بس اعم اهم اهم اهم شي لاتحطي الدجاج بماي سخن عشان يذوب الثلج أبداااااااااااااااااا لو كنتي بتعملي هيك تأكدي ان هذا هو السبب طبعا غير انه ساااام حماكي الله والملح والطحين افضل شي لما تغسلي الدجاج واللحم من تجربتي الدارسين هو اللي يشيل زفرتها

 

[أم عزة]

[Bمثل ما قالوا الخوات فركى الدياى بليمون وكركم وخليه نص ساعه فى الثلاجه وبعدين يعتمد على نوع الدىاى اللى تيبينه مره شريت دىاى شقنه فى زفرته من خبرتى دىاى ساديا والمتحده ما فيهم زفره أما اللحم المفروم كتى مايه اول مره وشيلى الزفر]l[/B]

 

[شندوخه]

جربي دياي بوعلي اينن مافيه زفره وخليها تفج من الثلج على راحتها
انا عن نفسي افركها اول شي بخل ابيض وبعدين طحين واخليها بو ربع ساعه وارد اغسلها وبعدين فوحيها بالبهارات العدله عادي

 

[أم الغاااالية]

اهم شي غسيل الدياي اهواللي يطير الريحه ولازم تطلعين الدياي من الليل برا الفريزر والصبح نقعيه بماي وملح وايد عشان الديايه تصير طريه خصوصا الصدر خليها لمده ساعه بعدين غسليها عدل وفركيها بملح وكركم وطحين وخليها اقل شي نص ساعه بعدين غسليها ورشي عليها شوي خل واغسليها ورشي عليها شوووي بهارات الكاري العلبه الخضرا بس لا تكثرين تصير طعمها مررر يعني الديايه حطيلها قفشه الحوس الصغيييره ورشي شوي ملح وبهارات الكاري احلي شي ماركه غزال او ماركه ماذرززولما تفوحينها حطي بالماي حبه فلفل اخضر راح يشيل ريحه الزفره واللحم المفروم احسن شي اللي من القصاب خليه يغسله ويفرمه وحطيه بالفريزر وادا بغيتيه طلعيه لحد ما يذوب الثلج بعدين غسليه بماي ورشي خل وردي غسليه بالماي عدل وحطيه بمشال لحدماينزل الماي حمسي البصل وفلفل اسودوهيل وبهارات كاري وحبه فلفل باردوورق غار جربي طريقتي وراح تدعين لي ولا تستخدمين الماي الحار في غسيل الدياي واللحم لانه يسبب ريحه زفره

100% صح