{ ...الدكتورة رشا الصفي تجيب على استفسارتكم ..} استضافة اسبوعية

[د. رشــا الصفــي]

هلاا دكتوره طلع ولدي في فايرس وديته الطبيب حطوله ادرب لانه كله ترجيع واسهال بس اليوم الحمد الله وااايد احسن خف الترجيع والاسهااال

دكتوره ولدي عمره سنه وبدش الشهر وزنه 8 ونص !!

ما يشوف شر و الحمدلله على سلامته

بس ما قلتيلي جم عمره ؟

اذا بين سنة و سنة و نص طبيعي الوزن

 

[د. رشــا الصفــي]

السلام عليكم دكتورة
أنا عندي بنت الله يحفظها واهي أول بيبي عمرها بتكمل الثلاث شهور بعد 4 أيام ان شاء الله
اهيا ترضع صناعي حليب نان 1 اتش أ
رضعاتها غير منتظمة يعني متى ماياعت رضعتها ... هل هذا الشي صحي ؟

يصير بس لازم تاخذ الرضعات كل 3 ساعات مو اكثر

ومرات ما انطرها تبجي عشان ارضعها يعني بس اشوف ان طافت كذا ساعة على آخر رضعة واهي نايمة ارضعها وزنها أعتقد صار 4 ونص اذا مواكثربشوي

زين ما شاء الله طبيعي وزنها

ألحين بهالعمر ألاحظها وايد قامت تبجي وخصوصاً بالليل قبل لاتنام وخشمها مسدود على طول بسبب التكييف أعتقد مع اني يبتلها الجهاز اللي ينظف ويرطب الجو على حسب ماقالت دكتورتها بس مافي تحسن كلش
وانا احطلها بخاخ اللي اسمه اوشين سبراي ... واحس ان الامر يزيد يعني قاعد اشوف نفس بلغم لما اترجع شوي من الحليب بعد الرضاعة واخراج الهوا

هذا شي عابر و يروح بروحه لا تحاتين

ودكتورة بنتي اتعرق وايد شسويلها ؟ اهي نفس ابوها بالنسبة للتعرق ؟ وأحسها ماتتحمل الحر؟

ما تقدرين تسوين لها شي
طبيعي ان في اطفال طبيعتهم يعرقون وايد

مادري هل اشغلها التكييف عادي واشلون على خشمها؟

شغلى التكييف عادي بس لا تخلينه حيل بارد و لبسيها لبس كامل يغطي ريولها اهم شي

دكتورة بعد عندي سؤال : أحس ان جتفها يعورها لما احاول امسكها بشكل بسيط يعني نفس التهمييز ؟ من شنو ؟

مادري والله يمكن احد شايلها غلط او شي وديها الطبيب يفحصها احسن

اهي اتحب تنام على بطنها ترتاح بهالنومة؟ هل هذي النومة أتأذيها؟ طبعاً مرات اتنام على جنب ومرات على ظهرها بس اكثر شي على بطنها.

البيبي الصغير ما ننصح ينام على بطنه ممكن عالجنب بس مو عالبطن

أنا آسفة اني قرقت وايد ويمكن كلامي داش ابعضه بس عذريني انا عضوة يديدة ومومتعودة على النت والمنتديات بس المنتدى هذا يشجع وخصوصاً اني فيه اللي يفيدنا ... وانا سعيده بوجودج في هالمنتدى :tek:
​

مشكورة حبيبتي و انا اسعدتني اسئلتج و اهتمامج ببنتج

 

[د. رشــا الصفــي]

السلام عليكم دكتورة اشلونج ؟

انا ولدي عمره 6 اشهر واول الشهر الياي بسافر دبي وباخذه معاي
وانا الصراحة قاعده احاتي الوضع بالطيارة مع الضغط شنو تنصحيني فيه

وماقصرتي

بالسلامة ان شاء الله

تقدرين وقت الاقلاع و الهبوط تعطينه يمص مصاصة اذا كان متعود عليها او تعطينه رضعة حليب يشربها بهالوقت علشان ما تنسد اذونه و يتضايق

بس ضغط الطيارة بحد ذاته ماله تأثير على الطفل بشكل عام

 

[د. رشــا الصفــي]

السلام عليكم دكتوره
انا بنتي عمرها 3 سنوات قبل ما اولد بنتي كان اكلها طبيعي تاكل كل شي بس عقب ولادتي صارت ما تاكل ولا شي الا العيش الابيض مع الروب وفي بعض المرات يسبب لها الامساك فحبيت اسالج شنو اسوي عشان اخليها ترد مره ثانيه وتاكل وصايره وايد ضعيفه وخااصه اني قطعت عنها المميه يا ريت تنصحيني شنو اللي اسويه معاها ؟؟؟؟؟؟
معلومه : بنتي مصابه بتكسر الدم (ممنوع عليها البقوليات )
وشكرا

بنتج تغار من البيبي و تبي تلفت انتباهكم

عطيها انتباه اكثر و اهتمام اكبر و لا ترجعين الممية

و حاولي تقعدين معها عالوجبة و توكلينها و تاكلين معاها

و ما تشوف شر

 

[د. رشــا الصفــي]

السلام دكتورة ...... حبيت اسال انا تونى ولادة صارلى اسبوع والحمدالله ارضع بنتى من صدرى طبيعى بس ساعات صراحة اتعب
لانها باردة على ما تشرب ....... قلت اجرب حليب صناعى بس بالليل سيميلاك ادفانس ( العلبة البيضة ) ....
واذا اشربت الحليب سواء من صدرى او صناعى تطول وايد تقريبا ساعة وبعد كل هذا ما تشربها كلها .......
وسؤالى الثانى ؟ ...... وايد تسهل عادى وايد قالوا لى لانها ترضع من صدرج ...... وناطرة ردج ومشكورة

بالنسبة للرضعة اللي ما تكملها جم رقم تسوين لها

كافي عليها رقمين بس

و طبيعي تو الناس عليها انه ترضع بسرعة ما تعرف و فكها لي الحين ضعيف

يبيلها صبر شوي

و الاسهال عادي مع الرضاعة الطبيعية

 

[د. رشــا الصفــي]

السلام عليكم
انا ولدي عمره 8 شهور و للحين ما بدا يتحرك او يزحف على الارض و كل الاطفال الي بعمره تقريبا عندنا في العايله يتحركون و ويحاولون يوقفون مع العلم ان ولدي بدا التسنين من عمر 6 شهور
و انا قلقه من ناحيه عدم الحركه حتى الان !!

اذا تستخدمين الدراية شيليها و راح يتحرك بسرعة

و حاولي تخلينه على الأرض

مو على الكرسي او العربانة على طول

و ما عليه شر ان شاء الله

على فكرة ما يعتبر متأخر لا تحاتين

 

[د. رشــا الصفــي]

السلام عليكم اختي انا ولدي عمره 4 سنوات و عصبي جدا جدا ما ادري شسوي فيه و ساعات ما اعرف اتعامل معاه و صارلي فتره ما اوديه معاي مكان لان لمه نطلع يعصب على اشياء تافهه و يشد نفسه وايد و يعض اضروسه تخيلي حته وجهه يصير احمر واعروج وجهه يطلعون حاولت معاه وايد طرق ماكو فايده قالولي لا اتوكلينه وجبات سريعه بس احس انه ماله سغل لان اعيال حماي ياكلون على طول وجبات سريعه ما يسوون جذي و حته ساعات لمه يروح عند امي اول ما يدش امي اترحب فيه بالأغاني و القبل احس انه مستانس بس يسوي روحه امعصب و يقط روحه على الأرض و يبينه نسكت يبط الشبد لمه يسوي جذي ، و انا الصراحه حاسه إب يأس أبي حل و يعطيج العافية

الحركات اللي يسويها ولدج الغرض منها لفت الانتباه

لا تعطينه اهتمام لما يسوي جذي

و عطيه وقت اكبر و اهتمام اكثر لما يصير عاجل و هادي

يعني القصد من هالشي

تحفيز السلوك الجيد و تشجيعه

و عدم الاهتمام بالسلوك السيء و بالتالي التخلص منه

 

[د. رشــا الصفــي]

سلام عليكم
شخباركم بناتوووووووووووووووووو
سؤاليحق دكتورنا العزيزه انا ولدي كمل 6 شهور متى اعطيه حليب رقم 2 اول الشهر 6 ولا اخره
ومشكووووووووووووووووووره وايد

دام كمل 6 شهور تقدرين تبلشين رقم 2

 

[د. رشــا الصفــي]

السلام عليكم يعطيج العافيه دكتوره
عندي سؤال :
ولدي عمره سنه و 4 شهور كنت استعمله حليب نان من اول ما ولدته بس توني صارلي 5 ايام غيرته و قمت اعطيه بروجرس لانه الكل يمدحه و يقدر يشربه لي 3 سنين
بس لاحظت انه ويه قاب حساسيه و حمار و يحك حيل .. يمكن يكون من الحليب ؟؟؟ مع العلم انه اكله مثل ما هو ما غيرت فيه شي الشي الوحيد اللي تغير عليه الحليب
اشرايج دكتوره ؟؟؟ اشتنصحيني فيه ؟؟
ارد على نان 3 ؟؟ و نان 3 لي اي عمر يقدر يشربه مكتوب من عمر 10 اشهر بس مو حاطين لي اشكثر ؟؟


اسفه طولت عليج

رجعي على نان 3

يقدر يشربه لي سنتين

يمكن الحساسية من الحليب او اي مادة او نكهة بالحليب اليديد ما تحملها او تحسس منها

اذا صحته زينة على نان 3 لا تغيرينه

 

[د. رشــا الصفــي]

الله يوفقك ويسعدك يا دكتورتنا الفاضلة
يا ليت تنصحيني بدكتور مسالك بولية زين لعلاج مشكلة التبول اللاارادي الليلي عند بناتي واعمارهم فوق العشر سنين تدرين الموضوع حساس ومو اي دكتور ممكن يفيد
ومشكورة على كل شي

حبيبتي المستوصفات بعضها الحين يعالجون التبول اللا ارادي بكل كفاءة و اذا مستوصفكم ما عندهم هالخدمة طلبي تحويل على طبيب الأطفال بالمستشفى التابع لكم

حبيبتي العلاج واحد ماكو غيره

حبوب المينيرين

و افضل لج تراجعين بالحكومة لأنه الدوا شوي غالي و ينصرف بالمستشفيات الحكومية مجانا

و الموضوع ما يطول كله اسبوع بالكثير و يشوفج الدكتور و يطلب لليهال تحاليل و ممكن اشعة و سونار و ممكن من اول زيارة يصرف العلاج او ممكن انه يعطيج نصايح و تعليمات تسوينها لغاية المراجعة الثانية


و اذا ما فادت يبدا الدوا

انا شخصيا اتتبع هالطريقة

و اي استفسار ثاني انا حاضرة

 

[(محبة)]

السلام عليكم دكتورة

أتمنى بمشيئة الله عزوجل أن تفيديني لأني عجزت من أستشارة الأطباء والأشخاص ذو الخبرة

ولدت أبني بعملية قيصرية في الأسبوع 37 من الحمل لأنهم خافوا عليه لأن وزنه ما يزيد في الرحم

ولدته وكان وزنه 2ك والحمد لله ما احتاج إلى وضعه في الحضانة

بعد 3 شهور أنقطع عن الرضاعة الطبيعية وبديت أعطيه الحليب الصناعي سيميلاك ومن ثم تابعت وزنه لاحظت انه ما يزيد فنصحوني بحليب نان وعند زيارة لأخصائية الأطفال وكان عمره 6 شهور لاحظت وزنه الضعيف ونصحتني ببروميل مع الوجبات أنا قمت بتغير الحليب وإعطائه النظام الغذائي إلي نصحتني به الأخصائية لكن نفس الشيء الوزن ما يزيد بالمعدل المطلوب ولما بلغ 11 شهر كان وزنه 6 كيلو وأصيب بإسهال شديد لمدة 3 أسابيع نصحني الصيدلاني بحليب بيبيلاك بدون اللاكتوز والحمد لله تعافى على فكرة منذ الأسهال أصيب بإحمرار في الوجه وحكة الآن عمرة سنه ولا أدري ماذا أعطيه من الحليب علما بأنهم نصحوني ببيدياشور لناقصي الوزن \\


ما الحل عزيزتي في حالة ولدي؟وماذا تنصحيني بالنسبة للحليب؟

 

[(محبة)]

على فكرة ولدي ضعيف كثير للآن ما طلع أسنان وما يوقف أو يمشي وعنده خوف شديد حتى من العطسة يخاف ويبكي....

 

[بسمة خجلِِ]

السلام عليكم دكتورة بصراحة ماقصرتي عالمجهود اللي تسوينه وكله في ميزان حسناتج انشالله
أنا بنتي بجري عمرها 4 شهور ونص وزنها عند الولادة 2 كيلو وألحين وزنها 4ونص كيلو هل طبيعي كل من يشوفها يقول كأنها أم شهرين والله تعقدت
تشرب حليب سيميلاك نيوشور رقم 3 الحمدلله مرتاحة عليه بس يقولون اللي بعمرها تشرب 5 أرقام صج؟
انا بيتي ماتدخله الشمس عادي ولا لازم أعرضها للشمس ؟
في صوب كوعها بقعة مو محددة الشكل لونها أبيض افتح من جسمها شنو تكون اخاف شي لاسمح الله؟
آخر سؤال ياقلبي تكرمين بولها له ريحة قوية عادي؟
ومشكورة وما قصرتي

 

[فروحة الكويتية]

دكتورة شخبارج؟؟

بنتي عمرهاا 7 شهور ونصف متي اعطيهااا الدجاج واللحم وشلون اضيفه علي اكلهاااا؟؟

يصير اطبخ لها الحين بقدونس مع اكلها؟

شنو الخضرة اللي اقدر افوحه لها الحين؟ الزهرة اعطيها

مشكووورة

 

[هواي أنت]

مرحبا دكتورة

الله يعطيك الصحة والعافية وبارك الله لك على

جهودك الطيبة معنا


بالنسبة لي أعتقد إستشارتي تتعلق بعلم نفس الطفل أكثر.. لكن بإذن الله يكون لها حل عند حضرتك
بنتي عمرها سنتين وتسع شهور , وحيده بعد 9 سنوات من محاولات الانجاب , عنيده , مدللة من الاب , لاتخافه لكنها معي العكس
لانني أدللها في موقف الدلال و اكون حازمه معها في الجد والغلط ...

في البيت تكون من اروع مايكون ... المشكلة عندما نكون في بيت اخر او في السوق او الجمعية هنا يبدأ الصراخ والعصبية
والبكاااء على أتفه الاسباب رغم توفير و مراعاة كل طلباتها واحتياجاتها !!!!

احاول هنا ان احتويها بالحزم مرة والمراعاة مرة ولكن لاااااااااااا فائدة والله العظيم احيانا اصل الى حد البكاء والعصبية في الضرب
والزعل او التوبيخ ولكن ... نفس الحااالة تتكرر مرات ومرات ...

ساعديني بحل الله لا يبكيلك عيييين
​

 

[الكويت مني و]

السلام عليكم دكتوره...
بنتي عمرها اربع شهور وتعاني من امساك يوصل لي 3 ايام واذا خرجت تبكي بقوه ويكون خروجها صلب وانتي بكرامه وحليبها سميلاك ادفانس واليوم رحت الطبيب وغيره ل نوفالاك للامساك شرايج تنصحيني فيه؟؟
وفي بقعتين صغار لونهم احمر براس بنتي من ورا اخر شي من ولدت كان شعرها من ورا طويل وقصيته وللحين موجوده وصارت تتقشر هل هذا وحمه او حساسيه وشلون اعالجها؟؟
وعندي بنت اختي عمرها 6شهور تعاني من ترجيع فضيع ما تشرب الحليب الاترجع وبكميات مرة شويه مره وااايد وودتها للطبيب وغير حليبها من سميلاك ادفانس لي سيميلاك ادفانس للحساسية وماكو فايده ورجعت حق سميلاك دفانس و نفس الشي مع العلم ان اول ثلاث شهور ماترجع ف ماتدري شتسوي تستخدم نوفالاك للترجيع؟؟
هل زيت الزيتون مفيد لنسداد الخشم عند الاطفال انا سمعت ان اذا قطرنا هالزيت بخشم البيبي زين حق البيبي اذا سكر خشمه ف مادري استخدمه؟
ومشكووورة

 

[Cacawa]

مشكورة دكتورة ويعطيج العافية

 

[om7amad]

السلام عليكم دكتوره والله يعطيج العافيه




1- انا ولدة بولدي 19/10/08 والصراحه ماني عارفه احسب عمره عدل مادري الحين اهوا جم بالضبط لأن سالفه كمل الشهر .. تخربطني يعني اهوا بالضبط جم 6 شهور ولا 5 ونص ؟ لاني استعمل له ابتاميل, وامس عطيته رقم 2 لاني حسبت انه 6 شهور وهل اعطيه الحليب رقم 2 بأول الشهر ولا اخره وهل صحيح اني عطيته الحين ولا ارده على رقم 1 ؟

2- ولدي مسكين من عمر 3 شهور تقريبا يعني قبل تطعيمه الثاني بأسبوع حاشه سعال ديكي ومع الادويه والكمامات الحمدالله تحسنت حالته , وبعدها بوقت طبعا يستمرض معاه حساسيه بالصدر ومثل منتي عارفه تبدي بالكحه والبلغم ويعطوني له الفنتولين والأتروفينت والبلميكورت هذا غير الشراب والبخاخ والحمدالله بس اني لاحظت انه عقب العلاج يعني على اخره ومرات عقب مايطيب بجم يوم يطلع بوجهه بقع حمراء تكون محثربه وخشنه وفيها روس خفيفه و عطاني الدكتور له كريم ( أليكوم ) وماشاءالله وايد زين بس عرفت انه فيه نسبت كرتزون والصراحه مادري هذي البقع لي متى بتطلع له وهل طبيعي هل شي لان مرات تطلع له بدون مايكون مريض قبلها ؟

3-ولدي بدا يسنن وعشان الحكه اعطيه بسكوت الاطفال مادري صح ولا موزين لانه مسكين بس يبي يعض اي شي؟؟

4- دكتورتنا العزيزه ادري كثرة عليج بالأسئله بس تحمليني انا ايام اعطي ولدي وجبات وايام اكون مشغوله بس على الحليب عادي ولا لأ ؟؟ وبالنسبه للخضار مايحب طعمها لانها وايد ماسخه وادري ان الملح موزين شنو الحل هل ممكن احط له من مروق الدجاج بس الماي مع الخضار عشان يعطيه طعم ؟؟ ومشكــــــــــــــــــوره

 

[da7doo7y]

هلا فيج دكورتنا العزيزة :bbbiu:
وسؤالي لج بنتي من ولادتها فيها بصفار والحين كملت الأربيعين وشوي وماراح عنها البصفار والدكاترة يقولون بس اكثر لها عدد الرضعات والماي
واللون وايد اصفر حتى لون بياض عيونها اصفر
هل هذا مثلا مرض بالكبد ووين لازم اراجع
وشكرا

 

[د. رشــا الصفــي]

السلام عليكم

شلونكم خواتي

يسعدني اني ارد على استفساراتكم في الغد ان شاء الله

بس حبيت اذكركم بقراءة سورة الكهف يوم الجمعة

القاكم على خير في الغد