{ ...الدكتورة رشا الصفي تجيب على استفسارتكم ..} استضافة اسبوعية

[د. رشــا الصفــي]

هلا فيج دكورتنا العزيزة :bbbiu:
وسؤالي لج بنتي من ولادتها فيها بصفار والحين كملت الأربيعين وشوي وماراح عنها البصفار والدكاترة يقولون بس اكثر لها عدد الرضعات والماي
واللون وايد اصفر حتى لون بياض عيونها اصفر
هل هذا مثلا مرض بالكبد ووين لازم اراجع
وشكرا

اذا كنتى مراجعة فيها الطبيب و مسوين لها تحاليل يعني ماكو شي

فعلا ما تحتاج الا زيادة الرضعات و بس حتى الماي مو ضروري اذا ترضع طبيعي

و لازم تعرفين جم النسبة اقل شي كل اسبوع

و ممكن تسوين التحليل بأي قسم حوادث أطفال عادي

و مرض الكبد يبين بالتحليل ما يصير بالكلام بس

القصد وديها اسبوعيا تقريبا جيكي عليها احسن بالمستشفى القريب من بيتكم بحوادث الأطفال

 

[د. رشــا الصفــي]

السلام عليكم دكتورة

أتمنى بمشيئة الله عزوجل أن تفيديني لأني عجزت من أستشارة الأطباء والأشخاص ذو الخبرة

ولدت أبني بعملية قيصرية في الأسبوع 37 من الحمل لأنهم خافوا عليه لأن وزنه ما يزيد في الرحم

ولدته وكان وزنه 2ك والحمد لله ما احتاج إلى وضعه في الحضانة

بعد 3 شهور أنقطع عن الرضاعة الطبيعية وبديت أعطيه الحليب الصناعي سيميلاك ومن ثم تابعت وزنه لاحظت انه ما يزيد فنصحوني بحليب نان وعند زيارة لأخصائية الأطفال وكان عمره 6 شهور لاحظت وزنه الضعيف ونصحتني ببروميل مع الوجبات أنا قمت بتغير الحليب وإعطائه النظام الغذائي إلي نصحتني به الأخصائية لكن نفس الشيء الوزن ما يزيد بالمعدل المطلوب ولما بلغ 11 شهر كان وزنه 6 كيلو وأصيب بإسهال شديد لمدة 3 أسابيع نصحني الصيدلاني بحليب بيبيلاك بدون اللاكتوز والحمد لله تعافى على فكرة منذ الأسهال أصيب بإحمرار في الوجه وحكة الآن عمرة سنه ولا أدري ماذا أعطيه من الحليب علما بأنهم نصحوني ببيدياشور لناقصي الوزن \\


ما الحل عزيزتي في حالة ولدي؟وماذا تنصحيني بالنسبة للحليب؟

حبيبتي ممكن اعرف بالتفصيل وين و عند منو راجعتي عنده حق ولدج

خلى عنج كلام الناس و ذوي الخبرة من الامهات

ابي الدكاترة اللي رحتيلهم منو ؟و وين مكانهم ؟ و شنو سووله ؟ شنو التحاليل و الفحوصات و شنو نتايجها

بصراحة وزنه قليل بالنسبة لعمره و يحتاج تقييم من اخصائي اطفال

روحي المستوصف التابع لكم و طلبي تحويل على عيادة الأطفال الخارجية بالمستشفى التابع لمنطقتكم

و ودي الولد يقيمون حالته و يعطونه اللازم

بس لا تقطعين المراجعات من اول شي استمري معاهم علشان يصير فيه نتيجة

 

[د. رشــا الصفــي]

السلام عليكم دكتورة بصراحة ماقصرتي عالمجهود اللي تسوينه وكله في ميزان حسناتج انشالله
أنا بنتي بجري عمرها 4 شهور ونص وزنها عند الولادة 2 كيلو وألحين وزنها 4ونص كيلو هل طبيعي كل من يشوفها يقول كأنها أم شهرين والله تعقدت
تشرب حليب سيميلاك نيوشور رقم 3 الحمدلله مرتاحة عليه بس يقولون اللي بعمرها تشرب 5 أرقام صج؟
انا بيتي ماتدخله الشمس عادي ولا لازم أعرضها للشمس ؟
في صوب كوعها بقعة مو محددة الشكل لونها أبيض افتح من جسمها شنو تكون اخاف شي لاسمح الله؟
آخر سؤال ياقلبي تكرمين بولها له ريحة قوية عادي؟
ومشكورة وما قصرتي

وزنها زين ما عليج من كلام الناس

اساسا وزنها وقت الولادة قليل فمتوقع انها تكون ضعيقونه شوي حسب وزن ولادتها

بس هم هالوزن بالنسبة للعمر طبيعي لا تحاتين

بالنسبة لعدد ارقام الحليب مو شرط كل الأ"فال بنفس العمر يشربون نفس الكمية

كل واحد و شهيته

بالنسبة للشمس لازم اقل شي نص ساعة بالشمس كل يوم و لابسة ملابس خفيفة يعني نص كم و شورت مثلا او تبانة

البقعة اللي يم كوعها ممكن تكون وحمة عادية

بالنسبة للبول اذا ريحته قوية غيري الحفاظات اول اذا تستخدمين بامبرز يسوي ريحة بالبول عزكم الله

و اذا استمرت الريحة بعد ما تغيرين نوع الحفاظات

سويلها تحليل بول احسن تتطمنين ان ما في التهاب

 

[د. رشــا الصفــي]

دكتورة شخبارج؟؟

بنتي عمرهاا 7 شهور ونصف متي اعطيهااا الدجاج واللحم وشلون اضيفه علي اكلهاااا؟؟

يصير اطبخ لها الحين بقدونس مع اكلها؟

شنو الخضرة اللي اقدر افوحه لها الحين؟ الزهرة اعطيها

مشكووورة

الدجاج و اللحم لما تكمل 8 شهور

و يصير تحطين بقدونس عادي

الخضرة تستخدمين كل شي عادي

الزهرة تسويلها غازات وايد بس غير جذي عادي

العفو حبيبتي حياج الله

 

[د. رشــا الصفــي]

مرحبا دكتورة

الله يعطيك الصحة والعافية وبارك الله لك على

جهودك الطيبة معنا


بالنسبة لي أعتقد إستشارتي تتعلق بعلم نفس الطفل أكثر.. لكن بإذن الله يكون لها حل عند حضرتك
بنتي عمرها سنتين وتسع شهور , وحيده بعد 9 سنوات من محاولات الانجاب , عنيده , مدللة من الاب , لاتخافه لكنها معي العكس

لانني أدللها في موقف الدلال و اكون حازمه معها في الجد والغلط ...

في البيت تكون من اروع مايكون ... المشكلة عندما نكون في بيت اخر او في السوق او الجمعية هنا يبدأ الصراخ والعصبية
والبكاااء على أتفه الاسباب رغم توفير و مراعاة كل طلباتها واحتياجاتها !!!!

احاول هنا ان احتويها بالحزم مرة والمراعاة مرة ولكن لاااااااااااا فائدة والله العظيم احيانا اصل الى حد البكاء والعصبية في الضرب

والزعل او التوبيخ ولكن ... نفس الحااالة تتكرر مرات ومرات ...

ساعديني بحل الله لا يبكيلك عيييين
​

الله يخليلج اياها و يرزقج لها اخوان و خوات يا رب

اول شي عمرها البنت صغير على الضرب و التوبيخ و الزعل و البكاء و العصبية

كل اللي تبيه بنتج هو لفت الانتباه و بس

مو قصدها تزعلكم ولا تأذيكم

لما تكونون بالبيت يكون كل انتباهكم منصب عليها فسلوكها يكون جيد

و بره البيت تنشغلون عنها بالزوار او التسوق

فتسوي هالأشياء علشان تجذب انتباهكم لها

كل اللي لازم تسوونه لنكم تتجاهلون سلوكها تماما

لا تشدون معاها ولا تسوون لها اللي تبيه

مع الوقت راح تعرف ان سلوكها هذا ما تستفيد منه و تبطل بروحها

 

[د. رشــا الصفــي]

السلام عليكم دكتوره...
بنتي عمرها اربع شهور وتعاني من امساك يوصل لي 3 ايام واذا خرجت تبكي بقوه ويكون خروجها صلب وانتي بكرامه وحليبها سميلاك ادفانس واليوم رحت الطبيب وغيره ل نوفالاك للامساك شرايج تنصحيني فيه؟؟

ممتاز نوفولاك للامساك استمري عليه و بترتاح ان شاء الله

وفي بقعتين صغار لونهم احمر براس بنتي من ورا اخر شي من ولدت كان شعرها من ورا طويل وقصيته وللحين موجوده وصارت تتقشر هل هذا وحمه او حساسيه وشلون اعالجها؟؟

هذي وحمة و تروح مع الوقت

ما تحتاج شي

وعندي بنت اختي عمرها 6شهور تعاني من ترجيع فضيع ما تشرب الحليب الاترجع وبكميات مرة شويه مره وااايد وودتها للطبيب وغير حليبها من سميلاك ادفانس لي سيميلاك ادفانس للحساسية وماكو فايده ورجعت حق سميلاك دفانس و نفس الشي مع العلم ان اول ثلاث شهور ماترجع ف ماتدري شتسوي تستخدم نوفالاك للترجيع؟؟

اول شي شوفوا كميات الحليب و الأكل ممكن يكون زايد عن حاجتها اذا كان وزنها يزيد زين و فحصها طبيعي اذا كان الوزن يقل و حالتها العامة تعبانة لازم تراجع فيها الطبيب مرة ثانية

هل زيت الزيتون مفيد لنسداد الخشم عند الاطفال انا سمعت ان اذا قطرنا هالزيت بخشم البيبي زين حق البيبي اذا سكر خشمه ف مادري استخدمه؟
ومشكووورة

مادري عن زيت الزيتون بصراحة

ما اقدر افيدج

 

[د. رشــا الصفــي]

مشكورة دكتورة ويعطيج العافية

العفو الله يعافيج

 

[د. رشــا الصفــي]

السلام عليكم دكتوره والله يعطيج العافيه




1- انا ولدة بولدي 19/10/08 والصراحه ماني عارفه احسب عمره عدل مادري الحين اهوا جم بالضبط لأن سالفه كمل الشهر .. تخربطني يعني اهوا بالضبط جم 6 شهور ولا 5 ونص ؟ لاني استعمل له ابتاميل, وامس عطيته رقم 2 لاني حسبت انه 6 شهور وهل اعطيه الحليب رقم 2 بأول الشهر ولا اخره وهل صحيح اني عطيته الحين ولا ارده على رقم 1 ؟

ولدج كمل 6 شهور و جم يوم و خلج عالحليب 2 عادي

2- ولدي مسكين من عمر 3 شهور تقريبا يعني قبل تطعيمه الثاني بأسبوع حاشه سعال ديكي ومع الادويه والكمامات الحمدالله تحسنت حالته , وبعدها بوقت طبعا يستمرض معاه حساسيه بالصدر ومثل منتي عارفه تبدي بالكحه والبلغم ويعطوني له الفنتولين والأتروفينت والبلميكورت هذا غير الشراب والبخاخ والحمدالله بس اني لاحظت انه عقب العلاج يعني على اخره ومرات عقب مايطيب بجم يوم يطلع بوجهه بقع حمراء تكون محثربه وخشنه وفيها روس خفيفه و عطاني الدكتور له كريم ( أليكوم ) وماشاءالله وايد زين بس عرفت انه فيه نسبت كرتزون والصراحه مادري هذي البقع لي متى بتطلع له وهل طبيعي هل شي لان مرات تطلع له بدون مايكون مريض قبلها ؟

ولدج عنده حساسية بصدره و اللي مثل حالته متوقع انه يكون عندهم حساسية بالجلد و هى البقع الحمرا اللي تطلع بوجهه

و الدوا حتى لو فيه نسبة كورتيزون اذا تستخدمينه بين فترة و فترة و مدة جم يوم ما منه مضرة

3-ولدي بدا يسنن وعشان الحكه اعطيه بسكوت الاطفال مادري صح ولا موزين لانه مسكين بس يبي يعض اي شي؟؟

عطيه بسكوت الأ"فال مافي مشكلة عادي

4- دكتورتنا العزيزه ادري كثرة عليج بالأسئله بس تحمليني انا ايام اعطي ولدي وجبات وايام اكون مشغوله بس على الحليب عادي ولا لأ ؟؟

لأ لازم ياكل باليوم اقل شي وجبة وحدة

وبالنسبه للخضار مايحب طعمها لانها وايد ماسخه وادري ان الملح موزين شنو الحل

حتى لو ماسخة لزم يتعود عليها اهو ما جرب غيرها فما يعرف يميز الطعم

استمري معاه لما يتعود عليها بدون اضافة الملح او السكر لأنه يخرب الكلى

هل ممكن احط له من مروق الدجاج بس الماي مع الخضار عشان يعطيه طعم ؟؟ ومشكــــــــــــــــــوره

لا مروق الدجاج ثقيل عليه بهالعمر

خلطي مع الخضار جزر و سالاري يعطي طعم شوي للخضار و ريحة حلوة

 

[(محبة)]

حبيبتي ممكن اعرف بالتفصيل وين و عند منو راجعتي عنده حق ولدج

خلى عنج كلام الناس و ذوي الخبرة من الامهات

ابي الدكاترة اللي رحتيلهم منو ؟و وين مكانهم ؟ و شنو سووله ؟ شنو التحاليل و الفحوصات و شنو نتايجها

بصراحة وزنه قليل بالنسبة لعمره و يحتاج تقييم من اخصائي اطفال

روحي المستوصف التابع لكم و طلبي تحويل على عيادة الأطفال الخارجية بالمستشفى التابع لمنطقتكم

و ودي الولد يقيمون حالته و يعطونه اللازم

بس لا تقطعين المراجعات من اول شي استمري معاهم علشان يصير فيه نتيجة

عفوا دكتورة

أنا من دولة مجاورة

أنا رحت للمستوصف وكنت اتابع مع الأخصائية لكنها ما أضافت شيء جديد لحالة ابني

فقررت الذهاب لمستشفى خاص هناك بعد التحاليل والأشعة كان واضح نقص الدم وتأخر بسيط في قياسات الطول ومحيط الرأس والأشعة ما وضحت شيء فحولني لمستشفى حكومي من اجل أشعة مغناطيسية وننتظر موعد طبيب المخ والأعصاب شهر 5 حتى نعرف نتيجة الأشعة ؟!!
كما انه طلب منا متابعة العلاج الطبيعي والحمد لله حدث تحسن بسيط

هذا حدث في الشهر الثامن تقريبا لأنه ما كان يصلب نفسه وسيقانه دايما ما يوقف عليهم وفي نهاية الشهر التاسع بدأ يصلب نفسه ويجلس...

 

[انت حبي]

السلام عليكم
بنتي يااااادكتور ذبحتني من البلغم دوووووووووم تطريش من فتره طويله بسبب البلغم واحيانا تطلع البلغم مع التطريش واحيانا لا

دكتور الله يخليك ابغى حل غير الادوية


الف شكر لك على المجهود

 

[فروحة الكويتية]

مشككووووووووووووووووورة وايد يا دكتورتنا وادري تعبناج معانا بس عذرينا
خشمة!!!!!!!!!!!!

دكتورة بنتي الحين عمرها 8 شهور يصير اعطيها بيض؟

متي اعطيها اكل البيت؟

 

[nono.724]

مرحبا دكتوره الله يعطيك العاااااافيه ولدي بيخلص تسع شهور فيه زكام مستمر له شهرين ونصف وبلغم وديته المستشفى نوموه خمس ايام يعطونه بخار ومضاد مع المغذي وطلع من المستسفي وماراح عنه الزكام بس خف بس كان فيه مشكله اول ماطلع كان يرجع ترجيع قوي واسهال وكان بالمستشفى جهال فيهم نزله معويه بس ماحطيت في بالي ان انعدى منهم وماعالجته دكتورته هاذا الكلام صار له شهر والحين من طلع من المستشفى لين اليوم صار له شهرين واستمر معاه بس على خفيف والحين دكتوره له اسبوعين يرجع ترجيع قوى من فمه وخشمه اذا رضع الرضعه كامله او نص الرضعه ولا فيه اسهال وحليبه سيميلاك 2 دكتوره انا شكيت انه من الحليب لان سميلاك كان صناعته ايرلندي وانقطع من الصيدلايات وحطوا سميلاك صناعه اسبانيا ومايمدحونه صار ثقيل وريحته قويه مو حلوه وسالت اكثر من وحده وقالتي نفس المشكله تكفين دكتوره ابي حل مع خشمه والزكام المستمر او دواء ينفع مع عمره مع العلم المستشفى شكو ان فيه لحميه؟ والسوال الثاني شنو مشكلة الترجيع المستمر هل من الحليب اومن الزكام والبلغم اومن الصناعه مع العلم اني ابغير حليبه الى بروميل جولد هل تنصحيني فيه اولا او بيدياشور يناسب حق عمره وتنصحيني اغير حليبه؟والسوال الثالث بالنسبه لعمره مايحبي ولا طلع له اسنان تنصحيني اشربه فيتامين اذا اوكيه شنو الفثامين المناسب؟ واخيرا طولت عليج بس انا بحاجه حق اجوبتك وراح ادعيلك من كل قلبي والله يجزاك خيرررررررر دكتوووره تكفين ثم تكفين اهتمي حق موضوعي والله يوفقك واعذريتي تعبتك معاي

 

[@الياسمين@]

يعطيج العافيه دكتوره
انا بنتي كملت تسع شهور ... ودي اعرف اقدر اعطيها حليب فراوله اوموز او كاكاو بالمميه بهالعمر ؟؟

 

[خجل العذاأارى]

مرحباااا دكتوووره ولدي بالشهر العاشر وصااارله تقريبا اسبوعين اسهااال تكرمين مره الى مرتين باليوم وريحته قوييه واسفه عاوصف بس اللون اصفر وصارله خلال الفتره انه تعب وصااارفيه حراره مع ترجيع ومن بعد الترجيع صااار ماياكل مثل قبل حده لقمتين ويكح وعلى طوول ترجيع وهو بداتطلع اسنانه اللي عالجنب فووق شنووو سبب الاسهال وشلون يرجع ياكل ولدي حيل ضعف

 

[Q8NV]

انا توني والده صارلي 27 يوم طفل الاربعين اشلون النفس عنده طريقه التنفس

وولدي عمره سنه ونص خشمه كله مسكر وعنده غازات واذنه فيها التهاب دائم من المميه

 

[أم هديل]

السلام عليكم اشلونج دكتورة عندي بنتي عمرها سنتين ونص بس اتصير فيها انفلونزا على طول صدرها يصير فيه بلغم واعالجها واوديها الطبيب مايبقى دوا ما استخدمته والحين كمام ويرجع لها مرة ثانية ارجو انك اتفيديني واهي عمرها بالاشهروهي على هالحال وشكرا

 

[سين من الناس]

نورتي المنتدى يادكتوره

 

[سين من الناس]

عندي ولد عمره سنتين وشهرين قصير بنسبه اللي بسنه بشكل واضح وضعيف وزنه 11 كيلو مشى متأخر سنه وسبع شهور ونص راجعت فيه لما صار عمره سنه وثلاث شهور وشوي بعد التحاليل قالو فيه نقص فيتامين دال لين عظام وعطونا الفا ون وعرضناه للشمس وعدنا التحليل بعد شهر طلع سليم بعدين لما صار سنه وخمس شهور وديته مستشفى الهادي عظام سواله تحاليل سليم واشعه عالحوض والساق والقدم كله سليم عطانا جوتي طبي عشان يوازن قدمه ما يفسخه الا وقت النوم ليما يسير عمره ثلاث سنين ومشى بعد شهرين اللحين يمشي حتى بدون الجوتي بس مانقطه الا عند النوم حسب كلام الدكتور بس المشكله انا ليما الحين يطيح بالارضيات الغير متساويه ومايقدر يصعدالدرج لازم نمسكه يعني نسنده يعني صار له خمس شهور يمشي بس للحين مو متمكن أبي اسوي له جك أب وتحاليل وين أوديه دكتور عظام ولا اطفال هل في دكتور عظام أطفال

 

[بطة الزلبطة]

اهلين دكتورة وجزاج الله الف خير على ردودج لنا برحابة صدر ...... دكتورة انا فيني سكر واخذ باليوم 4 ابر انسولين وان شالله الشهر الياي ولادتي بغيت اسال عادي ارضع طبيعي اذا كان السكر مرتفع عندي اللي اعرفه اني طول ما ارضع لازم ما اخذ حبوب السكر بس ابر ,والسكر اللي فيني ما ياثر عالبيبي اذا برضعه طبيعي لاني الصراحة تعبت 9 اشهر وكل يوم 4 ابر فودي عقب الولادة اريح منهم ويعطيج العافية

 

[بطة الزلبطة]

اهلين دكتورة ويعطيج الف عافية ... دكتورة انا بعد جم يوم ولادتي ان شالله وفيني سكر اخذ باليوم 4 ابر انسولين بس حبيت اعرف اذا اقدر ارضع البيبي طبيعي والا لا يعني اذا السكر عندي 8 او 9 هذا ما ياثر عالبيبي وانا عارفة اني طول ما ارضع مايصير اخذ حبوب السكر فياليت تفيديني جزاج الله خير