سيدة السلام
New member
مرحبااا كروشااااااات وغير الكروشاااات واللي مستقبلا كروشات ... واللي في الماضي كروشات زي حلاتي ...
ولدت الحمدلله بعد عناء 9 شهووووور مع الكريشة ويبت بنت كتكوتة عسووولة ...
قريت قصص الولادة في هالمنتدى واستفدت من أشياء وايد ... وقلت إذا ولدت راح اكتب قصتي اللي كانت فلم هندي صج ....
كنت اراجع في السلام عند د. نجمة علي .. كانت زينه بس الدور اللي عليها مو بسيط يعني عادي اروح المستشفى الساعة 5 وأطلع 10 عادي .... لحد مازهقت وريلي حده زهق ... حولنا عند الشاذلي بعد مامدحوه لي ناس بس حسيت انه بالسونار حمار حشاكم ... ومايفهم شي ... اصلا يحط السونار ثواني وخلاص كل شي تمام ... وفوق كل هذا يبيني كل يومين عنده .. صرف لي حبوب حديد .. من خذيت اول حبة الله لايوريكم جسمي كله قب حساسية حتى النوم مو قادرة انام تقول فيني جرب
وقلت له المشكلة ماحلها لي قالي روحي قسم الأمراض الجلدية ... دشيت شهري قلت له دكتور ... انا حاسة ان حوضي صغير ومايتحمل البيبي ... قالي مافيش دكتووور يقدر يحدد إذا حتولدي طبيعي ولا قيصري ... وانا حطول بالي علييك ... بس روحي حمي الطلق وتعالي :0bee2e8d89:...
قلبي كان ناغزني حييل ... بس قلت خل اشوووف آخرتها ... اتصلت رفيجتي وكانت تسولف مع رويال حياة وليش ماأخلي استقبالي فيه ... وكنت اقولها انا الحين اهم شي عندي الدكتور مو الاستقبال ... بس لحظتها تذكرت سالفة قالتها لي حماتي عن دكتورة خالدة المجيبل في رويال حياة ... كانت حماتي عندها مشكلة الحمل ووايد يطيح حملها ... كانت تراجع عندها في مستشفى الصباح قبل ماتروح رويال حياة ... وسبحان الله غيرت لها دم البيبي وهو في بطنها ... عن طريق حقنة في المشيمة .. والحمدلله ... فطرى في بالي اروح لها اشوف شتقوووول ... وخصوصا بعد ماقام ينزل علي ماي ودم بفترات متقطعة وبدون طلق ...
المهم بعد خراب مالطا حجزنا موعد ورحنا لها .. وكنت بالأسبوع 38... طبعا بالموعد ومافي دور مثل السلام ومعمعة السلام وفوق هذا بالفحص الواحد ياخذ راحته مو نظام "الكروته" على قولة اخوانا المصريين ... بعد سونار استمر ساعة تقريبا ...
كانت النتائج مخيبة للآمال ... عقب السونار قالت لي الدكتورة خالدة ... اول شي الحساسية هذي حساسية حمال مو حساسية من دوا ... وثاني شي ضغطج مرتفع وبهالحال لازم ولادة وفوق هذا وهذا حوضي صغير وراس البيبي اكبر ومو قادر يدش بالحوض ( وقالت لي لو انتي مريضتي جان ماخليت حجم البيبي يوصل لهالحجم وحوضج صغير) .. وماي البيبي ناقص حييل .. والمشيمة متكلسة .. وهذا خطر على حياة الجنين وحياتج بعد ..مافي حل إلا انج تولدين قيصري إذا تبين تولدين قيصري ممكن ادشين الحين وإذا تبين تنطرين على نفسج كيفج ... راح اعطيج يومين تفكرين فيهم و12 ساعة إذا بتحاولين تولدين طبيعي بس النتيجة قيصرية بالأخير ... وإذا تبين تسألين دكتور ثاني ... هم كيفج ...
طبعا بعد هالصدمة ... مابقى شي ماسويته كثفت المشي اكثر وأكثر .. ومابقى شي ماشربته .. وزوجي شوي يسوي الدارسين .. وشوي يمشي معاي عالرمل هديت حيلة مسكين ... يقولي انا اللي حوضي كبر مو انتي ..
ولا أكو فايدة ...
المهم ... اخذنا موعد ... وزهبت اغراضي ورحنا الصبح خذوا مني التحاليل وقاست لي لقت نفس اليوم اللي قبلة 1سم بس ... لاتغير ولا تبدل ...وسوت سونار ثاني مره وتخطيط طلق لقت كل شي مثل مااهو... قلت في نفسي دام الموضوع بآخرته قيصيرية شحقة ابهذل نفسي مع طلق صناعي و محاولات فاشلة ...
توكلت على الله ودشيت انا مع زوجي ... احلى مافي الموضوع ان زوجي دش معاي غرفة التحضير للعملية وغرفة العملية ... ماهدني إلا لما رحت الملاحظة ... طبعا خذيت ابره ظهر وكنت قاعدة في العملية وزوجي معاه شوي يم راسي وشوي ماسك الكاميرا يصور ... الستاف حده ينن والدكتورة ولا اروع بس تسمي وتسبح .. وفوق هذا نفسيتها روعة ... قلبتها اهي وزوجي غشمرة وضحك .. صج خلو وقت العلمية يركض ... وطلعت العنونه ناشفة من نقص الماي ... ناصعة البياض تقول عليها جصصصصصصص...
هذي صوره كتكوتي ( مجصصة ) ...
طبعا وإحنا بغرفة العمليات وعقب ماطلعت الكتكوتة دق زوجي على امي وبلغها بولادتي ... ( امي وايد تخاف ومن النوع الوسواسي حييل عشان جذي مابلغناها في ان ولادتي فتح بطن) ...
الحمد لله تمت الولادة بسلاااااااااااام
