قوارب البطاط بحشوه الدجاج والمشروم والجبن ٣٢٨ سعره حراريه

١٨٢ جرام بطاطه ١٢٧ سعره
٨٤ جرام صدر دجاجه ٩٢ سعره
٧٢ جرام مشروم ١٦ سعره
ملعقه صغيره زيت زيتون ٤٠ سعره
بصل اخضر
١٤ جرام جبنه موزاريلا قليله الدسم ٤٠ سعره
كزبره طازجه مفرومه
ملعقه طعام معجون طماط ١٣ سعره
ملح بالثوم
كركم وكاري

اول شي نسلق البطاطه لحد ماتستوي حيل
نهرسها بهراسه البطاط ونضيف عليها رشه ملح بالثوم واعشاب ايطاليه
وشويه كزبره طازجه مفرومه وملعقه طعام او ٢ حليب خالي الدسم علشان يسهل تشكيلها

بعد ما شكلنا القوارب نخليها على صوب ونجهز الحشوه

نحمس مع زيت الزيتون البصل الاخضر لحد ما يذبل شوي
نقصص صدر الدجاجه مكعبات صغااااار ونحمسها معاهم ونضيف الملح بالثوم والبهارات الكركم والكاري
ونغطيهم شوي علشان يستوي عالبخار ويطلع ماي الدجاج

نضيف الكزبره الطازجه ونحمسها عدل وعقبها المشروم ونغطيه لما يستوي
اخر شي نحط معجون الطماط وعقبا الجبن ونحركه عدل ونغطيه

لما ينشف شوي نخليه شوي يبرد ونحشي قوارب البطاط فيها
تقدرون تحطون جبن موزاريلا وتدخلونه الفرن من فوق لحد ما يذوب الجبن
بس انا ما حطيت علشان ما تزيد السعرات والدهون افضل

وعليكم بألف عافيه ألذ طبق صحي ☺️💪