الباييلا على طريقه الشيف تسنيم 🔶المقادير :
🔸نص كيلو فيليه هامور نقطعه مكعبات متوسطة الحجم ونتبله بليمون وكركم وثوم 🔸كيلو ربيان مقشر بالكامل نتبله بليمون وكركم وثوم 🔸٣ اكواب فلفل ملون مقطعين صغار 🔸كوب بصل ابيض مقطع صغير 🔸 كوبين ونص ارز الباييلا او اي نوع ارز قصير الحبه 🔸كوب بزاليا 🔸ملح / ورق الغار / ١ م.ط ببريكا / ١ م.ط بهار البايلا اذا مو متوفر ممكن استخدام اي نوع بهار مشكل / ١/٢ م.ط زعفران بودرة / ١/٤ م.ط خيوط الزعفران
🔸روزماري فرش 🔸١ م.ط ثوم مهروس 🔸١/٢ كوب زيت زيتون 🔸٥ اكواب مرق دياي او سمك 🔷الطريقة:
🔹بمقلاة خاصة بالباييلا نحط زيت الزيتون ونشوح فيه الهامور وبعدين نرفعه ونخليه على جنب ، وبنفس المقلاة نشوح الربيان وبعدين نرفعه ونخليه على جنب .
🔹بعدين نزيد شوية زيت زيتون ونضيف البصل ونقلبه شوي وبعدين نضيف الثوم نقلبه بسرعة ونضيف الفلفل البارد ونقلبهم مع بعض عدل ، نضيف ورق الغار والبزاليا ونقلبها مع الحمسة ونخليهم شوي لم يذبلون عقب نضيف بهارات البايلا والبابريكا ونقلبهم مع بعض عدل ، ونضيف الزعفران والزعفران البودرة ونقلبهم.
🔹تالي نضيف فوقهم ارز البايلا ونخليهم ينحمس مع المقادير عدل وبعدين نضيف مرق سلق الدياي ، ونضبط الملح ، ونرد نرجع عليهم الهامور والربيان اللي شوحناهم واخر شي نحد اعواد الروزماري الطازج ، ونخليها على نار عالية لمدة ٦ دقايق تالي نقصر النار ونخليها بعد ٦ دقايق على نار متوسطه واخر شي ونغطيها ونخليها من ١٠ دقايق الى ربع ساعة على نار هاديه وبعدين نسكر النار ونخليها ترتاح ١٠ دقايق ونقدمها بالعافيه