رز الشواية الابيض ( بطريقة البخاري باضافاتي)
جربوها تهببببل مررة ماشاء الله قضوا عليها
طبعا البخارية بس يحطون الكمون واحيانا الفلفل الاسود في اكلهم بس عاد انا حطيت هههه
اول شي قطعت بصلتين طوال وقطعوا اكثر لو تحبون ثلاث او اربع كل ماكثر احلى وقطعت جزرة او ثنتين اصابع
في القدر حطيت زيت وكثرت وبهارات صحيحة ( البخارين مايحطون ) قرفة وهيل وورق غار ولومي ومسمار والبصل واخرك لين يذبل مابيه يصير بني عشان مايغير لون الرز
شلت من البصل شوي للحشو بعدين
اضفت الدجاجة كاملة وحطيت فلفل اسود وكمون وشوي بهار مشكل ممكن ماتحطونه
وقلبتها شوي ثم حطيت الماء والملح وتركتها تطبخ لين تستوي تقريبا نص ساعة
صفيت الماء وخذت مقدار حاجتي منه للرز ( نوع الرز مزة) وكل كاس رز له كاسين ماء من المرق
الدجاج دهنته بخليط( زيت ومعجون طماطم وفلفل اسود وكمون) ورشة ملح ودخلته الفرن
الحشو : زيت وبصل وجزر وزبيب اسود ورشة فلفل اسود وكمون
احط الرز اذا غلى الماء ثم اخليه على حرارة عالية لين تطلع الحفر او يظهر الرز على السطح احط م ص ماء كادي يعطيه طعم المطاعم
واحط الحشو فوقه والحمص ( البليلة) واهدي الحرارة اقل شي واغطيها واتركها نص ساعة تقريبا
وبس بالعافية
السحاوق ( الدقوس)
في الخلاط
طماطم حبة وحدة
ربع شدة بقدونس
حبة فلفل حار
م ص خل
ملح
البعض يضيف ثوم انا ماضفت
سلطة الزبادي
زبادي وخيار ونعناع ناشف وملح