مجبوس الدجاج على طريقة الشيف تسنيم

– دجاجتين نقطعهم بالنص – بهارات السلق الحب (بصلتين – ٣ اعواد دارسين – ١٠ حبات هيل – ١٠ حبات فلفل اسود – ١٠ حبات مسمار – ٤ ورق غار)
– بهارات السلق المطحونه ناخذ ملعقه طعام من الخلطه اللي بين القوسين لكل دجاجه ( ١ م.ط كزبره – ١/٢ م.ط هيل – ١م.ط عرج الهيل او الخولنجان – ١/٢ م.ش مسمار – ١/٢ م.ش فلفل اسود – ١ م.ط زنجبيل )
– طريقه سلق الدجاجه : نحط ١/٢ كوب سمن في الجدر ونضيف له بهارات السلق الحب ونقلبهم وعقب نحط الدجاج اللي قطعناه نصين ونقلب الدجاج مع السمن والبهار الحب لمده ٥ دقايق عقب نضيف لهم ماي يغطي الدجاج و بس يغلي الماي نضيف الملح و٢ م.ط من بهارات السلق المطحونه ونخلي الدجاجه تنسلق لمده ساعه كامله.
– مقادير الحشو: ١ كوب نخي مجروش نسلقه ونخليه على جنب – ٥ حبات بصل نقطعهم مكعبات ونحطهم في مقلاة بدون مانضيف اي شي ونقلب البصل لم يصير بني ونرشه ماي ونرجع نقلب ونرشه ماي لم يستوي البصل عقب نضيف له ٣ م.ط سمن نباتي و نضيف له النخي المسلوق و بعد نضيف له ١ م.ط من بهار سلق الدجاحه و ١/٢ م.ش لومي اسود مطحون ونعدل الملح ويكون جاهز الحشو نخليه على جنب.
– مقادير الدقوس: ٥ حبات طماط نحطهم بجدر ونضيف لهم ماي لم يغطي الطماط ونسلق الطماط لم يستوي تقريبا ٣٠ دقيقه عقب نشيل الطماط من الماي ونضربهربالخلاط مع نص قلاص من ماي سلق الطماط ونخليه على جنب – في جدر نحط ١ م.ط سمن ونضيف له ١/٢ علبه معجون طماط تالي نضيف الطماط اللي ضربناه بالخلاط ونضيف له ١/٢ م.ط ثوم و ملح ويكون جاهز للتقديم.
– بعد مايستوي الدجاج نطلعه ونحطه في صينيه عقب ندهنه في خليط من (١/٢ م.ط هيل مطحون – ١/٤ م.ط دارسين – ١/٢ قلاص زعفران منقوع بماي – ١/٢ م.ش فلفل اسود – ١/٢ م.ش مسمار) ونقلي الدجاج ونتركه على جنب . – مقادير العيش : ٢ كوب عيش بسمتي منقوع بماي – ١/٢ كوب سمن نباتي – ٢ م.ط بصل مكعبات – ١/٢ م.ط بهار العيش ( هيل مطحون – رشه فلفل اسود مطحون – رشه مسمار مطحون ) – زعفران – ماي ورد – طريقة العيش : نحط السمن بالجدر واضيف له البصل و البهار ونقلبهم مع بعض وعقب نضيف لهم العيش ونقلبه شوي شوي لايتكسر عقب نضيف له ماي سلق الدجاج ونخلي مستوى الماي ١ سم فوق العيش ونخليه يطبخ على نار متوسطه لم يقل الماي ويبين العيش نغطي الجدر ونخليه يستوي على نار هاديه واخر شي نضيف الزعفران وماي الورد لم يتسكر العيش ويكون جاهز للتقديم ..
– في ماعون التقديم نحط العيش وعقب الحشو وفوقه الدجاج وبالعافيه …