لازانيا السبانخ والدجاج
علبه لازانيا السبانخ وممكن استخدام اللازانيا العاديه
كيلو ونص دجاج مفروم
٦ أكواب سبانخ فرش مقطع
١ كوب بصل مكعبات
١ م.ط ثوم
١٠ م.ط جبن سائل (جبن قلاص)
فلفل أسود/ ملح
١/٢ قالب زبده يعني ٥٠ غرام
٢ كوب جبن تشيدر وموتزريلا
-مقادير وطريقة البشاميل:
اصبع زبده و ٢ مكعب ماجي و ٣ قلاصات حليب سائل نحطهم في جدر على النار حتى يغلي الخليط.
في خلاط العصير نحط كيس جبن موتزريلا و ٥ م.ط طحين ابيض مع ٣ قلاصات ماي يعادل ٧٥٠ مل ونضربهم مع بعض ونخليهم على جنب .
بس يغلي الخليط اللي على النار نضيف له الخليط اللي ضربناه بالخلاط ونستمر بالتحريك لم يثقل البشاميل ونحط فلفل اسود بس لان مكعبات الدجاج مالحه.
الطريقه:
نحط الدجاج المفروم في جدر ونقلبه لم يستوي ونتركه على جنب. في مقلاة عميقه نذوب الزبده و نضيف لها البصل ونقلبهم لم يصبر اشقر عقب نضيف ١ م.ط ثوم ونقلبهم وبعدها نحط السبانخ المغسول ونقلب المقادير مع بعض ونضيف لهم ملح وفلفل اسود بس يذبل السبانخ نضيف الخلطه هذي على الدياي وبعدها نضيف ١٠ م.ط جبن سائل ونخلي الخليط يتجانس على النار بعدها نضيف لهم نص كميه البشاميل و نخلطهم عدل ونطفي النار. في صينيه الفرن نحط طبقه من خلطه الدجاج والسبانخ وطبقه من اللازانيا ونكرر الطبقات وممكن نحط من جبن الموتزريلا والتشيدر بين الطبقات واخر طبقه نحط بس بشاميل بعدها نغطي الصينيه وندخلها الفرن من تحت على حراره ١٨٠لمده تقريبا ٤٠ دقيقه عقبها نشيل القصدير و نرش الويه بجبن الموتزريلا والتشيدر وندخلهم الفرن علشان يتحمرون وبعدها تكون جاهزه للتقديم وبالعافيه