ورق عنب بالزيت والليمون
غرشه ورق عنب
كوب ونص بصل مكعبات
١ م.ط ثوم
كوب ونص طماط مكعبات
١/٢ كوب نعناع اخضر
كوب ونص كزبره
كوب ونص اشبنت
علبتين ماجي يعني ٤ مكعبات
١ م.ط ملح
كوب عصير ليمون
كوب ونص زيت زيتون
كوب ونص ارز مصري نغسله ونصفيه من الماي
بطاط شرايح
١/٢ م.ط ملح الليمون
الطريقه
في مقلاة عميقه نحط نص كوب زيت زيتون ونضيف له البصل ونقلبهم لم يذبل البصل شوي عقب نضيف مكعبات الطماط ونقلبهم و بعدها نضيف الثوم ومكعبات ماجي ونخلطهم لم يذوبون مع بعض و تالي نضيف الكزبره والاشبنت والنعناع ونقلب مقاديرنا مع بعض بعدها نحط الملح و ملح الليمون ونقلبهم واخر شي نضيف كوب ليمون وكوب زيت زيتون ونطفي النار و بعد مانطفي النار نضيف الارز المصري المغسول ونخلط المكونات مع بعض وبعدها نخلي الحشوه تبرد لمده تقريبا ١٥ دقيقه . بعد ماتبرد الحشوه نلف غرشع ورق العنب كامله و نصفي الحشوه من الصلصه و نحتفظ بالصلصه علشان نحطها مع الماي اللي راح نطبخ فيه ورق العنب. في قاع الجدر نحط شرايح بطاط وبعدها نصف ورق العنب بعد مالفيناه و نحط صحن وفوقه ثقل علشان نثبت ورق العنب بعدها نضيف الصلصه اللي صفيناها من الحشوه و نضيف ماي فاتر نغطي ورق العنب ونخليه يطبخ لمده ساعتين على نار هاديه بعدها نطفي النار ونخلي الجدر مغطى مثل ماهو لمده ساعه لم يبرد وعقب نشيله بس نرفع عنه الثقل ونخلي الصحن مانشيله ونحط عليه الغطاء مال الجدر وندخله الثلاجه ليله كامله بعدها ثاني يوم نقلبه ونحطه في ماعون التقديم وعليكم بالف عافيه
ملاحظه هامة: لاتفتحون جدر ورق العنب وهو حار علشان مايصير اسود