~¤ô¦ô¤~ دوانية رشيقات المستقبل ~¤ô¦ô¤~الجزء الثاني

[سمسميه]

قسم السمنه والنحافه يشجع حرص العضوات واهتمامهم في السعي نحو الرشاقه
ويهتم بروح التحدي والاصرار لديهم لذلك
يسعدنا افتتاح الجزء الثاني من دوانية الرشيقات كتجمع دائم لكل من ترغب بالتحدي في الرجيم مع زميلاتها من العضوات من خلال تبادل الافكار واليوميات والتشجيع المستمر

مع تمنيات قسم السمنه والنحافه لكم باطيب التمنيات للحصول على جسم رشيق وصحه افضل

 

[بطة رشيقة]

بسم الله الرحمن الرحيم ..

افتتح القسم الثانى من الدوااانيه ...

والقى هذه الكلمه بالنيااابه عن صديقاتى وبقيه العضوااات

اقول شكرا لك سمسميه الحلوه على حرصج واهتمامج فينا ومساااعدتناااااا على التخلص من كرشتنا وزنووودنا ...

واتمنى لكم رشاااقه دائمه

اختكم

بطه رشيقة :eh_s(21)::eh_s(21):

كل عام وانتوا بالف خير وكل سنه وانتوا طيبين ربى يجعل سنه 2010 سنه خير علينا ويسعدنا ويعينا على تكمله المشوااااار ونوصل لهدفنا جريب ..

وعندى سووعال حق كل وحده فيكم ...

شنو هدفج او شنو الشى اللى ودج تسوينه فى هالسنه اليديده ..؟

بالنسبه لى


اتمنى ان ربى يوفقنى ويسعدنى ويحقق امنياااتى العنونه فى هالسنه اليديده ان شالله ...

ان شالله ناويه اكمل مسيرتى الرجيميه بدون توقف باذن الله حتى لو صار وربى كتب وحملت راح احاول انى التزم فيه ووعدت نفسى الرقم اللى كان ما راح اشووووفه مره ثانيه ...

باغذن الله اتمنى انى تتغير حياتى من ناحيه ما ادرى شنو اسميها بس ابى اطلع من مكانى وابى استقل وابى ابدى حياه يديده وان شالله ربى يرزقنى اخو او اخت حق ولدى ويعينى على انى اتغير من داخلى للاحسن ..

وفى شى ان شالله ناويه انى اوقفه نهاااائيااااااااا ويارب يارب انى اقدر ابى اتوقف عن الحش بكل انوااااعه بتااااتااااا ....

وابى اكون انسانه سعيده ومتفاءله وابى اكون انسانه مشرقه وسعيده ....

وودى انى اكمل دراااستى ربى يعطينى اللى ابيه يارب

وانتوا يا بنات بعد ربى يعطيكم كل اللى تبووونه ويرزقكم كل الخير ..

وبالنسبه للرجيم ... اليوم اوف .. عشان نهايه السنه حشى ندور اى شى عشان نخربط استغفر الله:tongue22:

احبكم كلكم كل عام وانتوا بخير ...

 

[سمسميه]

والله انج عسل يا بطوطه
كل عام وانتي وكل عضوات كويتيات بخير يارب
والله يحقق لج كل امانيج ان شاءالله
ويجعلها سنة خير على الجميع يا رب
واهم شي سنة رشااااااااااااقه على الكل :yaaaaaarb:

:eh_s(9):

 

[just-me]

كل عام و الجميع بألف صحة و سلامة يارب




ما قصرتي سمسمية على الجزء الثاني خلاص الاول طفح ذكريات

وكان أكثر من بيتنا مو بس ديوانيتنا



و لو انه كان يشهد يومياتنا و شكاوينا و بجينا و ضحكاتنا ويعز علينا تتسكر ديوانيتنا

بس ماراح نوقف وان شاء الله راح نستمر و بقوة وبنتايج باهره انا عن نفسي بفضل

من الله ثم تشجيع خواتي (بطه رشيقة و زينه و من من و عنيد و انوجه و ام فجر

و صافية و قاب و تينا و عبير ( وتعذرني اي وحده نسيت اذكر اسمها )

و كذلك كل من طل وشارك أو حتى قرأ.. اني انزل 15 كيلو



ماشاء الله و لو اني هالشهر مو ملتزمه زود بس ميخالف باجر يوم جديد و سنه جديده

و أبي من الله سبحانه انه يقدرني و انزل بعد 10 كيلوات وألتزم بالرياضة و أحافظ عليهم

الله لا يحرمنا من بعض و لا يغير علينا و ياليت ينظمون لنا و يوه يديده تشجعنا و نشجعها

يالله تجعلها سنه حلوة و أحلى من كل سنة مرت علينا و يحقق حق كل

وحده فينا اللي تتمناه يارب عشان صحتنا مو بس مظهرنا

مشكوره مره ثانية سمسمية و ماقصرتي صج هالسنة ديوانيتنا باذن الله بتكون غير

و أتمنى نقرأ هالسطور اذا الله كتب لنا عمر نفس اليوم نهاية سنة 2010

ونشوف شنو قدرنا نسوي

 

[mn.mn]

أمبيه خنقتني العبرة لما شفت مكتوب الجزء الثاني قلت وين ديوانيتنا

بس ان شاء الله هذي الدوانية بتصير عامرة وحافلة بالانجازات يارب

ما قصرتي سمسية ويعطيج ألف عافية

يارب تكون سنة 2010 سنة خير علينا كلنا

 

[بطة رشيقة]

يا حبيباااتى والله جسوووت ومنمن وسمسم يعطيكم العافيه على هالكلمات الحلوه والطيبه ان شالله مثل ما قلتوااا ان ربى يجعلها سنه خير علينا ... ويسعدنا ويفرحنا يارب ....

 

[بطة رشيقة]

يا حبيباااتى والله جسوووت ومنمن وسمسم يعطيكم العافيه على هالكلمات الحلوه والطيبه ان شالله مثل ما قلتوااا ان ربى يجعلها سنه خير علينا ... ويسعدنا ويفرحنا يارب ....

 

[بطة رشيقة]

صبحكم الله بالخير يا حبيباااتى ...

جمعه مباركه على الكل ... وسنه يديده عساها خير علينا كلنا يارب ..

وافتتاح جزء ثانى يديد عسى ربى مايكون ثانى واحد وبس ان شالله يكون نوصل لى عد اجزاااااء مالها نهايه وربى لا يقطعنا ولا يحرمنا منكم يارب ...

واتمنى من كل قلبى ان ربى يحقق لنا كل امانينا ويسعدنا ويشرح صدووورنا ويوفقنا يارب ... مثل ما قلتوا السنه اللى فاتت راحت بكل شى حلو ومر فيها ... ويارب يارب تكون هالسنه سنه خير على الكل وربى يحقق لنا فيها كل اللى نبيه على جميع نواحى الحياه الشخصيه والنفسيه والرجيميه ..

نبى نكون اقوى

نبى نكون اسعد

نبى نكون متفااااائلين

:eh_s(9):

ونبى نكون صج صج ناس مشرقين مانبى زعل ولا كدر ولا راح نسمح حق اى احد او اى شى يخلينا نصير ضعااف لالا لا تخافون مو ضعااف بالوزن اقصد ضعاف شخصيه .. :rerrerek:

وعلى الناحيه الرجيميه ربى يوففقنا ونصير كلنا بالستوناات ويسموونااا دوانيه بنات الستينات ...

اليوم الله يسلمكم ملجه رفيجتى وهذه رفيجه عمرى من يوم احنا صغار ويحليلها اليوم الحمدلله ربى بيكمل سعادتها مع الانسان اللى تبيه بروح وياها الصاالون يعنى اليوم انا وصيفه خخخخ :eh_s(2):

بس ما ادرى عسى ما يخترب الرجيم :gr4uu:

وباجر الله يسلمكم بنسوى حق ابوى عشا بمناسبه تقاعده مشالله 33 سنه من العطااااااااااااااااااااء والعمل والاخلاص يعطيه العافيه حبيبى والله مشالله كان مدير اداره فى مكان مهم وتعب وايد

عاد قلت انا واختى نبى نسوى شى نفرحه

طلبنا بوفيه عنونو ...

وسويت كيكيه كبيره حطيت صووورته عليها بلبس الدوااااااااااااام ...

ويعنى راح تكون محفوووفه بينا احنا وخوالى واكيد المرووووءه تخسى انى اسوى كل هذا حق ابوى وما اكل !!! فباجر هم بيكون نو رجيم

وعقبها ان شالله برد لقواعدى الرجيميه ... 100%100​

 

[just-me]

صباح الخير متأخر ... شلونكم بنات

وناسة حاسة بشي يديد مع الجزء اليديد ...صج كل شي يديد حلو

ربي يحلي ايامنا جمعيا اللهم امين :eh_s(2):

قبل لا اسهب ( حلو المصطلح على السنة اليديدة) بالحجي حبيت اصبح

عليج صباح خاص بطه عسى ربي يعطيج على قد نياتج وطيبتج وبسخر لج عباده الصالحين

ألف مبروك تقاعد الوالد يارب يطول بعمره و يعطيه الصحة و العافية بس الله يعين الوالده

على الفراغ أحلى شي هالاحداث تكون موثقة بالمنتدى و باول صفحة

وبالمبارك على زواج رفيجتج الله يتمم عليها

الحين دوري

على الصعيد الريجيمي ماني صايره طماعة حامدة

ربي قايمة قاعده اذا نزلت كيلوين لاثة بالشهر و الا بصير سعلوه و الويه عسى ماشر مريضه..؟؟

ودي التزم بالرياضة لان فعلا الرطاريط مأزمتني :weight_lift:

على الصعيد الديني و دي اضاعف مرات ختم القران و التزم اكثر بصلاة الشفع و الوتر و ياليت الله

يرزقني حجة ثانية يارب :yaaaaaarb:

على الصعيد الشخصي اتمنى القى الزرار اللي اقدر اقصر فيه جولة اعصابي لاني وايد اتضايق :rgewrg:

واتنرفز و اشيل هم الدنيا على راسي و هالشي غلط و مضايقني وعافس منامي

اتمنى ان الله يرزقني بوظيفة و يبارك لي براتبي و تكون بيئة الدوام سنعه و بناتها سنعين

وبالنسبة لاهلي و اسرتي عسى الله يحفظهم من كل مكروه و ربي يشافي محمد يارب

و يوفق الباقين بالدراسة و يهديهم و يبعد عنهم عيال الحرام و يقوي دينهم ويجعلهم من عباده الصالحين

ويحفظكم و يحفظ اهلكم و عيالكم يارب

 

[just-me]

تكملة سوالفنا المعتادة بالديوانية

عقب عفيسة امس من نفيش و ناتشوز و ماكدونالدز و الكاكاوات و مطبق السمج وووووو

ماشاء الله كل هذا كليته علبو اليوم ريجيم المهم عقب هذا كله شربت لي تب شاي رويال

عشان ابدي اليوم صح وزني اليوم 72.6 و تريقت نسكافيه



و فعلا ناوية ابدي بدابة سليمة وصنعه ونوره و عينو رمني ..جمره حرقني ..من بابو جني ...

و ابتدي اشرب ماي أكثر لاني ما اشرب الا قلاص باليوم و احيانا انساه



و اركز على الاكل الصحي و اتحاشى و أتلاشى العجين بأشكاله و انواعه



و اصك حلجي عن البلعات اللي مني و مناك تالي الليل علبو ضايق خلقي

 

[Loving Stella]

كل عام و انتو بألف خير بمناسبه 2010
عسى الله يكتبلنا الفرح دوم بهالسنه و نتوفق كلنا و يرزقنا على قد نيتنا
مبروك افتتاح الدوانيه و ربي يحقق امنياتنا و ننزل وزنا بصحه و عافيه اللهم امين

انا عفست الدنيا بأواخر 2009 .. انهديت عالاكل و ارد التزملي جم يوم بس هذا مو حل .. الالتزام المفروض اسبوه و بريك يوم واحد س انا عكست السالفه

امنياتي ب 2010
اتقرب من ربي اكثر و التزم بصلاة الفير بوقتها اصليها لانى صايره استغفر الله اتأخر عليها
يارب احج بيت الله و اعتمر مره ثالثه
و بالدراسه ودي اتفوق بالجامعه مره ثانيه و ارد نفس قبل و احسن
انزل وزني بصحه و عافيه و اعتني بجسمي و العب رياضه
و اتخرج و افرح ابوي و امي .. و بإذن الله يرزقني ولد الحلال الي يخاف ربه و يلتزم بصلاته
و اتمنى انه ربي يطول بعمر والدينا اجمعين ويخليهم لنا يارب العالمين اللهم امين

 

[just-me]

نصائح عشان يصير شكلنا اصغر من عمرنا

طبعا انا مترجمته من قوقل مع تعديل مني بالاسلوب أتمنى تعجبكم


استخدام المرطب بالنهار و بالليل و بالذات حول العين

استخدام كريمات واقية من الشمس
في الصباح واستخدام عامل حماية من الشمس بنسبة لا تقل عن 45.

عدم السهر و اخذ الوقت الكافي بالنوم سواء الظهر او بالليل و انا فعلا ودي اعود نفسي على نومة الظهر
بمعى ان ننام لا يقل عن 7 ساعات كل ليلة
النوم ينعش الجسم. إذا كنت بصورة منتظمة الحصول على بضع ساعات فقط من النوم ليلا ، وسوف تعرقل عملية التمثيل الغذائي وإنتاج الهرمون بطريقة مشابهة لآثار الشيخوخة ، ويحذر الدكتور جوزيف Mercola ، مؤلف كتاب "لا - حبوب الحمية." يقول سبع ساعات في الليلة هو الحد الأدنى المطلق بالنسبة لنا جميعا ، وبعض الناس من الاستفادة أكثر. نصيحته : كن في السرير 9 مساء في أشهر الشتاء والساعة 10 لبقية العام.

الاكثار من شرب الماء خصوصا ياعات النهار الاولى

ممارسة الرياضة الخفيفة سواء المشي او الرقص

بمجرد أن نوصل لعمر ال 30 لازم نبتدي نراجع اخصائي الجلدية والحرص على تغيير انواع الكريمات و الفيتامينات طبعا
بعد عمل التحاليل وبالتالي لازم مانستغنى عن استخدام الكريمات سواء للوجه او البشرة
وكذلك حبوب الكالسيوم و فيتاميتات مثل مشتقات فيتامين (أ) ، مثل ريتين ألف مع هالمنتجات سوف يصبح لديك تجاعيد أقل بشكل ملحوظ ، وسوف يساعد فعلا تتلاشى بقع العمر في الجلد و تمويه الخطوط الدقيقة حول الشفاه الخاص بك عن طريق الترطيب

استخدام الألوان الفاتحة لظلال العيون يجعلها تبدو اجمل ولكن تجنبي اي شي لامع وحاولي استخدام الوان ماسكرا
الرموش باللون البني الغامق أو الكحلي المسكرة. أو ألوان أخرى. تجنب مضاد الماءلانها تحتاج فرك وبالتالي تجعد الجلد

ارتفاع الطاقة
فاختيار افصل انواع الدهون- وتحديدا الفول السوداني ، والجوز ، واللوز ، هي الأفضل. انها تساعد الاستفاة وزيادة القدرة على تحمل الجوع طول اليوم لانها تمدنا بالطاقة

تقبل العمر اللي وصلنا له
استشاري كارين مكولوغ لديه بعض النصائح من المدهش بالنسبة للنساء : "لا تكثروا التستر علي العمر الحقيقي

الحرص على ارتداء النظارات الشمسية الجيدة
ارتداء النظارات الشمسية حتى لا أعبس وتبتدي الخطوط و التجاعيد بالظهور وسوف تساعد على منع اثارالشيخوخة وخطوط الجبين ،

 

[بطة رشيقة]

قوووه جسوووت مشالله مشالله على هالحجى الطيب الحلو فى بدايه السنه ربى يعطيج قد ما تتمنين ويزيدج من فضله انا الحين لابسه وقاعده انطر العروس تى عشان نروح الصالووون ... والحمدلله كل شى تمام وكلامج فرحنىى واسعدنى وسلامج الخاااص وصلنى يا بعد عمرى والله صج لازم نفرح روحنا ولازم نكون متفاءلين حتى لو فى حوالينا ناس تحاول تغير شخصيتنا وتخلينا نصير متكدرين ومتضايقين وتعيسين لا والف لا لهم وانا اقوى من كل هالخرابيط ... ربى يعينا ويثبتنا على الرجسم وعلى الايمان وطاعه الرحمن ... وشكرا عشان قلتى هالحجى عن ابوى اى والله صاجه الله يعطيه الصحه والعافيه ويخليه لنا وعلى قولتج الله يعين امى على الحنه والرنه بس لازم هذه سنه الحياه واهو الله يحفظه عنده هوايه مهمه ويحبها وايد واكيد الحين راج يتفرغ لها الا واهيا ( الحمام يعنى الوالد مطيرجى ) فاكيد الحين راح يجابل ربعه الحمام وايتناجر مع امى شوى يعنى لازم مره لك ومره عليك خخخ وموتينى ضحك جسوت على صنعه ونوره وعينو ورمنى خخخخخخ من زمان صج صج ما رقصت وعنفصت واليوم ان شالله راح اعنفص شوى حق رفيجتى خخخخ ...

ما ستالتونى شنو بلبس احم احم ..

من قال الحين بنعرف شنو بتلبسين ...

المهم ...

بلبس الله يسلمكم تايور من جوووويس لونه تركواز مع ورود ناعمه وردى ويعنى اهو مو توه نازل شاريته من مده انا بس الحمدلله لى الحين كبرى خخخخخ .. بلوزه فلو وتنوره واهو شيفون احبه وايد احس انه يطولنى ويخلينى رشيقه ... مع جوتى تكرواااز تكرمون مع سلسله ناعمه وتراجى ذهب ابيض ومكياااجى انا بحطه تركوتز ناعم مع شوى وردى مع حمره ورديه وسلامتكم ...



ستيلا شلونج حبيبتى كل عام وانتى بخير وربىي يسعدج ويعطيج كل ما تتمنين فى هالسنه ويارب ربى يجعلها سنه خير عليج وعلينا يارب ....

 

[Loving Stella]

يعطيج العافيه جسوووووت على النصايح الذهبيه
فعلا كلها صح

بطه حبيبتي تسلمييييين انا الحمد الله بخير الله يسلمج و تسلمين عالدعوه الحلو و لج مثلها يارب العالمين و بإذن الله سنه حلوه علينا كلنا انا حاسه ان شاء الله كلها افراح و مفاجآت و مبروك على ملجه رفيجتج و تبارك الرحمن على اللبس الحلو اقرى على نفسج و على رفيجتج و الله يوفق المعاريس ان شاء الله

 

[زيـنـه]

مساء الخير

اولا : اشكرج سمسم على الجزء الثاني للدوانيه و على التثبيت .

ثانيا : اهني كل زميلات الكفاح و رشيقات المستقبل ان شاء الله على افتتاح الجزء الثاني مع تمنياتي لهم جميعا بالوصول للوزن المثالي و اهم يتمتعون بكل صحه و عافيه .

ثالثا : احب اهني الكل على السنه اليديده 2010 واقول كل عام و انتوا بخير و اتمنى تتحقق كل امانيكم و ماكو شي يعوقكم عن الوصول لاهدافكم على جميع الاصعده و في كل نواحي الحياه .

رابعا : بالنسبه لي شخصيا .. الايام اللي فاتت فيها التزام يوم و انفلات يوم .. بس من اليوم 1-1-2010 و استمرارا ان شاء الله الهمه فوق و الالتزام يكون مضبوط .
وزني بصراحه ما قسته بس كان قبل يومين 82.9
ان شاء الله خلال شهر يناير اطلع من مرحلة الثمانينات .
نظامي تغير حق هالاسبوعين .. و ان شاء الله تكون فيه نتايج ايجابيه .
التزمت و اليوم اول يوم و عدى على خير و لله الحمد

ربي يقدرني وياكم على الوصول لاهدافنا و الرشاقه المنشوده .

قواكم الله .. و ربي يوفقنا

 

[mn.mn]

ماشاء الله تبارك الرحمن ربي يتمم على دوانيتنا ويجعلها فاتحة خير علينا كلنا ولا يفرقنا ولايخلينا من بعض

بطبط بعد عمري ربي يتمم عليكم ويزيد هالمناسبات الحلوة وعسى أيامكم كلها وناسة وفرح

زيون ما شاء الله خلج جذي وان شاء الله شوفة السبعينات قربت

جسوت ربي يحقق لج كل اللي تبينه تستاهلين كل خير يا قلبي

ستيلا ربي يعطيج كل ما تتمنين وان شاء الله تكونين أحلى عروس ب 2010

--------------------------------------------

انا احوالي الرجيمية مو مستقرة بس ان شاء الله من باجر رادة التزم 100 % عشان لي يوم الميزان اكون نازلة نزول حلو

 

[Loving Stella]

صباحكم خير

شلووونكم؟؟

من من تسلمين حبيبتي عالدعوه الحلوه و لج مثلها يارب :** اللهم آمين
و عسى الله يوفقنا رجيميا و غير رجيميا ان شاء الله

انا بعد احوالي مو مستقره بالرجيم بس العشا مخففته الحمد الله و يارب استمر كل يوم مخففته لانه سبحان الله من اقط العشا احس روحي خفيفه
الله يتمم علينا يارب الالتزام و ننزل بصحه و عافيه يارب العالمين

 

[زيـنـه]

ظهر الخير

شلونكم و شخباركم ؟

ان شاء الله اموركم الريجيميه ماشيه على ما يرام ؟

انا الحمدلله ربي لك الحمد .. مر اول يوم لى خير و اليوم ثاني .. و ان شاء الله استمر على نفس الطريقه .
صج الالتزام يعطي راحه نفسيه ..و ماكو تانيب ضمير

متى الميزان ؟؟

 

[just-me]

صباح الفل على الكل

يه يه يه ماشاء الله زيون عيني عليج بارده

كيفكم تبون كل خميس عشان بعدها نخبص بالزواره

بالنسبة لي باجر باذن الله موعدي مع دكتور عبدالله المطوع

طبعا اول ما راح ادخل بقوله ( احنا عيال اليوم واللي فات مات و سنة جديدة

و اعتبرني حالة جديدة )

عموما انا باحرص على المشي و الرياضة و الدمبلز اكثر و ودي اشتري قرص

عشان أضمه حق كودة الادوات اللي عندي و اكمل الكوليكشن

تدرون كتبت رد شطوله و اثاريه بح اختفى شكيت اني كتبته بمكان ثاني

عموما يالله بنات نبي همه نبي تشجيع نبي أفكار

وباجر باذن الله راح أوافيكم باخباري مع المطوع و انزل لكم تقرير عن زيارتي

من من انا اقول من باجر انا وانتي نبدي جد الجد شرايج

بطه ها بشري شلون العروس ؟؟ و اهم شي شلون وصيفة العروس ؟؟

وين عنيد و أم فجر و انوجه أخاف ما يعرفون عنوان الديوانية اليديدة

 

[سمسميه]

يا هلا بمن من وبطه وجست مي وزينه ولوفينغ ستيلا و بكل بنات الدوانيه وربي يوفقكم وتصيرون احلى رشيقات يا رب
وانا بعد وياكم مستمره بالرجيم ولو اني الشهر الاخير بديت اخوره شويه كل من طلعات البر
بس ان شالله الايام اليايه نلتزم اكثر

وبالنسبه لافتتاح الجزء الثاني لان الاول صار عدد صفحاته وايد فوق الالف ما شاءالله ويصير بعدين صعب التصفح!
فقررنا نفتتح الجزء الثاني لعيونكم