أبي شورتكم

[Fanar90]

السلام عليكم خواتي في الله ..أبي استشيركم في موضوع .. عندي خادمتين و ودي أقسم الشغل بينهم .. الحمد الله عيالي كبار وبالمدارس .. بيتي دورين وعندي سايق يغسل السيارات والحديقه والحوش ... وحده اقترحت علي اللي تطبخ عليها غسيل الملابس والكوي والثانيه عليها تنظيف الغرف و عزكم الله الحمامات .. ماعليكم أمر ابي اقتراحاتكم ..ادري فيكم ماتقصرون بالنصيحه

 

[الغاليه نونو]

اناعندي خدامتين ياقلبي ماوزعت الشغل بينهم ولاااا شرطت عليهم شي
يبتهم وقعدتهم الثنتين وقلت لهم هذا البيت يبي تنظيف وغسيل وتلميع من الالف لييييما الياء ابي كل شى اشوفه يلق من النظافه وياويلها اللي تقول انا سويت جذى وهذى سوت جذى توزيع الشعل بينكم انتو الاثنين ومابي اسمع لكم حس
لي قعدت من النوم اتفقد البيت حتي الدواعيس اجيك عليها اشوف كل شى نظيف وتمام والغسيل بالغساله الاتوماتيك بس يشرون الهدوم عالمنشر وتالي اثنيناتهم يكوون مع بعض واذا طقيت لهم الجرس واهما مشغولين وحده تكمل الشغل والثانيه اتييي تشوفني شبغيت منها
اشتري راحتج خلي حيلهم بينهم وغصبن عليهم يشتغلون واللي تشوفين شغلها موذاك الزود وماهي نظيفه علميها مره مرتين واذا طلعت تلحه مسودنه زتيها المكتب وييبي غيرها ياقلبي

 

[bnt_kwt]

انا ما عندي خدامه
بس امي مسويه مثل الغاليه نونو

ثنتينهم يعاونون بعض يعني ما قسمت الشغل

والحمدلله اشوف الشغل ابيت اهلي ماشي تمام

 

[جكورة]

أنا لو عندي خدامتيــن أوزع الشغل بينهـم وحده للمطبخ وغسيل المواعيــن وغسيل الحمامات الله يكرمكم ووحده لتنظيف الغرف والصاله والملابـــس بجذي تعرفين كل وحده وشغلها إذا طلع شئ قاصر تعرفين تكلميـــن منو بالضبــط .. ومايكون الشغل كله على وحده.. أنا ببيت أهلي ثنتين وبيت إختي فيه ثنتين ومو مقسمين الشغل فيهم لو تكسر قلاص وإلا الملابس خربت مايدرون منو يكلمون لأن كل وحده تقط البلوة على الثانيه وهم ببيت إختي فيه وحده تشتغل أكثر من الثانيه فحرام جذي نظلم وحده فيهم أما لوقسمتي الشغل بينهم وعرفت كل وحده مهامها ذيك الساعه لخرب شئ أو لقيتي شئ مو نظيف تعرفين تحاجين منو بالضبـط..والله يوفقج

 

[Filakawyia]

احنا نفسكم بعد عندنا خدامتين و مقسمين الشغل بينهم

وحده تطبخ و تغسل السيارات و تغسل الملابس و الثانية تنظيف البيت و تكرمون الحمامات و الكوي

و اذا وحده خلصت شغلها تساعد الثانية​

 

[beauty]

آنه مع جكورهاذا مقسمتي الشغل بتتعبين كل وحده بتلووم الثانيه

عندنا خدامتين وحده للمطبخ والدور الارضي وتغسل وتكوي ملابس يدتي والثانيه للدور الثاني وغسيل الملابس والكوي

 

[حبنا الله عليه]

الخدم علل

برايي تقسمين الشغل عشان تعرفين تحاسبينهم

وعسى الله يعينج

 

[ضحكة الدنيا]

انا بعد مع تقسيم الشغل علشان مايقطون الشغل على بعض
وعلشان تعرفين منو اللى مقصره فى شغلاها
يعنى وحده حق الطبخ والمطبخ والمواعين
وحده حق البيت من تنظيف وغسيل وكوى
والله يعينج

 

[سيد-الغنادير]

انا اشوف اختي عندها خدامتين
وحدة الدور الاول والثانية الدور الثاني وكل وحده مسؤولة عن الدور المسؤوله عنه واشوفها مرتاحة معاهم

 

[الالماس واللولو]

انا عندي خدامة واحدة ولكن امي عندها خدامتين وزعت الشغل بينهم وحدة للتنظيف مثل ما قالو الخوات وحدة للطبخ ولكن في حال وحدة خلصت شغلها تساعد الثانية معني متعاونين مع بعض واذا كان في حفلة او عشاء عند امي تدخل معاها المطبخ بعد ما تخلص التنظيف بسرعة تعاونها وتلف معاها سوا الحلو او اي شيئ خليها تتعلم الحلويات والمحاشي مو تقعد بطالية تتعود على الربادة ..................

 

[Fanar90]

السلام عليكم ... بعد قلبي كفيتو و وفيتو ماقصرتو حبايبي
مشكوره الغاليه نونو وبنت الكوريت وجكوره و الالماس والولو وسيد الغنادير و ضحة الدنيا وفيلجاويه وحبنا الله عليه و بيوتي
مشكوووووووووووووووووووووووورين:eh_s(8):

 

[الفرحه السجينه]

لازم تقسمين الشغل عشان تعرفين اللي مقصره بشغلها مو كل وحده تتبلى عالثانيه

امي عندها خدامتين.. وحده للطبخ والدور الارضي كله

الثانيه حق الدور الثاني وغسيل الملابس والكوي

واهم يتعاونون عالشغل بكيفهم بس اهم شي التقسيم

 

[قهوة عربية]

حبيبتي ..قسمي الشغل بينهم

وحدة للطبخ والمطبخ والمواعين والدور الأرضي

والثانية للدور الثاني وغرف النوم والحمامات وغسيل الملابس والكوي

بشرط ان كلهم يتعلمون الطبخ والكوي

عشان إذا وحدة مرضت أو سافرت ....تقوم الثانية بشغلها ..مو تحتاسين معاها

 

[رماس*]

وحده لأهم شيء المطبخ والثانيه لأهم شيء غسيل الملابس والأوتي والباقي يتعاونون