أغراض المدرسه

[لؤلؤة الكويتْ]

انا السنه الجايه اخر سنه لي ..

يعني بحط حرتي في اغراض المدرسه << اخر سنه دراسيه لي ههه ..

بس ماشريت شي لحد الان ..

بس يمكن اشتري من الافنيوز ..

اما نفنوف المدرسه << لايعه جبدي منه السنه الجايه اول مره البس اللبس الجديد ..

ويع ويع ويع

راح افصل عند خياط بالعميريه حلو خياطه حيل ومرتب << من تحجبت واخيط عنده ..


الله يعينه ..

مدرسه >> رمضان >> عيد

 

[أم ملاس]

وبة نستعين............

المريول من غير نقاش على طول....من الايوب لأنة خامتة حلوة حق الكراف الى نهاية العام الدراسى طبعا اخذ أثنين

بس ياريت الاخت اللى قالت عن اللى بالديرة تعطينا تفاصيل أكثر ......:tek:

المكتبة كل مرة غير :eh_s(8):مثلا شى سنتر بوينت والقرطاسية سوق الاسرة أو مكتبة جرير.......ألخ

ومنكم نسسسسسسسسسسسسسستفيد:gathering: ......

 

[نماين]

خالتي راحت وشرت اغراض عيالها المكتبية من

سوق رامز لانها تشتري بالدرزن ( المساطر و البرايات و...................... ) لعيالها

مو كل يوم مضيعين بالمدرسة مرة مضيعين شي مرة براية او مسطرة او .................ز

 

[عنايد]

العام كنت اول مره اشتري لبنتي حق المدرسه

الجوتي والجنطةخذيتهم من سنتر بوينت والمريول من الايوب خذيت لها اثنين واحد كم طويل والثاني نص كم
صج صج كرفووو معاها لي آخر السنه تقريبا وملابس الرياضه وملابس الصلاة من النصر الرياضي

واغراض المكتبه من الجمعيه

 

[عهود الحب]

مبروك ياعنايد يارب يحفظها ويخليها لج وتشترين لها ليييي الجامعة قولي امين



بنات انا ماالي خلق اشتري والجو مايساعد امانة انا اكبر بلوى عندي القرطاسية
كل سنة اشتري من مكان غير
لاعت جبدي مرات الطوابع قدددددم ومايلزقون غش تجاري ليش
الله المستعان



امانة بنات الي تدل مكان حلو وبالجملة لانه عيالي 3 بالمدارس والرابعة مادري اسجلها بحضانة خاصة ولا لاللحين مترددة

 

[ام وليد hamood]

حبيبتي عهود الحب هم انا عيالي ثلاث بالمدارس وصراحه يوميا برايه محايه مسطره قلم . عشان جذي اخذ لهم من طيور الجنه سوالفهم حلوه ورخيصه حيل او رامز اخذ ماركة روكو كل شي بالدرزن .

 

[كويتية نشيطة]

اغراض المدرسة من الجوهرة وايد حلو ورخيص

والملابس من فاملي كير واحيانا من الجوهرة

 

[سفيرة العشق]

وي عاد انا ولدي توه اولى ابتدئي ومادي من وين في ملابس صبيان حلوة وتكد ؟؟؟؟

الجواتي انا اشتريهم من النصر الرياضي والكتب والادوات مرات بومية ينزل شغلات حلوة وجيدة

بس انا احاتي الملابس ....

 

[ام وليد hamood]

انا بصراحه اخذ ملابس عيالي من بيت اولادنا .

 

[هنـــد]

يعطيكم العافيه

 

[N.springflawer]

جان اخرتي موضوعج بصراحه لاعت جبدي وانغميت

 

[عنايد]

عهود الحب الله يسمع منج يارب
ويخلي لج عيالهم ويوفقهم ويبلغج فيهم قادر ياكريم

 

[رحوله الحلوة]

بنات وين هذا النصر الرياضي

دلوني يزاكم الله خير ...

 

[دندونة]

يووووووووووووووووووووووه ذكرتونا بالمدارس .... اللبس ما يبيله .. الايوب ... كد ومد...والقرطاسية والجناط انطر معرض مشرف .... او سوق مترو بالفروانية او مركز سلطان ... حلو شغلهم... والله يعين

 

[ام وليد hamood]

النصر الرياضي بكل مكان احنا عندنا بجمعياتنا افرع للنصر الرياضي

 

[تاج الغلا]

اشتروا من الحين وافتكواااا من الزحمه بس ينزل معاااش ريلي هالشهر بروح اشتري
واخلص عشان على اخر ثمانيه نجهز حق رمضان والعيد

عندكم متروو بالفروانيه شغلاته حلوه والملابس من مويد المير بجمعية الروضه حق البنات وااااايد حلو
والجواااتي من المثنى كد ومد

 

[أساور]

سوالف المحايات والبرايات من رامز بالكراتين بعد هذي مافيها موديل وشكل
اخذي النوع الزين وامشي

ياريت الاخت اللي قالت عن الديرة تدلينا

 

[سبائك]

الله المستعان ورانا لويه

عادة آخذ من الايوب وفاميلي كير والنصر

والقرطاسيه من مكتبات التربيه الي بالديره(الجمله) بس هالسنه ماراح اروح لهم بقزرها بمكتبة الجمعيه وخلاص

انا مشكلتي بالجناط ياربي ما يكرفون ما يمر شهر الا مغيرين الجنطه

 

[هنـــد]

حياكم الله بنات

سبائك وين صاير مكتبات التربيه ؟؟اي صوب

 

[اخت فروحه]

اي والله اللي تقدر تشتري الحين احسن