سلام عليكم
ماشاءالله عيالي كبروا الحين , واحد بجريد 1 و الثاني كي جي 2 لكن حبيت اقولكم شنو كنت اسوي وياهم.
من قبل لا ولدي الكبير يدخل كي جي 1 كنت مجهزه له اوراق علشان يتعود يمشي على الخطوط بأنواعها. سواء كانت كستقيمه او متعرجه او اشكال هندسيه.
و الأوراق عندي منها نسخه للي حابه تجربهم حق عيالها. هذول كانوا كتب ملوت عيال بنت خالتي, اهمه بالمدرسه الباكستانية بحولي و عيالها عطوا ولدي الكتب. انا اخذتهم و مسحت كل اللي اهمه حالينه و صورته بالمكتبه و سويت مجموعه حق عيالي.
بالنسبة للواجبات الحمدلله ماكو من بدوا كي جي 1 لي جريد 1 الحين ولا شي. ماشاءالله دوامهم وايد طويل و يسوون كل شي بالمدرسه. فكه بصراحه و اريح.
القراءة اهي الشي الوحيد اللي ملتزمين فيه من المدرسه لأنه عندهم كتب للقراءه من كي جي 1 و بعد عندهم قصص تتبدل مرتين في الاسبوع, و لازم ولي الأمر يقرا القصه مع الياهل و يوقع على الورقه انه خلصوها.
و القصص طبعا تدرجوا بالمستوى من قصص مافيها ولا كلمه علشان يخلون الياهل يشوف الصور و الرسمات و يعبر شنو يشوف بالانجليزي. و الأم تسأل شنو مثلا هاللون شنو الشكل هذا. جم ورده قاعد تشوف؟ من هالأسئله.
احل وياهم تمرينات خارجيه وايد و فيه شغلات حلوه محصلتها بالانترنت. بس المواقع للأسف بالجهاز الثاني اللي تبيهم من عيوني احطهم لها.
على فكره عند مكتبة الثنى اللي بالسرداب فيه قصص مالوت Lady Bird
اكيد الكل يعرف المجموعه هذي. عندهم قصص تهبل و تتدرج بالمستوى. يعني عندهم اربع مجموعات و كل مجموعه لها حرف معين A,B,C,D
و كل مجموعه عباره عن 12 قصه وايد حلوين و مفيدين جربوهم. انا شريتهم من جرير لكن عندهم اغلى. اخذوها من المثنى ارخص
كتب التدريبات وايد و فيه شغلات تهبل تحصلونها في مركز سلطان شرق, بالطابق اللي فوق صوب الكتب. فيه مجموعه اسمها GOLD STAR وايد ممتازه الكتب هذي. انتي تختارين اللي تبينه سواء رياضيات او انجليزي و كله على حسب عمر البيبي.
كنت شاريه كتاب نفس المجموعه من مركز سلطان وايد متين و شامل كل شي ب 6 دنانير, شفته عند بروي ب 8 و ربع. فخلكم على مركز سلطن.
و فيرجن بعد عندهم شغلات حلوه. بس هذا اللي بالامارات ما ادري بالكويت تصدقون ولا مره رحت له.
ان شاءالله اكون فايدتكم.
سلام
