شرايكم يا بنات في مخدتي ؟؟
إلي عاجبتها أو ودها تسوي مثلها فالطريقة سهله كتبتها لكم بالخطوات و وضحتها بالصور
الأدوات إلي راح تحتاجينها للرسم على القماش
1. جلاد على أن يكون من النوع السميك افضل عشان و انتي تشتغلين ما يتلصق عليج.
2. موس يفضل أن يكون مثل إلي في الصورة لأنه أسهل في القص من الموس العادي.
3. مقص
4. صمغ
5. فرشة تلوين
6. صبغ أسود للرسم على القماش تلقونه في كذا مكان بس أنا شاريته من محل بركات.
7. خرز
- أول شي راح تاخذين الرسمة و تلصقينها على قلبة الجلاد بشوية صمغ عشان تثبتينها و يكون أسهل عليج لمه تقصينها.
- راح تقصين دار ما دار الرسمة باستخدام الموس و راح يصير عندنا الرسمة و القطع الصغيرة و باجي الجلاد و حاولي إنج تحتفظين في كل شي لأنج راح تستخدمينه
- بعدين راح تيبين القماش إلي تبين ترسمين عليه و تلصقين عليه الجلاد بحيث تفتحين القطعة الكبيرة منه و حاولي و انتي تفتحينه أن ما يتلصق مع بعضه و بعدين حطي عليه الرسمه (الثريا) بس لا تلصقينها بس جنج قاعدة تركبن تركيب أو جنج بتردين كل شي مثل ما كان و القطع الصغيرة لصقيها في مكانها و بعدين شيلي الثريا فراح يصير عندك مثل الصورة.
- و ألحين هذي أحلى خطوة و هي التصبغ لأن لا فيها فن و لا فيها احتراف بس تلطخ بس حاولي إن ما يكون فيه فراغ بعدين تركي اللون ليمه ينشف تقريبا لمدة نص ساعة و بعدها راح تستخدمين الأوتي (المكواة) عشان يثبت اللون و هذي الخطوة مكتوبه على الصبغ.
- ألحين صار عندنا الرسمة جاهزه و إذا حابه تضيفين عليها الخرز و الأشياء الموجودة في الصورة بس بإبرة و خيط .
إن شاء الله عجبكم شغلي :bye22:
المرفقات
-
66.JPG -
22.JPG -
33.JPG -
55.JPG -
11.JPG
