إستعداداتنا لموسم المدارس ورمضان والعيد

[الدنـ نور ـيا]

السلام عليكم أخواتي الطيبات أولا أسأل الله عز وجل لكم الصحة والعافية والإستمتاع بالعطلة الصيفية ’ وثانيا أخواتي الغاليات كلنا ندري إن المواسم ورا بعض راح تكون مدارس/رمضان / العيد خلونا نتبادل الخبرات في إستعداداتنا من جميع النواحي علشان نفيد بعضنا وأعاد الله علينا جميعا الشهر الفضيل على خير .

 

[ريفيل]

والله يا نور الدنيا انا ببلش بملابس المدرسه على الاقل القمصان البيضة للاولاد والتي شيرتات واخذت من وحدةه من البنات هني بالمنتدى تصميم للقرقيعان والعيد عاد ينطر شوي احس راسي راح يتفجر ما اقدر

 

[الدنـ نور ـيا]

سلامتج يالغالية ومشكورة على المرور .

 

[رشروشة]

والله انا للحين ماسويت شى بس ودى اخلص شغل المدارس ورمضان بالاول عشان اتفرغ للعيد ان الله احيانا

 

[OmRashed]

وعليكم السلام اختي
واجمعين ان شالله

اولا اذا كنا من العايشين ان شالله ابدي بملابس المدرسه والمكتبه
وبعدين حق ارمضان اعاده الله علينا وعليكم ان شالله
وبالنسبه حق العيد بسافر ان شالله اسبانيا بنص 8
وبشتريلهم من هناك والله يكون بعونه وعونكم

 

[$$مذهلة$$]

والله انا هالسنه نويت اريح راسي اللي بلقاه جدامي باخذه
اهم شي مدارس اليهال ولا بعد ماني ماخذه رايهم مثل كل سنه بس يتشرطون ويغثوني بطلباتهم

ورمضان يامحفوظة السلامه يبيله دراعتين وكان الله غفور رحيم كل سنه اكود وماينلبسون اكثر شي بدل ومسايير وهالسنه ماظنتي بيمديني اسير ولا اروح دوام ويهال ودراسه

وبعد العيد بتهل العروس ماتدرين تشترين للعيد ولا هالعروس اللي تنطر والله كريم يعودهم علينا وعليكم بالصحه والعافية

 

[نونا العنونة]

والله بصراحة أنا ما سويت شئ ودي أشتري حق البنات للمدارس بس وحدة من البنات راح يكون يوني فورمها مال المدرسة جديد يعني وردي مو المبكر ومادري وين أحصله والروضة اشلون عليهم نفس اليوني فورم القديم ولا تغير بعد ؟؟

ودي أشتريلهم قرطاسية مادام الحين الكل امسوي مهرجان عودة المدارس

والله يعينا أجمعين...هالسنة المواسم ورا بعض ما نلحق عليهم الله يخليهم ويخلي اعياكم

 

[بتبوتااا]

وي الله يعينكم ويعينا على هالتجهيزات
انا ما جهزت ولا شي وكل شي بوقته انشالله

 

[جكورة]

زيدي فوق تجهيزات رمضان والمدارس والعيــد تجهيز نفاستي وتجهيز الدوام الجديد :eh_s(11):

ببدء أول شــئ بتجهيز أغراض النفاس بعديــن المدارس ورمضــان أما العيــد بخليـــه متأخر شوي ....وكل عام وإنتم بخيـــــر مقدما لجميع المواســــم..

 

[CrystalQ8]

الهه يعين دراريع رمضان خالصه الحمدالله باجي المانتوا للدوام ببلش فيهم وأغراض المدارس أنطر بس ينزلونهم والعيد بشتري من الخبر بدل بنتي يمدحونهم هناك أو وعند ريميه عرض بأخذ منها بدله العيد دايما شغلها حلووو والله يعين

 

[مشغوله و محتاسه]

عيل انا ببدا استعداداتي ... باني اسوي جرد للكبت ... مسكين راح ينبط ..

و اغراض المدرسه ... هالويك اند ببلش فيها .. ان شاء الله

و رمضان ... الله يعيده علينا و عليكم بخير ... بشوفله دراعتين و جم طبخه من المنتدى

و العيد ... بنص رمضان بفكر فيه ... بس كافي

 

[الدنـ نور ـيا]

مشكورين على المرور بنات أختي نونا العنونة ملابس المدارس كلها متوفرة في محل فميلي كير .

 

[jolie_q8]

تم نقله للقسم المختص

 

[فراشة كووووول]

على طاري ملابس المدرسة الجديدة شفتها بالسوق تلوع الجبد لا لونها و لا موديلاتها صراحة القديم أحلى

 

[CrystalQ8]

يمدحون دايما الأيووب لملابس المدرسه.

 

[غيوووض*]

والله يابنات حوسه انا حوستى حوسه تجهيز مانتوهات الدوام ودراريع رمضان والعيد وبعد هذا كله عرس اخوى والله مخى وقف تعبت

 

[~~أم جــســوم ~~]

انا اول شي جهزت للمدارس وبديت اشتري من النصر الرياضي عندهم
خصومات حلوه وبضاعه جديده والشهر الجاي نكمل للعيد ورمضان والله يعين​

 

[زينة الخشة]

انا مو متعبة عمري للحين عايشه العطلة:eh_s(15):
وكل ما طرى علي الدوام تجيني ضيجه

 

[عنايد]

الله يعينا هالسنه صج ضغط

 

[هنادي المزيونة]

اللهم بلغنا رمضان وتقبله منا
خواتي حبيباتي خلونا نخلص طلبات عيالنا ونتفرغ للعباده في رمضان لا يروح وقتنا وتفكيرنا بالسوق
خاصه انه في المنتدى مواضيع لكيفيه ختم القرآن وتنظيم الوقت في رمضان وغير رمضان ( أسأل الله لنا ولكم القبول )