رد: حملة إلزمي الاستغفار ..... وستأتيك الدنيا راغمه وتسعدي في الدارين
اليكم قصتي مع حملة الاستغفار وأمور الطاعة والعبادة اللي بدينا فيها ..
اسمعوا وركزوا في كل كلمه راح اقولها لانها راح تنفعكم بإذن الكريم ..
طول الفترة اللي تركتكم فيها اللي أوصلت أكثر من شهر ونص صارت تطورات حيل كبيره في حياتي ..
انا انخطبت حق شخص من طرف أهله اتصلوا وقالوا بنخطب بنتكم فلانه طبعا الوالده قالت حياكم الله وقبل موعد مجيئهم بيوم دقوا وقالوا عندنا ظروف بعدين انشوف يوم ثاني .. مر شهر كامل وبعدها سمعنا ان نفس الشخص اللي خطبني خطب وحده من العايله والله كتب النصيب بينهم بدون ما يبلغونا بأي شي انا اهني يوم سمعت الخطبه انصدمت وقمت اتحاشى أي ذكر للموضوع والوالده امعصبه ليش ما بلغونا ليش يعلقون ويقولون عندنا ظروف .. انا ماهمني اصلا لاني ماعرفهم بس ليما قعدت بروحي انزلت ادموعي قلت يارب عوض صبري خير وبينلي الاسباب .. وكنت متيقنه بهالشيء ان رب العالمين له حكمة في موضوع عدم اتمام خطبتي ..
بعد مرور سنتين على زواج الولد من اسبوعين وصلني خبر ان الولد فيه صرع وخاشين عن امرته وحياتها صعبه حيل ومن مشاكل لي الثانيه وواصلة لي الطلاق والبيت كله بعد وفاة الأم والأب كله مشاكل بين الأهل وقطع أرحام وبين الأخوان والخوات ( يعني لو تشوفون احوالهم تقولون لا مانبي نتزوج خلاص عفنا شيء اسمه زواج )
ترا القصه من مده طويله صارلها أكثر من سنتين وبتقولين ليش اشتاق قالتها الحين بقولكم لان رب العالمين بينلي الأسباب والحكمة من عدم اتمام خطبتي مع هالشخص من تقريبا اسبوعين .. سبحان الله ربي يحب لي الخير وعارف مصلحتي أكثر من نفسي .. سجدت سجدة شكر لله
اللي ابي ابينه لكم ان رب العالمين له حكمة في كل شيء .. وعسى أن تكرهوا شيئا وهو خير لكم وعسى أن تحبوا شيئا وهو شر لكم والله يعلم وانتم لا تعلمون
بعد هالموضوع كنت احس بالفرح والسعادة والبشارة طول الوقت وقمت ازيد بالاستغفار وصلاة الليل والاذكار طول الوقت على لساني لحد ما جتني صدمه ما كانت على البال ..
انسرق مبلغ كبير من رصيدي حاولت بكل الطرق استعيد المبلغ بواسطة البنك بدون مشاكل ما نفع .. كل الأبواب اتسكرت في وجهي قعدت يمكن شهر كامل اعاني بس من هالمشكله اشلون اسدد دين علي مع اني عايشه برفاهيه ومعاي سعة في افلوسي كبيره بس فجأه وبدون مقدمات طار المبلغ من حسابي زاد الدين علي .. سبحان الله قالولي في حل مع البنك وقمت استغفر بشكل مو طبيعي واذكر الله وازيد .. في اليوم الثاني وانا قايمه مستبشره قالوا مافي حل الا انج اتقدمين بلاغ وقضيه ومباحث ولويه ..
انزلت دمعتي بيني وبين نفسي وقلت الحمدلله على كل حال وقمت ازيد بالحمد والثناء على الله أكثر وأكثر وبيني وبين نفسي عندي قسط سياره من وين ادفعه مر شهرين عليه وداخلين بالشهر الثالث والمبلغ ليما تراكم صار كبير والدين كبر ..
قال الوالد يلا انقدم بلاغ ضد اللي سرق المبلغ وخل ياخذ عقابه قلت هااا فكرت في نفسي لا لا حرام يمكن هالشخص في حاجه
حرام الله يعوضني خير .. وقلت اللهم اجرني في مصيبتي واخلفني خيرا منها .. الوالد قال الله يعوضج خير هذا احسن شيء اتسوينه وترا المال الحلال ما يضيع ابدا .. سبحان الله عندي يقين بهالشيء ..
وبعدها قمت صليت الليل ركعتين وقلت يالله انا عفيت عن هالشخص اللي ماعرف عنه أي شيء لأجل رضاك يارب قد يكون هذا الشخص في حاجه ماسه لها أكثر مني وانزلت دمعتي وبعدها قلت اللهم اقضي عني ديني .. وانا متيقنه بقبول رب العالمين
فجأة وصلني مسج بمبلغ على الرصيد وليما سألت قالوا ان الشخص رجع الفلوس .. يالله سبحان الله ..
وبقولكم قبل ما يصير هالشي كانت علاقة مقطوعة بين اخت واخته صارلها فترة شهرين وأكثر .. حاولت اقنع الاخت انها اتسلم وتصفح واتسامح بعد محاولات رفض ارجعت المياه لمجاريها وكسبت اجر فيهم الحمدلله ..
وفي شخص بعد كان في أزمة مالية كبيرة ما ينام الليل منها ساعدته بكل اللي اقدر عليه ليما انحلت مشكلته .. سبحان الله
حاولوا تعملون الخير بكل صوره حاولوا تامرون بالمعروف وتنهون عن المنكر حاولوا تفكون عسر انسان محتاج لكم حاولوا
تكفلون ايتام سوا الخير طول الوقت والله والله بتشوفون السعادة في حياتكم وبتحقق امانيكم ..
سبحان الله الدنيا اختبارات وابتلاءات لا تلجئون الا لرب العالمين .. زيدوا في عمل الطاعه بتشوفون السعاده ..
ادعيلي ..
