ابي افكار وصور للدزه

[MyLittleBerry]

اللي عندها افكار وصور للدزه

اول تجربه لنا

موعارفين

واللي عندها صور لاتبخل

 

[Liverpolian]

sorry
نو صور ممكن أفكار
طبعا الصندوق قديم ولكن فيه صناديق غريبه
تعرفين كبت الاكسسوارات اللي ينفتح من فوق وفيه منظره
استري واحد جاهز وحطي بكل درج شي وتفنتقي ... ورد مجفف وعطور وعباه وملفع واكسسوارات يعني نوعي واستري هدايا ما تطري على البال.

 

[MyLittleBerry]

بس الكبت مو صغير ؟؟

شنو احط فيه ؟

 

[*كويتيه يونيك*]

حبيبتي روحي سوق الديره تلقيييين صناديق حدهااا روعه وإنتي ودي الصندوق بوابة الهدايا

وحطو فيه إلي تبون من داخل وغلفو الهدايا وأذكر عندهم بوابة الهدايا أشياء غريبه تحطون فيها المهر

 

[GAP]

هلا حبيبتي انا بقولج عن دزه اخوي كانت حدها عجييبه وكل من شافهاشكرنا عليها


اول شي الصندووق حلو بس احس وايد استهلك

احنا شرينا كبت الي صير جنه ميزتواليت عرفتيه يصير فيه ادراج شكلللله وااااااااااااايد حلو لي درجه ان اختي خذتلها واحد حق غرفتها

وحجمه مو كبير وايد ولا صغير معقول وشكله مثل معتق يعني من غير تزيين حلو بس احنا وديناه بوابه الهدايات حطلنا فلينه ولبسها بخام وكتب اية واساميهم


الحين بقولج الاغراض الي داخل الكبت

باول درج حطينا سياده وملفع وقران ======> روحو سوق الديره في محل عنده قرائين مذهبه مع صندووقها واايد راقين

وشرينا عطورات فرنسيه وشيلات ودراريع حق البيت والاستقبال

وخذينا جنطه ماركه ربرتو كفالي

شرينا ست كامل من البدي شووب

امممم بس في شغلات وايد بس ما اذكر ============> كل ما اذكر شي بحطلج اياه


المهم وخذينا صندوق من سوق الديره الي يكتبون على ظهره =====> اذا فتحو الصندوق يطلع الكلام --- احسن اني هنديه اذا بشرح هههههههههه

المهم هذا الصندوق رحنا المرشود وخذينا عطورات عربيه ودهن عوود واللوشن وهالسوالف ومن العربيه للعود خذينا الخميريه حطيناهم كل بغراش كريستال شكلهم طلع رهييييب

والصندوق نفسه فيه درج حطينا فيه المهر بس كل مجموعة غلفناها بشريطه وشويه ورد وكرستال وحطيناهم

وسلاامتج

 

[MyLittleBerry]

gap حلوه فكرتج

انا كتب اللسته

جنطه وساعه ماركه

عبايه وملفع كشخه

سياده وثوبها

خاتم هديه من المعرس

المهر نحطه بصندوق صغير

عطورات فرنسيه سيتات ودهن عود

بخور

قران وشريط ديني يخص الزواج

واهم شي كتاب تحفة العروس

 

[GAP]

حلووو ماشاء الله الاغراض كلها حلووه بس نصيحه مني خلو الخاتم بعدين اهو يعطيه اياها لان راح تصير اغر اض واايد وراح تضيع حلاته بس اذا بعدين عطاه اياها تصير مميزه اكثر هذا رايي



انا في دزتي حطولي تلفون اكثر اخر موديل نزل هم فكره تحطون موبايل

 

[GAP]

ايي صح كل الهدايا غلفووها لا تودونها بوابه الهدايا لان راح تطلع غاليه ومردها راح تنقط انتو غلفوها بالبيت

 

[GAP]

انا ما اعرف عدل بس مره حطيتهم بالمرفقات

 

[GAP]

ترى الصوره مو طالعه حطيها بالمرفقات وفي شي جنه اسمه رفع ضغطي عليه وتطلع

 

[GAP]

اممم ما اعرف بس ان شاء الله البنات يفيدونج

 

[Om Sgair]

هلا ومرحبا اختي

انا عندي فكره حلوه

مالي شغل في الهديه اللي تبونها

انا احب شكل الدزه في الصندوق القديم

بس هابين في صناديق كبيره وايد فيها ليتات وزجاج

وايد حلوين وملفتين وستايل

اتمنى اني عطيتج فكره

 

[MyLittleBerry]

ممكن صور

يالله بنات شدعوه ولا وحده مالجه ومعطينها دزتها
؟؟

 

[لولال]

شوفي يا عمري انتي
انا بدزتي حطوووو شبكتي بقفص طيووور بس الي يكون في قاعدة طويلة كانت حدها حلوة الفكرة واوريجينال والقفص كانو راشينه بلون احمر وحاطين عليه فراشات وورد وشرايط بس كان شكلة حده كووول ويشوق

و كانو يايبين لي دراريع وبدله سهرة وحاطينهم على منيكانات كانت الفكرة حدها حدها زقرت هذا غير صناديق البخور والعطور

اي اي تذكرت بعد تعرفين القاعدة الي يحطون فيها بطول الشامبانيا الله يبعدنا عنها القاعدة الي تكون طويلة ويحطون فيها البطل الي يحطونها بالفلام مشترين قاعدتين لونهم ذهبي مزينهم بورد وشرايط حمرا وحاطين داخلهم قمصان النوم

اي وبالنسبة حق القران فكانوا يايين مجسم كعبه يينن من مكه وحاطين فيه القران وكان شكله حده عجيب

 

[MyLittleBerry]

ana 3indi 9owar dazat e5ti bs mani 3arfa shlon a76lhom min ams a7awil ma y9er...etha t3rfen golili 3ashan a76lch yahom

اذا عندج الصور في كمبيوترج

دشي على اي موقع لتحميل الصور مثلا

www.0zz0.com



راح تلقين مكتوب حدد الصوره ويمها خانه فاضيه ويمها كلمة browse

طقي على browse

راح يفتحلج مربع فيه البرامج اللي في جهازج

طلعي الصوره وطقي open

راح تنزل الصوره في الخانه الفاضيه

بعدين قبل لاتطقين رفع الصوره كتبي الارقام اللي فوق الخانه اللي يمها ( اكتب الرقم في المربع )

بعدين طقي رفع الصوره

اول ماتنزل الصوره في الصفحه

راح تلقين تحت الصوره روابط الصوره

حددي الرابط وسويله كوبي

ولصقيه في الرد بالمنتدى

وبس

 

[BaiTotia]

أحس ماكو فكرة غير الصندوق ههههههههههه

دوروا صندوق شكله فنتك وغريب

أو أخذو صندوق ووديه لرسام يرسم عليه شي حلو وماراح يحتاج لتزيين أو يرسم عليه صورة المعاريس ويكتب عليه آية أو دعاء أو شعر

أو أممممممممممممممممممممممم ليش ماتحطونه بكرة غش كبيرة مرة شايفته مدري وين يمكن بوابة الهدايا

وبعدها تزينونه ويطلع شي

إذا يت ببالي فكرة ثانية راح أقول

 

[GAP]

ما شاء الله تبارك الرحمن وااايد حلووه والله يهني اختج فيها

 

[MyLittleBerry]

ماشاءالله وايد حلوه الدزه

عجبتني فكرة القفص

مع ان مو كل الاشياء باينه بالصوره

 

[june_m00n]

مشالله الله يوفق اختج يا ( صج والله )


كاب عسا بالمبارك انشالله الف مبروك حبيبتي وسلمي على اختج كاب الكبيره



بتر فلاي خل اقولج هالفكره

تيبين ثلاث صناديق

واحد اللي يصير جنه ميز

ينفتح على اليمين واليسار وبالوسط يرارات صغار

اليرارات الصغار تحطون فيهم الانواط وتلفونهم بشريطه

والكبت اللي على اليمين واليسار حطو صورتها وصورته

بعدين هالصندوق تحطون فوقه ورد طبيعي من رايي افضل يبين شكله حي وفيه حياة بس اكون تنسيقه راقي ( جربي نيكولاس )

الصندوق الثاني

تحطين فيه : سياده ثوب صلاة ومصحف تسويهم وحده اعطيج رقمها اذا بغيتي دزي لي رساله
وكتبو عليها اسمها

تصير وايد اوكي ( مطرزه باسمها صوب مكان تدويرة الويه او اي مكان ثاني ) ونفس الشي السياده )


حطو منظره كبيره اللي تصير مثل مالت مرت ابو سنو وايت هههههههههههه ابيه مالقيت وصف ثاني اللي تصير مذهبه وشكلها كلاسك حييل

وتصير وراها قاعده او سناديه مثل مالت الصور تسندها اكو منهم صغار وحلوين

واكو اللي يصير ست منظره مع بروش كبير ومشط كبير اللي يصيرون بس زينه احس الاشياء رمزيه اكثر يعني ما تنحط اشياء اهيا تستعملهم وخاصه من الاغراض الشخصيه

احس تدخل بخصووصياتها ولا شرايج؟

اكو ست ينباع الي يصير بظهر المشط والبروش وداير مداير المنظره كلهم مخمل ودانتيلات حلويين وخرج دزه

ويا حبذا لو يصيرون نفس لون السياده لأنها هم بعد مخمل يصير اوكي


همممم


حطووو وياها ساعه من طقة الساعات اللي داير مدايرها الماس وتتبدل سيرها واكو وايد ماركات اسعارهم مو حيل غاليه

( اكو محل اول ما تدخلين الصالحيه على ايدج اليسار ) مو كارتييه ههههههه لا طبعا داخل ورا الشايع


وروحو حق مجوهرات الشرق

وسووو خاتم الماس على اسمها واسمه حلووو

تلبسه بعدين مع الدبله لما تطلع وياه شكله كيوت


انا افضل بدال شريط عن الزواج

ان رساله تنكتب من ام الزوج

اذا كانت لها قدره على الكتابه

او تنكتب عن طريقكم وبتوقيع الوالده

فيها نصيحه لها وله تصير فيها حميميه اكثر


وهالرساله يا حبذا لو تنكتب بورق البردي وتنخط خط حلوووو وتكون مختصر مفيد احس اوكي



طبعا واكييد :

البخوووور : وانا افضل ان بس البخور الخشب او اللي يسمونه عوود لا تحطون معمول ابدا

الخلطات : دهن عوود ومجموعه

مشعل


وهذيلي حطوهم بقراش

وسووو استكرز وكتبو عليه اساميهم

ولزقووه على القراش

وكل قرشه حطو فيها شريط مخمل نفس لون السياده والمنظره والعده الباجيه

شريط مخمل ويا ورده بسيطه او دانتيل

يصير شكلها كيوتت

وتحتها ملزوق على القرشه مالت الطيب والمشعل بالاستكرز اسمها او اسمها واسمه

والله تصير الدزه شي


ولا تنسون ان كل الصناديق تنربط بشريط مخمل او الي تبين او حتى في اغصان من محل الورد

وتنحط فوقها تنسيقة ورد طبيعي

يكون راقي


والف الف مبروك

وتفرحون انشالله بالباجي وذريتهم وذرية ذريتهم

 

[حبيبة جمال]

دزة اخوي

كريستال محفور عليه اسمائهم ، دهن عود بقراش مصممة محفور عليه اسمها واسمه شي نسائي الورد الطائفي من القرشي والي فيه اسمه عود العنبر ، ساعة الماس مع دبلة الماس من الشرق للألماس ، حجابات ديور وفندي وبربري طبعا اصلي واسود مع عبايته من الرياض موصين عليهم كلهم شغل خطير ووايد راقيةومطرز على العباية اسمها ، ترجي الماس من داماس كان توا هابين في الكريستال الملون مع خاتمهم ، عطور من دبي ما في منها بالكويت ، جنطة يوم هبو في لوي فيتون الي فيها نقشة النمر داخلها بوك وميدالية نفس الماركة وسكارف لوي فيتون الي فيه كرز ، اقمشة شك شغل هندي يصلحون فلات ، كاكاو مزين بالورد الطبيعي ، والستاند حديد مشغول فيه سلال للورد وكله ورد طبيعي ونباتات خضراء وكان بالنص مصحف مع التفسير وسي دي للمصحف الشريف . والمهر بعلبة مغلفة من بيت الهدايا وعيه اسمها وايات قرآنية . وكريسال فيه بخور مغلف وربوط وطبعا الورد كله طبيعي

وهذا الي اذكره ،،، الستاند خلوه في شقتهم وصارو يستخدمونه للضيوف فعلا مصمم على هذا الأساس على اساس ما ينقط .