ابي نصيحتكم يا بنات

[الصافية]

أنا احب واحد من العائلة و اتوقع اهو يحبني بعد لان على طول الوقت و إحنا قاعدين و هو يخزز فيني و نظراته غريبة بس لما اشوفه يسوي روحه يشوف مكان ثاني و اليوم كان عيد ميلادي و طبعا أنا و لا مرة كلمته ولا كلمة سأل أمي جم صار عمري و أمي ما جاوبت سوت روحها ما سمعت بس اهو كان يشوفني و يضحك مع العلم هو اكبر مني بس جم سنه ما ادري بس ترى عمرة بالعشرين و أنا عمري 15 ابي نصيحتكم يا بنات ما ادري شنو اسوي

 

[كويتية تبي ريل]

رد : ابي نصيحتكم يا بنات

تراج ياهل وهذا شعور مراااهقة وعادي اذا كبرتي يا ماما كلشي بيتغير وانصحج انج ماتحطين هالسوالف في بالج وتجابلين
دراستج احسن لج حبوبة

 

[برنسيسة الرياض]

حبيبتي أنتي لسه صغيرهـ وبفتره مراهقه طبيعي بتفكرين كذا

وهو اكبر منك وأكيد أن تفكيرهـ غير تفكيرك

خلك في دراستك احسسن

 

[الصافية]

ونسيت اقول لكم شي بعد لان هو امه و اخته تزوجوا و عمرهم مثل عمري

 

[يا عيون جدي]

رد : ابي نصيحتكم يا بنات

حبيبتي
لا تشغلين نفسج بالهسوالف
اهتمي لبدراستج الحين ما ينفع البنت الا شهادتهاا
واذا انتي من نصيبه اكيد بتاخذينه
وربي يوفقج انشالله

 

[ســتارز]

مافي شي اكيد يمكن سؤاله كان عادي وممكن نظراته ماكان يقصدج

اذا فعلا تبين تعجبينه وتكبرين بعينه اجتهدي بدراستج خل يعرف ان مخج نظيف مو مثل بعض بنات هالوقت

 

[اطـخـم w7da :~]

رد : ابي نصيحتكم يا بنات

حبيبتي انتي لا تشغلين بـآلج بالتفكير < اذا يبيج يتقدم لج مع اني انا كلش ما احب الزوآج بعمر صغير
بس واايد تزوجو وماشيه حياتهم ,,

وتــرى هذا شعور المراهقه لأن توج صغيرهـ اتحسين كل من يطالعج يحبج , فكري بعقلج

واللي كاتبه ربي بيصير

 

[ترانيم القصيم]

رد : ابي نصيحتكم يا بنات

هلا بك أختي الكريمة , حياك الله معنـا و إن شاء الله تفيدين و تستفيديـن يا رب ,, بخصوص مشكلتك :

ابي نصيحتكم يا بنات ما ادري شنو اسوي

و ليـه وش صار يا الغاليـة حتى نشور عليك بآللي تسوويـنه ؟

أنتِ صغيرة ,, و كلنا كنا من سنك في يوم من الأيام و متفهميـن تماماً المرحلة العمرية آللي تمريـن فيها و طبيعة الأفكار و المشاعر بهذا السن

يعني 15 سنة هذي عز المراهقة و آللي تحسين فيه ( من الشيطان ) ,, هو آللي يوسوس لك حتى تعجبيـن بقريبك و تحبينه و تطيحين بمصيبة ما لها أول و لا آخر

و لا يا أختنا العزيزة ,, اسمعي كلام أخواتك هنـا آللي يحبون لك الخير و ودهم بمصلحتك أكيد :

طنشي الموضوع و لا تفكريـن فيه ,, و كل ما جت السالفة في بالك تعوذي من إبليس , تراهـ كلهن أفكار و هواجيس من إبليس

و هو آللي يخليك تتصوريـن التصور هذا ( إن قريبك يناظرك ) و يسأل عنك لأنوهـ مهتم فيه

ترى كله خرابيط و ألاعيب الشيطان و مداخله كثيييييييييييرة انتبهي , يا ما بنات كانت بدايتهن مثلك و انتهت بالعار

هنـا وحدة من البنات طارحة مشكلة إنها كانت تحب ولد عمها و فعل بها ما يفعل الرجل بزوجته , و ما تزوجها

و الحيـن متوهقة تقدم لها واحد و ودها تتزوجه بس خايفة , ولد عمها عمل عملته و تركها و الحين هو يبي يتزوج ( أمورهـ مشت )

شفتِ كيف إن البنت هي المتضررة الأولى من هذي الأمور ؟

و خليـنا نشوف , أيش كانت البداية ؟ مثل ما يقول قايل : نظرة فابتسامة فكلام فموعد فلقاء ..

( حطيها حلقة بإذنك )

إذا قريبك هذا أو أي واحد ثاني يبونك ؟ خلهم يدقون باب بيتكم و يخطبونك

أما حركات روميو و جولييت و الأفلام الهندية ترى هذا كله خرابيط و لعب و مسخرة ,, و ما يرضي ديننا يا الغاليـة

ديننا إللي كرّم المرأة و صانها عن عيال الحرام و وضع لها الضوابط الشرعية حتى تتقيد بهن و تحمي نفسها من النظرات الخاينة

فرض عليها الحجاب , حرم الإختلاط , منعها من الإستعطار حين الخروج من المنزل , منعها من الخضوع بالقول , أمرها بغض البصر

و أشياء كثيرة تثبتك على الصلاح و التقى و تخليك تحافظين على طهارة قلبك ..

أتمنى تفكرين بكلامي زيـن يا الغاليـة ,, حنا أكبر منك بالعمر و فاهميـن بالأمور هذي و نظرتنا أبعد و أعمق ,

الشي الثاني يا قلبي حنـا مسلميـن و ديننا ما فيه إلا عيديـن , عيد أضحى و فطر مُباركيـن بس , أما أعياد الميلاد فهذي حرام و ما تجوز

كونها بدعة و النبي صلى الله عليه و سلم يقول : ( من أحدث في أمرنـا هذا ما ليس منه فهو رد )

و قال أيضاً : ( كل بدعة ضلالة , و كل ضلالة من النار )

و البدعة أحب إلى الشيطان من المعصية ,,

انتبهي أختي الكريمة .. اشغلي وقتك بالدين و ركزي بدراستك و شيلي سالفة الإعجاب و الحب من راسك

خليك بين دروسك و الإطلاع على الكتب الدينية المفيدة ,,

الله يوفقك يا رب و يرزقك بالزوج الصالح لامنك تكبريـن و تصيريـن أحسن أم يفتخر فيها الإسلام قبل المجتمع آللي هي فيـه ..

احترامي و تقديري

ترانيم القصيم

 

[سـعـاد]

الله يسعدج يارب

ان كان يحبج ومعجب فيه .. المفروض اهو اللي يتصرف .. ويكلم اهلج .. اياني وياج تتصرفين اي تصرف تطيحين من عين اهلج ومن عينه بعد .. حتى ان حاول يكلمج لا تعطينه بال .. عشان تكبرين بعينه ..

وبنفس الوقت اهتمي بدراستج .. وبجذي تكوني هم كبرتي بعين اهلج وبعينه ان كان فعلا يبيج ..