احتفل ولا ما احتفل

[om . alzeen]

السلام عليكم ورحمة الله وبركاته

بنات ببدا بالموضوع علطول


ابي نصيحتكم انا توني متزوجه واول عيد زواج لي تاريخ 16-12 وزوجي مو مفكر انه يحتفل ولا يسوي شي لي بهاليوم باعتبار اني انا طالبه مو موظفه

رفضه انه مايسوي شي لانه الضروف مش ولا بد


بس عازه علي نفسي اول عيد زواج لنا ومانحتفل فيه لازم يكون هاليوم مميز

فكرت اخذ من امي واسوي لي شي بسيط تغيير بالمفرش وقميص نوم جديد وشموع وورد

شرايكم ولا ما احتفل ولا اتعب عمري


وملاحظه : اعانتي قاعده اخشها عشان اساعده بفلوس ولادتي ومصروف مايعطيني بيدي


بليييييييييييييييييييز يامشرفااات ارفعولي الموضوع واعتمدوه بسرعه لانه مابقى شي ومحتاجه رايكم

 

[Pinky -cat]

حياتي شوفي دامه مسوي الوضع كبير وسالفة عوده سوي اللي ببالج بس بطريقة حلوة يعني كيكة صغيرة سويها انتي بيدج او

سوي حلا او ايس كريم وياه فواكه شغل دلع زينيه وعدلي بيتج ولبسي حلو وعطري المكان وشموع واحتفلي بدون خساير


لا تطوفين فرصة للوناسة ولا تنطرين المبادرة كلة منه بذكاء سوي اللي تبيه

 

[mira]

الرجال مسسستحيل يبادر بشغلات زي كذا وخصوصاً لأول مررره ؟
انتي ابدأي وعادي كل شي خليه سمبل ومرتب وبأقل تكلفه
وانبسطي

 

[نـعـومـه]

حز بخاطرج لانه مايدفع عشان تحتفلون بيوم زواج بس ماحز بخاطرج انه مايدفع فلوس ولادتج !!!

خلي اعانتج للاحتفال بيوم زواج سوي شي بسيط كيكه جذي بس الولاده شلون تدفعين وانتي طالبه !!!! خليه اهوه يدفع اذا الولاده مايدفع عيل شنو بيدفع!!!

مولازم يدفع سوالف استقبال وجذي بس ولادتج !!'

 

[زين ودلال]

اشتري اشياء بسيطه

شموع وورد زيني فيه الفراش وكيكه ولبسي اي قميص عندج عادي مو لازم يديد

تمكيجي وسوي شعرج بالبيت مو لازم صالون

وبسسسس مايكلف وااايد

مولازم يكون الشي اووووفر وخصوصا ان الوضع مايسمح

الله يسخركم لبعض ان شاء الله

 

[شريت ديني ونفسي]

تبين نصيحتي أنا ما أحتفل في هاليوم من باب البدعه ليش آخذ ذنب بس بنفس الوقت بين فتره وفتره أحتفل معاه بدون مناسبه من باب التغيير مو لازم في مناسبه علشان اسوي التغيير خلي كل أيامج مناسبات ومو لازم شي مكلف
الله يوفقج ويريح بالج ويهنييج مع ريلج

 

[ناتشوو]

لحظة لحظة
خل الاحتفال ع صوب

ليش مايعطيج مصرف ؟

يعني حيل ظروفه المادية صعبة ؟


الله يهون عليج
وييسر امورج

بس بشكل عام
لا تشتطين زيادة عن اللازم
اهم شي
تكونين فعلا مرتاحة ومبسوطة ف زواجج
والاحتفال لا يقدم ولا يؤخر

والاحتفال
شنو يبيله نفسية منشرحة
وتعطر وتبخر للمكان
وانت حامل
ممكن البكيني تلبسينه
مع شال تحت الخصر
صار قميص جديد
يعني مااتوقع حافظ كل قمصانج
لبسي اي شي ماشافه او مالبستيه واجد
وممكن تلبسين بدلة طلعه
وعشا مطعم سواءا بيت او تتعشون برة
وانتهى

 

[M!SS.LOBY]

كل عام وانتي بخير ومستقره بحياتج يارب
سوي الحفله وأحتفلي وخليج أحلى منه الله يوفقج

 

[جروح^^الروح]

سوي الحفله ولبسي قميص أول ليله وخلي شغلج بسيط وعطيه هديه احنا البنات تهمنا هالمؤر والاحتفالات ونستانس فيهااا اهوا إذا جربها بيستانس


الله يووفقج معاااه ويسهل عليج ولاتج ويسخره لج

 

[Um Tuki]

حبيبتي مو شرط مفرش و شموع
يكفي تطلعون تتعشون برع و كيكة صغيرة مكتوب عليها كل عام و انت حبيبي مثلا
اخذي كيكة صغيرة لج و له مو لازم بذيج لحجاية
و لين صار عندج معاشج الخاص اخذي له هدايا و فراش و اللي في خاطرج
و دام اول سنة زواج لج يعني يا مكثر قمصان نومج لبسي قميص نوم ليلة دخلتج
او اي قميص مالبستيه وايد
و رتبي شعرج و ميك اب بسيط

يا محلاج

 

[om MaRyooM]

اذا الميزانية حده قده .. طلعو تعشو برة بمكان حلو هادي وبالبيت لبسيلج قميص نوم ومع السلامة

 

[امـ خــزامـى]

بصراحه مصدووووووووومه

ماابي اشيشك بس ليش متزوجك؟

لا يصرف عليك ولا يدفع ولادة البيبي

وياخذ اعانتك ؟؟؟؟؟؟؟؟؟؟؟؟؟؟

ولابعد بتتسلفين عشان تبسطينه ؟؟؟؟

ياحظه فيك ماشاءالله امه داعيتله

الله يسخرلك والحمدالله يارب على نعمك

 

[PuPa^^SWeeT]

كيكة و قمييص نوم



بس ليش مايعطييج مصرف


؟؟؟؟؟؟؟؟



لا موظفة ولا شي ؟؟؟

 

[موريا آدم]

والله يكفى انك تنسقى شعرك والميكاب وتسوى وجبة عشاء لطيفة وتكونى مبتسمة وودودة
هذه افضل وسائل رومانسية للاحتفال بمناسبة خاصة بينكم

 

[ام زهقانه]

اول شي
انا ابنصج لوجه الله
احتفلي بشي خفيف مثل اشتري كيكه
واكشخي ومكياجج انتي وبس
قميص من قمصانج
اما مسالة اعانه تخشينها علشان توليدين فيها غلط
خلي رجال يولدج من اقلوسه
مو منج انتي هذا اول جهاله جذي
بعدين انتي توليدين عمرج
لاتخرين الرجال
اذا اهو ماعنده ميخالف واذا حالته زينه لا والله
لا تخربينه
اما علي امج تسلفين علشانه اكبر غلط
علشان تفرحينه اهو ما يبي يحطيج دينار
انتي حيل تخربين الرجال
افلوسج الاعانه فسفسرهم علي مكياج عطور ملابس
دباج خليه يدفع لولد لا تشترين انتي
قولي افلوسي احتاج اشيا اشتري لي من طلعت اربعين
احتاج بدله لطلعت اربيعين
والله كسرتي خاطري نفس اختي جذي الطيب ما ينفع مع الرجال جذي
غلط خلج ذكيه
اشويه
الله يتتمم عليج

 

[مناير ...!]

لاتشترين ولاتخبين عمرج
واهو حتى مصروف مايحط باايدج

 

[غرام القمة]

احتفلي واستانسي حتي لو شي بسيط

 

[خالتي قموش]

اشتري لنفسج وافرحي لنفسج
ونسي عمرج حتى لو بشي بسيط
انا هم كنت مفلسه
شريت كيكه وبوكيه ورد وشمعتين
والكشخه اكيد
مو لازم ضخامه عشان نستانس

 

[حبيبي مالكني]

ليش ما يتكفل بروحه في بمصاريف ولادتج
انتي طالبة مو موظفة
وانا اقول احتفلي بالي موجود عندج
يعني مالها داعي المبالغة
هاي انا رايي

 

[om . alzeen]

يابعد قلبي يابنات

الله يسخر لكم ازواجكم ويهنييييكم ويبعد عنكم كل شي يعكر صفوو حياتكم

ريحتوني وونستوني بردودكم مشكورين من كل قلبي

بصحح معلوماتكم يمكن كتابتي للموضوع خربطتكم لاني ماوضحت عدل

انا اجمع اعانتي عشان الاستقبال مو الولاده وكل شي لا اهو بيولدني بس انا علي لكفر والورد والسوالف هذي بس اهو بيتكفل بولادتي فقط وانا بجر وحابه اسوي شي مميز لاول مولود لي

والمصروف من اول ماتزوجنا ماكان يعطيني مبلغ معين بيدي يعني نادر يعطيني 40 . 50 جذي بس وبعدين اتفقت معاه باسلوب حلو انه مايعطيني شي بيدي ماعندي مانع بس بشرط انه مايقصر علي كل نزلت معاش يوديني السوق اشتري بدلتين بمبلغ مناسب واهو يسدد فواتير تلفوني ويكون عندي اعانتي اخربط فيها

بس من حملت قصر شوي علي ماقام يوديني السوق واعانتي انا اجمعها مثل ماقلت لكم للاستقبال

انا مابي اصير كلش يعني اضغطه وازهقه مني عشان جذي احاول اسايسه بالمعقول واهو معاشه زوين مو قوي ولا ضعيف

ومشكورين ياخواتي ماقصرتو على ردودكم وراح احتفل بالي عندي والمعقول مثل ماقلتو ماراح اتكلف :*