استفسار عن الدكتورة عبير عوض اذا امكن

[punk Rose]

السلام عليكم

اتمنى تكونون كلكم انتو وعيالكم بالف خير و صحة بفضل الله سبحانه

لي طلب اذا سمحتوا لي .. حطيت موعد حق ولدي بعد اسبوع اذا الله سهل

عند الدكتوره عبير عوض... الهدف منه ابي ارسى على بر .. ابي اعرف ولدي شنو فيه بالضبط

توحد والا تأخر عقلي و الا شنو بالضبط .. اعطيه منتجات قمح وألبان والا لآ

ادخله مدرسة خاصة و الا عادية .. بيتحسن و الا بتم نفس ما اهوه

الصراحة خواتي تعبت و دخت و على طول ادش مواضيعنا و بمنتديات ثانية

لاني ابي القى جواب عشان جذي قررت اروح لها .. بس

سؤالي ... د. عبير شراح تسوي بالاختبار ...؟؟ شنو أسألتها ؟؟ شراح تسألني و تسأل ولدي

بهالساعة ونص واذا السالفة مافيها تشخيص يعني خليني مثل ما انا عليه متوكله عليه سبحانه و اذا بامكانها

تشخص اتكالي عليها بعد الله سبحانه ياليت تفيدوني لو سمحتو بالبروسيجر اللي تتبعه..

للعلم ولدي عمره 3 سنوات و4 شهور وحاليا مدخلته بحضانة عادية ..كنت اوديه قبل سنة عند استاذ احمدالبرماوي

و جزاه الله خير ما قصربس من بدا دوام الحضانة وقفت الجلسات بفترتها من سنه كان ولدي مايرد علينا لمن اناديه

بس يأشر .. نومه زين ويحب اللم بس شويه مو وايد يطالع العين نتفة ويصد ..لمن كان بو أشهر مايسوى

حركات اليهال المعتادة باباي و بوسه بالهوا ولا Close open بس يصرخ و لمن اناديه جنه مايسمع

وديته قبل سنة فحصوا اذنه فيها شمع بس لمن الدكتور صفق التفت فقال وديه للطب التطوري بس انا

كشت لان ادري مواعيدهم اتطول ولازم اطق طريج عشان احط موعد ... لكن الحمدلله وبفضل الله توه من شهر

قام ساعات يرد نعم لمن اناديه و ساعات يطالعني وساعات يحقر.. يعرف افراد الاسرة يعرف الالوان والارقام

بس مو بالترتيب وكذلك ABC وهم مو مرتبين بس مايسولف نهائيا ولا يتفاعل ويشارك بالكلام

مايقول شنو صار بالحضانة منو طقه منو خذا العابه مايسولف شنو صار و ين راح منو ربعه سوالف اليهال الطبيعين

ويكرر سؤالي اذا سألته وكلامي اذا تكلمت جنه صدى صوت .. عموما ياليت تذكرون لي تجربتكم و انطباعكم

عن دكتورة عبير .. وجزاكم الله الف خير و شافى ولدي و عيالكم اللهم أمين


بانتظاركم

 

[& الذاهبه &]

هلا اختي

دكتوره عبير تقعد معاج انتي والابو بالأول تسألج عدة اسالة عن حياة الطفل وعن حمالج فيه واذا في تاريخ مرضي بالعايلة
بعدين تقعد مع الطفل وتسويلة عدة اختبارات عقب تقولج انطباعها عن الطفل وتطلب منج تحاليل تسوينها بمختبر البشر والكاظمي
على اساسها تقولج اذا الولد عنده حساسية من نوع معين او عنده فطريات بالأمعاء او معادن لاسمح الله وتبدا تعالج كل جزئ
بروووح

الله يشافي وليدج واي سؤال انا حاضرة

 

[punk Rose]

مشكورة الذاهبة وماقصرتي على سرعة الرد جزاج الله خير و شافى لج غاليج يارب

وقت اختبارها للطفل اكون معاه والا بروحها معاه ؟؟

شنو نوع الاسئلة والاختبارات .؟؟

هل حسيتي انها وسيعة صدر؟؟

تعطيه ألعاب تختبره فيهم والا بس بالكلام؟؟

جم تكلف التحاليل ؟؟

اذا ولدي استغرب منها او كان مستعسر تعطيكم موعد ثاني والا لا؟؟

أدري كثرت عليج بالاسئلة بس ودي اعرف شبيصير

وياليت كل وحده اتطل تعطيني رايها حتى لو الكلام مكرر لان سبحان الله مع الكتابة

الوحده تتذكر احداث ثانية وقت الاختبار

مشكورين ماقصرتوا ولازلت بالانتظار

 

[الصابرة المحتسبة]

هلا يالغالية

وأتمنى الشفاء العاجل لوليدج اللهم آمين

وياليت البنات مايبخلون على أختنا بأي مساعدة .

 

[& الذاهبه &]

مشكورة الذاهبة وماقصرتي على سرعة الرد جزاج الله خير و شافى لج غاليج يارب
تسلمين يارب
وقت اختبارها للطفل اكون معاه والا بروحها معاه ؟؟
تكونين معاه عادي
شنو نوع الاسئلة والاختبارات .؟؟
عدة اختبارات تخص بذكاء الطفل يعني تعطيه كور وقلم تشوف يعرف يستخدمهم صح ايضا تعطيه مكعبات يحطهم بعلبه
وتركيب وشغلات جذي
هل حسيتي انها وسيعة صدر؟؟
حيل حبووووبه وعسل انا اذا بغيت شي ادق اطلبهاا وماتقصر تكلمني لاتحاتين من هالناحيه
تعطيه ألعاب تختبره فيهم والا بس بالكلام؟؟
العاااب
جم تكلف التحاليل ؟؟
الكشف 150 والتحاليل تكلف تقريبا بعد 150

اذا ولدي استغرب منها او كان مستعسر تعطيكم موعد ثاني والا لا؟؟
اهي ذكيه ماشاء الله تعرف الطفل حتى لو كان متعسر وحاولي يكون ولدج شبعان نووم وشبعان وقت الموعد
أدري كثرت عليج بالاسئلة بس ودي اعرف شبيصير
اخذي راااحتج انتي مثل اختي
وياليت كل وحده اتطل تعطيني رايها حتى لو الكلام مكرر لان سبحان الله مع الكتابة

الوحده تتذكر احداث ثانية وقت الاختبار

مشكورين ماقصرتوا ولازلت بالانتظار

العفووو وانا بالخدمه

 

[هبونه]

شنو صار عليج رحتي الموعد ؟؟

 

[عطراللافندر.]

الله يشافي وليدج وطمنيناااا