اشرايكم بشرط ريلي للسفر للخارج ؟؟ اوافقه ؟؟

[جروح القصيدة]

هاي بنات

انا افكر بأوروبا ,, ميييييييته عليهاااااا

بس سؤال ؟؟

هل تشاركون رياييلكم مصاريف السفرة ؟؟؟؟

مع العلم انا توني عروس لي 5 شهور ، وريلي كان واعدني بالملجة بشهر عسل اوروبا ، لكن

ماسفرني بعذر المصاريف ماتكفي فلوسه وقال لي قبل العرس بأسبوع ماكو سفر !!!

طبعا زعععععلت لأن خبرت الكل ان بسافر ، ورضيت بشرررررط وحطوا تحتها مليون خط

انه بيعوضني بسفرة بعد العرس ، والحين

مفكرين نسافر اوروبا بس شارط علي التكاليف للسفرة النص بالنص !!

اشرايكم بنات ؟؟؟ مقهورا منه لأن وعدني بشعر عسل والحين يبيني اروح شهر عسل على حسابي ..

اوافق بنات ؟؟

 

[يالبيه]

اذا ضروفه الماديه ماتساعد انه يشيل تكاليف السفرة كلها فساعديه زوجج مافيها شي المهم تستانسين وصدقيني راح يحب السفره معاج وقوليله تعوضني بعد السفره باي شي

 

[عبيرالحب]

هلا فيك حبيبتي اول شي اسالية كم ميزانيتك اللي معك للسفرة عشان اقدر اوفر لك النصف الثاني ادا قالك الفين دينار مثلا قولي الفين تكفينا سفر لماليزا 20 يوم بالفنادق والتداكر والمصاريف اليومية هونت ما ابي اوروبا ادا ماتقدر على مصاريفها انا مابي احملك فوق طاقتك على قد افلوسك بروح معاك وشوفي كيف راح يكون ردة ادا قال ماعندي مشكلة ماليزيا احسن وكل شي علي فهو رجال شريف ويمكن مايقدر صحيح على تكاليف اوروبا اما ادا قال لا حتى ماليزيا تدفعين فيها او ففتي ففتي فهو رجال يستغل لهفتك لسفر ويبي كل شي عليك
نصيحة لا تعطينة وجة وقولي انت الرجال والصرف من واجباتك ومن حقوقي عليك وادا نقص شي بالسفر بساعدك ولا يهمك
وادا دفعتي شي فالسفر اول ماترجعين وينزل راتبة اطلبي افلوسك عشان مايتدماتى معك وبلاخير انتي ادرى في شخصيتة وفي ظروفة

 

[كتكوته امي]

شهر عسل وبفلوسي لا والله مااروح حتى لو استانستي هناك راح تكون غصه بقلبج وبعدها راح يقزرها كل شي يقول

ادفعي معاي

 

[جروح القصيدة]

يسلمو حبيباتي

اهوا حتى االنص بالنص مايقدر

لأن معاشه رايح ع اهله ، مادري اهله شايفينه مليونير مع ان معاشه متوسط

لكن علشانه طيب وايد ولا يقول لهم لا يستغلون طيبته

لكن انا لأن قاعده اراعي ظروفه المادية صار كل ماطلبت شي

قال حبيبتي لو ماراعيتيني انتي منووو بيراعيني ، يعني يقص علي بكلمتين

.... اهوا مو مستعد حتى للفيفتي فيفتي ، يقول انتي ادفعي الف وانا 500

لأن السفر من الكماليات ، وانا مسؤول عن الضروريات بس !

اهوا صح كلامه مقنع بس اهله مايخلونه يوفر كلللش

 

[جروح القصيدة]

بنات والله لما اسمع ان فلانه تزوجت بعدي او معاي وسافرت برا

احس بغصة بقلبي والله ، ان ليش اهيا شنو فيها زود عني

ليش انا ماسفرني مالت بس

المشكلة ميته ع السفر وبنفس الوقت قاهرني شرطه

يقول ماعندي فلوس لكن اذا بتدفعين اوكي نسافر

 

[جروح القصيدة]

وبعدين اهوا مايغبي شي عن اهله ، باجر يقول لهم سافرت بفلوسها

لأن بيقعدون يقولون له وفروا فلوسكم بيسوون ناصحين له واهما مو مخلين معاه شي

وباجر يقول لهم سفرتها بفلوسها وبيقولون راحت شهر عسل بفلوسها

مابي والله قهر

 

[جروح القصيدة]

بنات ابي اتعلم العواااااااااااااابة


لي متى وانا طيبة وعلى نياتي


ابي اتشرط واتدلع ماعرف

 

[عبيرالحب]

ادا اهله محتاجينة لا تمنعينة من انة يساعدهم لاكن خليك انتي بالمقدمة ولاتهاونين في شي واحد من حقوقك حتى لو كريم لليدين خلية هو اللي يجيبة عشان يحط حد لهلة ادا مو محتاجينة

 

[om_7sin]

حبيبتي والله علشان وناستي اقط فلوس شعلي من حجي الناس انشالله يتكلمون لي باجر ،،، انتي تدرين ريلج ماعنده لاتحملينة فوق طاقتة وساعدية وصح بالشرع مومجبور يسفرج وليش اخلي يصرف كل فلوسة وانا خاشة فلوسي لا والله استاني فيهم مو عشانة عشانج انتي وحبيبتي اخذيها كلمة مني ماكو وحدة ماصرفت على بيتها ولا على سفره وعلى على عبالهااا والله الكل لي الحين ماشفت ولا وحدة ماصرفت وانتي ادرى بحالة ريلج تدرين انه ماعنده ...*

 

[عبيرالحب]

السالفة مهي عوابة عارف كيف عشان تاخدين حقك لا انا احب التفاهم في كل شي احب الاخد والعطا والحوار بدون هوشات يعني مجرد نقاش حتى تعريفن مفهومة للحياة كيف
يمكن اهلة اموصينة على معاملة يعاملك فيها بداية زواجك عشان يعسفك وتمشين بطاعتة كلهم فالبداية كدا مجرد اله يا تمشيها الاخت الكبرى او الام لكن خليك دكية واعرفي طبعة كيف بعدين يصير زي الخاتم فيدك بس نصيحة الصبر ثم الصبر ثم الصبر وقراءة سورة البقرة كل يوم والدعاء والاستغفار وشوفي وشلون حياتك راح تتغير صدقيني بدون تحلطم وبدون ماتخبرين افلانة وعلانة عن اسرار حياتك بالدات المقربات لك بنت خال عمة عم اخت فاهمة علي خليك غامضة محد يدري عن حياتك اي شي والله يوفقك

 

[نااناا]

والله حبيبتي انا وحده اسافر كل سنه والنص بالنص عاادي مافيهاشي لان انا موظفه حالي حاله ومعاااشي الحمدلله قوي تقريبا نفس معاشه....
انا بنظري الي عندهاا فلووس وموظفه ليش ماتسااعد زووجها ؟؟؟
وبعدين اشرطي عليه مايقوول لاي احد انج دافعه وشرط بشرط...

 

[عبيرالحب]

بالاخير اختي زي ماقالت اختنا بالله مافية وحدة منا ما دفعت في سفرة او في البيت او على اولادنا لكن ارجع واقولك انتي ادرى بظروفك وظروفك زوجك صح وادا انتي تقدرين تتحملين مصاريف السفر لوحدك ترى مافيها شي ادا هو مايقدر وفعلان مايقدر يسفرك سافري واستانسي والله يتمم سفركم على خير ويسعدك

 

[الدانتيل]

انا لو بموقفج ما اسسافر عادي
بسسس احن ع راااسه لين يرضى
و اقوله متى ماجمعت فلوس نساافر
نطرتي خمس شهور نطري ع مايجمع :eh_s(16):
وبعدين تقولين ما يخبي شي عن اهله يعني باجر مو بعيده يقولهم سافرت بحسابها
مو حلوه بحقج ولا بعد يقول الف واهو
500 خووش والله:eh_s(14):​

 

[جروح القصيدة]

ياحياتي يابنات مشكوريييييييييييييييييييييييييين

اسيرة الذكرى والله ماقدر ماقدر اصبررررر خاطري نسافر

قبل لا ايون اليهال

 

[جروح القصيدة]

بنات اللي قبل اسيرة الذكرى كلامكم مقنع صراحا

 

[جروح القصيدة]

اب اب

 

[Hello_kitty]

حبيبتي صج الحياة مشاركه والوحده توقف مع ريلها بكل شي مو بس بالفلوس واهم الاثنين ستر وغطا لبعض
بس مو بحالتج!
انتي توج عروس ويعاملج بهالطريقه ومقصر عليج المفروض هالفتره يدللج ودلعج وما يخلي بخاطرج شي
واصلا عيب عروس ولا صار عندكم اعيال والتزامات ولاطاحت الميانه يقولج ساعديني ودفعي بعد اكثر بصراحه عمري ما سمعتها من قبل
بشهر العسل اشرط على عروسه تحط من فلوسها!
واضح ان ريلج مشحون ومدرسينه عدل من اولها لا تصرف عليها خلها تحط معاك وتساعدك لا تعلمها تدلع وتصرف باجر تدبس بالمصاريف
خاصه وانج ذكرتي ان اهله يحنون وفر فلوسك ومن هالكلام
انتي الحين اوقفي وقفه جاده وعلميه من اولها ان المسؤل عن الصرف ولا اذا جذي من اولها باجر ابشري كل شي بيصير عليج تبين خدامه تبين تولدين بخاص من فلوسج
خليج قويه عندا يسفرج سافري ما عنده قوليله ان شاء الله اذا اهلي بيسافرون بالصيف بسافر معاهم عشان تبنيله انج مو مستعده تصرفين على وناسته
اوقوليله جم ميزانيتك وبحدود فلوسه سافروا ولا تدفعين شي مثل ما عنده يصرف على اهله انتي ملزومه بعد منه واولى منهم ومن واجباته يصرف عليج ويقوم فيج

 

[اروى77]

عادي حبيبتي مافيها شي تتشاركون بمصاريف السفر والله يرزقه وتسافرون مستقبلا بدون ماياخذ منك فلس

 

[جروح ودموع]

:eh_s(15):

هلا فيك حبيبتي اول شي اسالية كم ميزانيتك اللي معك للسفرة عشان اقدر اوفر لك النصف الثاني ادا قالك الفين دينار مثلا قولي الفين تكفينا سفر لماليزا 20 يوم بالفنادق والتداكر والمصاريف اليومية هونت ما ابي اوروبا ادا ماتقدر على مصاريفها انا مابي احملك فوق طاقتك على قد افلوسك بروح معاك وشوفي كيف راح يكون ردة ادا قال ماعندي مشكلة ماليزيا احسن وكل شي علي فهو رجال شريف ويمكن مايقدر صحيح على تكاليف اوروبا اما ادا قال لا حتى ماليزيا تدفعين فيها او ففتي ففتي فهو رجال يستغل لهفتك لسفر ويبي كل شي عليك
نصيحة لا تعطينة وجة وقولي انت الرجال والصرف من واجباتك ومن حقوقي عليك وادا نقص شي بالسفر بساعدك ولا يهمك
وادا دفعتي شي فالسفر اول ماترجعين وينزل راتبة اطلبي افلوسك عشان مايتدماتى معك وبلاخير انتي ادرى في شخصيتة وفي ظروفة

:eh_s(15)::eh_s(15)::eh_s(15): اوافقها كلامها منطقي وسليم ميه بالميه لان الريال اذا ساعدتيه باولها بيقط عليج مصروف البيت واليهال وراح كله يقول لج ما عندي واهو عنده