اشياء تخزنيها بالفريزر...خبراتكم بنات

[أحلام ورديه]

السلام عليكم ورحمة الله وبركاته

بنات حبيباتي

ساعدوني ابي تجاربكم في الأكلات والخضراوات والحلويات الي تحطونها بالفريزر

اشياء ممكن تسوينها وتجمدينها وإذا بغيتيها بسرعه تستوي

حق اذا جايه من الدوام وبسرعه تبين تحطين العشا أو جوج ظيوف فجأه

اول شي انا ببدي

بالنسبه للأكلات

أحشي سمبوسه بحشوتي وإذا بغيتها احطها بالفرن مع شوي زيت زيتون

وأحشي لفائف شاورما وإذا بغيتها أصفها في البايركس واصب عليها الكريمه الحمرا مع القيمر

بالنسبه للخضراوات

أقطع الباميه والقرع والجزر

والشبنت والكزبره مفرومين

الزنجبيل مبشور

واحطهم في علب كل واحد بروحه

واستخدمهم بالطبخ بسرعه ماأقعد اقطع >>>>>>>>>>لأن ماعندي خدامه وارد من الدوام الساعه

7.30 باليل فأبي اشياء سريعه

وحده قالتلي تسوي حمسة لحم مفروم أو شاورما وتعلبهم حق معكرونة الباشاميل أو أي نوع من المعكرونه

وحده ثانيه تقول تسوي كيك وتجمده وإذا جوها الظيوف بسرعه تطلعهم وتحطهم بالميكرويف

وتقدمهم شرايكم بنات

حبيباتي الي ترد تقول شنو تسوي وحق شنو الطريقه بالظبط عشان نستقيد

 

[الوردة المكنونة]

هلا حبوبه خوووش موضوع

انا عن نفسي اجمد الكبه والقبوط والسمبوسه
وتوست بالجبن ووقت ما ابيه بس اطلع واقلي
الباميه انظفها وافوحها واثلجها
ساعات اسوي كمية عجينه للفطاير او البيتزا واثلجها متى ما بغيت تكون جاهزه

خالتي ام زوجي تثلج ورق العنب والمحشي بعد ما تطبخهم تثلج كميات وكل كميه حق يوم

واذا تذكرت شي ارد اكتبه

 

[أحلام ورديه]

هلا وغلا الورده المكنونه

اسعدني ردج ياعمري

بس الباميه أظن تذوب بسرعه شلون تفرحينها انا عن نفسي بس اقطعها وإذا بغيتها على طول اغسلها واحطها

 

[زنوبة الحلوة]

والله يا اختي كل شي يتجمد

الصراحة خووووش موضوع

انا يمكن اعطيج فكرتي

الفواكة اللي تظل بالثلاجة فترة طويلة

قبل لا تخترب قطعيها وحطيها باكياس تعليب

علشان اي احد اييج تسوين عصير طبيعي

مثلا الموز تسوين عصير حليب بالموز

الكيوي حلو مع المنجا تخلطينهم مع بعض وطبعا تحطين معاه شكر وماي ويصير خوووووووووش عصير

والخوخ بعد تقدرين تجمدينها وتسوينها عصير باي وقت

واي شي من الفواكه




وانا خالتي ام ريلي حتى ورق العنب تسويه قبل فترة وتحطة بالفريزر وتسويه والله عجبتني طريقتها


وكل المقالي اللي تحبين تسوينها تقدرين تجمدينها بالفريزر


وانشالله اذا تذكرت شغلة هم راح اقولج

 

[الوردة المكنونة]

هلا وغلا الورده المكنونه

اسعدني ردج ياعمري

بس الباميه أظن تذوب بسرعه شلون تفرحينها انا عن نفسي بس اقطعها وإذا بغيتها على طول اغسلها واحطها

لا عادي حلو بس ما تفوحينه وااايد قلبه قلبتين وتشيلينه

هذا كلام العيايز يقولون اذا بتثلجينه لاوم تفوحينه عشان طعمه ما يخترب​