افكر بالطلاق تفكير جدي رغم اني و زوجي نحب بعض

[ميساء التركي]

ما ادري من وين ابدي

بس احاول اعطيكم الزبده

زوجي صاير عصبي حيل حيل حيل و على اتفه الأمور خناقه و مشاكل

انا اعالج و زوجي كان صابر الحين يقول ليمتى اقط فلوس و ماكو نتيجه استغفرالله


غير هذا قاير بعايرني وايد و اسكت يا الرفله يا الرفله ما تسوين لي لقمتي

يا بنات انا فبيت حموله صرت وجبة البيت الرئسيه الغدا الكل ينزل عليها

زوجي مرات يقعد متأخر يقول سويلي غدا و مرات حمسات عشا و مرات صواني وانا مطبخي نظام بار بس في چوله ام عينين و فرن و مايكرويف و كل شي

بس حق خفايف

مصروفي منه 160 دينار
ماتسوي شي
كلش كلش كلش
لا انا اللي قادره اجمع
لا انا اللي قادره ادلع نفسي
لا انا اللي قادره اشتري شي




كل ما طلبت منه شي يعيونه تبذير و ماله داعي


نبي نسافر ماكو ماديه
نبي ليلتين بمنتجع هم ماكو ماديه
ابي كفر يديد و تغيرات خفيفه هالخرتبيط مالها داعي
خو شسوي !!!!


غير هذا الدكتور يقول لا تفكرين بالإنجاب ساعات يكون نفسيه انسي هالموضوع
وهالريال لا طلبته فلوس قال ورانا علاج ومحتاجين فلوس
شلون تفكرين بهالخرابيط و انتي وراج علاج ومسؤوليه



وايد مختلفين على موضوع الميزانيه
وايد مختلف معاي على اسلوبي يقولي صبيك انتي
كل هذا لأن اسلوبي عملي
ادري بتقولون تدلعي وتمطمطي بالكلام
اتدلع بالأوقات معينه مو دايم
على الرغم من اني احس بنفجر من الضحك وان هذي مو انا


انا ما احب الفراش والجنس اهو يحب
احس ما انجذب الا وين وين


اسمحولي كلامي مبعثر و مطشر بس اخاول اشرح وضعي قدر المستطاع


وايد مشاكل حول اني فاشله بكل اموري
من ترتيب بيت
من تنسيق
من مشتريات كل ما دخلنا جمعيه تهاوشنا على اني اخم كل الجمعيه و طالعين بمبلغ و قدره
انا اشتري من جمعيتنا و اسعارها زينه جمعية اليرموك نطلع منها بالغالب شي وسبعين تقريباً

فقلبي حجي وايد بس ملخبطه

ماني عارفه اسوي لي برنامج لبيتي
متى اخم متى اغسل متى اكوي اغلب يومي فبيتي فاضيه ما عندي شي

انتظر شوركم وادري كلكم شاطرين وايد و نصوحين

 

[farina]

الله يعينج يقطع الزواج و سنينه
احنا الحريم بس لازم نضحي و نتحمل و اهمه كل واحد يفكر بوناسته و راحته
ريلي كل فلوسها قاطها على اهله و لماااطلب منه يقولي مااعندي هههههههههه الحمدالله و الشكر

 

[برنسيسه عسل]

ههه بسم الله عليك وش فيك
روقي وهدي اعصابك
ولا توترين نفسك

اول شئ خليك هاديه وريلاكس على الاخر
ودلعي نفسك لحد ماتصير نفسيتك اوكي ومرتاااااااحه

بعدين ابدي فكري وقرري ونظمي وجدولي !

اول شئ
مسالة الانجاب
قالك الدكتور لاتفكرين
يعني بكل بساطه لاتفكرين
وحتى لو زوجك ازعجك وقروشك وحرمك من اشياء كثير عادي وسعي صدرك لانه بالاخير ماتقدرين تغيرين تصرفاته ولا قراراته
بس الاهم انك تقدرين تغيرين نفسك !
بمعنى اخر ,, مشي له ,, سلكي له
والاشياء اللي تحتاجينها مو شرط تشترينها شهريا
ممكن شهر تاخذين حاجه
والشهر اللي بعده حاجه ثانيه
وبنفس الوقت اقتصدي فيها

انا اسوي كيذا
وانا ماعندي مصروف !! واذا دخلت السوبر ماركت زوجي يقول ترا مالك الا ( طفسه )
بالرغم ان هالمقاضي مو لي !! هي اغراض عشان عشاه وغداه ومع ذالك صرفت نفسي

ومسألة الترتيب والغسيل والكوي

سهله جدا
يوم ترتيب البيت ( كنس , تمسيح ارضيات وحمامات وطاولات , تعطير ) وافتحي الدرايش وخلي البيت يتهوى.
ويوم غسيل ملابس
ويوم كوي الملابس

وبالنسبه للطبخ وصي الشغاله تحط لك في طاسه انتي وزوجك
ومتى مابغيتو الغداء فهو موجود بالطاسه

وبعدين افتحي قوقل وشوفي وش كثر الطبخات السهله السريعه



وعندي ملاحظه
يمكن زوجك زي زوجي من نفس الطينه اذا كان مو اكيد
مهما دلعتي ومهما خققتي عند المصاريف ينسى كل شي !
ممكن يتحسن اسلوبه بس في المصاريف هو هو مايتغير
فــ تشوفيني ماعاد تعبت نفسي

 

[((غلاي))]

لاتفكرين وايد بالحمل الي الله كاتبه بيصير
يمكن زوجج معصب من هالموضوع
ادعي ربج و توكلي عليه

و اذا عالمصروف اشتغلي و اصرفي على نفسج ترى الحياة تعاون الريال ما يقدر على كل المصاريف بروحه كل شي صار غالي

الله يوفقج ان شاء الله

 

[كيندر بوينو]

مافي مشكل مدام

انا زوج مال انا كلو فلوس مال هوا لاهلووا انا لا مافي

تكيل< تخيل هوا في الشهر روه سوي قرض هو يعطي اخووات اخو كللو ماما وبابا الا انا مافي أئئطي

بعدين نكببببته وكشششفته معطيهم قلت يالحببببيب الدراهم الله لايهينك وعطاني


لكن انتي تقولين مصروفك ميه وعليها يعني بالسعودي الف وشوي صح!! ولا غلطانه المهم اذا كان بالالف صح

يختي روحي اشتري كفر من هوم سنتر تلقينه ب28 ديناار بالسعودي ميتين وعليهاا ,,

ولا انزلي الخبر تلقينه رخيص جدا < تحمست ع موضوع الكفر

والمكياج خوذي مسككرآ من ريميل رخيص بحدود 6 دنانير او اقل ماادري عندكم بكم بس في اشياء رخيصه وماركات حلوه

مصروفك والله لو عندي بيكفي بالرياض اشتري فيه كذا شغله

لاتتقللينه بنظرك بيتبارك باذن الله

بعدين حاولي تبخرين بيتك وترتبين جربي يوم وشوفي كيف بيشوف الوضع هو اذا ماعلق بالزينه ماكون شسمه كيندر

 

[كيندر بوينو]

بعدين صح نسيت اششربي ميرامييييييه باذن الواحد الاحد تقوي المبايض وتزيد فرص الحمممل

هاذا معررررروف وسط العالم كلهَ والله يرزقك من حيث تريدين بس حاولي تهتمين بنفسك وابدي سوي صواني الدجاج وحركات وكذا بعدها بتعلمين الطبخ

والله الله بالنظاافه ترتيب البيت والتبخير والفواحات بايكيا حلوه ورخيصصه

اي رجال بالعالم يدخل يلقى بيته نظيف ومعطر بتنفتح نفسه ويلقى اللي تشتهيه عممره بينبسسط

 

[زوجة عزيز]

انا اقولج لا اتفكرين في الطلاق بسبة هالشي ترا هالشي عادي واهم شي انه يمشي لج مصروفج حاولي ترتبين وقتج

 

[أحمرجوري]

حبيتي بنسبه للعيال ربي يرزقج يارب ويرزق باجي الحريم
وبنسبه لمصروف انتو شخصين يعني ماراح تصرفون وايد
والوجبه الرئيسيه مثل ماقلتي عند خالتج ام زوجك
يعني نصف المصروف للبيت والنصف الثاني لج ومو لازم كل شهر تشترين لج شي يمعي لين تكوني مبلغ واشتري لي بنفسج
انا متزوجه واشتغل وماعندي شغاله وماعندي لي يسويلي وجبه رئيسبه نفسج يعني اداوم الصبح بالشغل وارد البيت اداوم بالمطبخ اسوي غدي وبعدين استقبل ريلي اغديه واشربه شاي واقعد معاه ليما يدوخ ارد المطبخ انظفه واغسل المواعين غير تنظيف البيت غير الغسيل غير الكوي غير الجمعيه وغير وغير وغير حمدي ربج انه في احد يساعدج وانج بيت حموله عيل اذا طلعتي بيت بروحج شنو راح تسوين وتدرين انا كم اصرف للجمعيه انا وريلي طول الشهر 50 دينار الحمد الله

 

[Gatwa DaloO3a]

يعني انتي تبين تتطلقين عشان هالمشاكل ، على بالك كل المتزوجين مايمرون بهالمراحل او بمشاكل ثانيه ؟

هو يحب الجنس ، صيري تحبينه او حببي نفسك فيه .. او عالاقل لا تحسسينه انك ماتبين ! ( الرجال ينمسك من السرير)

لو ريحتيه من هالنقطه بيسوي اللي تبينه ..


ثاني شي المصروف ، صح انو مايكفي كل شي ، بس مثلا اشتري كل شهر شي انتي تبينه ..

لا تتذمرين كثير قدامه عشان مايصير الوضع اسوأ

 

[ام كوثر2007]

كبري عقلج حبيبتي مشاكلج تافهه جدا اسمحيلي بالكلمه هذى بس هذا الصج

يعني ماهو ذاك الدافع القوي اللى يخليج تفكرين بالطلاق والله عشان عصبي عشان ما عرف ارتب اموري عشان قالي ياالرفله

حبيبتي الريال لمن يقول حق الحرمه يا الرفله اكيد شايف هالشي بعينه وانتي اكدتييه لنا الحين بكلامج

شفيها لا نزلتي بيت حمولتج وطبختي بمطبخهم وسويتي اللى بخاطره ؟


اشفيها لا قعدتي وجابلتي بيتج ورتبتي وسنعتي وبخرتي وعطرتي البيت ليش ما تسوين هذا كله شاللى ملهيج ؟ وانتي اربع وعشرين ساعه بالبيت علي قولتج


مصروفج اشوفه وااايد وزياده عليج

مو معقول 160 ما تسويلج شي ؟ ليش شتبين تشترين مثلا ؟

كفرااات ؟ اكسسوارات للبيت او للغرفه

ترا تقدرين كل شهر تشيلين ثلاثين دينار من هالمصروف وتخلينهم حق هالكمالياات

حاولي تأقلمين نفسج .. انتي الحين بمرحله علاج واللى تعالج نفسيتها تصير تعبانه

حاولي انج ما تكبرين الامور وسنعي نفسج وبيتج وريلج وخليج مرااا قادره علي ظروف الحياه

ريلج لا شافج مقدره ظروفه وتشكرينه علي القليل صدقيني بتكبرين بعينه

والامام علي سلام الله عليه قال القليل الدائم ولا الكثير المنقطع

يعني ال 160 هذى ترا تعيش عايله كامله شهر كامل

تحمدي ربج علي النعمه وانا اختج وشووفي بلاوي البنات بالقسم تحمدين ربج علي مشكلتج

 

[دلال و غلا]

بالنسبه للمصروف 160 كافي
انا مصروفي 100 يكفيني اشتري كل اللي ابيه
و يزيد لآخر الشهر و اجمع منه بعد و ربي يشهد ع كلامي
و حتى الجمعيه ما تحتاج الا ورقه تكتبين فيه الحاجات ع شان ما تصير مشاكل بينكم
و ابصراحه احنا لا رحنا الجمعيه نشتري اللي نبي من ماجله للبيت و كل شي بخاطرنا
و الاغراض ما توصل حتى ٥٠ دينار
انصحكم تغيرون الجمعيه شوفي جمعية هديه او القرين اسعارهم مناسبه واحسن
و سالفة زوجي يقوم متأخر الله لا يهينج
نجبي من الغدا اللي يسوونه
او طبخي له ما يبيلها شي
وان ما طبختي له من يطبخ له و يجهز لقمته
و ترتيب الشقه مو مشكله كبيره
كلها مسحي الارضيه او كنسيها و غسلي المواعين و بخري البيت و عطريه
و الملابس تغسلينهم مرتين بالاسبوع و جزئيهم الملابس البيضه و بعدها الملونه
وانا حاسه انه العلاج مأثر ع النفسيه
و مسبب توتر حاولي تكونين اقوى من جذي
و الله الرزاق بإذنه يرزقكم
كلش مو صعب هالشي

 

[شادن33]

يحليلج من سج اشوفج متوتره ومبعثره
بس اغلب مشكلكم من الميزانيه
مصروفج زين
وريلج معاه حق يمكن يبيله افلوس وايد العلاج
حاولي تتكيفين مع الوضع
واخيرااا مشاكلكم ماتسوي تفكرين بالطلااق

 

[درة أهل الطولات]

عيشي على قدج 160 كمصروف حلوو خليه للعلاج اهم شي مو لازم تضيعينهم على منتجع وما ادري شنوو

شدعوة تتطلقين على سخافات

 

[شادن33]

وصح بالنسبه للحمال جربي القرنفل مع الحليب على الريج يقولون زين

 

[برنسيسه عسل]

حبيبتي
اذا عندك تكيس في المبايض اشربي كاسين بردقوش يوميا
ماعرف طريقته بس اللي اعرفه انه حل اكيد بعد الله لعلاج تكيس المبايض

 

[swanyway]

الزواج موب كله حلو و مشاكلك موجودة بكل بيت


بالنسبة للمصروف اشوف مصروفك حلو موب شين مثل ماقالوا البنات موب كل شئ تشترينة مرة وحده + توظفي اذا تقدرين

وزوجك معه حق وش اللي تشترين بسبعين وشئ وانتوا نفرين ولا فيه طبخ وساكنين ببيت حمولة ؟ من جد يعني وش مشترياتك ؟ كثير ترى

وهو معه حق العلاج يكلف ويحتاج مبلغ وهو يفكر لبعدين الحين هو عنده مفرش وغيرة خرابيط


انت تقولين ماتنظفين ولا ترتبين ومالج خلق فما قالج رفلا من فراغ حبيبتي , الاكل سهلة حطي اعزلي له وحطيه بحافظة فوق عندج ومتى ماقام جهزي له الاكل

ماتحبين تأدين حقوقة اسلوبج جاف وعملي شكلج ماتعرفين تطلبين و الدليل يقولج ماني بصبي عندج , لمن تبيين شئ قولي حبيبي وش رايك نشتري كفر يديد ولا نحتاج كم غرض شرايك نقوم نجيبهم الحين , ولا شفت كفر ياخذ العقل ومريح بس حسافة انقصتني كم بيزة لا تقولين ابي وعطني موب حلوة


اشتغلي على هالاشياء فيج عدليها وسنعيها بتلاحظين بعدين بيتغير معاج شوي شوي

 

[chatterbox]

مشكلتج بسيطة ولاتستاهل اللي قاعدة تسوينه
الزواج مسؤولية وضغط نفسي وجسدي وان حصلتيلج ساعة باليوم راحة ووناسة حبي ايدج عدلة ومقلوبة
وانتي ماشاله ببيت حمولة يعني اربعين بالمية من المسؤوليات شايلينها عنج اذا مو اكثر
بس باقيلج مسؤولة زوجج والاهتمام فيه
مافيها شي اذا شلتيله من الغدا نقصة واذا قعد سخني الاكل وخليه ياكل
والعشا سويليه شي خفيف بمطبخج الصغير حتى لو خرابيط جبن ولبنة وحمسة خفيفة راح يستانس فيها
والمصرف مقدور عليه يعني اهو معطيج 160 حقج والماجلة عليه ماشالله واااايد زين حتى لوما ماتشتغلين
قدري ظروفه واهو بيقدر ظروفج بس اهتمي فيه زيادة ولاتتدلعين وتحسسينه انج مو قد المسؤولية ترى الريايل مايحبون الدلع اللي جذي
والله يوفقج ويكتبلج اللي فيه الخير

 

[Nokia N95]

الله يرزقج الذرية الصالحة البارة

بالنسبة حق المصروف .... ماقلتي حق شنو بالضبط ؟
حق الملابس والا المطاعم و الا شنو ؟
ترا احنا الحريم واااااايد مبذرين عكس الرياييل ...
حاولي بداية كل شهر تكتبين الشغلات اللي محتاجتها صج .... و لاتروحين السوق وايد ...
اعتقد اغلب الحريم يشترون ملابس وشغلات ما نحتاجها ...

وبخصوص الكفرات و التغيير ....
عندج سنتربوينت و مركز سلطان و غيره من الاماكن الحلوة ...
بالنسبة لي عندي كفرين من ايكيا .. اذا غسلت واحد استخدمت الثاني .... وبس
مرة كان عندي كفر هدية و مبين عليه غالي وفيه شغل حلو .... الصراحة كان واااااايد حلو وكان عاجبني
استخدمته مرة .. وكان مو مريح وحطيته تحت السرير فترة طوييييلة وبالاخير تصرفت فيه ! كان ماخذ مكان عالفاضي !

وبالنسبة للجمعية !
ليش 70 دينار !!!
ماعندكم عيال .. يعني ما تشترون حليب وبامبرز .... وماتطبخين وايد .... فـ المبلغ وايد الصراحة
راجعي فاتورتكم وشوفي ليش اغراض الجمعية جذي غالية .... !
وشوفي جمعية الشرطة او الضباط ... يقولون وايد ارخص من الجمعية العادية

و بالنسبة للمطبخ !
انا مطبخي صغير و فيه جولة كهربا ( ام عينين ) وعندي فرن كهربا حيييييل صغير و مايكروويف و ثلاجة
واقدر اطبخ اللي ابييييييه بس ريحة الشقة تصير طباخ ... واستخدم بخور ( المسني ) من العطار ... بدينار
مو خسارة كل يوم احط منه ....

وبخصوص المنتجع .... اغلب الرياييل ما يحبون هالشغلات ... عندهم هذا تبذير وماله داعي
استغلي العروض ... اذكر السنة اللي طافت رحت الخيران .. اخذنا استديو اسبوع ( الايام العادية مو ويك اند ) طلع علينا اقل من 100 دينار
بس كان عندهم عرض
انتي كل شهر دقي عالمنتجعات ... مرات يسوون عروض حلوة خاصة بالفترات الميتة .... امتحانات - رمضان - مدارس
وبخصوص السفر .... شوفي السفريات وعروضهم ... عندج جريدة الوطن متروسة اعلانات للسفريات
بس لا تضغطين على ريلج ... يمكن صج ميزانيته ما تسمح له حق هالامور .... هو يشوف انها ثانوية وانتي تشوفين انها اولية
ترا تقدرين تستانسين بالكويت ... السينما - الاكواريوم ( خاصة ان الجو حلو هالايام ) - السيرك - الغابة الصغيرة - الابراج - فيلكا

انا ما اعرف شنو هي ظروفكم ... تدرسين والا تنطرين وظيفة ؟
خلج قنوعة ولاتقارنين نفسج مع اي احد ثاني

والله يوفقكم و يرزقكم الذرية الصالحة البارة يارب

 

[بولندية]

الله يرزقكم بالذرية الصالحة ويهدي ريلج لج

 

[دلوعة أبوهآ]

الله يعينك