الأستاذ أحمد البرماوي ( اخصائي تعديل السلوك ) يجيب على استفساراتكم.. حياكم

[احمد البرماوى]

سلام عليكم
*عندي اخوي عمره 3 ونص واهو اصغر واحد
وكله يسويها على نفسه ما يقول بروح الحمام وانتوا بكرامه
اول كان خفيف بس من ولدت ويشوف امي ماسكه بنتي يهدد وما يمدي نوديه للحمام الا وسواها بنفسه
وايد يغار منها ويغافلنا ويسكر خشمها بيخنقها*
وانا قمت اشتري كاكاو واحطه بيد بنتي واقوله شوفها اهيا قالتلي اخذلك كاكاو من الجمعيه ويقولي احبها بعد شوي ترجع الغيره
حتى مع اختي اللي اكبر منه بسنتين وشي بس يشوف امي معاها مثلا بتسبحها او جذي على طول يقولها انا بروح الحمام واهو ما فيه شي*
بس يبي الاهتمام حقه بروحه
مع انه امي مهتمه فيه اكثر واحد
والحين متعلم يعض اظافره
واذا ما حصل اللي يبيه يصرخ حيل ويبجي*

مادري شنسويله جربنا الطق ما نفع*
جربنا المساحل وطولنا بالنا هم ما نفع

ويعطيكم الف عافيه

السلام عليكم اختي الكريمة

مشكلة اخوكي تقريبا نفس المشكلة قبل السابقة يمكنك الاطلاع علي الاجابة فيها حتي لا يكون الكلام مكررا
ولكن احب ان اضيف انه لا داعي للضرب لانة لن ياتي بنتائج ولن يفيد وبالعكس سيجعل الامر يزداد سوءا حاولي فقط ان تحاولي تقريبة من ابنتك وابتعدوا عن مدحها واللعب الكثير معها امام عينية حتي لا تزداد المشاعر السلبية تجاه ابنتك واجعلية يلعب معها تحت اشرافكم وكافئية ان قام بذلك بشكل سليم

شكرا

 

[dectora 7elwa]

شكرا استاذ احمد

 

[om_3alawy2008]

سلام عليكم
عندي استفسار
ولدي عمره 3سنين وصارلي 6 شهوور احاول اعلمه عالحمام بس كلش مو مستجيب
يتحكم بنفسه شوي بس مايقول انه بيروح الحمام ومرات يعاند خصوصا لما صار عنده اخوو
الحين مو عارفه شسوي جربت الثواب والعقاب
وااايد اشجعه و احاول اخذه بالسياسة بس مو قادرة عليه


ودي بحل

 

[krkosha]

دكتور دايما احس ان ولدي هايبر وااايد فيه طاقه مشالله احس فوق الطبيعي

يعني طول الوقت يحذف الاغراض ويكسر ويناقز ويطق ويحاول يجذب الانتباه وسبحان الله يعرف الشي الغلط يسويه ويطالعني من طرف عيونه لان يدري برده فعلي اني راح انصدم واعصب مع ان عمره سنتين

مادري شنو الحل لان هالشي ياثر سلبيا عليه كل يوم يطيح ويتعور

والاستفسار الاهم بما اني ساكته ببيت اهل زوجي ومشالله اللي موجودين بالبيت اشخاص يفوقون 20 شخص (اهل زوجي واطفالهم والخدم والسواق) يعني صعبه جدا السيطره على شخصية ابني لان يشوف الاشخاص اللي حوالينه ويحاول يقلد وانا وايد متاثره من هالموضوع لان دايما احب اشوفه بصوره نظيفه ومؤدب بس تاثر وايد

وبصراحه انا اخاف على ابني من اي تحرش سؤاء من الصغار او الكبار وكلنا عارفين ان التحرش الجنسي منتشر وخصوصا البيت فيه اشخاص لايقلون عن 20 .. الحين اهوه عمره سنتين وصعبه افهمه ان عيب او موزين فشلون احمي ولدي بليز دكتور ريح قلبي الله يريح قلبك واسفه عالاطاله

 

[أبله سارونه]

السلام عليكم استاذ
اسال الله ان يوفقك وياجرك على هذا الامر
بالنسبه لي لدي اخ عمره 10 سنوات يكذب بشكل متكرر مما جعل الجميع يكرهه حتى ابوي
وامي دايم تقول لا هو ما يكذب خياله خصب الخيال ينتهي بالسنين الاولى هو عمره الان 10 او 11 سنه ودائم الكذب واذا كشف يضحك ولا ينتصح ويحلف ويقسم واخر شي كذب في كذب فانا خايفه ان الامر يتطور عند الكبر فما الحل دكتور علما بانه اخر العنقود وقبله 4 بنات في ولدين كبار وغير مدلل بالعكس لكن لا اعلم ما الحل ؟؟


وبالنسبه لابني عمره 3 سنين اي شي يريده يبكي الى ان يحصل عليه سواء له او لا واحيان يستيقظ من النوم ابي دونات ويبكي للحصول على الدونات مستعد ليومين تعبت معاه يصر على رايه هو الاوسط فوقه بنت 5 سنين وتحته ولد سنه و7 شهور

 

[حلا الاكوان]

السلام عليكم ورحمة الله وبركاته
اولا اتوجه بالشكرللاستاذ احمد على مساعدته لجميع الامهات الحائرات
لدي مشكله مع ابني ذو ال9سنوات وهوالوحيد ومن يوم كان عمره 4 سنوات كان عنده شخصيه كرتونيه محببه له
وكانت فيها مشاهد داميه يعني فكاهيه وكان يشاهدها ويضحك وعادي بس فجأه تغير واصبح يخاف منها
لدرجة انه ينزعج منها وقت النوم ووضحت له انها مجرد خيال ورسومات غير حقيقيه ومن بعدها مايقدر يجلس لحاله
حتى النوم مايحب ينام وحده ويقول لي ما احب النوم لانها
تجيني افكارتخوف ويطلب مني ان اجلس بجانبه حتى ينام !
والله تعبت واخاف يكبر والخوف هذا ملازمه وانا عارفه ان السن هذا المفروض يكون تجاوزمخاوف الصغار
ياليت تريحني انا خايفه عليه وكيف اقدر اجنبه التفكير والخوف هذا
والله يعطيك الف عافيه ويجزيك بكل خير

 

[حلا الاكوان]

بليييييييييييييز انتظر الحل

 

[أم شيوخة]

السلام عليكم ،،،يعطيك ألف عااافيه دكتور على جهودك المبذوله ..
عندي ثلااث بنات عسى ربي يحفظهم ،،،ومشكلتي في بنتي الكبييرة دايما تظرب اختها اللي أصغر منها بسنه ’’’ وتغار منها ودايما تعاندها (مثل تاخذ أغراضها ) ’ ودايما تردد أنا ما أحبها .
شلون يادكتور أخليها تحب أختها ’’ لأني بصراحه خايفه تكبر ويكبر الكره لأختها معاها ؟؟

 

[ميرور]

دكتور بنتي عمرها سنتين و3 شهور .. ايجابياتها انها تساعدني لما اطلب منها ،، علمتها تعتذر عند الغلط وتشكرني اذا عطيتها شي


بس الجانب الثاني من شخصيتها تصيح بشكل هستيري اذا تبي شي وعندها اخ عمرها 9 شهور اذا شلته تبكي نزلييييه ،، تغار منه بشكل فضيع واحيانا يبكون بنفس الوقت
انا اتنرفز عليها واحيانا امد ايدي عشان تسكت ،،، واحيانا قبل ماكون عنيفه معاها احاول اهديها اسآلها ليش تصيحين شو تبين ؟؟؟ ماترد علييي وتظل تصيح
لحد ماتكح وكانها بترجع...

الفتره الاخيره قمت اطنشها وعلمتها انها اذا بتصيح فيه عقاب ادخلها في الغرفه واسكر عليها الباب وماافتح لحد ماتسكت
بس انا خايفه انها تتعقد او يصيبها شي لانها تصيح بشكل فضيييييع


وتقلد اخوها بكل الحركات واحيانا تسوي نفسها ياهل ماتتكلم ولا وشي عشان نعاملها نفس اخوها
مع العلم انها هي ماخذه النصيب الاكبر من الاهتمام لانها الاكبر وتفهم اكثر منه ،، واحاول ماافرق بينهم


بس صياحها يخليني افقد اعصابي ،، لانه حتــــي بالليل تصحى تبكي بشكل هستيري ...



ولكن لما تسمع الكلام احضنها واقولها باليوم مليون مره اني احبها وادلعها ...


كيف اتعامل معاها ؟؟؟
وهل التطنيش مفيد لسنها ولا بيأثر بطريقه سلبيه على شخصيتها؟؟؟

لانه الاهل يقولون انتي قاسيه علييها وهي طفله وماتفهم ... ؟؟؟





شكرا

 

[om MaRyooM]

يعطيك الف عافية دكتور


انا عندي بنت عمرها سنتين و4شهور . .وحيدتي

ماتسمع الكلام نهائيا . .متعبتني انا وابوها وايد

تعاند وصايرة تسب (تسمع كلام من باجي الاطفال وتتعلم ) ولما تسب اول الفترات كنت اطنش
بس لما زادتها حبتين قمت اصارخ عليها والحين وصلت لمرحلة العقاب اني احطها بسريرها لدقايق عشان تتادب

تيي تتأسف بس ترجع بعد ساعة على نفس السب والعناد


...
هذي اول مشكلة


المشكلة الثانية
انا الحين حامل .. ووايد خايفة على الطفل الجديد لأن بنتي تحب الاطفال بس تأذيهم
يعني تعض وتضرب !!!
وايد مستغربة منها حاولت اعدل فيها هالسلوك بس مادري شلون !!!!!!


وشكرا

 

[كيان امراه]

السلام عليكم دكتور احمد ويعطيك الف عافيه

انا مشكلتي انا مررره عصبيه واصارخ على عيالي (بنتي عمرها3 ونص وولدي عمره سنه ونص)واذا صار شيء وفقدت اعصابي اضربهم واحس انهم يتعورون ويضيق صدري بس مااتوب
والنتيجه بنتي جدااا عصبيه وولدي
بنتي عنيده وماتسمع كلامي ابدا واعاقبها بالزنجبيل في فمها او احرمهامن التلفزيون او الحلاوه او الطلعه بس مااحس انه في تغير او تاثير ايجابي وطبعا مهمله في اغراضها الشخصيه تخلي الكل يلعب معاها ويخرب ويكسر اشياءها ماتهتم والاكل ماتكل الا بطلعة الروح واذا عطيتها خبزه ماتخلص نصها الا بعد ساعه ونص من غير مبالغه بس تحب اللعب والاطفال (انا ساكنه عند اهل زوجي والبيت كله اطفال بعمرها واكبر)وطبعا تحبهم بس لازم يطقونها وتطقهم بس بنتى عنيفه وعدوانيه وحساسه وعصبيه وعنيده وغيوره تغار من اخوها واذا شافت عند احد لعبه او اكل او لبس جديد تبي مثله

بالنسبه للولد عصبي والطق يعتبره لعبه يطق ويضحك واذا قلت له عيب ولا طقيته على يده كاني ماسويت شيء ويعيد الحركه وما يحب ياكل بس يبي يشرب حليب وياكل شبس وحلويات ولسه هو مايتكلم غير ماما وبابا

اسفه على الاطاله بس من جد تعبت ماادري وشو اسوي ولا كيف اتعامل ولا من وين ابدا والضغوط ماتنتهي ويعطيك الف عافيه والله يجزاك خير الدنيا والاخره

 

[مزيونه موت]

أنا زعلااااااانه ليش يا دكتور ما جاوبت على سؤالي في صفحه 22

من زمان انتظر الاجابه ​

 

[ميرور]

وانا بعد انتظر الاجاااااااابه لاني في حيره كبيره مع بنتي


الظاهر الدكتور مشغول

 

[شوشو&صوصو]

السلام عليكم دكتور انا عندي ولد عمره 5سنوات وبنتي عمرها 3سنين ونص عندي مشكله انا احسها كبيره لان بديت افقد اعصابي حيل واطق بشكل موطبيعي وطول اليوم مضايقه ونفسيتي تعبانه تخيل دكتور ماقدر اسيطر علي عيالي مايسمعون كلامي وشطانه وحركه زايده وانا قاعده بيت زوجي انا اربى وغيري يخرب كلشي موفرته حقهم وادلعهم اذا طلعنه من البيت رحني حق اقاربي لازقين فيني طول الطلعه مايقومون يلعبون مع اليهال حتي احتر اني ماخذتهم لازقين فيني وبالبيت شطانه جربت اطلع طاقتهم دخلتهم نوادي ماكو فايده يروحون 7صبح يردون الساعه1 الظهر تخيل دكتور من يردون طاقه موطبيعيه يعني لو اخليهم بكيفهم عادي لي ساعه12 بليل بس انا اجبرهم ينامون الساعه 8بليل طول الوقت حركه يعني انا اكون راده من دوام ما ارتاح ومايرغبون حق التلفزيون وذا رحني سوق اقولهم كلشي عندنه ماله داعي تاخذ طول الوقت يبجي ويحرجني بسوق تعود لازم ياخذ والحين بنتي صارلها شعر تبول باليوم 6مرات علي نفسها ولجاة حق طق ولصراخ ماكو فايده تكذب تقول انا قتلج قتلها انتي جذابه وماقلتيلي ادري مشاكلي وايد دكتور بس كلش موعارفه اتصرف معاهم وتعبت واصلن عندي اكثر من هل شغلات ابي اعرف شنو الحل اذ دوخوني ومايسمعون كلامي احس مالي هيبه عندهم وشلون اشوف حل حق بنتي تبول المتكرر وناطره رد منك

 

[Sa7aBa]

الدكتور الفاضل يزاك الله خير على سعة صدرك ووجودك معانا بالمنتدى فاحنا نحتاج لنصايح في تعديل السلوك عشان نطلع جيل ممتاز

انا عندي استفسارات وايد لكن حابه اني اخذ رايك بكذا شغلة

حاليا ماخذه اجازة طويله من الدوام لعدم وجود خدامه تساعدني
فقلت هذه البداية

عمر ولدي سنتين و 6 شهور_ ماعندي غيره الله يحفظه
الوالدة والوالد ملاحظين انه طفل فطين ذكي ودمه خفيف وحابيين اني ما اضيع الولد مع صفاته الحلوه
مشكلتي اني كنت وااايد مشغووووله بالدوام ماخذ اغلب الوقت للأسف
وفرصتي الأن اني مشرفه على كل شي
يعرف اربع الوان لكن لا يميزهم عدل ( يبيله وقت اتوقع ) !
ويعرف الأحرف الإنجليزيه
والأرقام ملخبطة
المهم
اللي ابي اوصل له

ودي اعيييد ترتيب كل شي
من ناحية الأكل والتربية لأنه وقتي طووييييل معاه
شنو نوع الأكل المناسب لعمره ؟
ابي الألعاب التعليمية والترفيهية المناسبة لعمره ؟ عشان اروح اشتريهم
وشلون اتعامل معاه واجذبه للتعليم بهذه الألعاب لأنه تقريبا ملووول !

دكتوري الفاضل
ابني عنيد وكل شي يبيه ياخذه
وذا ماخذاه يطق او يحذف اي شي ويصارخ ويبجي
ونا مو عاجبني هالشي
فهل الحقران يفيد ؟ ولي متى احقر ؟ وهل استمر ؟
وشلون اذا تصرف تصرف سئ شلون اعاقبه ؟ وشنو العقاب وشكثر مدته ؟

على فكره
ولدي واااايد يخاف اني اروح واخليه لأنه صادف اني شهر كامل سافرت بدونه ورديت وعقب رحت اسبوع ورديت وعقبها شهر ورديت !
ودخلته حضانه لكنه كلللللللللللللللللللللله يبجي يبي ماما لي درجة انه الحضانه قالولي قاعد يخرب على اليهال ببجيه ! (( قصدهم طلعوه )) فطلعناه من الحضانه لأنه يسكت بس بو 5 دقايق ويرد يبجي طوووول الوقت من اقطه الصبح لين اخذه !
فطلعناه من الحضانه
فهل السبب الفترات اللي سافرت فيها ؟
وعلى فكره ساعات من كثر ما يبيني اروح عنه مااقدر اروح التوليت وانت بكرامه اعذرني دكتور ساعات ادخله معاي !!
فماالحل ؟
والأبو الحين مسافر فأنا علي كل شي
وشي اخر
يحب ياخذ فرش المكياج ! وياخذ احمر الشفاه يبي يحط على شفايفه
ودااااااااااااااااايما ابوه يصرخ عليه هذا عيب مو حق صبيان
لكنه الى الآن اذا لمح يروح ياخذ ويبطل ويحط
وانا مابي يتعود ! اخاف

اسمحي لي طولت عليك واااااااااااااااااايد دكتور لكن اعذرني

 

[جبنة بيضة]

دكتور جزاك الله خير

عندي استفسار ولدي عمره ثلاث سنوات و لما يختلط بالأطفال الي من عمره يتعلم كلمات مو زينه أو حركات عناد الصراحه هالشي مضايقني و اذا منعته عن الاختلاط بالأطفال أحس هالشي غلط

بالنسبه للأطفال من أبناء عماته عنيفين في لعبهم اشلون أتصرف و مشكور

 

[MoonDiamond]

الله يعطيك العافيه استاذ احمد

انا مشكلتي مع بنتي اللي عمرها 3 سنين البجي على كل شي
من تشوفني وهي تبجي وتحن وتداحرني
ولما ما اكون موجوده ماكوا احسن منها مؤدبه ومطيعه وهاديه ومتعاونه
وهذا كلام خواتي وحتى الخدم
بس من تشوفني تتفرعن وتحرق قلبي بالبجي على غير معنى وكل شي ماتبيه
من تغيير البامبرز والاكل والشرب وتمشيط الشعر وكل شي تتله وتخرب وتطق اخوها

الحل اللي مرات ينفع
اني احطها بكورنر العقاب ليما تقول سوري وتبوسني
او اروح الغرفة الثانيه وما اخليها تدخل عندي
هني شوي تعقل مو وايد
وبعدين بنتي مستحييييييييييل تنام وانا مو يمها
تقوم من عز نومها تشيك علي اذا انا عندها ترد تنام هذا اذا ما نامت علي
واذا مو عندها تبجي وتناديني وتقوم تدورني


استاذي بنتي ذكيه واسم الله عليها تعرف عربي وانجليزي وتروح حضانه من عمرها سنه
والمدرسات يمدحونها وااااااااااااايد وقياديه ومعتزه بنفسها
وتلاحظ اشياء اللي بسنها مايلاحظونها

ارجوا تفيدني
ويزاك الله خير​

 

[الكويت ديرتنا]

السلام عليكم




آنا بنتي الله يحفظها 4 سنوات ونص خجووووووله وفيها غيييييره حيل يعني إذا شكرت أي أحد أو مدحت أحد تغييييير وتزعل علي وتقولي ليش قلتي حق فلانه حبيبتي وقلبي؟ يعني تبي الغلا لها بروحها؟


مع إني امدحها واقولها عبارات حلوة بس ماادري ليش سلوكها جذي ؟



ارجو إفادتي

 

[sofiaa]

السلام عليكم ورحمة الله وبركاته
دكتور ما رديت على تساؤلي من 8 أشهر على الصفحة 16 كل اللي وراي جاوبتهم

 

[جبنة بيضة]

و عندي سؤال ثاني يا دكتور ولدي مو من نوع الوقح يعني يعاند عناد أطفال عادي بس الصراحه أضايق لما أحد يدخل في تربيته في الزف الأني موجوده مثلا خالتي أو عمته