الأطباع السلبية في شخصية المرأة الكويتية؟! ما هي برأيك

[coffee]

kekat kakaw حياج الله حبيبتي وتسلمين على المشاركه هم ابي كيكة كاكاو هههه نكاتكم تشوق

 

[كندية]

2- تشيينة النفس وشح الابتسام: بالسوق خزت غيرها بنفس.. بالعروس خزت غيرها بنفس.. بالشارع خزت غيرها بنفس.. بالزوارة خزت غيرها بنفس.. يات بتسلم على وحده سلمت بنفس.. كلمها احد من جنسة ثانية ردت بنفس..
طيب ليش؟ من تواضع لله رفعه! وفي مفهوم غلط ويمكن لاحظته حتى بالنكات المنتشره بالنت ان بعض البنات ونتيجة لتاثرهم بالشعرالشعبي يحسبون ان الغرور والفخر ميزه وان اذا اغترت الناس بيشوفونها حلوه ومهمة ونست ان رب العالمين قال "ان الله لا يحب كل مختال فخور" و "إنه لا يحب المستكبرين" يعني تبي محبة الله والا التميز بين الناس اللي من نسج الخيال؟

بصراحه هذي شغله اكرهاا وللاسف وايد اشووفها في المنتدى وحتى في حياتناا العااامه كلنااا بشر ويوم القياامه بننحشر في مكان وااحد ماافي احد احسن من احد...واللى يبط الجبد ان ترضااهاا على غيرهاا بس ماترضااها على نفسهاا
وساالفه النكااات خليني ساااكته بصرااحه انا اشووفه مرض..وكل وحده راازه صوورتهااا في التوقيع وماافي كلام غير عنهااا وانا واناا...

8- الاتكالية والكسل: ما تسفط الا يم المكان اللي بتنزله... ما تنزل الاغراض الشويه الا مخليه الخدامه.. تبي ماي ما اتحرك تامر احد اييب لها.. يعني مهما كان الشي بسيط لازم احد يسويه.. احد طلب منها شي تسويه من ورا خاطرها
الحركه بركه.. وبدال تكود الشحم ودفع الفلوس للنوادي الحركه بالبيت ابلاش والوحده لو تظيف متعه كل شي بتسويه حتى لو كان روتيني بيكون حلو ومميز


هذي بعد انا حيل ملاحضه ان واايد صاار الاعتمااد على الخدم...في تتزوج والخدامه معااها...وحق كل يااهل خداامه والطبااخ خدامه والتنضيف خداامه..شساالفه قبل الامهاات اذا تشتغل اتيب وحدة ولا ماتسوي كل شيء..الحين كل خدم...

مااقوول اللى الله لا يعووزني على الخدم...

طبعااا مو الكل على شااان محد يزعل....ومشكووره حبيبتي على الموووووضووع​

 

[جداوية سعودية]

أول شي اشكرك اختي على طرحك لمثل هذا الموضوع الي راح تستفيد منه المرأة الكويتية
واحب اوضح لجميع الاخوات ان لكل بلد مزايا سيئة ومزايا حسنة واختنا وضعت هذا الموضوع حتى تتعرف على اكثر شي انتشر بين النساء الكويتيات حتى تبحثون عن الحلول فلا يبقى بقاء المزيا الحسنة والقضاء على كل المزايا السيئة أن شاء الله..
عذاً لن أصوت وذلك لاني لست كويتية فلا اريد ان اضع صوتي حتى لا اظلمكم ولكن بنتظار نتيجة التصويت وحلولكم
موفقون بأذن الله

 

[coffee]

كندية صاجه حبيبتي والله انا ضد سالفة الخدم هاللي مكودين على غير معنى يعني بالسفر والشاليه اشوف عادي تقدر المره تدبر روحها فاستغرب صراحه من الحريم اللي يكودون الخدم.. وليلحين مو قادره استوعب خدامه مع ريال ومرته بشقه صغيره مادري وين الخصوصية لو بيت اقول اوكي .. حياج الله حبيبتي

جداوية سعودية حيا الله بأهل جدة حبايبي حبيبتي صدقتي وانا هذا مقصدي من الموضوع .. واذا انتي حابه تشاركينا بملاحظاتج ببعص الصفات اللي تحسينها موجودة عندكم بنكون سعيدين بهالمشاركه.. وحياج الله حبيبتي نورتي الموضوع

 

[بنت باباتي]

انا قريت حق زوجي الاختيارت واختار الاخيره


ابيه

<<< توها تدري انها زعوليه


انا اختار الحسد لان جد الحسد منتشر بشكل كبير ومحد يحب لاحد الخير
طبعا مو الكل

 

[غَـنْـجَـى و دَلـوعْ]

تم التصويت


و صح لسانج كلامج كله صــــح .. أنا أشوف كل الصفات اللي ذكرتيها موجوده عندنا باستثناء الأخيرة


لكن مثل ما قالوا لو خليت خربت

و كل مجتمع فيه الشين و الزين

لكن للأسف أحس إن المرأة الكويتية طلعت عليها سمعة إنها شايفه نفسها على الناس ..

 

[coffee]

بنت باباتي ههههه الحساسية زينه وشينه بس حاولي ما تزعلين بسرعه ولي زعلتي على طول سوي شي ثاني يونسج والله يخليلج ريلج حبيبتي صاجه والله يكافينا ويكافيكم شر الحساد

 

[coffee]

غنجي ودلوع تسلمين حبيبتي وصاجه والله معظم هالاشياء ماكانت بحريم قبل.. احسه شي بدا بالاسنين الاخيره وان شاءالله يتلاشى.. وصاجه شوفة النفس مشكله والبعض قام يحسب شوفة النفس ثقة مع ان الفرق كبير بين الاثنين

 

[Dr.SoS]

السلام عليكم.....أنا الصراحة صوت على كل الصفاة لأن كلهم موجودين, بدون تعميم طبعا, و عاد الله غفور رحيم, في ناس فيهم صفه وحده و في أكثر من صفه و في ناس كلهم مجتمعييين....أنا اللي بقوله صح الكويتيه فيها وايد أشياء زينه و يمكن هذه الأشياء تبين وقت الجد, تصير اخت رجال ما شاء الله, بس الصراحه نمط حياتنا و اسلوب معيشتنا و الترف و ان كل شي نبي نحصله و الدلع و العز و غيره بدال لا تخلينا أفضل مع الأسف ردتنا لي وره, و أعيد و أقول مو الكل, في ناس ما شاء الله عليهم ينحطون على الجرح يبرى و تراهم وايد و لله الحمد....بس فعلا هذه الأمور موجوده و بكثره....يعني كل شي نبي مثل ما نبي ما نبي نصبر ما نبي أحد يقول لنا لأ....و يمكن هذه الصفات موجوده بنساء وايد مجتمعات بس على قولة أختنا coffee اهي قاعده تتكلم عن مجتمعنا بس....و مشكوره على الموضوع

 

[coffee]

Dr.SoS تسلمين حبيبتي وتعليقج جدا واقعي ومنطقي نورتي الموضوع

واتمنى هالعاده تتلاشى لو كل وحده تراجع نفسها وما تقول وييه هالشي عادي جان الوضع صج يفرق لان صار الشي عدوى الله يكافينا ويكافيكم الشر اذا وحده تحلطمت بناتها بيقلدونها حتى لو يهال ترى الياهل فطين.. اذا وحده حشت رفيجتها بتونسها وتحش معاها وهكذا..
عن نفسي للامانه يمكن لاني ما اجامل اللي تييني تحش اقولها تركي عنج هالسوالف واغير الموضوع واذا وحدة او مقعد وماكو ميانه اسكت واكون مستمعه فقط واحسسها بتفاهتها وفعلا وايد من اللي هوايتهم الحش قاماو يتجنبوني وابركها من ساعه .. انا نوعي احب نقاشات هادفه احب اطلع من مكان قضيت وقت وجهد فيه وانا اقول والله استفدت هالمعلومه وهالشي بدال لا اقول استغفر الله يالله لا تاثمني على الحش والكلام الفاضي.. واتمنى من الخوات ان ما يجاملون بهالامور ولا يعطون مجال لان هالشي لا نهائي
ومن وجهة نظري الوقت اهو اللي يعطي مجال للحش مثلا وحده تطلع مع رفيجتها يوميا لمدة ساعات بيكون ماكو سالفه غير الحش بالتالي الحل ان تتقلص ساعات الطلعه.. او مثلا بالزوارة ماكو شغل واحد مجابل الثاني مافيها شي بدال الحش تستبدل بالعاب لا تقولون ويه مالنا خلق بالعكس العاب مثل اونو جنجفه بلي استيشن اي نوع العاب او مثلا تخصصون موضوع للنقاش فيه مثلا عن الطبخ او التنظيف او مسائل دينيه او صحية او اخر الاخبار وغيره او حتى لو تروحون مشوار الجمعية تتمشون صوب الكريمات و غيرو ترتيب ديكور البيت لعبو مع اليهال المهم لا يصير الوقت طويل وماكو شغل فيه

 

[viva la glam]

تم التصويت

 

[***كلي شموخ***]

تم التصويييييييييييت

 

[coffee]

choco-09 - كلي شموخ
تسلمون حبايبي وحياكم الله

 

[*مارلين_مونرو*]

مشكوره حبيبتي عالموضوع .. بس سوووري يعني شالهدف منه !!

عشان الناس تشوف سلبيات المراة الكويتيه !!

و لا عشان شنو بالضبط !!

اوكي يمكن عشان نشوف سلبياتنا و نعدلها !! كل الحريم عارفين بعضهم و كل وحده عارفه نفسها !!

ياليت ادش اي منتدى ثاني و القى احد يذم بأهل ديرته كثر ما تذمون بأهل ديرتكم !!


بدال ما نشجع حريمنا و نطورهم للأحسن و نعلمهم نطمسهم جذي مساكين !!

و بعدين المره الكويتيه فيها مجموعة سلبيات لكن إيجيابياتها تفوق 1000 مره سلبياتها !!

كافي انج تقولين انا كويتيه متعلمه مثقفه متطوره لج حرية الاختيار و الراي و غييييرها من الاشياء اللي حريم وايد محرومين منها ..

يعني بالله عليج ترضين احد ينقل موضوعج بمنتديات ثانيه و يقولون هاذيله حريم الكويت !!

و نقول ليش العالم ما يحبنا و يذمون فينا !!

و هالموضوع اهوا بكبره الصراحه يعبر عن اللي انتي ذكرتيه (( الحش و النميمه .. التسأل و اللقافه .. التحسر و مطالع الغير و الحسد )) !! و سامحيني حبيبتي يمكن ردي ما يعجبج بس انا من حبي لديرتي و عيالها ماأرضى عليهم الشينه

 

[coffee]

نوااره_ حياج الله .. وانا ذكرت الهدف من الموضوع باول جمله لي واللي اهي "...واتمنى ان نستعرض الاطباع اللي تشوفونها بايخه وياليت نبدي نغيرها"
ما ذميت باهل ديرتي وكلنا ما نرضى على اعيال ديرتنا .. الهدف اهني النقاش والتذكير ومراجعة اخطائنا واتوقع هالشي ممتاز وياما ناس تغيرو بمجرد قراءة مواضيع وهذي الثقافة عزيزتي .. وشلون بنطور الحريم اللي تشوفين انهم يسوون هالاشياء ومساكين اذا شجعنا اخطاءهم!
وانا ذكرت شي من الواقع ما يبت شي من عندي وانتي اكدتي ان من ايجابياتنا ان لنا الحرية بالتعبير عن راينا وهذا الموضوع يعبر عن رايي وراي ناس معايشين هالشي.. اذا انتي شايفه ان المراه الكويتية مافيها سلبيات وان المفروض ما نتطرق للسلبيات فهذا رايج وانتي حره فيه اما بنظري اذا هالسلبيات ما نوقشت ما عمر الناس بيحسون بعيوبهم ولا عمرهم بيتعدلون .. وكره الناس لنا اللي انتي تتهمين موضوعي ان يزيده انا ما اشوفه من هالمنظور اللي بيكرهنا مشكلته ومو واقفه على موضوعي انا اللي هامني اهني اني اطرح موضوع مؤثر على مجتمعي وبشفافية بهدف ايجاد الحلول واصلاح العيوب.. ولو قريتي موضوعي بتمعن ما قلت ان كل حريم الكويت جذي انا تطرقت للجانب السلبي واكدت ان في جانب ايجابي.. فاللي بيقرا موضوعي وبيقول هذيله كل حريم الكويت فهذا جاهل وما ينشره عليه لان مافي مجتمع خالي من السلبيات .. واما عن نقل المواضيع فكلامج غير منطقي بنظري على افتراض موضوع عن عمليات التجميل ينقل لمنتدى ثاني ويقولون كل بنات الكويت جياكر ومسوين عمليات؟ بليييز خلج منطقية وهالمنتدى وضع وبالاخص هالقسم لمناقشة القضايا الاجتماعية والنفسية وانا اشوف هالموضوع بالمكان المناسب كونها مشكلة اجتماعية يمكن مو بالنسبه لج لكن بالنسبه لوايد غيرج..
وما فهمت شلون هالموضوع اللي على قولتج بكبره يعبر عن الحش والتسال والحسد .. هههه هدي اعصابج حبيبتي ومسموحه

 

[C'est La Vie]

ليش دايما ندور الاشياء السلبية؟
ليش ما نشوف الاشياء الايجابية
والله يا ناس ملينا من العياب بالناس
ضحكتو العالم علينا
الكويتية مثل ما اهي ملقوفة ودفاعية .. الى آخر الصفات اللي حطتها الاخت صاحبة الموضوع
هم بعد الحمدالله اهي بارة بأهلها وقايمة بواجبها لربها ووالدينها
مصلية ومسمية
والف حمدلك وشكر يا رب ما عليها قصور

 

[C'est La Vie]

مشكوره حبيبتي عالموضوع .. بس سوووري يعني شالهدف منه !!

عشان الناس تشوف سلبيات المراة الكويتيه !!

و لا عشان شنو بالضبط !!

اوكي يمكن عشان نشوف سلبياتنا و نعدلها !! كل الحريم عارفين بعضهم و كل وحده عارفه نفسها !!

ياليت ادش اي منتدى ثاني و القى احد يذم بأهل ديرته كثر ما تذمون بأهل ديرتكم !!


بدال ما نشجع حريمنا و نطورهم للأحسن و نعلمهم نطمسهم جذي مساكين !!

و بعدين المره الكويتيه فيها مجموعة سلبيات لكن إيجيابياتها تفوق 1000 مره سلبياتها !!

كافي انج تقولين انا كويتيه متعلمه مثقفه متطوره لج حرية الاختيار و الراي و غييييرها من الاشياء اللي حريم وايد محرومين منها ..

يعني بالله عليج ترضين احد ينقل موضوعج بمنتديات ثانيه و يقولون هاذيله حريم الكويت !!

و نقول ليش العالم ما يحبنا و يذمون فينا !!

و هالموضوع اهوا بكبره الصراحه يعبر عن اللي انتي ذكرتيه (( الحش و النميمه .. التسأل و اللقافه .. التحسر و مطالع الغير و الحسد )) !! و سامحيني حبيبتي يمكن ردي ما يعجبج بس انا من حبي لديرتي و عيالها ماأرضى عليهم الشينه

:ggdw::ggdw::ggdw:
على راسي

 

[C'est La Vie]

نوااره_ حياج الله .. وانا ذكرت الهدف من اذا انتي شايفه ان المراه الكويتية مافيها سلبيات وان المفروض ما نتطرق للسلبيات فهذا رايج وانتي حره فيه اما بنظري اذا هالسلبيات ما نوقشت ما عمر الناس بيحسون بعيوبهم ولا عمرهم بيتعدلون .. هههه هدي اعصابج حبيبتي ومسموحه

حبيت اعلق يا اخت كوفي:
اولا الاخت نوارة ما قالت ان الكويتية ما فيها سلبيات واتمنى تقرين ردها عدل
ثانيا ليش كل ما احد خالفكم بالراي تقولون اعصابج؟
الوحدة ليما تبين غيرتها على ديرتها وبنات ديرتها جذي يكون ردكم؟
ما اقول الا الله يسامحكم بس
حبيت اضيف صفة سلبية بعد حق اللستة اللي حاطتها صاحبة الموضوع
التسرع وعدم الاستماع
يعطيج العافية

 

[ScarletteO'Hara]

مشكوره حبيبتي عالموضوع .. بس سوووري يعني شالهدف منه !!

عشان الناس تشوف سلبيات المراة الكويتيه !!

و لا عشان شنو بالضبط !!

اوكي يمكن عشان نشوف سلبياتنا و نعدلها !! كل الحريم عارفين بعضهم و كل وحده عارفه نفسها !!

ياليت ادش اي منتدى ثاني و القى احد يذم بأهل ديرته كثر ما تذمون بأهل ديرتكم !!


بدال ما نشجع حريمنا و نطورهم للأحسن و نعلمهم نطمسهم جذي مساكين !!

و بعدين المره الكويتيه فيها مجموعة سلبيات لكن إيجيابياتها تفوق 1000 مره سلبياتها !!

كافي انج تقولين انا كويتيه متعلمه مثقفه متطوره لج حرية الاختيار و الراي و غييييرها من الاشياء اللي حريم وايد محرومين منها ..

يعني بالله عليج ترضين احد ينقل موضوعج بمنتديات ثانيه و يقولون هاذيله حريم الكويت !!

و نقول ليش العالم ما يحبنا و يذمون فينا !!

و هالموضوع اهوا بكبره الصراحه يعبر عن اللي انتي ذكرتيه (( الحش و النميمه .. التسأل و اللقافه .. التحسر و مطالع الغير و الحسد )) !! و سامحيني حبيبتي يمكن ردي ما يعجبج بس انا من حبي لديرتي و عيالها ماأرضى عليهم الشينه

والله العظيم صدقتي, انا ما صوتت و ماراح اصوت على مواضيع ممكن انها تزل اسم الكويت و الكويتيات بالارض, و انا معاج ماني عارفة شنو الفايدة من الموضوع, يعني طرحنا المشكلة, و بعدين؟؟؟ ما شفت حلول حق المشاكل المذكورة, مو معناه اني انزل من قدر الي كاتبة الموضوع الله يعطيها العافية بس انا ما احب اذم بالكويتيات و لو كانوا متروسين عيوب, والله ودنا نشوف موضوع يحدد لنا ايجابيات الكويتية, خصوصا ان في بيننا اخوات من دول ثانية, شنو يقول عنا؟؟؟

 

[coffee]

C'est La Vie انا ما ادور السلبيات انا طارحه قضيه اجتماعية ما تحتاج دواره وارد اعيد اني اكدت وجود ايجابيات .. الكلام كان للاخت نوااره مو لج وقصدي ردا على ردها بان سواء اذا اهي تشوف ان مافيها سلبيات او ان ما نتطرق للسلبيات .. وانا قلت اعصابج مو لانها مخالفتني بالراي بس لان اسلوبها مبين .. وحبيبتي ترى كلنا نحب ديرتنا .. والله يسامح الجميع.. وصاجه التسرع وعدم الاستماع صفه موجوده وواضحه خاصه في المواضيع الجادة وبالحكم على الآخرين.. والله يعافيج

عقربه لج الحرية ومحد جابرج واللي صوتو بالاستطلاع على العين والراس وحبهم لديرتتنا محد يشكك فيه.. الله يعافيج حبيبتي اي ما تبين تنزلين من قدر كاتبة الموضوع اذا مواضيعي عادتها من اللي ممكن تنزل اسم الكويت والكويتيات الارض!.. واذا انتي مو شايفه فايده للموضوع غيرج مستفيد والحلول انا ذكرتها بردودي وبانتظار اقتراحات البنات.. واذا انتي ودج تقدرين تنزلين موضوع عن الايجابيات.. شنو اللي شنو بيقولون عنا اللي من الدول الثانية؟ في كل مجتمع سلبيات ويمكن عندهم نفس هالسلبيات ويناقشونا ويمكن ما عندهم ويثرون مواضيعنا بتجاربهم وهذا هدف المنتديات واذا انتو ما تحبون تناقشون هالسلبيات غيركم يحب يعرفها ويدرسها ويعالجها.. ومو عيب ان نطرح العيوب ونعالجها

وجد مادري شكو غصب مدخلين سالفة حب الكويت اللي يفترض مواضيعه تكون بوطني الكويت بموضوع يمثل مشكله اجتماعية في قسم مختص بالقضايا الاجتماعية. ومو شرط كل موضوع يعجبكم ومحد ملزوم بموضوع ما يعجبه. والله المستعان