الأطباع السلبية في شخصية المرأة الكويتية؟! ما هي برأيك

[C'est La Vie]

رأيي صواب يحتمل الخطأ و رأي غيري خطأ يحتمل الصواب

 

[coffee]

C'est La Vie العفو ما فهمت قصدج؟

 

[C'est La Vie]

الله يعافيج

 

[coffee]

C'est La Vie الله يعافي الجميع بس مو فاهمه شنو ردودج تعني

 

[pure feminine]

صاجه حبوبه كلامج مو من الخيال هذا واقع انشووووووفه بكل مكان بالدوام بالسوق بالزوارات


صوت حق تشينة النفس لان معااد اشوف ابتسامه خاصة من البنات الشابات كل وحده رافعه راسها وعاقده النونه خيير شصاير

وهم الكسل هذاااا حيل لدرجه الوحده مالها خلق تتحرك كل شي على الخدم مسلمتهم الاكو والماكو مو ناقص الا تسبحها الخدامه بعد .

 

[coffee]

حياوية حياج الله حبيبتي وتسلمين على التصويت وصاجه الابتسامه صدقه .. سبحان الله اذا احد ابتسم بويهج تحسين براحه جنها كلام مريح انقال لج ما جنها مجرد حركة لعضلات وي الشخص اللي مقابلج.. حركة بسيطة لكن مفعولها سحري

 

[قهوة عربية]

تم التصويت

بس تظل الكويتية أحسن من غيرها ...

وصفة الكسل والاتكالية ماتنوجد بالكويتية إلا فيما ندر .....بالعكس الكويتية هبة ريح وشقردية

 

[coffee]

قهوة عربية تسلمين على التصويت وحياج الله

 

[الإسراء]

آنا بصراحة ما صوت ,,,
لأن المرأة الكويتية مو كلهم مثل مثل كل وحدة لها أطباع ,,,
عالعموم يسلمووو عالمجهود ,,

 

[Maltesers]

اكثر شي التحسر وامطالع الغير والحسد .. ما أذكر اني سافرت مكان وشفت الناس كل واحد خزني واخزك من فوق لي تحت وكل من يطالع الثاني شنو لابس وشنو مسوي وشنو حاط

والشي الثاني .. الكسل

بناتنا كسالى مو مثل بنات قبل


مشكورة حبيبتي .. بس مثل ما قالوا هالأشياء موجوده شخصية الحريم بكل الدول بس عندنا بزوووووووود

 

[اسوووره]

مشكورة حبيبتي عالموضوع بس صراحة احس هالصفات مو محكورة بس الكويتيات يعني هالاشياء تنتشر بين معظم النساء ...
وهذي وجهة نظري حبيبتي ...
وراح اصوت:ggdw:​

 

[فديت عيوني]

تم التصويت

 

[jasmine_flower]

welcome back coffe

كلامج واقعى 100% وصحيح واصوت على كل الى انذكر

مشكلتنا انه ما انحب ننقد ذاتنا ونعتبر الناقد يبى يشوه سمعه ابناء البلد مع انه النقد اهوه الى يخلينا انطور من نفسنا للافضل

وانه اشوف هالصفات واقولها بكل صراحه موجوده فى الكويتيه عن باجى الجنسيات بالذات صفه التحلطم التشره والمصفط لازم لازم ايكون يم الباب هالصفه موجوده فى الشباب بعد

 

[*بسبوسه*]

اغلب اختياراتج موجوده وصحيحه 00بس مادري من وجهة نظري الحش والنميمه حيل بزود منتشر
يعني الحين ما تامنين لاقرب قريب لج تكونين قاعده مع اقرابج ويقعدون يحشون عن فلانه وعلانه وهم متروسين عيوب جنه بس الناس اهما اللي فيهم عيوب وما يشوفون نفسهم00ومايندرى تقومين شيقولون عنج
واذا قلتي لهم حرام لا تحشون يقولون احنا ما قلنا الا الصج

 

[coffee]

بدون اسم صاجه الاختلاف موجود والله يسلمج حبيبتي

Fossila صحيح اهي امور حلها بسيط خاصه ان اللي يسوون هالسلوكيات ما يرضون انها تتسوى لهم .. ولو كل وحده تستمتع بالصحبه اللي معاها وباللحظات وما اتركز على الناس بيكون احسن لها واريح للناس.. حياج الله حبيبتي

اسوووره اكيد حبيبتي لكل مجتمع سلبياته بس انا اللي هامني مجتمعي واللي اعرف عنه اكثر من باجي المجتمعات .. تسلمين وحياج الله

فديت عيوني تسلمين وحياج الله عسوله

jasmine_flower هلا وغلا عاش من شافج وتسلمين حبيبتي في ناس ياخذهم الحماس الشبابي وينسون اهداف هالمواضيع ومثل ما ذكرت في عيب اللي اهو التشكك بنوايا الناس .. وبنظري حبنا لوطنا طبعا انتي اخبر فيني اقاتل دفاعا عن ديرتي لكن انا اشوف غلط انقول احنا الاحسن وديرتنا احسن من كل الدول وحريمنا افضل من الباجين هالشي اهو اللي يكره غيرنا فينا لان لو انولدنا مصريين بنقول مصر الاحسن ولو انولدنا امريكان بنقول امريكا الافضل ..الخ فاذا نبي الدول الثانيه تحبنا ونبي نعطي صوره افضل نبين محاسنهم اهم وحبنا لهم بدال هالطريقه وهالشي ترى بدا بعد الغزو والدليل ان الدول الصديقه واللي حاربت لتحريرنا شنو كان رد اغلبنا؟ ايي بيفلوسنا! كيفي كويتي! وغيرها من كلمات تضر الديره بدال لا تنفعها واهني بدت معادات باجي الدول لنا طبعا انا ما اتحجى على مستوى الحكومه لان العلاقات طيبة لكن على مستوى الشعب وبالاخص بالانترنت .. عموما اللي يهمني النقاش المثري واصلاح هالصورة اللي اشوفها موجودة واللي بدال لا تخلي الناس تلقى متنفسها بالسفر انها تستمتع بالديره.. ههههه صاجه هم الشباب بعضهم ماشاءالله نادي وحركه وبعضهم عيزان يمشي خطوتين

 

[ghalaty]

ليش مو حاطين باستلاع الحب المبالغ فيه للموضه صج في حب ياخواتي للموضه من غير سنع تشوفون الوحده حاطه بقشه فوق راسها والمكياج فلللللللللللللللللل وين رايحه رايحه السوق انزين ليش كل هالاصفر والخضر ما ادري زكل شي يسوونه ازمه يعني على سبيل المثال الحين وقت تجهيو العيد شوفي الزحمه الي تصير بالصالونات انزبن ليش وينكم باجي الايام حلاته النظافه مو بس للعيد بس لا يقولون لازم قبل العيد بيوم اويومين احلى احسن ولا وحده تقول لي لا روحي لمن يقولون باجر عيد يعني ليش ما ادري اصلا وقتها حتى الي يشتغلون مالهم خلق وتعبانين والصالونات تكون نظافتها مو ذاك الزود ولا في بنات يسشورون شعرهم قبل العيد قبل يومين وثلاث اعتقد بجونا لازم الواحد كل يوم يسبح ومو لازم هالسشوار بالصالون ما اعتقد بيت يخله من سشوار انا حضرت احتفالات العيد ما راس السنه بلندن ج يشترون ويتجهزون بس مومثلنا بصاطه وترتيب وسنع لحد يزعل انا ما اعمم

 

[دراهــم]

خوش موضوع وخوش ردود

انا صوت لأثنين .. وهـ الشغلة اشوفها منتشره شكثر على الاقل في البيئة اللي اعيش فيها واهم

التحسر والحسد

الحش والنميمة

مع اني اشوف ان الحش والنميمة ناتجة من الحسد

وقواج الله

 

[coffee]

بسبوسه صاجه والله الوحده تقعد وما تدري اشراح يقولون عنها لي مشت بس كلها آثام لهم والله يصلحهم.. وحياج الله عسوله

ghalaty ههههههه واي ضحكتيني صاجه في ناس يلهثون ورا الموضه حتى لو مو على سنع.. بس زحمة العيد شر لابد منه لان في ناس ما يعرفون يسوون شعورهم بروحهم او ما عندهم وقت مثل اللي عندها بنات فالله يكون بعونهم وحياج الله

دراهم تسلمين حبيبتي وصاجه في شغلات تتداخل على حسب الموقف.. حياج الله

 

[داريني]

ما صوت لانه الموضوع بكل صراحه ما عجبني وهالشي منتشر بكل دول مو بس احنا
وسامحيني بس هذا رايي واتمنى تتقبلينه
وانا ما ادعي المثاليه بس هذا رايي

 

[a l m a g r O r a]

الاتكالية والكسل وحبها الشديد للمظاهر