الاستقبال.. يوم ولا يومين..!!؟؟

[Lulu_Perla]

السلام عليكم و رحمة الله و بركاته

شلووووونكم حوامل..؟؟؟ عساكم بخير..؟؟

الله يهون علينا الثقل ما بقى شي عالولادة :eh_s(2):
و بعضنا ليلحين يحووووووووووووووس بالاستقبال و التجهيز
ربي يعينا كلنا..


حبيباتي.. اللي سووا استقبال من قبل.. او اللي بخارهم يسوون
ابي رايكم..
جم يوم استقبال بتسوون..؟؟
يوم واحد يكفي...؟؟؟؟ ولا يومين احسن..؟؟؟؟

انا ريلي ولد عمي يعني حمرلتي هم اهلي..
و اخاف اسوي يومين محد اييني ثاني يوم اكون خابة روحي عالفاضي.. خاصة اني بجر و اخاف اتعب ><
و اخاف اسوي يوم واحد يصير في ظروف و مايوني وايد.. يعني من الاهل البعاد و رفيجاتي..
فحدي محتاااااااااارة
انتوا شرايكم..؟؟؟ يوم يكفي ولا يومين..؟؟؟؟


شاركوني حدي متوهقة ابي شوركم :eh_s(7):

 

[بربيره]

اذا بالمستشفا يومين

اذا بالبيت يوم انتي بتسوينه بالبيت ؟

 

[Lulu_Perla]

لا حبيبتي انا بسويه بالمستشفى..
بجناح دسمان - مستشفى السلام ان شالله

 

[Om_Ksha]

^
^
انا العام نفسج ولو مسويته يووم احسن

بس شنووو يومين هم يوو ناس ,,

 

[noo7a]

انا سويته يومين


اذا تبين تسوينه يوم واحد عطي الناس خبرها قبلها بيومين عشان يحسبون حسابهم
لان ان قلتي لهم بنفس اليوم او قبلها بيوم واحد بس يمكن يكونون مرتبطين و مايقدرون ايون

 

[noo7a]

انا سويته يومين


اذا تبين تسوينه يوم واحد عطي الناس خبرها قبلها بيومين عشان يحسبون حسابهم
لان ان قلتي لهم بنفس اليوم او قبلها بيوم واحد بس يمكن يكونون مرتبطين و مايقدرون ايون

 

[زهره الجلنار]

يومين احسن والله يسهل عليج ولادتج يارب

 

[قمورة الكويت]

هلاا ببنت تجمعي ..

بريق حبيبتي على حسب عايلتكم يعني احنا عايلتنا متعودين يوم واحد بس والكل يجي يعني انا حتى لو عندي شغل وصادف عندي استقبال اكنسل كل شي واروح الاستقبال وكل عايلتنا جذي ..

انتي شوفي منو سوا عندكم استقبال يوم واحد وشكثر كان الحضور اذا واااجد اللي جو خليها يوم واحد افضل لج واذا كانوا شويه اللي جو خليها يومين

والله يسهل عليج يارب

 

[نـعـومـه]

اول كان كله يومين

الحين ملاحظه يسون يوم بس

انا شخصيا بسوي يوم واحد وخلاص اريح

 

[Dalal.al3tibi]

يوم دام اهلكم واحد

 

[~LiBrA~]

والله انا ودي بيوم واحد

بس خالتي تبي يومين!!

الصراحه مخاسير عالفاضي يعني كافي بندفع زياده على قعده يومين بالغرفه

ولازم حلو وفطاير

وكافي القعده الي بنقعدها صراحه تعب


بس احاتي لان بيصير اعطيهم خبر قبل يوم بس مادري اذا بيون ولا لا

بس مالي شغل الي بيي بهاليوم حياه الله والي مايقدر خلاص

 

[فلافل وبطاط]

الله يهون الطلق ويسهل الولاده ويقومنا بالسلامه

الاغلب الحين يوم واحد ...

 

[بربيره]

لا دام بجناح دسمان سويه بيوم بدون تردد

لان راح تجهدين نفسج عالاستقبال ولازم يكون راقي و تعبت و مصاريف بصراحه

سويه يوم ما يسوا يومين

 

[بخـــارى]

يوم واحد بس سوي الصبح والعصر الي ماتقدر الفتره الاولى اتيي الفتره الثانيه

 

[Lulu_Perla]

الله يسهل ولادتنا كلنا قولوا امين..
مشكورين اللي صوتوا

هو من ناحية اوفرلي يوم وااايد اوفر.. كافي دسمان ليلتها بـ 900
بس ابي الناس تيي.. مو اقط 900 على يوم و محد ايي و تعالي سوي بالبيت.. هذا اللي مأزمني ><

ناطرة راي البقية
لحد الحين الاغلب يقولون يوم واحد..

 

[بخـــارى]

عليج بالعافيه بريق
بس ماتقدرين تلزمين الناس والله اعلم بظروفهم
عالعموم اذا كتبتي دسمان التاس بتيي وانتي اول ماتولدين بلغيهم علشان يتجهزون واستقبال الولاده كلها نص ساعه اذا ذبحوا عمرهم وخذوا من وقتهم

 

[worood82]

انه عندي الفضل يومين لان الولاده تصير فجأه اذا ما قدرو الناس تيي اليوم الاول تقدر تيي اليوم الثاني

 

[tmtmt]

يوووومين ...

انا صارت ظروفي ان سويته يوم واحد
لني طلقت ١٩ ساعه وراح علي يوم

الصراحه تعبببببت بهاليوم الكل حاول ايي
لي الساعه ١٠ واهما ايون الي احس خلاصدي اقولهم طلعوا من كثر ما انا تعبانه

وهم ما كفى هاليوم
الناس لها ظروفها في وايد ماقدروا ويو بالبيت بعدين

( انا نفسج ريلي ولد عمي )

الله يسهل عليج يارب

 

[انجبر قلبي]

حلوة فكرة يوم واحد صراحة أوفر

 

[Lulu_Perla]

تقنعتوني و رديتوا حيرتوني لووووووووووووول


بخاري
اكيد مالزم الناس.. بس لاني خابة روحي ابي الاغلب ايون.. مو مايوني و يقولون بيون البيت و ردي حوسي مرة ثانية


تمتم..
انا خايفة من الولادة اخاف وقتها يوهقني ><