البدون....

[بدون وافتخر]

انا احب الكويت...

بس مايمنع اتكلم عن اللي عانيناه بسببها..واحنا نبي نتحاور مو منهاوش...اوكي


شرايكم باللي عاش بالكويت 32 سنه...خدمها...وايام غزو الكويت...تأسر سنه ونص..

عشانه دافع عنها..واخر شي...انحرم من ابسط حقوقه...

العلاج بفلوس

المدارس بفلوس

جواز مافي...

ورحل لديره ثانيه..عشان يلاقي استقرار...بس للاسف مالقى استقرار...

عياله ماتزوجو لان اللي ماعندهم اثبات مايقدرون يتزوجون...

وحده من بناته جابت نسبه 98 علمي...وقدمت اوراقها للجامعه بس قالولها

ماعندج اثبات مستحيل تدخلين الجامعه...وضايف مافي يعني عايشين عالاعمال

الحره البسيطه...والمشكله اننا اصل وفصل يعني قبليه..وكل قرايبنا كويتين جناسي اولى

بس مشكلتنا لصق فينا لقب بدون....بالله عليكم هذا عدل..؟؟؟ الواحد يضحي

بنفسه ويتأسر واخرتها يعاملونه معاملة قاسيه..؟؟

انا ابعرف رأيكم اللي مثل هالحاله يستحق الجنسيه

اولا؟؟؟ وتعتقدون ان الكويت اللي انولدت وعشت فيها واحمل لها كل الحب

ضلمتنا ولالا؟؟؟؟

يلا قولولي؟؟؟

 

[fajer-85]

السلام عليكم

حياج الله اختي بينا وهاذه بيتج ومكانج

بنسبه حق موضوعج

جوفي اختي انا بنسبه لي في فئه من البدون فعلا مظلومين من قلب وحس قلبي ايعورني عليهم وفي فئه ثانيه من البدون اهيه الي مخربه على الي قلبي يعورني عليهم عندهم جناسي بس خاشينها مع الاسف

بس ودي اقولج شي بس لاتزعلين خل انكون شوي واقعيين اكثر لكويت قبل الغزو ماقصرت ويا الكل موبس مدت ايد العون للناس لا بالعكس الا فتحت بيبانها الكل والكل يدخل ويغرف من خيرها بس اتعرفين الي صار بالغزو خرب على الناس كلها خصوصا لعراقيين والفلسطينيين والاردنيين الي عاشوا بالكويت اهمه الي دلوا الجيش لعراقي على الاماكن الحساسه بالدوله ودلوهم على لكويتيين يعني مافي ادخل بتفاصيل الغزو بس هاذه الي صار

فشنو تتوقعين يصير اكيد انا اختي عزتني اكيد المرا الثانيه بتصدالها وبوقف ابويها صح ولا غلط وبنفس الوقت مابي ارجع اعيد الكره

اختي بقولج شي بس هاذه الصج الي صار انا ابوي يشتغل ابمدرسه المهم هالحجي بعد الغزو كانت عنده مراقبه على طلبه متوسط والله ان اغلبهم كانوا بدون اتعرفين ابوي شنو قالهم والله ماجذب عليج قالهم يا تييبون جناسيكم ولا مافي امتحان تدرين جم طالب والله ماجذب عليج طلعوا 3000 طالب بالمدرسه كلها وبكيفان عندهم جناسي من دوله خليجيه مانبي نذكر اسمها

يعني عندج هذيله يخربون على المساكين

بس قوليلي انتي اصلج وين بضبط ؟؟؟

 

[هب هب]

البدوون عوار قلب والله يعينهم حتى قضيتهم اكبر من انهاا تنكتب في كم سطر :0bee2e8d89:

في ناس صج صج تستحق الجناسي وحراام الي صاير لهم لا جواز لا دراسه لا وظيفه ؟ شنو ذنبهمم ينحرموون وشنو ذنب الاجيال الي بعدهم

كلهم نفس الحاله // والله اتذكر حالة الولد الي عمره 18 سنه انتحر بغرفته يوم عرف انه ما تجنس وكان حاط امله بالتجنيس..

انا مستغربه ليش قضية البدون موجوده عندنا بالكويت بس ..!! :gr4uu:

ايييه الله يعيين الجميع ويعينج اختي وعسى الله يحفظ ديرتنا من كل شر .. تحياتي لج :eh_s(17):

 

[pretty sarona]

الكويت ديرتج وانتو اهلها ,, بس انتو قبل ال32 وين كنتوا ؟ وأهلج اللي جناسيهم اولى من وين يابوها؟

 

[زيـنـه]

صج وين كنتوا قبل 32 سنه ؟؟
وليش قبيلتكم ما يشهدون لكم ان انتوا منهم ؟ و قرايبكم اللي جناسيهم اولى ليش ما يطالبون لكم ؟؟
وليش ما قدمتوا تحت بند الاعمال الجليله ؟

اسئله يبي لها اجوبه !

 

[قلبين وسهم]

اول شي انتي منا وفينا وكل من يعيش بهالديره اكيد له فضل عليها مثل ما للكويت فضل عالعااالم كله ..


بحكم اني بالدوام راح ارد على سؤالج بأختصااار ..

الواحد يضحي

بنفسه ويتأسر واخرتها يعاملونه معاملة قاسيه..؟؟

بهالحاله انا مع وبشده ان الكويت تقووم في كل من شارك بحرب تحرير الكويت والبدوون اللي بالجيش اهما اولى بأخذ الجنسيه الكويتيه وبكل فخر ولازمهم رعايه تامه.. لان اللي ولاائه للكويت بعد الله سبحانه هذيل اهم اللي يحافضون عالديره ..

انا ابعرف رأيكم اللي مثل هالحاله يستحق الجنسيه

اولا؟؟؟

اكيد كل اللي ولائهم للكويـــت ويحافظون عليها وبشرط تكوون اصوولهم معرووفه مو يجيني هندي وياخذ الجنسيه ..

وتعتقدون ان الكويت اللي انولدت وعشت فيها واحمل لها كل الحب

ضلمتنا ولالا؟؟؟؟

الكويــــت لاتلوومينها لان اللي شافته من الغدر والكره والحسد يحدها انها تكوون حازمه في بعض الاموور
لــكن للاسف موضوع البدوون تموو يماطلوون فيه لييييما صااار فيها نووع من الظلم وهالشئ رب العالمين مايرضااااااااه

واتمنى من كل قلبي تنحل هالقضيه حل جذري وعسى ربي يأمنا بأوطانا ويحفظنا من كل مكرووووه
اللهم آمــين​

 

[ScarletteO'Hara]

الكويت مو ظالمة
:0bee2e8d89:
المصيبة ان الفئة الي عليها قيود امنية اهي الي عمت على العموم
وااايد عندهم جوازات و جناسي ثانية؟ ليش ما يطلعونهم؟
مالهم حق بالجنسية ليش يطالبون فيها و يخربون على غيرهم؟؟
و صح, من 32 سنه وين كانوا اهلج؟؟
يعني نهاية السبعينات
اهلكم الي عندهم جناسي, ليش ما تتجنسون عليهم؟؟
على حسب الي اعرفه انه يصير تتجنسون عليهم
و الله يكون بعونكم

 

[Pettita]

الكويــــت لاتلوومينها لان اللي شافته من الغدر والكره والحسد يحدها انها تكوون حازمه في بعض الاموور
لــكن للاسف موضوع البدوون تموو يماطلوون فيه لييييما صااار فيها نووع من الظلم وهالشئ رب العالمين مايرضااااااااه

واتمنى من كل قلبي تنحل هالقضيه حل جذري وعسى ربي يأمنا بأوطانا ويحفظنا من كل مكرووووه
اللهم آمــين[/size][/center][/font]
[/color][/b][/QUOTE]

معاج 100% و الله يعينكم

 

[Athwaq]

حبيبتي الكويت ماتظلم احد .. ماسكين علينا ظلم و ظلم .. الكويت لو بتظلمكم جان رحّلتكم من الكويت وقالت مانبي احد بدون اثبات .. مو مخليتكم و ساكته عليكم جذي .. جان حطوكم في باصات و طلعوكم بره الديره نفس الديار الثانية مايسوون


اذا عندكم احصاء 65 و اهلكم اللي جناسيهم اولى يشهدون لكم .. راح تاخذون الجنسية


و بعدين شوفوا قبل الـ 30 سنه وين كنتوا عشان انتي تفهمين الوضع وتعرفين ليش ماتجنستوا

مو كل واحد قاوم والا صمد ياخذ جنسية .. مو مقياس هذا

وبعدين انا استغرب من اللي مو عاجبه الوضع بمكان ويقعد فيه ؟

و مو بس البدون .. حتى بعض المقيمين .. يتحلطمون و معجعجين بالديره

اللي موعاجبه الوضع يروح ديره ثانيه تعجبه .. و خل يشوف فرق العيشه .. ضرايب و بلاوي و عماة عين

مو هني .. حتى لما زادوا معاشات الكويتيين حاشت المقيمين زيادة .. اكو ديرة تسوي هالشي ؟؟

و فوق هذا كله تف و سف بالكويت

اللي موعاجبه الوضع .. الكويت ماترد احد .. يروح يدور العدل والمساواة بمكان ثاني

 

[fajer-85]

بس لختي احب انوه على شغله البنات نبهوني فيها

32 سنه ترا مو وايد يعني معناته لكم اصل وفصل وبعدين فيناس قاعده صارلها اكثر من 50 سنه اعتقد هذيله اولى

 

[رانزي]

32 سنه ويايه تقولين الكويت ظالمه !! قبل هالفتره وين اهلج كانوا؟؟؟؟؟ انتي انولدتي بالكويت على عينا وراسنا بس اهلج وين كانوووو؟ واهلج الي عندهم جناسي اولى يشهدون لكم وتاخذون الجنسيه بسهوله لو كلامج صيح وترا مو بس الكويت فيها بدون
انتي تقولين 32 سنه غيرج قال احنا خمسه وتلاتين سنه خدمه في الكوييت لييييه مايوووودني قنسيه ؟؟انا زي زي الكويتي طب لييييييه مايوودني !! وهالمصري خاش جنسيته ويقول انا بدون ومقدم عالجنسيه انا اعرفه وياي بالدوام من سنتين

 

[MissChoco]

اوكي اختي اهوا صح عشتو جم سنه حتى لو ان شاء الله 100 سنه

على اي اساس تاخذون جنسيه!!!

الحين الكويتي الاصيل يساوونه بالي من جم سنه يا الكويت!!!


مستحيل حبيبتي .. انا مارضاها لو شنو والله ,, مايصير هالشي


عيل اذا انتي بتاخذينها اوكي والمصري الي قاعد بالكويت من الستينات هذا شنو مايستحقها!!!!!!


الشغله مو يلا انا قعدت ودافعت وسويت .. اوكي على عينه وراسنا .. بس جنسيه لا والله لو شنو تاخذون

اشولن ننسب انفسكم حق الكويت وانتو اساسا مو منها!!


حبيبتي ماكو احد طلع جذي كل واحد له اصل وفصل وموطن .. وين جناسيكم ليش قطيتوها وعساس تبون الكويتيه!!

واغلبهم من دول فوق قطو جناسيهم ويبون الكويتيه .. مايصير !!


وشي مايدش العقل اشلون اهلكم جنسيه اولى وانتو لا؟؟ اشلون اهما خذوها وانتو لا .. لا اتقولين شي صار وخلاص

لانه اكثر الي عندهم ياخذون جناسي ينسوبون اعيال خواتهم ولا عيال عمهم على انهم عيالهم عشان ياخذون جنسيه!! ويضيع النسل استغفرالله
وشفت حالات جذي ومحد ينكر

 

[MissChoco]

وانا اعرف وايد ناس عراقين مقدمين على الجنسيه تكفين على شنو ؟!!!!!!!!!!


واشكره عندهم جنسيه عراقيه بس خاشينها و واثقه من كلامي مليون بالاميه ..


يعني لا اتلومين الكويت اوكي

 

[بدون وافتخر]

قبل 32 كانوا اهالينا عايشين بهجر بالبر...وشدعوه عاد مارحلنا من الكويت...حبيباتي انا من السعوديه...بعد الضيقه اللي شفناها اضطرينا نسافر للسعوديه

وحاليا صارت تطورات وقالو يشوفون حل للي اعمالهم جليله والقرايب بيشهدون لنا لو استدعوا ابوي للكويت.....بس

خوفج بعد يماطلون..

 

[manoola]

الله يعينكم بس هذا مومعناته ان الكويت ظلمتكم يعني كل واحد عاش بهالديرة سنين لازم ياخذ جنسيتها والا تعتبر دوله ظالمه !

وايد ناس قعدت بدول ماخذو جنسياتهم ولا حنو عليها عايشين مستورين والحمدلله وانا متاكده لو الجنسيه مافيها المميزات اللي فيها ماكان احد حن عليها وقال ان نستحقها .... وبعدين الصراحه في بدون يستاهلون لان اهلهم معروفين تلاقين كل اهلهم كويتيين بس هما اهملو هالاوراق ايام قبل على قولتهم يقولون مو الاوراق اللي تخليني كويتي ولما دارت الايام كلوها المساكين بس ان كل بدون يستحق الجنسيه اسمحي لا
.... ومادري على اي اساس عطو الممثلين والفنانين جناسي بالله من متى صارت هذي اعمال جليله !

اذا كنتوا تستحقونها لاتخافين الله مايظلم عبيده وراح تاخذون حقكم

 

[بدون وافتخر]

انا اقول بناخذها على اساس ان ابوي تأسر وله اعمال جليله...شنو ماتفهمون..ولا كلمة الحق ماتطلع

 

[manoola]

@@

شنو ماتفهمون !

وليش كلمة الحق ماتطلع ليش خايفين من منو !!!!!

ودامج بدون وتفتخرين عيل لاتطالبين بالجنسيه
واختاري الاسلوب اللي تتكلمين فيه رجاءا

 

[Athwaq]

هذا وانتي تفتخرين انج بدون و ميته عالجنسية .. انزين بتاخذونها .. شنو المطلوب الحين .. شنو مغزى الموضوع ؟


ليش مانفهم شنو شايفتنا ؟؟

 

[شاربة بيبسي ومدلعة نفسي]

***************************** والله ابصراااحه حيل كاسرين خاطري البدون بس* في ناااس تخرب على ناااس يعني مثلا توهم يايين الديره ويبووون الجنسيه وفي نااااس 60 سنه بالكويت وماعندهم الجنسيه يعني من المستحق الجنسيه ؟؟؟؟

اللـه يعـــينهم انشالله ؟؟؟

 

[بدون وافتخر]

اسلوبي مافيه شي بس استغرب التهجم..هو للحين فيه عنصريه؟؟؟ع اساس انقطعت والناس تطورت واوباما
اسود البشره صار رئيس للولايات المتحده الامريكيه,,,


انتي اقري الموضوع عدل بعدين ناقشي...احنا حاله استثنائيه يعني اللي سوى اعمال جليله ماله قدر عند الحكومه

اللي تأسر وقام يغمس خبز بماي...بحكم انه دافع لكويت مايستحق الجنسيه؟؟؟؟