الحمولة وما أدراك مالحمولة

[تبولة حامضة]

صباح الورد ...
مثل ما مبين من العنوان .. عندي أزمة نفسية سببها الحمولة ... مب قادرة أتجاوزها ولا قادرة أنساها .. قلت أطرحها هني يمكن كلمة منكم مني مناك تساعدني اتجاوزها ...
المشكلة ومافيها :
تزوجت في بيت عايلة ... زوجي محبوب بينهم .. مب الكبير ... بس اهو القايم بكل شي لأمه .. بيت اهل زوجي صعبين شوي .. دايم ينقدون .. ودايم يتكلمون على الناس .. وحارين محد يقدر عليهم لو عصبوا .. وآنه كنت صغيرة عمري 17 توني على الدنيا .. قلت اكسبهم دامهم ما يعجبهم العجب وفعلا قدرت اكسبهم .. بس على حساب شنو ؟ على حساب وقتي وجهدي وحياتي ودراستي .. صرت شغالة بما تعنيه الكلمة .. اطبخ .. أنظف .. اشتغل لهذي وذيك .. وربي جمعاتهم الاسبوعية واليومية قايمة فيها .. أطبخ وانظف وهم قاعدين ... واستحمل كلامهم لو غلطوا .. كنت اخاف منهم واااايد ... وأسوي اي شي يبونه .. فكان كل شي على راسي ... ومن يبون اي شي ينادوني .. طباخ .. توصيل .. روحة سوق ... اختيار ثياب ومكياج بحكم يثقون في ذوقي.. اي شي وكل شي حتى الحفاف والحلاوة اسوي لهم تخيلو ... ما أنكر انهم يحبوني بس مستغليني من الزين وما يمنع يسمعوني كلام يغث بين فترة وثانية ..
شلي صار بعدين ؟
زوجي كان يتاجر بالعقارات .. وكان بخير والكل متنعم بخيره يصرف على امه .. وخواته يمد لهم ..
اللي صار انه خسر خسارة كبيرة ... من بعد هالخسارة .. محد وقف ويانا الا القليل القليل القليل ... الناس اللي كنت اتعب واكرف علشانهم ... ونصرف عليهم .. ونضيع اوقاتنا عليهم .. الكل تباعد ... الكل عايش حياته ولا أحد يرفع السماعة حتى يسأل عننا ... القهر انهم خواته واخوانه ... وفي عز أزمتنا كان يوم جمعتهم يشتري الخضرة والاغراض وانزل اطبخ واكرف واركب اقعد وياه لأن نفسيته تعبانة كلش والشرطة دوم تبيه ... والديانة مأذينه .. وفوق هذا يجون ياكلون من خيره ومن تعبي ... ولا أحد منهم يفكر حتى يسأل عنه أو يفتقده او يركب له ويطيب خاطره بكلمتين ... بصريح العبارة الكل تخلى عنه .. الكل نساه ... تعرضنا لظروف الله أعلم بها وعشناها لحالنا ...
اضطريت اطلع واشتغل بس علشان لا نمد يدنا لأحد رغم ان اهلي مو مخلين علينا قاصر ..
اللي صار ان الدنيا فعلا حكتنا وخلتنا نشوف الناس بدون الاقنعة اللي كانت عليهم وبان اللي فيه الخير من اللي مافيه خير وياكثرهم ... والحين .. مب طايقتهم .. مب هاضمتهم .. ما اطيق حتى سيرتهم تجي .. جايتني ردة فعل قوية عليهم .. للعلم انتقلنا لبيت على قد حالنا .. ولازال زوجي اهو الوحيد اللي يعزمهم ويجمعهم من فترة لثانية ... بس بعد مو طايقتهم .. احس اللي بينا انكسر .. واحس تسع سنين ضاعت من عمري في خدمتهم استغلوني عدل .. ماتم شي ما سويته لهم .. اقعد ابجي والوم نفسي على ضعفي ذيك الفترة وشلون صرت طحين جميع الاستعمالات لهم :eh_s(14): ...
المشكلة الحين في نفسيتي اللي مب راضية تنسى اللي صار .. عقلي يقول خلاص سو يتي خير قطيه بحر وانسي وواصلي حياتج .. بس قلبي لا .. دوم يتحسر ويبجي على سنين التعب والظروف اللي مرينا ولازلنا نمر فيها ... ومتأثرة وايد من جفا الناس ونكرانهم ...
هذا اللي عندي وقلته .. انتو شتقولون ؟

 

[قارورة عطر]

الله يعوضك ويعوض رجلك ويرزقكم من فضله وخيرة ياحبيبتي انتي عملتي خير لاتتحسفين عليه صدقيني مالك الا الدعاء وانسي وعيشي حياتك لان مااحد داري عنك انتي بس تغثين روحج وزوجك وماحد داري عنك

 

[الغنج والدلع]

خلاص تجربه وتعلمتي منها ولولا التجارب القاسيه ماراح نتعلم

 

[الأميرة جوري]

انسي واللي سويته ان شاء لاالله تاجرين عليه...والله يكون بعون زوجججج

 

[أم الفناتك]

حلو الواحد يشوف اهله اللي ماقصر عليهم بشي يكونون اول ناس يوقفون معاه بشدته
ويمكن اهم يشوفون اللي سويتوه مفروض عليكم موطيب منكم وخصوصا اهم مايعجبهم العجب انتي سويتي اللي سويتييه علشانهم وشفتي النتيجه لو كان عملج لله ونيتج الاجر احسن لج بالدنيا والاخره وهذا درس لج وتعلمي منه والحمدلله الله سخرلج اهلج وان شاءالله ماتحتاجين لأهل زوجج بشي

 

[ام كوثر2007]

عمرج لا تندمين علي شي زين سويتيه


ولا عمرج تنطرين كلمه شكر من ابن ادم


دايم سوي وخليه حق ميزان اعمالج بالاخره

لانه يمكن بالنسبه للناس هذا امر وغصبن عليج تسوينه ولا يقدرون وقفتج هذى اللى منتي ملزومه فيها

لكن عند ربج مافي شي يضيع


ليش تهتمين للناس وتفكرين انهم استغلوج

ليش ما تقولين انج سويتي بأصلج واجرج علي ربج ؟


الحين دام انكشفت حقيقتهم خلاص خلي اللى بالقلب بالقلب الزم ما عليج ريلج ووقفتج معاه


والناس الباجي طز فيهم لا يهمج احد غير بيتج وظروفكم اللى تمرون فيها

وعسى الله يعديها علي خير يارب

 

[مذهــلــه]

احتسبوا الاجر عند رب العالمين والا البشر عمرها مايبين بعينها الطيب
انتي سويتي باصلج وان شالله ربج مايضيعكم لا انتي ولا ريلج
الحموله طول عمرهم جذي مايتغيرون ياخذون ومايعطون لاتتوقعين منهم خير
مثل ماعودتيهم عليج حاولي تسحبي منهم شوي شوي وطنشيهم وجبيهم وعامليهم بذوق كاي ضيف يدخل بيتج مو اكثر
وعوضج عند رب العالمين

 

[Salamat]

القضة القديمه قدم التاريخ + الله بوفقج ويشتر على كل البنات حبيبتي

 

[قلبـــهـ]

ان يكون الواحد منا انسان فيه الخير وطيب ومو مقصر عاللي حوله ، فهذا باختياره !
انتي كنتي زينه معاهم وهذي شغله المفروض تذكرينها وانتي مستانسه وتستمرين عليها باللي يرضيج

قولي الحمدلله غيرج ابتلى بنفس شينة ، وانتي مرا فيج الخير وسند لريلج وعاده اهله اهلج ،
ما شاء الله عليج ، وربي يهني زوجج فيج ويفك كربتكم ، خلج مثل ما انتي والله يثبتج ع كل خلق يحبه سبحانه ..


وهذي لج :eh_s(17):

 

[جوري الكويت]

انتي سويتي ب اصلج و انسي اللي فات لان اكيد ريلج مقدر اللي سويتيه معاهم

دام ان ريلج الحمدالله زين معاج و اكيد اهو شايف و مقدر بس ما يقدر يتكلم و يقول شي عنهم

بس اكيد بينه و بين نفسه مو عاجبه تخليهم عنه في هذي الظروف


اعرف وحده ريلها ما يجيب عيال و هم كان مو زين معها .. كان مخليها ممرضه حق ابوه المريض و خدامه حق امه

صبرت عليه لمن صار عمرها 40 سنه و بعدها طلقها

لأنه ابوه المريض توفى و ضامن ان ما فيه أحد بيتزوجها لان عمرها تعدى الاربعين

يعني هذي اللي صج المفروض تتحسف على شبابها و خدمتها لأهله و اخر شي لا ريل و لا عيال

 

[منو انت]

شي يقهر بس وضعج انتي احسن من زوجج اقل شي انتي بالنسبه لهم غريبه وبنت الناس


الله يعين زوجج اللي صدمته قويه هذول اهله مفروض يكونون له عزوه وسند بصراحه الله يعين قلبه صج قهررر

 

[روح مووود]

الله بعينج حبيبتى ويعوضج

 

[بدورة القمورة]

خلاااص انسي


الله يعوضكم يارب

 

[فطيم الامارات]

اجر ان شاء الله


كل شي ب آجره

ومايضيع لج شي عند اللله

ان شاء الله هال9 سنين حسنات ومغفرة وثوووووواب يارب

وطريقج للجنة بفعل الخير

الحين انسي كل شي وسوي دليت وامسحي كل شي ف بالج انسي الماضي عيشي اللحظة وادعي اللله

والله بيفتحها عليكم

هاي ابتلاء ف المال

((وَلَنَبْلُوَنَّكُمْ بِشَيْ‏ءٍ مِنَ الْخَوْفِ وَالْجُوعِ وَنَقْصٍ مِنَ الأَْمْوالِ وَالأَْنْفُسِ وَالثَّمَراتِ وَبَشِّرِ الصَّابِرِينَ))


الله يجزاج خير يارب

 

[فطيم الامارات]

وتعوذي من الشيطان

قولي " اعوذ بالله من الشيطان الرجيم "

لان الشيطان يوسوس لج ويخليج حزينه ويبي حسناتج تروح

ويخليج تنقهرين وتككرهين وتحقدين ويخلي تفكيرج كله ان شي مب زين اللي سويتيه


وانا اقوووولج بيض اللله ويهج وماقصرتي صج انج مرة سنعه

انتي انسانة مسلمة قلبج ابيض .. لاتخلين الشيطان يخلي فعل الخير اللي سويتيه من 9 سنين يروح اجره ف معاملة سيئة او مقاطعة اهل


انتي سوي اللي يرضي اللله ويرضى زوجج

 

[حجيه هيونه]

ربج يرزق كل واحد على نيته

انتي ماقصرتي وعطيتي وعطيتي وربج راح يجازيج تاكدي اذا مو اليوم باجر

لاتندمين ولا تتحسفين الى سويتيه من طيب اخلاقج

ورد فعلهم من سوء اخلاقهم وربج هم راح يجازيهم

اصبري واحتسبي والله يعوضكم خير يارب

 

[am faisal]

حبيبتى فى الشدة فوائد مع قسوتها الشدة عرفتنى بمعدن كل من حولى وللاسف هم اول المتخاذلين كرهتهم وكرهت حتى النظر فى وجوههم ولعنت نفسى الف مرة على كل قرش انفقتة وكل ساعة ضيعتها بخدمتهم ابنى بالعناية المركزة واللى يتعذر واللى يقول قدمولة على الصحة والمسالة مخ واعصاب ومانقدر ننطر
حكاية تتكرر لكل مغفلة تصدق خرافة الحمولة وما ادراك ما الحمولة

 

[كلنا عشاق لكن]

ماهي صدمة دام أطباعهم من قبلها جذي
لأن كل شخص معدنة نفسة قبل وبعد
وإنتي شفتي منهم آلاف المواقف وعارفتهم ناس تعودوا ياخذون مايعطون
وإنتوا العكـ س والنعم فيكم والله يبقى الفاقد اللي تعود ياخذ
والحين اللي راح عدية صدقة عن الجاي كله ولاتقهرين نفسج لأنج ماغلطتي من الأساس وهذا الأهم
والعقار خسارتة امعوضة وحتى على النت ماشية خدماتة من وسطا وتصوير عقار وو
والأرباح يومية وممكن من بيعة أو شروة اتعوض هالخسارة بيوم واحد من فترة وسيط ربح 7 ملايين ر من أرض أبعد ماتكون عن الكهربا والمناطق بس رزقة والله جابة له
ويارب يوفقكم وإمعوضين خير إن شالله​

 

[خشف العذارى]

لولا المواقف الصعبه جان ما عرفنا الردي
الله يعوضكم خير ان شاء الله

 

[اميره1980]

لا تعطي كثيرا حتى لا تندم كثيرا

انتي سويتي خير و تعلمتي منه منو اللي يستاهل و منو اللي لا
خليصيرلج درس و اللي ما ثمر فيه الخير قطيه بحر و عطيه ظهرج و لا تستمرين بالخير تجاهه اذا كان ناكر جميل