بنات .... خلونا منطقيين شوي ....
ماراح يقرون القانون ....
انا ودي يقرونه .... بس بشروط طبعا ... ( الوحدة تكون متزوجة - عندها عيال مو بالمدرسة - وغيره من الشروط الثانية )
بس بالمنطق ....
300 دينار .... حلوة ...
بس جذي البنات ماراح يكملون دراستهم ....
راح يكون الزواج عبارة عن وظيفة .... كل وحدة تبي تتزوج و يصير عندها معاش وهي قاعدة بالبيت ...
ناس وايد راح تلعب عالقانون .... تتوظف و تقول انها مو موظفة ( مثل اللي ياخذ بدل اجار من الشركة اللي يشتغل فيها وياخذ من الحكومة بعد ! )
التجار راح يرفعون الاسعار ....
الاجارات راح تصير اغلى
البنات اللي مقدمين عالديوان وما توظفوا ياخذون بدل بطالة .... قيمته اقل من البنت اللي قاعدة بالبيت و ماتبي تتوظف
وهذا فيه نوع من الظلم ! لان ممكن الاثنين عندهم نفس الظروف ... متزوجات و عندهم عيال
والامهات اللي ماخذين اجازة امومة و ينخصم نص راتبهم لمدة 4 شهور ( بفرض ان الراتب 500 دينار .. راح يكون معاشها 250 دينار )
يعني اقل من اللي قاعدة بالبيت !
اللي تبي تقعد بالبيت ويمشي لها معاش ... تقدر تتعلم عالبورصة و تضارب عن طريق النت ....
واقل مبلغ ممكن الوحدة تدخل فيه البورصة هو 500 دينار عن طريق بيت التمويل ....
( تدخل دورة او منتديات وتتعلم .... و شوي شوي ممكن يزيد المبلغ )
او تبتدي تجارة صغيرة .... مشغل - محل حلويات - اشغال يدوية ... الخ
انا اخذت اجازة سنة من غير مرتب علشان اجابل بنتي وكنت اتمنى يقرون القانون ... بس المنطق يقول انهم ماراح يقرونه !
وخلونا صريحين .... لو تسوون تصويت ( استطلاع ) بالمنتدى ... راح تلقون عدد موقليل من البنات ما يأيدون القانون
يعني مو بس النائبات ....
والنائبات عندهم شهادات ( يعني ما يتكلمون من غير دراسة ومنطق ) .... ورولا دشتي تخصصها اقتصاد ....
واللي يحط في باله اقتصاد الدولة ... لايمكن يعطي انسان ما يشتغل معاش شهري !
واللي يقول علشان تربي الاجيال .... !!
خلونا صريحين زيادة ....
روحوا اي فرع او جمعية .... من الساعة 5 المغرب الى الساعة 10 بالليل وشوفوا اليهال اللي قاعدين هناك و يكسرون بطول البيبسي و يأذون الناس
مافي ام تشتغل بـ هالوقت ( الا ما ندر طبعا )
ومع هذا اليهال بالشوارع ...
فـ سواء الام قاعدة بالبيت او لا ....
اللي مايبي يجابل عياله ... ماراح يجابلهم
انا استغنيت عن معاشي علشان بنتي ... و مثلي وااااااااااايد ....
واعرف وحدة ... حتى اجازة امومة ماتبي تاخذ ... علشان ما ينقص من معاشها .... لان عليها قسط سيارة بالسعر الفلاني
ماكان لازم تاخذ سيارة قسطها مرتفع ....
وغيرها اللي ماخذين قروض علشان سفر والا اثاث والا اشياء مو من الاولويات ....
بس انهم يتنازلون عن رواتبهم علشان يربون عيالهم او يجابلونهم ... ما يقدرون !!!!
الحين اغلب الامهات موظفات ... وشوفوا نسبة الغياب بالمدارس .... !!!
ترا مو من الوزارة ..... من اولياء الامور اللي يخلون عيالهم يغيبون .... و مساكين اليهال اللي يداومون وما يلقون احد بالمدرسة و يرجعون بيوتهم .... هالشي من الام والابو ... !!
هذا والام تداوم ..... عيل لو قاعدة بالبيت .. شلون الوضع بيصير !!!
ادري ان وايد امهات قاعدين بالبيت علشان عيالهم .... و متنازلين عن اشياء وايد .... السفر - المطاعم - الشاليهات - الخدم - السيارة ... وغيره من الشغلات الثانية علشان يجابلون عيالهم وما يخلونهم بايد الخدم ....
الصراحة .... هالفئة تستاهل راتب شهري .... عالاقل بدل الغلاء اللي اقروه قبل 3 سنين لكل الموظفين ( 120 + 50 )
كنت اتمنى يقرون القانون ( بشروط معينة ) .... لكن الموضوع صعب
وبس كلام .... علشان الانتخابات و الاصوات ....
