السلام عليكم .. شلونكم يابناتي اليوم؟؟ عساكم بخير وعافيه ؟؟ يعلكم دوم بخير وعافيه .. اليوم بنطبخ مرقة الربيان وبنفس الوقت كبة الربيان .. ومرقة الربيان ماتحتاج تعب سهله وسريعه .. ويالله خلونا نبدي
بسم الله بدينا وعلى النبي صلينا .. نحتاج حق طبختنا اليوم كيلو ربيان شحامي .. شدتين كزبر .. شدتين شبنت .. 3 بصلات ولميات .. طماطتين ولميات وحمر جنهم خدودي:$ و4 فصوص ثوم جنهم مو خدودي والبهارات .. لومي سحاري قفشتين مالت حوس الشاي .. قفشه فلفل اسود .. وتخلطين قفشه متوسطه عباره عن كمون .. كركم .. هيل ناعم .. كزبر ناعم .. ونحتاج بعد 3 حبات لومي سحاري وملح طبعا وقوطي معجون وشوية دهن
اول شي نفرم الخضره كلها ونخلطها مع بعض و نقص البصل والطماط وندق الثوم .. وقبلها نغسل الربيان عدل ..اكثر من مره واخر مره نغسله بكركم وملح عشان تروح الزفره .. بعدين نركب الجدر ونحط شوية دهن ونحمس البصل اول شي وبعدين نكت فوقه الطمام مع شوية ملح عشان يذوب .. نحط الخضره وباجي البهارات ونحمسها .. لمدة 5 دقايق وبعدين نحط الثوم وفوقه الربيان .. ونخلي الحميس على نار هاديه عشان الربيان ينز الماي اللي فيه و لما يخف ماي الربيان بعدين نحط قوطي معجون ونحركه مع الحميس .. واخر شي نصب فوقه ماي حار مو وايد؟؟ لا هبابه يغطي الحميس . ونخليه على نار متوسطه لان الربيان بسرعه ينضى .. وسلامتكم وتعيشون وعليكم بالعافيه ..
طبعا مسوين المشخول وتعرفون الطريقه وماله داعي اعيدها واللي ماتعرف تسوي مشخول هذي ماتصلح حتى بالسبع المذاهب ..
وبنفس الطريقه تقريبا نقدر نسوي كبة الربيان .. بس شوي غير .. يعني نفس الخلطه مالت مرقه الربيان لكن نسويها بطريقه غير شوي والحين اقولكم الطريقه
اول شي نحتاج شدة كزبر مع بصلتين مفرومين عدل و3 فصوص ثوم مدقوقين عدل .. وكركم وفلفل اسود ولومي اسود .. على قفشه قفشه مالت الحوس .. ومثلهم ملح ..و قلاص طحين عيش خشن .. يعني تطحنين العيش خشن شوي ..
اول شي تسوين الحشو .. والحشو عباره عن, تحمسين البصل مع الكزبر والبهارات .. لما يصير لونه مشوقر .. وتخلينه على كتر .. والحين تفرمين الربيان وتخلطينه مع الطحين وشوية كركم وفلفل اسود ولومي والثوم .. وبعدين تاخذين خمطه من العييينه وتكورينها وتحشينها من الحشو وتسكرينها عدل .. وتقطينها بالمرقه .. وعلى هل طريقه .. وطبعا المرقه لازم شوي تزيدين مايها لان الكبه تشرب الماي .. وتخلينها تقلب على نار متوسطه .. لمدة ربع ساعه مو اكثر وشوي شوي تقصرين على النار .. وبعدها تنجبين وعليكم بالعافيه .. ترى شكلها راح صير مثل القبوط تقريبا مرقه خاثره وفيها الكبه ..
ملاحظات : تقدرين تحطين شبنت مع الخلطه .. وتقدرين تحطين فلفل اخضر بارد .. يعني اللي تبينه .. والملح طبعا على حسب ذوقكم .. وفي ناي يحطون كشمش اللهم ياكافي .. بس ذوقهم شنسوي بعد..
هذي طريقة مرقة الربيان وكبة الربيان .. واللي عندها ملاحظات تطرشلي على هذا
اي نسيت اقول اللي ريلها ماتعجبه الكبه تاخذ وحده بيدها وتفلعه على راسه لان صج ماعنده ذوق ولا تعطينه ويه بعدها .. وان قالج طبخيلي قوليله روح حق امك ..
شعرنا اليوم
كبة الربيان... تجعم الحنان
مع تحيات امكم العوده
دندونه
