{ ...الدكتورة رشا الصفي تجيب على استفسارتكم ..} استضافة اسبوعية

[د. رشــا الصفــي]

السلام
بنوتي عمرها تقريباً شهر و 3 أسابيع والسره عندها مو ناشفه و قالي الدكتور سليمان السعد في مستشفى رويال أطوي البامبرز علشان أخليها تنشف بس أمس لاحظت لحمة صغيرة داخل السرة لونها أحمر و خفت مادري شنو ؟
وبعد عندها تكرمين الخروج ماي و آنا أعطيها حليب سيميلاك قالي الدكتور ممتاز

وعندي ولدي عمره 3سنوات و نص و عصل وزنه 14 وأعطيه فيتامينات مستر تومي و ماكو فايده ذابحني ما ياكل

ممكن ردج دكتوره و ملاحظاتج و أكون شاكرتلج

sOkOnOnO

و عليكم السلام

بالنسبة للسرة هذه اللحمة الزايدة يسمونها

umbilical granuloma



و تكون يهالشكل

هذي اذا ما نشفت بروحها لازم تحتاج كي بارد

تودينها عند حوادث الجراحة بالمستشفى التابعة له منطقتكم و يسوونها ما تعور و لا تاخذ وقت مجرد ثواني

يحطون عليه شي مثل العود فيه مادة من فوق باردة و بس

بالنسبة للخروج اذا كميته بسيطة و البنت صحتها زينة ووزنها يزيد لا تحاتين هذي الأمعاء تفضى نفسها

تستعد للرضعة الجاية

بالنسبة للولد

وزنه بالنسبة لعمره طبيعي ما يحتاج لا مشهيات و لا فيتامينات و لا شي

 

[د. رشــا الصفــي]

مرحبا دكتوره انا ولدي الحين عمره سنه واهو توام حق اخوه انولدوا على 33اسبوع بعد ماكنت شهر بالمستشفى لانهم iugrعلى كلام الدكاتره ولدوا بقيصريه ولدي التوام الاول مافيه شي بس شوي بنيته ضعيفه بس الثاني الي انا اقصد تعرض حق شكثر مشاكل منها جرثومه بالدم الرئه فيها مشاكل بعد وبعج بالخصيه والمهم كان بالعنايه لمدة شهرين كان على تنفس صناعي واكسجين همن فيه bvl الي اثر على مخه وسببله شحنات وفيه تشنجات ياخذ عليها علاج كيبرا المشكله ان وزنه من 4شهور واقف على ال5 كيلو مو راضي يزيد علاما انه وزنه عند الولاده1.250 الولد حيل ضعيف بس الدكاتره قالو ان طوله ووزنه ومحيط راسه يمشون على خط واحد صج اقل من الطبيعي بس على خط واحد بالحسبه انا ولدي تغذيته زينه وراضعته حيل زينه مافيها مشاكل بس الولد مايقعد ولا يقلب عكس اخوه قاعد اسويله تدليك يومين بالاسبوع شسوي مع بنيته ووزنه الدكتور بالصباح صرف له سوستاجين وتو بديت معاه مع انه ياخذ ادوية حديد وفيتامين ويراجع بالعياده الخارجيه بس ماشوف اي تحسن وغير انه حيل يرجع باليوم اربع مرات وصدره كله بلغم يتعافه يوم وييرد اليوم الابعده اخذ كرتزون الاكمام بس يتعافى يرد يتعب صدره ابي حل حييييل تعبت وشرايج بالحلبه والعسل وشكراااااااااااااااااااااااااااااااااااااااااا:edbf4317b9:

فيااافي

ما يشوف شر ولدج

و الله يعينكم و ياجركم

بالنسبة حق بنيته

انتي تدرين انه عنده وايد مشاكل و هذا الي مأثر على بنيته

و بالنسبة للتدليك يومين بالأسبوع مو كافي

انتي لازم بالبيت تسوين له مرتين الى ثلاث مرات باليوم

و الترجيع مع البلغم يرحج احتمالية ان يكون عنده ارتجاع بالمريء فالحليب يشربه و يرجعه و يشرق فيه فيتكرر

عنده البلغم و الحكة

سألي دكتور ولدج عن هالإحتمال و اذا تفيد ولدج ادوية الإرتجاع

بالنسبة للعسل ما عندي فكرة

و الحلبة ممتازة للصدر و الوزن بس ما تحل المشكلة الأساسية

يعني من تتركينها ترجع نفس الحالة القديمة

 

[د. رشــا الصفــي]

دكتورة انا ولدي بين فترة و الثانيه صدره يكون تعبان و يطلع صوت أعطيه فنتولين و اتروفين و أخاف يتعود عليهم شرايج؟

أم غايب

اول شي ابي اسألج سؤال اذا ممكن

اذا ولدج كل ما صارت فيه حرارة عطيتيه أدول

هل هذا معناته ان ولدج تعود على الأدول ؟؟

و لا يكون مريض و محتاج الأدول كعلاج ؟

نفس الحالة بالنسبة لحساسية الصدر

حساسية الصدر هذا مرض مزمن الى حد ما مع اختلاف الشدة و يحتاج الفنتولين و اللأتروفينت كعلاج

ما يتعود عليهم الطفل

لا بالعكس يريحون صدره من البلغم و يحسنون مستوى الأكسجين عنده

فلا تخافين متى ما احتاجهم ولدج عطيه

بس ممكن تقولين لي كل شكثر يتعب ولدج يعني مرتين بالسنة مثلا و لا كل شهر ولا كل اسبوع ؟

و شلون نومته بالليل اذا يكح باليل ولا لأ ؟

و اذا لما يلعب يتنك صدره ؟

دخل المستشفى من قبل ولا لأ علشان الحساسية ؟

اسألأج كل هالأسئلة علشان اشوف هل حالة ولدج شديدة و لا بسيطة و اذا كان يحتاج علاج وقائي ولا ما

يحتاج

 

[د. رشــا الصفــي]

اهلين دكتورة رشا ومشكورة على تعاونج مع هذا الركن واعطاءنا كل ما يشكل علينا في أمور عيالنا أنا عندي بنت عمرها ستة اشهر ولله الحمد صحتها جيدة بس أنا ابي منج تنصحينني بافضل حليب في هذا العمر أنا الحين أعطيها حليب نفلاك رقم 1 بس احس أنه يسمن الطفل بشكل واضح لأن صدر بنتي كأنه صدر واحدة سمينة حتى أن ثدييها بارزة بعض الشيء وأنا خايفة عليها بأن هذا الحليب يسمنها بشكل غير صحي ياليت تنصحيني بكيفية تغذيتها الله يجزاكي كل خير

عاشقة السراب

هلا فيج اختي و تستاهلون اكثر

ما سوينا شي حبيبتي هذا واجبنا

بالنسبة للحليب الصناعي كل الأنواع من الولادة الى 6 شهور تحتوي على نفس السعرات الحرارية بالضبط

فما فيه واحد يمتن عن الثاني

اللي يفرق بالنسبة لوزن الطفل هو

الكمية المعطاة للطفل

عدد رضعات الليل

الأكل

غالبا الأمهات يحبون يتبعون التعليمات اللي مكتوبة على علبه الحليب من ناحية الكمية المعطاة للطفل

بالرضعة الوحدة

بصراحة من اللي اشوفه بالأطفال هالكميات تعتبر كميات كبيرة و كثيرة على الطفل بهالعمر علشان جذي

يمتن الياهل

و الشي الثاني كلما زادت رضعات الليل ( اللي ياخذها البيبي و هو نايم ) كلما سمن أكثر

و الأكل يحتاج الطفل بو 6 شهور الى وجبة وحدة او 2 بالكثير باليوم و تقللين عدد رضعات الحليب حسب

يعني

اذا الطفل كان يشرب 6 رضعات باليوم قبل ما ياكل

لما ياكل وجبة كاملة و اعيد كاملة باليوم نخلي رضعاته 5 بدل 6

و اذا يحب يرضع بعد الوجبة تكون نص الرضعة او عصير او ماي

هذا بالنسبة للطفل اللي وزنه زايد شوي

بس الطفل الضعيف لا بالعكس ما نقلل عدد الرضعات ولا الكمية






و الحليب الحين لازم تعطينها نوفولاك 2 او اييي حليب حق بعد 6 شهور

ما فيه نوع افضل من نوع

كل طفل و اللي يتقبله

 

[د. رشــا الصفــي]

دكتوره انا عندي بنت عمرها 6ونص تشتكي من المغص صارلها 3 اسابيع
وديتها الطبيب 3مرات وعطونيtheraprim/hyopan
وبعدينhyopan/suprazol
والمره الاولى Hyopanمع دوا ثاني
بصراحه بنتي زهقت من الادويه اذا تركت الدوا رجع المغص

SARA_912

غالبا يكون الامساك هو سبب المغص المزمن في اغلب الحالات خصوصا بالعمر هذا

طبعا البنت تروح الحمام بروحها

و ما تعرف اذا تسألينها اذا فيها امساك ولا لأ

اللي ابيج تسوينه الحين

تحاولين تخلينها تدخل الحمام بنفس الوقت كل يوم و يفضل بعد الريوق بربع ساعة تقريبا

و ما يكون ازعاج يمها

القصد انها تاخذ ارحتها

و تخلينها بالحمام لما يطلع بطنها

اذا ما ضبطت من اول يوم حاولي كل يوم نفس الوقت لما جسمها يتعود

و خليها تاكل الياف وايد

مثل الفواكه و الخضار و التبولة و النفيش

مجرد ما يتنظم بطنها راح يروح عنها المغص بإذن الله

و اذا استمر معاها و قام يصحيها من النوم و بدا يأثر على شهيتها و ديها المستشفى يسوون لها تحاليل دم

و بول تكرمين و اشعة للبطن

و ما تشوف شر

 

[د. رشــا الصفــي]

دكتوره ولدى بعد اسبوعين يتم 6 شهور..

حليبه سيميلاك ادفانس..ومو قاعد يزيد عليه..من شهرين واقف وزنه على 6 كيلو..

طبعا هالحليب يتغير بعد الست شهور..شنو نوع الحليب اللى تنصحينى فيه؟؟ والا اكمل على السيميلاك 2...؟؟؟

وهو من ولادته ماتعرض للشمس..اول الشهور ولادته كانت بالشتا..وتالى فتره الاعتدال كان صدره تعبان وكل ماطاب انتكس..والحين عجاج والاجواء ماتساعد على القعده بالحوش..وشقتى للأسف ماتحوشها الشمس..تنصحينى اجيبله فيتامين د من الصيدليه؟؟

وفى هالعمر عادى اعطيه مجموعة فيتامينات؟؟وشنو النوع اللى تنصحينى فيه؟؟وجم مره باليوم؟؟

وشاكرتلج تعبج معانا..

سما الكويت,,,

بالنسبة للحليب تقدري اذا مو مرتاحة من سيميلاك تعطينه اي نوع حليب رقم 2 اللي بعد 6 شهور

مثل نان 2 او ابتاميل 2 او بيبيلاك 2 او نوفولاك 2

وايد فيه انواع حسب ولدج شنو يقبل و يمشي معاه

بالنسبة للشمس ليش ما تطلعين الولد عادي مو زينه القعدة بالبيت وايد له

طلعيه بالوقت اللي ما يكون فيه غبار

و بالنسبة حق فيتامين د لازم تتأكدين اول من الطبيب هل يحتاج و لا لأ لآنه اذا مو محتاج الولد يسببله

مشاكل بالكلى

و الفيتامينات هم مالها داعي وكليه عادي خضار و فواكه و ما عليه الا العافية

 

[د. رشــا الصفــي]

السلام عليكم بنتي عمرها 7سنوات من قبل 4سنوات تشعر بخوف ومع سنين يزيد معها تحس بن احديركض وراءه ماتقعد بروحها ابدا هي اصغر عيالي من بعد 5صبيان ارجوا المساعده من بعد الله

آآم شهد

في اطفال يكونون خوافين اكثر من الطبيعي

شوفي يمكن احد من اخوانها مخرعها من شي

و لا صاير لها موقف خرعها

ولا تخيلت شي يوم و بنت عليه افتراضات و خافت منها

قعدي معاها و سولفي معاها يمكن تقول لج

و عقبها حاولي تقنعينها انه ماكو سبب لهالخوف

 

[د. رشــا الصفــي]

دكتورة ولدي عمرة سنه و شهر بس من الخدج مولود بالسابع 000 ما يمشي ليلحين و لا يقعد و مو متوازن شوي

هل في مشكلة بالعضام معني اعطيه كالسيوم 3 مرات باليوم كتقوية لهو اعطيه حليب سميلاك

صغيرة على الحب

اذا ما فيه نقص كالسيوم ما يحتاج

الكالسيوم بروحه ما ينفع

لازم معاه فيتامين د

و اثنينهم ينعطون تحت اشراف طبي علشان ما يصير للطفل مشاكل

بالنسبة لمشي و القعدة راجعي فيه طبيب اطفال يفحصه و يشوف هل هذا مجرد تأخر عادي علشان الخدج

ولا في شي ثاني

 

[د. رشــا الصفــي]

سُبْحَانَكَ اللَّهُمَّ وَبِحَمْدِكَ ، أَشْهَدُ أَنْ لا إِلهَ إِلَّا أَنْتَ أَسْتَغْفِرُكَ وَأَتْوبُ إِلَيْكَ

جمعة مباركة

ولا تنسون قراءة سورة الكهف

 

[فرنسا]

مرحبا دكتورة مشكورة على جهودج المبذولة
عند حالتين الاولي ولدي عمرة10 سنوات اكلة زين بس مو قاعد يزيد وزنة من سنة وطولة متوسط وبالفترة الاخيرة مايشتهي اكل البيت ابي فيتامين يزيد من الطول لان دايما يقارن نفسة بربعة انة قصير او افضل وصفة طبيعية
وبالنسبة لولدي الثاني عمرة 3ونص فاقد الشهية ولايحب ياكل وسويت لة تحليل دم طلع معاة انيميا وعطاني المستوصف حديد لمدة شهر بس اهو وايد ظعيف وقير مع ان يوم ينولد طولة 51 بس مو لاقية حل كلش ماياكل لابترغيب ولابتهديد
وسامحيني عالاطالة ومشكورة

 

[نماين]

مرحبا
شخبارك الدكتورة

انا عندي بنتي عمرها شهر ونص من اسبوعين جتها كحة ونشلة يعني يطلع صوت من خشمها كنه مسكر
وديتها الطبيب و قال نزلة برد وعطاني لها مضاد حيوي الي كرتونته صفرا بابيض وقطرة للانف ودوا للسعال و البلغم وقال بعد يومين اشوفها

ووديتها له بعد يومين ولما شافها قال استمروا على العلاج واشوفها بعد ثلاث ايام

ووديتها بعد الثلاث ايام ولما فحصها قال خلاص اهيا تمت خمس ايام على المضاد

والحين هي الحمدلله بخير اقطعوا الادوية وعطانا دوا بونيسان من شركة هيمالايا لما قلتله عن البكي الي تبكيه وقال يمكن مغص او غازات

بس لما ردينا البيت بنفس اليوم حسيت الكحة فيها وانها ما راحت بس خفت شوووي والنشلة بعد بس خفت شوي

ورديتها له مرة ثانية بعد ثلاث ايام فقال انتوا يمكن التكييف بارد مع انه والله مو بارد وعطاها دوا بروسبان 5 نقط ثلاث مرات باليوم

وقال اشوفها بعد 5 ايام يعني بكرة

المهم احس انه الكحة زادت بعد هالدوا خاصة عقب ما تشرب الحليب وفي صوت بلغم مع الكحة بس

اهي مو عارفة تطلعه

فبشنو تنصحيني والله كاسرة خاطري هالبنت على صغرها وكل هالادوية ووزنها ما كمل 4 كيلو واحاول قد ما اقدر اوفرلها جو مناسب وانا خايفة ما يصير عندها مناعة بسبب الادوية

 

[أم غايب]

أم غايب

اول شي ابي اسألج سؤال اذا ممكن

اذا ولدج كل ما صارت فيه حرارة عطيتيه أدول

هل هذا معناته ان ولدج تعود على الأدول ؟؟

و لا يكون مريض و محتاج الأدول كعلاج ؟

نفس الحالة بالنسبة لحساسية الصدر

حساسية الصدر هذا مرض مزمن الى حد ما مع اختلاف الشدة و يحتاج الفنتولين و اللأتروفينت كعلاج

ما يتعود عليهم الطفل

لا بالعكس يريحون صدره من البلغم و يحسنون مستوى الأكسجين عنده

فلا تخافين متى ما احتاجهم ولدج عطيه

بس ممكن تقولين لي كل شكثر يتعب ولدج يعني مرتين بالسنة مثلا و لا كل شهر ولا كل اسبوع ؟
يعني هو من يبته عطيته على فترات لمدة اسبوع و هو عمره 11شهر وألحين صدره في بلغم بس لمه وديته الدكتور قال بس يحتاج ديلانيل و دكسول شراب
و شلون نومته بالليل اذا يكح باليل ولا لأ ؟
لا ما يكح بس ما يطول بالنومه
و اذا لما يلعب يتنك صدره ؟
لأ
دخل المستشفى من قبل ولا لأ علشان الحساسية ؟
لأ
اسألأج كل هالأسئلة علشان اشوف هل حالة ولدج شديدة و لا بسيطة و اذا كان يحتاج علاج وقائي ولا ما

يحتاج

مشكورة دكتورة عالنصيحة

 

[blue sky]

يعطيج العافيه دكتوره..........
دكتوره بغيت اسال انا اعطي ولدي حليب نان اش اية (منخفض التحسس) كتبه لي الدكتور لانه طلعتله حبوب خفيفه بجسمه لما كنت اعطيه نوفيلاك فصارله الحين تقريبا شهر واسبوعين وانا اعطيه النان فهل اتم على الاش ايه ولا اهوا فتره وارجع اعطيه نان العادي ...ولدي عمره 3 شهور ؟؟
وبغيت اسألج الرضعه شكثر اقدر اخليهااا لانه واايد اي وقت على ما اسوي الرضعه الا اهوا نايم فتبرد واكتهاا فيسير اشربه ياها واهي بارده ولاتضر ؟؟

ومشكووره واسفه اثا ثقلت عليج بالاسئله ...

 

[SweeTa_4ever]

مرحبا دكتوره رشا شلونج؟؟

ولدي عمره شهرين بالضبط ارضعه حليب صناعي لانه بالبدايه حليبي قليل حبيت اعرف ابهالعمر جم رقم اعطي وكل جم ساعه اعطي حليب؟؟

انتي تقولين نعطي البيبي من 3 اشهر منقوع التمر انا اعطي ولدي ابهالعمر هل في مضر لانه اكتشفت يريح بطنه؟؟

وسؤال ثاني ولدي يخرج باليوم مره وحده او كل يومين مره ويكون خروجه اشوي اسهال هل طبيعي ؟؟

ولج جزيل الشكر

 

[love love]

دكتورة بغيت اسئلج
بنتي عمرها شهر و3 اسابيع
من يبتها واهي تتنفس بصعوبه وبصدرها خرخشه حتى الرضعه ماتشربها عدل احسها تختنق وديتها اكثر من مره مره يقولون نشله وعطوها قطرة للخشم واستمر معاها بعدين قالو بلغم بعدين قالولي صدرها متنق عليها ولازم كمام واستمريت عليه ولمه وديتها اخر مره قالي الدكتور ماتحتاج كمام
بس ليلحين ماتتنفس عدل وصوت خرخشه وااايد بصدرها

شتنصحيني فييه؟؟

وشي ثاني تحت منطقه الحفاظ حبب عندها وصار احمر وبعد فتره اشوي تقشر مع اني احافظ على نظافة المكان وايد وادهنها بكريم

ومشكوورة

 

[SARA_912]

جزاك الله خير دكتوره
مشكوره على استشاراتك
وعسى الله يوفقك

 

[sanfoora]

السلااااااااااام عليكم أختي الدكتوووورة شلونج أن شاء الله بخير 0((

أنا ولدي عمرة سنة و3 شهور مشكلتة أن من كنت حامل فية بالشهر الخامس قالت لي دكتورة السونار أن البيبي داخل بطنه (وحش) ههههه أضحك طبعا قالت فية ماي وبعد ماولدتة قلت لهم ماتسووون غسيل حق معدتة قالووو لأ هو يرووووحه يروووح وبعد 3 شهور من ولادتة صارت فية سخونة وبطنه صار شكلها مو طبيعي حيييييل متفووووخ وصار مايتقبل الحليب سيميلاك ادفانس طبعا تخيلي ! دخلوووة المستشفى علشان شكل بطنة مو السخونة وتحااالييل وأبر وحاااالتنا حااالة حولوه ابن سينا قالو مافية شي مايحتاج جراحة وبعدها حولوووة حق الأميري وسووولة جميع أنواع الأشعة ومنظار من فوق ومن تحت وأخر شي قااالوووووو !!! أن البرووتين يقل من جسمة ويتجمع مااااي فتنتفخ البطن وهذا عيب خلقي من الله ونعم بالله 00

بس القصة ومافيها ان كل 3 شهوور لازم أسوي تحاااليل علشاان مراااجعتة ويتنوم بالمستشفى علشااان قل البروتين فيعطووونة بروتين بالوريد ونرجع البيت 000 وعندي مرااااجعة بتاريخ 2008/7/3 !!

بشنوو تنصحييينيي يااا دكتووورة والله تعبت ومااافيني حيييل وهذا أول مولووود لي وأنا عمري20 وكان أخر اقتراح لي أودية برة أعااالجة _000

واللة يعطيييج العاااافية * وأرجووو الرد بسررررعة ؟

 

[نور الحب]

نورتي المنتدى دكتورة

حبيبتي بغيت اسألج جم سؤال لاني ام يديدة

بنتي بعد جم يوم تكمل ال4 اشهر ووزنها 4.95
انا رحت الطبيب والدكتور قالي وزنها طبيعي وراواني المخطط وكانت اقل شي بالطبيعي
والكل يقولي ضعيفه وحليبج مايشبعها ..... انا ارضعها طبيعي والحمدالله احس ان حليبي يشبعها
جم الوزن اللي لازم تكون فيه
بس ودي بشي يزيد وزنها بشنو تنصحيني


وابي اعرف متى اقدر اقعدها واهيا مسنوده بشي ... امي تقولي اهيا ضعيفه نطري عليها

والبييبي متى يقعد من نفسه ابي اعرف مراحل نمو البيبي
متى يقعد متى يحبي متى يقول ماما .... الخ

وانا ولدت بدار الشفا واول ماولدت طبعا فحصو ريولها والحمدالله ماكان فيها شي هل لازم افحصها مره ثانيه عشان اتاكد انه مافيها خلع
واتمنى ماكون طولت عليج :tek:

 

[د. رشــا الصفــي]

مرحبا دكتورة مشكورة على جهودج المبذولة
عند حالتين الاولي ولدي عمرة10 سنوات اكلة زين بس مو قاعد يزيد وزنة من سنة وطولة متوسط وبالفترة الاخيرة مايشتهي اكل البيت ابي فيتامين يزيد من الطول لان دايما يقارن نفسة بربعة انة قصير او افضل وصفة طبيعية
وبالنسبة لولدي الثاني عمرة 3ونص فاقد الشهية ولايحب ياكل وسويت لة تحليل دم طلع معاة انيميا وعطاني المستوصف حديد لمدة شهر بس اهو وايد ظعيف وقير مع ان يوم ينولد طولة 51 بس مو لاقية حل كلش ماياكل لابترغيب ولابتهديد
وسامحيني عالاطالة ومشكورة

فرنسا

اول شي ماكو فيتامين يزيد الطول

بعدين ممكن اعرف جم طول الولد ووزنه بالضبط علشان اقول لج طبيعي ولا لأ

و بالنسبة للصغير الحديد شهر مو كافي

اقل شي 3 شهور

و عقب ينعاد التحليلفيه اطفال يحتاجون مدة اطول من العلاج بالحديد

و مرة ثانية مكن وزنه و طوله ؟

 

[د. رشــا الصفــي]

مرحبا
شخبارك الدكتورة

انا عندي بنتي عمرها شهر ونص من اسبوعين جتها كحة ونشلة يعني يطلع صوت من خشمها كنه مسكر
وديتها الطبيب و قال نزلة برد وعطاني لها مضاد حيوي الي كرتونته صفرا بابيض وقطرة للانف ودوا للسعال و البلغم وقال بعد يومين اشوفها

ووديتها له بعد يومين ولما شافها قال استمروا على العلاج واشوفها بعد ثلاث ايام

ووديتها بعد الثلاث ايام ولما فحصها قال خلاص اهيا تمت خمس ايام على المضاد

والحين هي الحمدلله بخير اقطعوا الادوية وعطانا دوا بونيسان من شركة هيمالايا لما قلتله عن البكي الي تبكيه وقال يمكن مغص او غازات

بس لما ردينا البيت بنفس اليوم حسيت الكحة فيها وانها ما راحت بس خفت شوووي والنشلة بعد بس خفت شوي

ورديتها له مرة ثانية بعد ثلاث ايام فقال انتوا يمكن التكييف بارد مع انه والله مو بارد وعطاها دوا بروسبان 5 نقط ثلاث مرات باليوم

وقال اشوفها بعد 5 ايام يعني بكرة

المهم احس انه الكحة زادت بعد هالدوا خاصة عقب ما تشرب الحليب وفي صوت بلغم مع الكحة بس

اهي مو عارفة تطلعه

فبشنو تنصحيني والله كاسرة خاطري هالبنت على صغرها وكل هالادوية ووزنها ما كمل 4 كيلو واحاول قد ما اقدر اوفرلها جو مناسب وانا خايفة ما يصير عندها مناعة بسبب الادوية

نماين

ما تشوف شر بنتج
الكحة شوي تاخذ وقت لما تروح بروحها
اذا البنت ما عليها حرارة ما كو خوف
و الصوت اللي يطلع بعد الرضعة هذا طبيعي يصير بعد الرضعة الحليب جنه صوت بلغم

و المناعة ما تضعف بالطريقة الي الناس متصورتها من الأدوية
اذا محتاجة الدوا عطيها لا تخافين

احيانا يكون الصوت من الأنف مسكر بس و الأم تحس ان الصوت من الصدر
اذا تبين تتأكدين وديها طبيب أطفال يسمع صدرها و يتأكد