الفزعة يا خبيرات استراليا

[fat]

السلام عليكم

حابة اسافر استراليا الي عندها اي معلومة ياليت اتفيدني واكون شاكرتها

 

[fat]

وينكم يا بنات اشدعوة ولا وحدة ردت

 

[الذهب والألماس]

مرحباااا موفقين خير انشالله ويسر لكم اموركم
انا الصيف اللي طاف رحت استراليا بس جولد جوست صراحة عجيييييييبة صج قارةالاحلام واذا رحتي انشالله انصحج تروحين على طول مركز اللاوند مكتب سياحي للعرب تلقينه بالسيرفس بردايس بفندق الهولدي ان مقابل فندق الشيفرون كلهم عرب وثقة حيل وانا توقعت انهم بينصبونا بس طلعت اسعارهم ارخص م المكاتب اللي برة واحلى مافيهم مواعيدهم مضبوطة واذا رحتي انشالله روحي كل مكان لا تخلين شي وانصحج بفندق كورت يارد ماريوت موقعه حلو واسعاره زينه

 

[lilo-y]

خلني افيدج
انا رحت لاستراليا سنة 2004 و 2005 وودي لو مكلمة لي 2010
وناسة حدة مثل ماقالت (الذهب والالماس) عن مكتب الاوند في جولد كوست حجزي كل الرحلات واذكر انه حجزنا عنده رحلة يودونج مزرعة وتستانسون مناك يطبخون لكم بعد ما تقوليلهم انه تبين الاكل حلال واليهال يطشون بالزرع وناسة
والبردايس لاصار بليل شوف الخليجين والكويتيين مناك بالكافيهات ولا يطوفج شورما علي بابا

واذا ناوية على سدني عجيبة بس المنطقة حق مزاج رايق على قولتهم بدون يهال وهذا تعال مني وانته تعال هناك انصحج بفندق ماادري للحين بمستواه ولا لا مدينا جراند كان عجيييب
بس استراليا ماتنتطوف

 

[lilo-y]

اي ونسيت لا اقولج لا تاخذين اكل معاكم ترى كله غير مسموح فيه
ولا تسوين سواتنا وتقولين باخذ حب قروضات على قولة ام البنات ترى كله مايدخلونة

 

[بحرينية حنونة]

والله تبين الصج انه رحت استراليا بس توقعتها وايد احلى من جذي واستراليا بين قوسين مملة يعني سدني وايد حلوه حق تمشي يعني سدني يبي لها 3 اياك بالكثير والجولد كوست رحنا لها 10 ايام بس مارحنا الاا 3 اماكن سياحية مافيها شي وتخرع شوي

سدني مثل لندن والجولد كوست مثل امريكا بس سدني الساعة 6 المغرب كل من نايم ومافي احد في الشوارع غير القطاوه ههههههههه

 

[fat]

ماقصرتو يا الغاليات

 

[fat]

ابي اروح شلالات وطبيعة حلوة واركب تلي فريك وين في اي منطقة وتنصحوني برحلة بلوماوتن في سدني في بنات يمدحونها وغيرهم موعاجبتهم

وانا محتارة واي احسن المجمعات حلوة وفيها اشياء غريبة احب الغريب والفتنك بكل شي في اللبس واكسسوارات البيت من وين احصل علىيم لان الكل يقول مجمعاتهم موشي وغالية انتو اشرايكم نوروني

 

[أم@الحلوين]

عندج منتدى العرب المسافرين وايد راح يفيدج

 

[fat]

مشكوووورة أم الحلوين

 

[n-h-m]

الله يكتبها لي

 

[الذهب والألماس]

شوفي حبيبتي انا ما اوافق اللي قالت استراليا مملة مستحيل حدها عجييييييبة وما انصحج بسدني لانها ما فيها غير رحلتين سياحيتين والديرة بعيدة يعني ماتسوى تروحين اكثر من منطقة لان تعب عليج روحي بس جولد كوست وردي لانها تغنيج عن كل المناطق وفيها كل الرحلات السياحية مثل رحلة(4wheel drive),وهذي رحلة بسيارة الدفع الرباعي تصعدون جبال وتوفقون باكثر من محطة فيها الشلالات والمزرعة زكل شي لا تطوفج
وبعد رحلة البقيات تروحون مجموعة مع القايد مغامرة تعبرون جبال وانهار وانتم بالبقي روعة هذا غير السي وورلد والموفي والدريم وورلد ورحلة جزيرة ماك لارنس

 

[البدر خ]

اصحج وبقوه تروحين منتجع تنغلوما تطلعين لها من برزب بيخت نص ساعه بصراحه كلمة روعه شويه عليها بالليل تدشين البحر توكلون الدلافين,وفيه بقيات ,وفيه هليكبتر تشوفين منظر الجزيره من فوق .الجزيره ساحره ونظيفه حيل وهذا السايت مالها
http://www.tangalooma.com/info/home/

 

[البدر خ]

اقصد برزبن

 

[fat]

مشششششششششششششششششششششششششششششششكورين

 

[^^ام ميمي^^]

اشتراليا خيااااااااااااااال رحت لها قبل 3 سنوات و كنت اتمنى اروح لها مره ثانية بس ربي ماكتبها وان شاء الله انطر ميمي تكبر واوديها اتشوفها ,,,,

بالنسبة حق استراليا اولا اللي يقولج لا تروحين سيدني غلطانين (( انا ما رحت سيدني وتحسفت )) لان انتي اطبين سيدني اول شيء تقعدين بالمطار 50 دقيقة تقريبا و عقب تركبين طيارة مره ثانيه وتروحين جولد كوست الطريج بعد تقريبا ساعة يعني تستقلين انج طبيتي فيها وتقعدين فيها على الاقل 3 ايام احسن لان سيدني طبيعة شلالات و جبال و وثلج خفييييييييييييف ومطر اما جولد كوست دافيه مايلة الى البروده بليل يعني مثلا انا وزوجي كنا نلبس صيفي و ناخذ معانه جاكيتات من اتصير الساعه 5 تقريبا يعني بتظلم الدنيا استبردنا ولبسنا الجاكيتات .

برنامج رحلتي كنت رايحة >>> كويت / بانكوك ( يومين ) / جولد كوست ( 19 يوم ) / بانكوك ( 3 ايام ) / كويت .

اولا مارحت مع قروب بس حجزت بالكويت السكن و التذاكر حجزت من سفريات المستقبل .

نصيحة : خلي توقيتج لما اطبين استراليا يكون بالنهار احسن وافضل .

السوق انا تسوقت ببانكوك ( تايلاند ) لان سوقهم ارخص وكل شيء فيه

وخذيت حق نفسي من سوق استراليا جم شيء وتلقين باستراليا شغلات رخيصة بعد بس تكون صناعة صينيه

السكن انا ماحبيت فكرة الفنادق اخذت شقق فندقيه والصراحة ماتحسفت لان الشقة اولا ارخص و كل شيء متوفر فيها من غساله اوتوماتيك و اوتي و جولة ومايكرويف و فرن و غسالة مواعين و ثلاجة و دفاية

الفندق ( امبريال سيرف ) تقريبا ربع ساعه تمشين الى السنتر اهوا صج بعيد بس الشغلات المتوفره فيه تغنيني الصراحة عن كل شيء وبعد انا اكثر شيء رحلات و المواصلات تاخنا من الفندق بالرحله واذا ردينا نقوله يقطنا بالسنتر نتمشى و نقعد بالقهاوي و عقب انرد الفندق .
وهالفندق جدا امن يعني ما اتصير الساعه 9 الا وقافلين عليكم باب الفندق الرئيسي ومو اي احد يدشه الا سكان الفندق و الحلو فيه تقدرين تكلمين الريسبشن تاخذين الحمام سباحة شخصي لج بروحج انتي وزوجج او عيالج و يتصكر عليج وحمامهم مو مكشوف لان برد و فيه تدفئة داخل .

احنا طبينا جولد كوست الساعه 12 بليل نمنا و ثاني يوم من الساعه 6 الصبح قاعدين تقولين مو شايفين خير

نزلنا وتريقنا بسابوي وعقب تمشينا نستكشف المدينة على راحتنا ورحنا مكتب لاوند عند الهوليدي ان واللي يشتغلون فيه عرب وصاحبه لبناني وفيه بعد بقاله يبيعون كل شيء حلال لحم ودجاج و همبرجر و نقانق و نجتس .. الخ ومعلبات وعيش يعني جمعية عربية مصغره

صج اسعارهم اشوي غاليه بس تسوى لان بعض المرات تكونين رادة من رحله بليل ومالج خلق تنزلين السنتر وانا اكثر شيء نفعني الخبز والجبن .
وفيه مجمع بالسنتر فيه هارد روك بالمجمع نفسه بالسرداب جمعيه بعد اسعارها حلوه ورخيصة .

العرب طبعا ما اتشوفين الا على الساعه 6 مبسطين عند القهاوي ومايتحركون تقولين مافي بديرتهم قهاوي .


انا طريقتي احب بالسفر اغير اقعد من الصبح اروح اتمشى بهالجو الحلو و اروح رحلات وارد من الرحله اريح اشوي عقب انزل السنتر اتعشى وارد

بالنسبة للرحلات تحجزين عند مكتب لاوند كل شيء من الى حتى اخذي رقمهم اي وقت توهقتي والا شيء ادقين عليهم ويجاوبون عليج بكل شيء او ماحصلتي تاكسي يطرشون لج تاكسي .

حجزت عندهم الرحلات كالتالي :

سيي وورلد ( عالم البحار ) فيه عروض للحيوانات البحرية وفيه اشوية العاب وفيه هيليكوبتر تقدرين اذا خلصتي من الرحله تحجزينه هذا بروح مو من ضمن الرحله بس لان موقعه يم عالم البحار . حلوه وممتعه بس انا يومها اشوي زهقت لان رايحة مثل هالسوالف وايد بالسفر

دريم وورلد ( عالم الاحلام ) العاب مثل المدينة الترفيهيه بس مصغر لان مو وايد العابهم وماعجبتني الرحله حسيتها اكثر من عادية

موفيي وورلد ( عالم الافلام ) حلووو وعجيييب تلقين اكثر من عرض يبدون ورا بعض ومكانه عجيب و ديكوراتهم حلوه للتصوير وتووووووونس.

ووووووووووووووووووو <<< ناسيه قاعده تتذكر


رحله العمر انا اسميها الله الله رحلة المعاريس

حجزت عندهم بالمكتب قارب لج انتي وزوجج بروحكم يكون قارب صغير والريال اللي يسوق القارب << حلوه يسوق بره وما اتشوفينه ولا يشوفج ويفتر فيج بجولد كوست كلها على الراحة تقريبا مدتها ساعتين ومعاها وجبة عشا و شمووع وموسيقى هادية .

وفيه باخره تحجزينها يكون فيها وجبة العشا بس تكون مع ناس وايد مو فرديه حلوه بعد وايد بس للاسف كل وحده ترقص سلوو مع زوجها الا انا ريلي يقول اذا قمت اعرجبج

ورحلة زنقارا هذا عرض وايد حلو وممتع ولج عليه يعني ااذا انتي وحده غيورة انصحج باخر عرض تسحبين ريلج وتنحاشين اوتقوليله تعبانة برد لان اخر شيء يطلعون الحريم لابسين بس قطعتين و الاجساااام اااااااااااااخ على الاجسام .

فيه مطعم دراكولا بعد حلو وشيء غريب يعني كل شيء عندهم يخرع بطريقة التقديم من اثاث الى الاكل مثلا العصير تشريبة لونة لون الدم وبابرة و الوجبة يحطونها لج مثل شكل تابوت .... الخ


رحلة بريه ناسية اسمها البرادايس شيء مادري شنو المهم انها مثل حديقة الحيوانات وعروض بعد عقب وجبة الغدا وتكون حلال بعد .


وفي عندج بعد بالسنتر هالاشياء تحجزينهم بنفسج مثلا البولينغ و القيمز و بعد ناسية اسمه مثل مكان كله قزاز و حلو ماتدرين انتي وين تروحين ووين تمشين دشينا انا وزوجي مرتين من كثر ما اهوا يشوق .

وفيه بعد صدق او لا تصدق حلو مدته تقريبا نص ساعه او اقل وبنفس الوقت اتحجزينهم

انا كنت بحجزهم من المكتب وانصحوني قالو هالاشياء ما يحتاج لان موجوده تحت ومافيها صعوبة .

ورحت سوق الاحد مالهم نصيحة لا اتروحيله لان لوعة الاشياء اللي عند ابو امية عندنا يبعيونهم تقريبا بنص دينار


وبعد شيء تامرين فيه قوليلي وانا ان شاء الله ماراح اقصر معاج باللي اعرفة .

 

[شانييل]

حلوة أستراليا بس لا تطولين بجولد كوست حدج فيها أسبوع
وسيدني عالم خرافي تحسين صج إنج بدولة من دول العالم الأول والمتقدمة واااااااااااااااي رهيبة
الاماكن مثل ماقالتلج الإخت توهة
ولا تطوفين رحلة للمزرعة فيها عرض لأنواع الخرفان الاسترالية وطلعوا ما ييبولنا إلا أردى نوع, لا ويشولولكم من هاللحم العجييييييييييييييييييب
ويسوون عروض بالخيول وتشربون الشاي العجيب والكيك الي ينن على هالمركب
وتروحون جزيرة في رحلة ويركبونكم القوارب السريعة والمناطيد علما توصلون للجزيرة لا وتشوفون الضب الاسترالي الي أصغر من التمساح بشوي يتمشى عااااااااادي
والكناغر تتمش عااااادي
تينن هالرحلة
ويودونكم بالجهة الثانية عل الجيبات مالت سفاري للجهة الثاني من الجزيرة تشوفين المحيط الهادي
ورمال هالبحر جنها الأماس من كثر ما تبرق وتلمع والله العظيم شي عجيب
وفي رحلة متابعة الأحوات جمع حوت
هذي ما رحنالها للأسف
في بجولد كوست لعبة عجيبة تدشين فيها ما تشوفين فيها أحد عاااااااااااااالم غريب
الأرض تتحرك وتدور وكله خيال علمي
وهمن في ألعاب بجولد كوست بالممرات والمحلات لا تطوفج
أما مطعم دراكولا ترى فيه عرض وصخ وكلام ما ينقال لا يروح معاكم أحد يفهم إنجليزي هههههههههه راح تتفشلين

 

[fat]

مشكورة ام ميمي ومشكورة شانيل على معلوماتكم الحلوة

 

[fat]

ياليت يا حلوين تقولون لي سعر التذاكر الرحلات وتكون الرحلة مع وجبة ومواصلات لا تبخلون عليي بالمعلوماتكم القيمة بكل المدن سواء سدني او جولد كوست

 

[fat]

تكلمنا عن الرحلات بس نسينا اهم شي وحابه تفيدوني لان رفيجتي توها رادة من ماليزيا وتوهجت في فيزتها عندها رصيد وما تقدر تسحب شنو اودي معاي كي نت ووين بنك بيت التمويل وين يصير في سدني وجولد كوست وشلون على مواعيد الصلاة اشلون اعرف


وفي الفندق سهم يعلمج وين الجبلة ومن وين اشتري كرت للموبايل وعندهم بطاقة التوقير يعني انا سامعة في بطاقة تشترينها وتصير للتاكسي والملاهي والمطاعم


يعني كل شخص يشتري بطاقة وبس ما يحجز للملاهي ولا للتاكسي وهذي بطاقة vip مادري في هل بطاقة في استراليا





يقولون تنباع في مكتب بالمطار شسم المكتب الي تعرف تقولنا ومنها الكل يستفيد وياليت كل وحدة عندها اي معلومة تقول وتفيد الكل يزاكم الله خير